سيدنا النبي صلي الله عليه وسلم قال : (يُستچاب لأحدكم مالم يُعچل ، يقول دعوت فلم يُستجب لي.) رواه أبي هُريرة .
كتير مننا بيفضل يدعي ويستغرب ربنا مش بيستجيب ليا ليه ؟ أنا مش بدعي بمعصية ..!
يارب نفسي دعوتي تستجاب يارب ، بدعي بقالي كتير ومفيش حاجة بتتحقق .
وبيفضل الإنسان يدعي لغاية ما يوصل عند نقطة غلط وهي إنه يزهق .
وللأسف دا غلط بيقع فيه كتير من الناس ، وعشان كدا حذرنا منّه رسولنا الكريم صلوات ربي وسلامه عليه 🌸✨
معني الحديث ايه بقي ؟
يستجاب لأحدكم : يعني دعاء كل واحد فيكم .
ما لم يعجل : يعني إنه يبقي مستعجل ان دعائه يتحقق .
سيدنا النبي صلي الله عليه وسلم🌸 بيقولنا في الحديث دا أن اي حد بيدعي ربنا ميستعجلش بالإجابة .
وفي حديث تاني في صحيح مسلم سيدنا النبي بين فيه موانع الدعاء وذكر من ضمن الحاجات استعجال الإجابة .
وفي حديث لسيدنا النبي أنه قال :" لا يزال يُستجاب للعبد مالم يدع بإثم او قطيعة رحم ، مالم يستعجل " قيل : يا رسول الله ما الأستعجال ؟ قال :" يقول :قد دعوت وقد دعوت فلم أر يُستجيب لي ، فيستحسر (أي ينقطع عن الدعاء) عند ذلك ويدعُ الدعاء " .
اما بقي الناس اللي بتزهق وهي بتدعي ، زي ربنا مش بيستجيب ليا لا يا عم مش هدعي ، أو الناس اللي بتبطل تدعي لمجرد أن ربنا أخر تحقيق دعائها فالناس دي بقي ايه اللي بيحصلها ؟؟
في علماء قالوا أن الناس دي ربنا مبيقبلش دعائهم ❌
ليه ؟؟؟
عشان الدُعاء أصلاً عبادة 🌸😌 سواء حصلت الإجابة او لأ ، فمينفعش أننا نزهق من عبادة ربنا 😉.
ايه بقي أسباب تأخير إجابة الدعاء ؟
تلات اسباب :
١- إما إن الحاجة دي مش وقتها ،عشان لكل حاجة وقت هتيجي فيه عشان نفرح بيها 👏💙
٢- أو إن ربنا قدر ليك أن الحاجة دي هتجيلك في الدنيا مش في الأخرة ، وكلنا عارفين طبعاً أن أي حاجة هناخدها في الأخرة فهي أحسن من حاجة الدنيا أضعاف كتييير 🎊✨.
٣- أو إن ربنا أخر تحقيق دعاكي ، عشان تفضلي تدعي أكتر وتعيدي وتزيدي😂 عشان ربنا سُبحانه وتعالي بيحب الإلحاح من العبد مع الانقياد والاستسلام وإظهار الذُل والافتقار إلي الله تعالي .💙
طب هل للدعاء آداب ؟
أيوة ليه كتيير جداً ومن ضمنهم :
١- الوضوء قبل الدعاء .
٢-اختيار أوقات فاضلة زي السجود ، وبين الآذان والإقامة ، وعند نزول المطر ، وعند السفر ، وفي الثلث الأخير من الليل .
٣- التوبة والصلاة والإخلاص .
٤- الاعتراف بالعجز والتقصير .
٥- استقبال القبلة .
٦- افتتاح الدعاء بالحمد والثناء علي الله سبحانه وتعالي .
٧- الصلاة علي النبي صلي الله عليه وسلم .
٨- أنك متخصش نفسك بس بالدعاء ، لا أنت تعم الدعاء وتخلط حاجتك بحاجة الناس ربما تقبل ببركتهم .
يعني بدل "يارب ارزقني " 👈"يارب ارزقنا "
٩- أن يختم الدعاء بكلمة "آمين " .
الأصل بقي في قبول الدعاء تلات حاجات :
١- اتقاء الشبهات والبعد عن المحرمات .
٢-تحرى الحلال الطيب.
٣- البعد عن الحرام في الأكل والشرب واللبس .
طب في حاجة مستحبة عند الدعاء ؟
أيوة 💪😌
في أنك ترفع إيدك أثناء الدعاء والدليل أن الرسول صلي الله عليه وسلم قال :" إذا سألتم الله فاسألوه ببطون أكفكم ولا تسألوه بظهورها " .
فأنت او أنتِ بتمد إيدك خشية من اللع سبحانه وتعالي 💙 زي لما بتحتاج حاجة تقوم مادد إيدك للشخص لكن لله ولرسوله المثل الأعلي 🌸
طب في ناس بعد ما بتخلص دعاء بتمسح وشها بإيديها حكمهم إيه..؟
جائز ، دول بيتفائلوا كأن ربنا حقق دعائهم ، وتبركاً بأنهم يوصلوا الرحمة للوجه اللي هو أعلي الأعضاء وأشرفها .💖
ربنا يتقبل منّا ومنكم إن شاء الله 💗👌.
