عباس ،،،دفنا الشيخ وكل حفنة تراب تتناثر فوكاه حسيت حياتي ومستقبلي وكل احلامي دتتناثر وياها
جنت مخنوك اريد اصرخ اريد ابجي بس الوضع الي جنت بي مكدرت بس انزل راسي والانظار والكامرات كلها تحاصرني حسبي الله ونعم الوكيل بيك ياحسين الا انتقم منك لو اخر يوم بعمري
جانت ابالي والدتي واخواتي ماشفتهم شلون حالهم ياربي يصبرهم
جان المجلس مال العزاء بعيد عن البيت الي جان عزاء النساء بي
تمنيت لو بس نص ساعة اكدر اطلع واروح اشوف امي واخواتي واطمن عليهم بس جان ميصير اطلع من المجلس الا ينتهي العزاء مدة 3 ايام وهم ميصير اروح للبيت وكلة نسوان جنت مااملك الا الدعاء ان يصبرهم وتعدي هالمحنة على خير
فاطمة،،،بيوم المات الشيخ ودفنوا انكلبت الدنيا واطلاقات نار بكل مكان وحسين ماامبين ولا الة اثر والخوف اخذ نص عمرنا وكل شوية جايتنة طلقة طايشة من جهة وجنت متمسكة بأبوية مااخلي يطلع لان اعرف اذا طلع ماراح يرجعلنا بعد وخاصة هسة دمهم فاير ع الشيخ
قبل المغرب ونسمع دفرت بوبنا من كل صوب وكاموا يطلقون رصاصات عشوائية اني وامي وابوية تكومنا بالزاوية جانوا هواية وملثمين ضربونة اني وامي وابوية وسحلوا ابوية وطلعوا شكد صارخت ونخيتهم يتركوه لخاطر شيباتة بس جانوا يزيدون بالضرب
اخذوا وطلعوا وهمة يسبون ويغلطون علينة ظلينة اني وامي نلطم ونبجي وشنو نسوي منعرف كتلها يمة منو ذولة معقولة من طرف الشيخ
كالت اكيد يمة هذا ولد الشيخ دزهم ميعوفون ثار الشيخ حتى لو يفنونة عن وجه الارض
كمت بسرعة ولبست عباتي وكتلها ماراح اسكت يايمة وابوية الا يرجع مرفوع الراس
امي ،،،ردي ولج لتفضحينة وين رايحة ردي
فاطمة،،،رحت اركض والدنيا ليل وغطيت وجهي بعباتي وكمت اسأل عن مضيف الشيخ وجانت الدنيا هوسة وتعج المنطقة بالرياجيل خفت حيل وردت ارجع وتذكرت ابوية من يضربون بي وكمت ابجي وانحب جوة الشجرة وحايرة بزماني مدري اتقدم مدري ارجع
شفت شايب جبير بالعمر يصب كهوة للرياجيل ناديت عليه من ورة الشجرة بصوت ناصي كم مرة الى ان صد علية واشر براسة انتظرت شوية ولنة ورة ظهري وج انتي شجابج هنا وشرايدة
كتلة عمي الله يرضى عنك اريد عباس ابن الشيخ بكلمة راس ضروري
الشايب،،،قصدج عمج الشيخ عباس
فاطمة،،،هاا صار الشيخ ؟؟
الشايب ،،مامرتاحلج ابد احجيلي شنو قصتج لان لو تموتين مراح تكدرين تواجهين الشيخ هسة
فاطمة،،نزلت ابوس ايدك عمي مسألة حياة او موت لازم اشوفة وكمت ابجي بحركة
الشايب،،استغفر الله يابنتي شنو قصتج انتي اني الكهوجي مال الشيخ احجيلي بلكي اكدر اساعدج
فاطمة،،،عمي بس اقابل الشيخ مااريد شي بس احاجي حتى لو من بعيد او حتى دخلني للديوان احاجي كدام الناس عادي
الشايب لا يابة شتحجين انتي شلون مرة تدخل ديوان شيوخ وبنص الرياجيل شنو ماظلت شوارب
فاطمة،،،لعد شلون اقابلة دليني ربي يوفقك
الشايب ،،ولو اعرف صعبة بس راح احاول كسرتي كلبي بس بالبداية خلي اجيب مرتي تفتشج عذرينة يمة الدنيا مو خوش
اجتي مرتة وفتشتني وراح هو للديوان وظليت انتظر وارجف كمت ابجي خفت كلت اني شجابني هسة يكتلوني بمكاني رجعت اركض لزمتني من ايدي زوجة الكهوجي وكالت وين رايحة مو ورطتي زوجي يروح يجيب الشيخ وتريدين تنهزمين شنو فلمج انتي احجيلي يلا
