Renad ~ ريناد

part:9

في السعوديه>>
ساره كانت تكلم هيثم..
ساره: وش الاوضاع عندكم بالشركه.. عادي عند عمي سفر ريناد؟؟
•
هيثم يتنهد ويقول: خليها على ربك.. انا احس المدير تعبان نفسياً بس كاتم هالتعب بينه وبين نفسه..
تطلع ساره للبلكونه اللي بغرفتها وتقول: ريناد وش بيكون بحالها؟؟
•
هيثم يناظر وراه للموظفين اللي يمشون ويقول لساره بصوت واطي: اللحين مقدر اتكلم بشيء.. اطلع من الشركه الساعه ٢ ..عازمك ع الغدا وبنتفاهم..
ساره: طيب ..
هيثم :يالله سلام..
ساره: باي..
•
وتسكر منه وهي تناظر للشارع من بلكونتها .. بُعد ريناد مسوي لها فراغ كبير بحياتها..
طلعت من سرحانها على صوت رساله.. فتحتها وكانت من عزوز.. قلبت عيونها وقالت: وش يبي بعد.. مو كافي الرعب اللي شفته منه ذاك اليوم بالمطعم..
•
كان مكتوب بالرساله انه بيشوفها ضروري..
ردت عليه: آسفه تروح تموت علي.. مو ناقصه وجع راس..
ابتسم عزوز وارسل: مو ميت لاتخافين.. وبعدين اللي صار بي ضيق تنفس.. فيني ربو.. بس تعطيني الجهاز اكون بخير..
•
ساره: على اساس اني اعرف ان فيك ربو والا اعرف ان الجهاز بجيبك.. لولا الرجال اللي صار به شوية ذكاء كان مت وابتلشت فيك..
يرسل عزوز ضحكه طويييله ويقول: ههههههههههه الاعراض كانت واضحه انها ربو .. بس يمكن انتي ماعرفتي والا الباقي كلهم توقعوا انه ربو..
•
ساره: ماعلينا من هالسالفه.. المهم مقدر اشوفك اللحين.. معزومه مع هيثم..
عزوز: حلو بروح معكم..
ساره: خير تروح؟؟ وش المناسبه؟؟
عزوز: اكيد بتسولفون عن ريناد.. وهذا هو الموضوع اللي انا ابيك فيه..
•
ساره: ايوه بس هيثم مايرتاح بالسوالف قدامك.. يخاااف..
عزوز: اذا قصده امي.. ماراح اجيب لها طاري ريناد ابد.. بس في شي براسي بسويه وابي هيثم يساعدني..
ساره: شوف انا بقوله وبكيفه اذا رضى يقابلك كان بها مارضى ماتقدر تغصبه..
عزوز: مو مشكله.. انتظر الرد..
_________________________\_
•
في امريكا:
ريناد كانت نايمه على الكنبه ومغطيه جسمها بالكامل مع وجهها..
وهتان كان بغرفته معه بنت من اللي يسهر معهن...
انفتح باب الشقه ودخل صديقه جاسر ورمى شنطه على الارض وشغل الضوء وشاف الشقه نظيفه.. استغرب معقوله هتان جايب عمال نظافه..
•
وشاف النايم على الكنبه وابتسم وجاه وضمه وهو متغطي وقال بصوت عالي: يلعن شكلك تو يبين شكل الشقه.. مبطي ماشفناها بهالشكل..
ريناد كان وجهها مغطي بالبطانيه ويديها مثبتات بيدين جاسر وكانت تحاول تفك نفسها وفيها النوم.. مو مستوعبه..
•
هتان سمع الصوت برى ولبس روب الحمام وطلع ولقى جاسر ضام ريناد ويضحك ومكمل سوالف عن سفرته وش صار وش ماصار..
طارت عيون هتان وجاء يركض وسحب جاسر من جنب ريناد وقال: خييييير من جيت انقضيت عليها..
•
ناظر جاسر لهتان مستغرب وناظر لريناد اللي ابعدت البطانيه عن وجهها وتناظر لهم وعيونها فيهم النوم..
جاسر يناظر لهتان ويقول بصوت واطي: قسم احسب انه انت النايم...
