"أنا دبش جداً .."
"لا دا انا بقي بقصف جبهات مقولكيش .."
"لا خلبالك انا لساني اطول مني ومحدش يعرف يتكلم معايا "
"الدبش اسلوب حياة "
وغيره وغيره اللي بنفتخر بيه كوننا بنقول كلام يكسف الناس ويحرجهم ونتريق عليهم ، او اي نوع من انواع الدبش او التريقة ..
وفي الفترة الحالية كلنا بقينا نتعلم قصف الجبهات والتريقة ع الناس وبقينا نتعلم اصلاً نبقي دبش لمجرد انه نزل كام بوست ع الفيس بيشكر بهزار في الدبش والناس دي ..
مع انه احنا برضو اول ناس بنعاني وبنتضايق ويومنا بيبوظ لما حد 'يقصف جبهتنا مثلاً ' او حد يحرجنا بالكلام وغيره ..
طبعاً في الحديث اللي كلنا بقينا نردده وحافظين بس مش بنطبق وهو 'الكلمة الطيبة صدقة '
نتخيل بس شوية انه لما ماما تحط الاكل لينا ونقولها تسلم ايديك يا ماما ، دي المكرونة حلوة اوى النهاردة او مثلاً دا الكفتة احلي من كل مرة هيحصل ايه ؟
اقولك هيحصل ايه .. مامتك اللي جت من الشغل الساعة ٢الضهر ووقفت مستريحتش من الشغل ووقفت تطبخلنا بسرعة عشان تحضرلنا الغدا بسرعة ووقفت كذا ساعة في حر المطبخ اللي بنتخنق احنا لو دخلناه نص ساعة كاملة ، مامتك هتنسي كل تعبها في اللحظة اللي انت او انتي هتقوللها كدا وهتلاقي الابتسامة ظهرت ع وشها كدا وهتحب تعبها اللي بيفرحك ..
والاهم بقي ان دي اتحسبتلك صدقة عند ربنا ، يعني بس كام كلمة كدا قولتيهم في اقل من دقيقة حصل بيهم ايه 💙💪
غير كدا بقي سيدنا النبي صلي الله عليُه وسلم قال :" إن العبد ليتكلم بالكلمة من رضوان الله ، لا يُلقي لها بالاً، يرفعه الله بها درجات ، وإن العبد ليتكلم بالكلمة من سخط الله ، لا يُلقي لها بالاً ، يهوى بها في جهنم. " صدقت يا سيدي يا حبيبي يا رسول الله🌸
معني الحديث دا ايه ؟؟
معناه إن الكلمة اللي بيتكلم بيها الإنسان إما كلمة طيبة بيفضل اثرها موجود ليوم القيامة وهتفضل نافعة لصاحبها ونافعة للمجتمع الاسلامي ، وربنا سبحانه وتعالي شبّه الكلمة الطيبة بالحاجة اللي بتجمع كل النفع اللي مبينقطعش اثره ولا فضله ..
وإما الكلمة دي تكون كلمة خبيثة وماكرة بتؤدي للفتن والحروب وبتقطع الوصل بين المجتمع او الاسرة ..
وربنا سبحانه وتعالي قال في كتابه العزيز" ألم تر كيف ضرب الله مثلاً كلمة طيبة كشجرة طيبة أصلها ثابت وفرعها في السماء *تؤتي أُكلها كل حين بإذن ربها ويضرب الله الأمثال للناس لعلهم يتذكرون* ومثل كلمة خبيثة كشجرة خبيثة اجتثت من فوق الأرض مالها من قرار "
كلام السوء دا كمان ممكن يكون غيبة ونميمة او مجون اللي هو ييفتخر بذنوبه ، او حد يستخف بحاجة في الدين ع سبيل الهزار .
نفكر في كلامنا شوية قبل ما يخرج ، يا ترى لو خرج هيحصل مشكلة ؟
طب انا لو مكان الشخص اللي بكلمه واتقالي كدا هتضايق ولا افرح ؟
سيدنا النبي صلي الله عليه وسلم هيبقي فرحان باللي بقوله ولا زعلان؟
ربنا هيكتبهالي ذنب ولا حسنة ؟؟
مش اقول ما هو الشخص دا لسانه طويل وعلطول دبش ، طالما انا شايفاه وحش كدا ليه اقلده انا مش هكره واخد ذنوب ع قفاه كمان😂😂😂
وبعدين الشخص الدبش واللي بيقصف جبهات دا هتلاقي الناس بتتحاشي الكلام معاه ، انا اتكلم معاه ليه اصلا وهو هيحرجني ويقعد يتريق ..
دايماً نحط ربنا وسيدنا النبي عليه صلوات الله ادامنا عشان نشوف افعالنا هترضي ربنا وتفرح سيدنا النبي ولا لأ ؟
كان النبي صلي الله عليه وسلم بيهزر ومبيقولش الا الحق والخير 💙👑
نشوف رسولنا الكريم كان بيتكلم ازاى ونعمل زييه عشان نبقي معاه في الاخرة ان شاء الله 🌸 مقلدش توتو ولا سوسو عشان دول دبشهم حلو 😂
حط نفسك دايماً مكان اللي بتكلمه وشوف هتبقي ازاى لو اتقالك نفس الكلام 💗
لو تعرفوا حد من صحابكوا عايز يستفاد من الكلام هنا قولوله ع الكتاب واعملوله منشن عادي😂😂
عايزين موضوع محدد المرة اللي جاية ؟
استقيموا يرحمكم الله 💙