فاطمة،،،عوفيني الله يخليج هسة يكتلوني عوفيني وابجي
زوجة الكهوجي ،،،وج منو يكتلج شبيج شمسوية
فاطمة،،والله مامسوية شي بس الشيخ عباس اذا شافني يكتلني
هههههه الشيخ عباس يكتل هي هي يمة منو مدخل هيج سوالف براسج الشيخ عباس ميأذي نملة فقير وطيب وابن حلال بس كوليلي شنو قصتج
فاطمة ،،،حسيت حجيها قواني وخلة عندي امل بلكي يعفي عنا
عباس ،،،واكف بالعزاء والناس دتسلم علية ويعزوني وتقرب مني الكهوجي وكلي عمي اكو حرمة تبجي برة وطالبتك بالاسم وتريد تحاجيك ضروري
اشرت بأيدي ...كلي عمي بس ....كتلة بعدين وراح
بعدين ظليت افكر منو هاي معقولة هيلين حبيبتي مااعرف ليش اجتي بالي بالرغم اعرف مستحيل تجي من المدينة للقرية وبهيج وكت من الليل ومتندل اصلا منطقتنة
ترخصت وطلعت ادور لابو عدنان الكهوجي رحت اركض علية وين الحرمة ابو عدنان
اشرلي ع شجرة بعيدة ولزمني من ايدي ديربالك ع نفسك ياشيخ احنا فتشناها ماعدها شي
حطيت ايدي ع ايدة وكتلة اطمن الله الحافظ
ابو عدنان ،،،الله يحفظك يارب
عباس،،، رحت بسرعة بس من قربت استغربت وحدة منطيتني ظهرها ولابسة عباية راس ايدي اجت ع الخنجر مااعرف ليش
سألت منو انتي
اندارت بوجهي واستغربت
فاطمة،،، اتوقعت رجال جبير شو هذا صغير ويكولولة شيخ
عباس،،، بنية طويلة حنطية وعيونها كبار سود تلمع وخايفة ومرتبكة
شنو رايدة وشجابج هنا
نزلت لايدي تبوسها دفعتها شبيج يابنت الحلال شنو رايدة مني
فاطمة ،،،داخلة على الله وعليك ياشيخ اريد الامان منك
عباس ،،،ونعم بالله الج الامان احجي مااكدر اتأخر الناس تنتظر
فاطمة ،،، اني اخت حسين
عباس ،،اي حسين بأنفعال ؟؟؟
فاطمة،،،حسين المنصوري بعدني ممكملة تقدم علية بغضب وكل معالم وجهة تغيرت وكل البراءة والطيبة الي بوجهة انكلبت لزمني من ايدي ولواها والج عين توصلين لهنا تقتلون القتيل وتمشون بجنازتة
فاطمة ،،،،،اااااااه اخ ايدي انت نطيتني الامان ياشيخ
هدني ودفرني
ياشيخ والله ماالنا ذنب بفعلة حسين واحنة مثلكم فاجعتنة اكبر منكم وابوية هالرجال الجبير مو حمل مهانة وضرب احترموا شيبتة على الاقل
عباس ،،،وين حسين احجي
فاطمة،،، والله منعرف عنة شي الله يسود وجهة
عباس ،،،وشنو رايدة مني هسة اطبطب لابوج على هالتربية وهالخلفة
فاطمة،،،احسن تربية ربانة بس دنيانا مو للفقير الحمدلله ماخلانة نحتاج احد رغم فقرنة بس انتو الطمع عمى ع كلبكم كافي عاد فوك ظلمكم النا انتو الي جرتوا علينا وحسين دافع عن حقة وارضة
عباس اسكتي ولج جرني من شعري والج عين تحجين عن الظلم وضربني راشدي وكعت بالكاع وعافني صرخت ياشيخ سواتك مو سوات شيوخ روحوا دوروا حسين واشربوا من دمة لتجون ع الحريم وتستكون ع رجال جبير شيبة تارس راسة
رجع وكلي انتي شدتخبصين وليش تتبلين علينة
منو تعرضلكم
فاطمة ،،،اجواجوي ملثمين ضربونة وضربوا ابوية وسحلوا وكسروا البيت واني جيتك ع هالشي
لزمتة من ايدة الله يخليك ابوية ماالة ذنب وابجي
عباس ،،هد ايدي ودفعني وعافني وراح ظليت ابجي بالكاع سمعت صوت جلاب تنبح خفت ورحت اركض رجعت للبيت ابجي
وللقصة بقية .....