وناظر وراه وشاف البنت اللي كانت مع هتان وقال بابتسامه : ماشاءالله عليك وحده بالغرفه ووحده تنتظرك برى.. ماتوفر احد..
•
شهقت ريناد وقالت: لا عمى.. انا مو مثلها..
يغمز لها جاسر ويقول: حتى هذيك المتفصخه لو تسالينها بتقول لا انا مو مثلها.. محد يعترف على نفسه..
يسحبه هتان معه ويطلعه برى..
•
يناظر له جاسر مستغرب ويقول هتان وهو يتكتف: جد هالبنت مو مثلهم.. ولا حاولت اصلا اني اخليها مثلهم..
جاسر يتكتف مثله ويقول: وش معنى؟؟
هتان: مدري احس فيها براءه مابي اخربها..
جاسر: عاد والله شكلها حلو..
•
هتان: ايه شكلها حلو ماختلفنا.. بس ماهي حقت هالسوالف..
جاسر: طيب وش جابها عندك اذا مو هي حقت هالسوالف.؟؟
هتان: سالفه طويله عريضه.. وانا ذبحني البرد هنا.. اقولها لك بعدين.. بس اياني واياك تسوي لها شي من حركاتك.. تفهم؟؟
•
يبتسم جاسر ويقول: وش ابي فيها اذا مو حقت الحركات اللي خبري خبرك.. اجلس اناظر لوجهها مثلا..؟؟
هتان يدخل ويقول: عاد انا حذرتك..
يدخل وراه جاسر ويأخذ شنطه من الارض ويتجه لغرفته ويوقف قدام الباب ويطلع مفتاحه ويناظر لريناد ويقول لها: عايشه بالصاله يعني؟؟؟
•
تناظر له ريناد وماترد.. مارتاحت له..
جاسر يأشر بيده ويقول: هلوووو في معلوم عربي؟؟
تصد عنه ريناد وتضم بطانيتها لصدرها.. يقلب عيونه جاسر ويفتح غرفته ويدخل..
•
هتان قرب من ريناد يبي يتكلم بس شاف ريناد ناظرت وراه وغطت عيونها بالبطانيه.. استغرب وناظر وراه وشاف البنت واقفه بملابس ماتعتبر ملابس بالنسبه لريناد ماتغطي شيء..
ابتسم هتان لحركتها البريئه.. وقال بصوت عصبي للبنت: انقلعي للغرفه وش مطلعك؟؟
•
تبزم البنت وتروح للغرفه..
يبعد بيده البطانيه عن وجه ريناد ويقول بابتسامه: خلاص راحت..آسسف.
ماتناظر له ريناد تناظر للارض وتقول: مالي حق امنعك عن هالاشكال ولا اقدر امنعك من انك تجيبهم للشقه لانها شقتك..
بس اتمنى انهم مايطلعون برى غرفتك بهالوضع.. اترجاك..
•
يبتسم هتان ويجلس بجنبها ويقول وهو يمسك يدها بين يدينه ويقول: اوك ...
ريناد تسحب يدها من يدينه وتقول: شي متعود عليه.. ماراح يتغير بيوم وليله.. ولا راح تغيره عشان وحده بتعيش عندك يومين بس.. انا اطلب منك بس هاليومين.. تمسك نفسك لحد مامشي.. وبعدها بكيفك.. ان شاءالله تطلع مفصخ انت وياها..
•
ضحك بصوت عالي هتان وقال: لااا مو لهالدرجه.. واللحين بخليها تروح لبيتها.. ماعليك..
يطلع جاسر وهو لابس شورت بس بدون فانيله واتجه للثلاجه ناظرت له ريناد وصرخت صرخه مكتومه وصدت بوجهها لهتان..
•
ابتسم هتان وقال بصوت واطي: ماعليش مو متعمد.. هو متعود يتمشى بالشقه كذا.. لسى ماتعود على ان يكون بالشقه بنت..
ترفع رينادالبطانيه ببطء وتحطها على وجهها وتقول: الله يعيني على هاليومين كيف بيعدن؟؟
هتان بصوت عالي: جاسر.. استر نفسك في بنات..
