بنك الثواب

تفسير "قريش، الماعون، الكوثر "

هيلووو🌸😁✋ ..
أنا عارفة ان مفيش حد اصلاً بيقرا الكلام دا ..بس عشان في يوم متأكدة ان ممكن ناس تقراه وتستفاد منه 😌✌

نكمل ..🌸💗

سورة قريش

في السورة هنا ربنا بيُذكر نعمه علي قريش
لإيلاف قريش.. الأية دي متعلقة بقوله تعالي "فليعبدوا" والمعني إن نِعم ربنا علي قريش كتير و متتعدش، فلو معبدوش ربنا عشان كل النعم دي .. فاعبدوه للنعمة الواحدة الظاهرة

و ممكن تكون الأية دي متعلقة باللي قبليها وهي أخر أية من سورة الفيل 'فجعلهم كعصف مأكول' ..والمعني أن ذلك الإتلاف لهذا الإيلاف ' عارفة انكوا مفهمتوش الحتة دي بس هدور علي شرح اسهل واقوله😌🌸'

ويكون المعني إن ربنا سبحانه أهلك الحبشة الذين قصدوهم ، عشان الناس تسمع بهلاك الحبشة فيبدئوا يحترموا قريش أحسن احترام ويبقي في أمن في رحلتين قريش عشان ميطلعش عليهم قطاع طرق لأنه زمان كانت رحلات التجارة بتبقي بالجمال وفي الصحرا ✌😌

إلافهم رحلة الشتاء والصيف .. ايه رحلة الشتاء والصيف دول ؟
بصي يا بيب قريش 'التجار غالباً' بيسافروا في الشتا لليمن ، وفي الصيف للشام وبيروحوا يتاجروا وكدا .. وكانوا في رحلتهم آمنين محدش بيتعرض ليهم لأنهم كانو أهل حرم الله 💗😌

فليعبدوا رب هذا البيت ، الذي أطعمهم من جوع وآمنهم من خوف

هنا ربنا سبحانه وتعالي خلي كلمة ' جوع' وكلمة 'خوف' نكرة عشان يبين شدتهم ..والمعني. أن ربنا أطعمهم بالرحلتين دول من جوع شديد جداً كانوا فيه قبل الرحلتين ، وآمنهم وحفظهم من خوف عظيم 'اللي هو ذكرناه فوق' 😌💖

✅✅✅✅✅✅✅
سورة الماعون

في سورة الماعون ربنا بيبين عقاب اللي بيكذب يالدين واللي بيعمل عمله رياء 'المنافق'

أرءيت الذي يكذب بالدين .. يعني عرفت اللي بيكذب بالجزاء مين هو ؟

فذلك الذي يدع اليتيم .. اللي بيكذب بالجزاء هو اللي بيعامل اليتيم بجفاء وبيأذيه وبيرده رد وحش بخشونة..

ولا يحض علي طعام المسكين .. يعني حتي مابينصحش أهله علي تقديم الأكل للمساكين ..

وربنا خلي علامة اللي بيكذب بالجزاء هو : ١-منع المعروف لأنه منصحش حد يقدم طعام للمساكين ٢-الإقدام علي إيذاء الضعيف لأنه معاملش اليتيم بالحُسني

والمعني العام هو : أنه لو آمن بالجزاء وصدق أن للأعمال الوحشة ذنوب هنتحاسب عليها كان هيخاف من ربنا وعقابه ومكانش عمل كدا 'أذية اليتيم ، وتقديم الطعام للمسكين' 😌👌

فويل للمصلين ، الذين هم عن صلاتهم ساهون، الذين هم يراءون، ويمنعون الماعون..

ربنا قصده بالآيات هنا المنافقين والمعني أنهم مبيصلوش في السر لأنهم شايفين الصلاة مش واجبة .. وبيصلوا ادام الناس بس رياءً

وقيل المعني : ويل للمنافقين اللي بيدخلوا في جملة المصلين صورة بس ، وهما اصلا غافلين عن صلاتهم وهما بيصلوا مش عشان يتقربوا لربنا ولا عشان يأدوا فرض ..هما بس بيطلعوا وينزلوا ويسجدوا ويركعوا زي 'السوستة' عشان بس يوروا الناس. ..وفي نفس الوقت هما بيمنعوا الزكاة ..

✅✅✅✅✅✅✅

سورة الكوثر

السورة بتبين منح وعطايا ونعم الله علي نبيه صلي الله عليه وسلم وبتبين أن اللي بيبغض ويكره النبي خسران 👊😌

إنا أعطيناك الكوثر .. الكوثر معناه المفرط الكثرة والكوثر دا هو نهر في الجنة أحلي من العسل وأشد بياضاً من اللبن وأبرد من الثلج وألين من الزبد ..

اللهم اسقنا منه🌸👌
والمعني إن ربنا سبحانه وتعالي من نعمه علي سيدنا محمد أنه اعطاه النهر دا ..نهر الكوثر

فصل لربك وانحر .. يعني يا رسول الله أعبد ربك اللي أعزك بعطائه ومنحه وشرفك واللي حفظك من اللي كان قومك بيعبدوه
وانحر باسمه يعني أذبح الأضحية وسم باسم الله ..

إن شانئك هو الأبتر.. يعني إن من كرهك وأبغضك يا رسول الله هو المنقطع عن كل خير ..😌🌸👌

✅💎✅

ان شاء الله تكونوا فهمتوا ✋😌💖