عباس ،،،ظليت شهر بالمدينة وامتحنت الامتحانات الي فاتتني وهيلين صفحة وطويتها من حياتي وشلتها من بالي وتفكيري وكنت على تواصل مع امي وعمامي واهل القرية
فاطمة،،،حاولت اتقرب من البنات وصارت علاقتنة طيبة وحتى جود صارت صديقتي وكنت اخدمهم واساعدهم بأي شي يحتاجوا ونضحك سوة ونلعب سوة حسيتهم خواتي فعلا
والحجية كامت تحبني وارتاحتلي كلش واني حسيتها بمقام امي وكنت اداريها مثل رمش عينها ونوبات من تتخربط اسهر عليها لصبح
مرة نادتني وكتلة اي يمة بعدين تذكرت امي وبجيت
كالت ليش تبجين فاطمة كتلها تذكرت امي واشتاكيتلها مااعرف وين صفى بيهم الدهر
خلت ايدها ع راسي وكالت حقج يمة الله يعينج من يجي الشيخ اخلي يسأل عن اهلج ويوديج الهم الاهل غالين وميعوض مكانهم احد
فاطمة،،،فرحت وبست ايدها وراسها كتلها والله يمة اعزج وغلاتج بغلاة امي كانت فعلا طيبة الحجية والظروف الي مرت بيها فعلا كانت قاسية
كمت احبهم وحسيتهم فعلا اهلي وخفت لا فد يوم اخسرهم ويطلكني الشيخ وجنت متوقعة هالشي
الحجية ،،،فاطمة شوفي هذا الفستان يجي عليج
فاطمة ،،،الله هذا الي يمة ؟؟
الحجية ،،،اي فطومة البسي
رحت لبستة اسود حصر وبي طرز اخضر من فوك والردن شفافة طلع كلش حلو علية
كالت خلي ام عدنان تحفلج وجهج انتي زوجة الشيخ وناس تباوعلج لازم ترتبين نفسج وتعتنين بمظهرج وبعد لتلبسين الشيلة
فاطمة ،،،فرحت بحجيها طرت من الفرح حسيت فعلا اني زوجة الشيخ
كالت يلا روحي رتبي نفسج باجر يجي الشيخ
صحت صحيح يمة جاي الشيخ بدون مااحس بنفسي وبعدين فشلت ودنكت
الحجية ،،، ضحكت اي ان شاء الله باجر جاي بالسلامة
عباس ،،،اتصلت بية الحجية وكالت اريد اوصيك
عباس ،،،امر تامرين سمي يمة
الحجية ،،،اريد تجهز ملابس ومكياج على ذوقك
عباس،،،امر صار بس لمن حجية ؟؟
الحجية لفاطمة
عباس،،،اي فاطمة ؟؟
الحجية،،فاطمة زوجتك زوجة الشيخ لو نسيتها
عباس ،،،فعلا انصدمت واصلا جنت ناسيها ومن رحت للمدينة ماسألت عنها ولا الحجية جابتها بالطاري سبحان مغير الاحوال شنو هالتغير
مجان عندي وكت وع طريقي جبت اشياء عادي هالأصادفة اخذة لان اعرف هية بسيطة ومتهتم لهل اشياء ومو كشاخة وتعتني بنفسها
فاطمة،،،،طرت من الفرح وحسيت عبالك عندي عيد كعدت من الفجر صليت وظليت اراقب طلوع الشمس وادعي من ربي يوصل بالسلامة واشوفة بخير رتبت الغرفة ونزلت حضرت الريوك وبعدها نايمة ام عدنان وع صوت حركتي بالمطبخ فزت كالت بسم الله فاطمة خوما بيج شي شصاير
فاطمة،،،ام عدنان انتي نايمة والشيخ راح يوصل خلي نحضر الريوك ونتريك ونرتب البيت ونسوي غدة اخاف يجي من وكت
ام عدنان ،،،لا ميجي قريب الظهر بالة طويل
فاطمة ،،،عفت الي بأيدي وكتلها للظهر انتظر والله طويلة
ام عدنان ،،،هههههه الي صبرت شهر متصبر كم ساعة
فاطمة ،،،ام عدنان شنو تعرفين عن الشيخ شنو يحب شنو يكره
ام عدنان ،،،والله مااجذب عليج تسأليني عن البنات اكلج لان تربوا بيت الشيخ وتعقريبا اني الربيتهم بس الشيخ عباس من صغرة بالمدينة ويجينا زيارات بالمناسبات ولان تربة وحدة مامتعود على الخدم معتمد على نفسة من يجي ميآمر علينة هو يخدم نفسة بنفسة بس من عشرتي الة طيب وابن حلال وشهم وصاحب موقف وكلمة الله يهدي عليج فاطمة ويسعدكم
فاطمة،،،دنكت وكلت امين ولو مااعتقد اني وين وهو وين
ام عدنان ،،،ليش يمة انتي شناقصج وبعدين ماطول رضت عنج الحجية وحبتج هاي هية امورج مضبطة وخلت ايدها ع كتفي وضحكت