يناظر له جاسر ويبزم ويقول: مابي..
•
تغمض ريناد بقوه تحت البطانيه وتضم البطانيه بقووه ويقول هتان بضحكه: حرام عليك اللحين تختنق..
جاسر يأخذ علبة بيره ويقول وهو يفتحها: خلها تختنق احسن.. والا من يحصل له يشوف جاسر بدون فانيله ويغطي وجهه؟؟ هااه؟؟ ماتقول لي؟؟
•
يقلب عيونه هتان ويقول : محد يبي يشوف جسمك.. غطه والا انقلع لغرفتك..
جاسر يتجه لغرفته ويقول: انقلع لغرفتي افضل..
ريناد بصوت مكتوم: ياارب ارحمني..
____________________\______\
•
في السعوديه ~~ تحديدا المطعم...
ساره وعزوز وهيثم جالسين على احد الطوايل هناك..
هيثم وافق ان عزوز يجي بس مايجيب طاريه عند احد..
ساره تشرب من قهوتها وتقول: وش كنت بتقول بالشركه.؟؟ قلت انك بتقوله هنا..
•
هيثم يتنهد ويناظر لعزوز ويقول : مثل ماأتفقنا.. أي شيء اقوله هنا يبقى هنا... مو ناقص مشاكل..
يهز راسه عزوز بمعنى ايه ويكمل هيثم ويقول: تقصيت عن امر ريناد واكتشفت انها مو مسجله بأي مدرسه هناك بأمريكا..
•
تشهق ساره وعزوز اتسعت عيونه من الخبر.. رفع يده هيثم لهم بمعنى اسكتوا خلوني اكمل.. وقال: انا سجلتها بمدرسه الامبراطور ويوم اتصلت عليهم.. قالوا ان في شخص سحب الفلوس وألغى التسجيل من نفس الحساب.. وإيضاً.. رصيد ريناد اللي بالبنك تسكر.. والتغت جميع بطايقها الائتمانيه...
•
ساره بصدمه: يعني ريناد تعيش هناك متشرده؟؟
عزوز يرمش بعيونه بصدمه بعد.. لانه متأكد ان امه هي اللي ورى كل هذا..
هيثم يتنهد ويحرك قهوته بالملعقه ويقول: هذا اللي بيصير اكيد.. لا رصيد ولا مدرسه ولا حتى بيت.. اكيد بتكون بالشارع..
عزوز وساره قالوا مع بعض: بسافر امريكا..
•
ناظرت ساره لعزوز وقالت: اكيد انجنيت..
عزوز: ليش مو انتي اللي انجنيتي.. تراك بزر.. وين بتدورين ريناد؟؟ وأهلك بيخلونك اساسا تروحين؟؟
ساره تضرب على الطاوله بعصبيه وتقول: انت البزر.. واكيد اني بروح غصباً عن الكل.. ذي ريناااد تفهم؟؟
•
يبتسم عزوز ويقول: عارف انها ريناد.. عشان كذا أنا بروح .. ومايهمني احد..
ساره: امك هي سبب كل شيء.. واذا درت انك بتروح لريناد الله أعلم وش تسوي بها بعد.. مابقى شي وماسوته عجوز قريح..
رفع حاجبه عزوز .. خير تسب امه قدامه..
•
ابتسمت ساره يوم حست بنفسها وقالت: ماعلي منك.. امك والا عمك.. اللي يأذي ريناد بكرهه واحقد عليه مهما كان يكون..
يتنهد عزوز ويناظر ليدينه بحضنه.. ويقول لهيثم: احجز لي اقرب طياره لامريكا..
هيثم بتردد: أنا آسف.. مقدر.. اذا بتسوون شيء انتم الاثنين.. ياليت تسوونه من وراي.. لان لو صار شيء وطلع لي يد بالموضوع.. عائلتي هي اللي تتأذى مو انا.. عشان كذا اعذروني..
•
ساره تأخذ جوالها من على الطاوله وشنطتها وتقول وهي تقوم: ماعليك عاذرينك.. وبنسوي كل شي بنفسنا.. انا رايحه اتفاهم مع بابا..
