هل سبق في مرة انك كنت نايم وگعدت ع صوت مرعب او حسيتو بأختناق ؟؟
هل سبق وحسيتو انكم بين الوعي واللاوعي ؟؟
هل سبق وحسيتو انكم ماتگدرون تتحركون وانه كائن موجود يمكم؟؟
هذا يطلق عليه اسم الجاثوم
الشيئ جداً طبيعي مالة داعي للخوف يطلق عليه العلماء النفسيين اسم شلل النوم اما الناس محبي ماوراء الطبيعة يطلقون علي اسم الجاثوم ويقولون انه نوع من انواع الجن العاشق
يجي للناس الي ينامون بدون ذكر الله او مايكونون متوضين فيجيهم وهم نايمين ويجلس فوقهم ويقوم بخنقهم
المواصفات او الاشياء الي تجيكم لما يجي الجاثوم
اول شي تحسون نفسكم لانايمين ولا صاحين
وتحسون انه مووحدكم بالغرفة وانه موجود كائن مظلم وتردون تحجون او تصرخون لكن ماتگدرون ولا حتى تحركون ايدكم او رجلكم وتصابون بشيئ من الشلل المؤقت
ويگولون بالحقيقة انه جني جالس فوقكم وهو الي يقوم بخنقكم لكن الي يمنعة انه تتحركون من مكانكم وبنفس الوقت يسببلكم هلوسات شديدة والبعض يگولون انها موهلوسات وانهم بالفعل شافو هالشي وانه اكو كائن مظلم كان يراقبهم وهم گاعدين يختنقون
قصة البنت الي تعرضت لشلل النوم
رح اسولفلكم القصة وكأنها صارت بية
في احد الليالي قرابة الساعة الخامسة فجراً سمعت صوت يكاد يشق اذني يعني حسيت وكأنه اذني حتنفجر وكنت في حالة الوعي واللاوعي يعني ماكنت واعية تماماً وسمعت جوالي يرن واقسم ع ذلك لكن كانت رنة جوالي مو الرنة الي تعودت عليهة ولما قمت حتى ارد عالجوال حسيت بشيئ يدفعني عالسرير وحسيت بأيد اجت ع رگبتي وكانت تحاول تخنقني وماگدرت اتنفس ابداً وماكنت اعرف شنو الي يصير وگلبي يدگ بسرعة من كثر الخوف الي كنت فيه وماكنت اگدر احرك اي شي من جسمي او كنت مشلولة حاولت اصرخ وحاولت اتكلم لكن لساني كان جداً ثگيل الى ان استسلمت وانا انتظر الى ان تخلص الليلة
وفعلاً خلصت الليلة ومن يوم الي خلصت وانا مااگدر انام وخايفة جداً من فكرة النوم الى ان اجة يوم وماقدرت اقاوم الى ان استسلمت ونمت قرابة الساعة الثالثة فجراً
وصارلي مثل تلك الليلة هم صحيت ع ريح قوويةة فعرفت انه حيصيرلي مثلك تلك الليلة وانه هالكائن اجة حتة يخنقني لكن خلاص هالمرة استسلمت وتكررت تلك الليلة وانتهى بعدهة بدقائق ولما انتهت صرت اقرأ ايات من القرأن وساعتهة اطمئنيت وكنت عارفة انه بيوم حيتكرر نفس الموقف بالايام الجاية
بعدهة رحت ابحث عن هذا الجاثوم حتى وصلت لنقطة انه اگدر اتخلص منة وهو اني احرك رگبتي يمين ويسار خلال الشلل
وبعدهة بأيام رحت انام وصحيت ع نفس الشي مرة ثانية ع صوت طرق وصوت اشياء تطيح عالارض ودگات گلبي المتسارعة فحركت رگبتي يمين ويسار بقوة شديدة وحاولت اقول اعوذ بالله من الشيطان الرجيم صحيح لساني كان جداً ثقيل لكنني الحمد لله قدرت اقولهم وتخلصت من الجاثوم
ومع اني گدرت اصرخ واتكلم واتحرك عالسرير لكن اختي الي كلنت تشاركني الغرفة ماحست بأي شي ولا انتبهت ع الي صار وكانه كل الي صار في خيالي
وبعد فترة رحل عني الجاثوم ومن هذاك اليوم وانا احصن نفسي واقرأ قرأن وانفض السرير ٣ مرات قبل ماانام