ام عدنان ،،،فاطمة الحجية جانت دائما تخاف ع الشيخ من بنات المدينة لا ياخذون عقل الشيخ ووحدة بيهم تضحك عليه وياخذها واحنة هنا الي ماياخذ من توبة يعايروا العربان ويتفاشل فمتأكدة الحجية ارتاحت الج لان شافتج بنت حلال ومعدلة وتربات حمولة وراح تحافظين ع الشيخ واسمة
فاطمة ،،،اووووف يارب يسمع منج ويصير هالحجي واقع
ام عدنان ،،،انتي سباعية وصبورة الامور تحب صبر فطومة روحي رتبي نفسج اني اسوي ريوك
فاطمة ،،،صعدت اريد اروح لغرفتي وشفت غرفة الشيخ مفتوحة دينضفون بيها دخلتلها وشميت ريحتة بكل ركن بيها وصورة على الحياطين فتحت الدولاب وطلعت دشداشتة الي شفتة لابسها بأول مرة قابلتة بيها بفاتحة ابوه وشميتها وحضنتها بقوة
سمعت عكازة الحجية بسرعة رجعتها بالدولاب وردت اطلع وصارت بوجهي كالت شجابج هنا فاطمة على غرفة الشيخ
فاطمة ،،،تلبكت حجية اجيت انظفها مع البنات
كالت تعاي اريد اسولف وياج
فاطمة ،،،صار يمة وكلبي راح يوكف
الحجية ،،،فطومة الصار منريد نفتحة ولا نعيد بي الصار صار واني صح جنت كارهتج بسبب الصار بينة من تحت راس اخوج الله يسامحة
فاطمة ،،،دنكت واختنكت
الحجية ،،بس هسة انتي بنتنا صرتي والله يشهد غلاتج بغلاة جوري وجود وماالكة جنة ومرة لعباس احسن منج بس مااكدر افرضج عليه فرض جان بأمكاني اجيبج واخليج بغرفتة بس اني مااحب تصيرين سهلة خلي هو يركض وراج ويغليج ويعزج ترة الرجال يحب المرة الثكيلة الي هو يركض وراها مو هي الي تسعى وراه مااريدج بعد طبين لغرفتة واذا عزج ورادج تصيرين على فراشة بعد انتي مرتة على سنة الله ورسوله يندلج ويعرف شلون يوصلج ماشي يمة
فاطمة ،،،دنكت وهزيت راسي ان شاء الله يمة
كالت يلا روحي تغسلي ولبسي وتعطري
فاطمة ،،،كلام الحجية اثر بية كلت ليش هيج قسمتي وحظي الحمدلله على كل حال
رحت لغرفتي غسلت ولبست فستان الجابتة الي الحجية وهديت شعري ع كتوفي وتكحلت طلعت حلوة هواي ظليت واكفة ع الشباك اتاني يجي نص ساعة ساعة ساعتين واني انتظر ومامليت الانتظار لمحت سيارة طبت لمزرعة كلبي طار مني كمت اكمز مثل الطفلة واني انتظرة ينزل نزل من السيارة ولابس ملابس حصر ونظارة شمسية اتلكوه البنات وسلموا عليه وحضنوا واني اراقبهم من الشباك وكلبي يدك فرحانة بشوفتة هواي بعدين طبوا وغيرت مكاني ولطشت بالباب هالمرة اريد اسمع صوتة صعد ع الحجية
وفعلا صعد ع درج وصاح حجية شونج فديتج والله مشتاقلج وصارت هوسة وكلهم فرحانين بجيتة بعدين نزلوا كلهم واجوي عمامة وولد عمامة وظلوا ويا وصبولهم غدة وتغدوا واني ماطلعت وكلت يمكن حتى نسوني
بعدين المغرب دزت علية الحجية لغرفتها رحت ولكتة كاعد يمها طار كلبي مني جان مدي اشبكة حيل بحضني
عباس،،،الحجية مدحتلي بفاطمة وجانت راضية عليها كلت سبحان مغير الاحوال من حال إلى حال ودزت ع فاطمة واجتي جانت متغيرة عن قبل لبسها وشكلها وترتيبها صح جانت هيلين احلى منها بس كان جمال فاطمة عربي طبيعي بدون تصنع بسيط سلمت وكالتلي الحمدلله ع السلامة شيخ
عباس ،،الله يسلمج فاطمة باوعتلها شلونج وتذكرت شلون كتلتها
فاطمة ،،،الحمدلله ودنكت
عباس ،،شمسوي للحجية فاطمة؟؟
فاطمة،،،اني !!! ممسوية شي شيخ والله
عباس ،،،لعد ليش هيج حابتج شلون كدرتي تاخذين كلبها علميني حتى تحبني مثلج وضحك هو والحجية
فاطمة ،،،اوووووه فديت ضحكتك
كلي هاي الجنطة الي وراج الج اخذيها
فاطمة ،،،ابتسمت وكتلة مشكور شيخ
عباس ،،،باوعت للحجية اي كوليلي شنو يوجعج بعد يرادلج صيدلية يمة كاملة وضحكنة
طلعت فاطمة من الغرفة وظليت مع الحجية نتعلل الى نص الليل ورحت لغرفتي نمت
وللقصة بقية،،،،،،،،
