حبيبي المزيون

الجزء السادس

يوم الخميس بعد العشا

ليلى و سعاد و فاطمة يسولفون مع بعض و بعيد عن الكل

ليلى : بسالج يا سعاد شنو كانت تبغي منش جدتي ليلى ؟؟

سعاد بضيقة خلق و زعل : تصدقون عمتي نجاح مشتكية عند جدتي عليي تقول أني اسوي 

مشاكل واجد لما اروح بيتهم اني استغربت من كلامها

فاطمة : يوووه ليش سوت أمي جذي ما توقعت هذا منها قلت يمكن تكلم عمتي فاطمة يعني أول 

تقول لأمج و تتفاهمون مو جذي تشتكي عليش

ليلى : اني تضايقت من الي سوته امي لا تضايقين روحش و إن شاء الله ما يصير إلا كل خير 

سعاد : قالت لأمي و أمي لانها تعرف أنه عمتي زيدت من عندها كلام عصبت و تهاوشت معاها

و من جذي عمتي اشتكت عند جدتي

ليلى : ايه اني ما اشوف ان في مشاكل و كل الي يصير ما يعتبر مشكلة حتى

 سعاد : المشاكل ما تصير لما تكونون موجودين لما اكون اني زايرتها بس

و الحين تعتب عليي ليش ما ازورها و ليش حارمتها من ولد ولدها و ليش ضربته لما عفس كل 

العابه بالكاكاو

فاطمة : بالكافي و ضربتينه ليش عاد جان اخذتيه بالهداوة

سعاد : بجنني ليش تتخيلين ان عمر واحد كلش ما يسوي مشاكل كل يوم يسوي مصايب

بس مع ابوه و جدته يصير عاقل

فاطمة : سكروا الموضوع الحين ترى أمي تأشر لي صار لها فترة علشان نروح لها

نتكلم بالمسنجر أوكي

ليلى و سعاد : أوكي

قاموا البنات و راحوا لعند نجاح

قعدوا مع الجماعة

بدور : حياكم الله زين ما سويتون احسن ليكم من قعدتكم بروحكم

فاطمة أم عبد الجليل : الا وين خديجة و كبرى و صغرى و زينب بعد مو موجودة؟؟

ليلى : بروح اشوفهم أكيد هم في غرفة خالتي زهراء مسوينها غرفة خاصة فيهم 

نجاح : ايــه اني ادري انكم ما تحبون القعدة هني اذا تبغون روحوا للبنات احسن ترتاحون ليهم 

اكثر

زهراء : اكيد بيرتاحون بقعدتهم مع الي بعمرهم مو الي اكبر منهم سوالفنا ما تناسبهم 

بدور : ههههه صادقين .. بدور تلمح أمها فاطمة تقوم : يمه وين رايحة ترى توه الوقت حتى 

عشر ما صارت علشان بتقومين

الجدة فاطمة : اني تعبت من صحيت للحين ما ريحت ما غفت عيني العصر