يقوم عزوز معها ويقول: اوصلك؟؟
تناظر له ساره وهي تلبس نظارتها الشمسيه وتقول بعد تفكير: ايه وليش لا..
•
وناظرت لهيثم وقالت: سلام..
اومى براسه هيثم وماتحرك من مكانه..
وعزوز وساره راحوا للسياره..
يقول عزوز وهو يشغل سيارته: انا رايح رايح.. بس اذا بتروحين.. خلينا نروح مع بعض احسن.. عشان نساعد بعض..
ساره: معك او بدونك اكيد اني بروح وبدورها.. ماحتاج احد..
•
عزوز يبتسم بسخريه ويقول: تكفين عاد ياللي مختمه شوارع امريكا.. وين بتدورينها؟؟ اي مكان؟؟ ولحالك وانتي بزر..
تضربه ساره مع كتفه وتقول: بزر بعينك.. ومالك دخل كيف ادورها..
يمسك كتفه عزوز ويبتسم ويقول: المهم اذا اقنعتي باباك على قولتك.. عطيني خبر عشان احجز لك معي..
•
تتكتف ساره وتمثل انها زعلانه وتقول وهي مبوزه: طيب..
يضحك عزوز ويقول: حيوانه ليش تكرهيني؟؟
تناظر له ساره بطرف عينها وتقول: لاتخليني ابدأ..
يضحك عزوز ويقول: طيب طيب.. خلاص.. يالله انزلي وصلنا..
تنزل ساره وتقول: بيننا اتصال..
يبتسم عزوز ويقول: اوك.. باي..
ساره ترفع يدها بمعنى باي وتسكر الباب وتدخل داخل..
______________________________
•
في امريكا>>
صحت ريناد على اصوات تكسير وهواش.. هي من نامت بالصاله وكل شوي يصحيها احد .. اما الباب والا اخوياهم والا بنات والا هواش نفس اللحين.. مافي اي خصوصيه لها بهالبيت ابداً ابداً..
•
وخرت البطانيه عن وجهها بهدوء وهي تشوف بنت تضرب هتان على صدره وتبكي وهتان يمسك يدها عشان ماتضربه وباين انه يحاول يهديها..
البنت ببكاء: ليش تسوي فيني كذا؟؟؟ لييييشش؟؟
هتان ماسك يديها الاثنين ويقول بهدوء: ماوعدتك بشيء..
•
البنت بصراخ: حنا كنا بننخطب الاسبوع الجاي..
هتان يبعدها عنه يدفها بخفه ويقول: انا ماعلي من كلام اهلك واهلي.. انا قلت لك اني مستحيل اتزوجك..
البنت وهي لسى تبكي: بس حنا نحب بعض.. وأهلنا بينهم صفقات..
•
هتان بنفس البرود: خطوبتنا صفقه ماليه بالنسبه لهم.. وانا مستحيل اشارك بهالشيء.. وحب ابداً ماحبك.. ولا فكرت.. ممكن صديقه وبس.. انتي اللي طرتي بافكارك..
البنت: هتااان وش اللي غيرك كنت موافق؟؟؟؟
•
هتان يبعد عنها ويقول: ومن متى انا اوافق على شيء يقرره ابوي؟؟ هه؟؟ انتي اكثر وحده تعرف اني اعانده بكل شيء..
والحب ابداً مايوجد بقاموسي.. لا تعشمين نفسك بشيء..
تسطره البنت كف وهي تبكي وتقول: حقييير واااطي..
•
يمسك يدها هتان بغضب وهو يعصر يدها بقوه والشرار يتطاير من عيونه من العصبيه وقال: مو هتان اللي ينضرب تفهمين؟؟
البنت تتوجع من مسكته وكانت تحاول تفك يدها منه..
لاحظت ريناد انه معصب مره وانه بأي لحظه بيضرب البنت.. موحلوه يضرب بنت بعد..
•
قامت ريناد لهم يوم مسك هتان شعر البنت وسحبها قدامه..
مسكت يده ريناد وهي تقول : هتاااان..
ناظر لها هتان ورقت ملامحه وقال بهدوء عكس ماكان عليه : وش عندك؟؟
تفك اصابعه من شعر البنت بهدوء والبنت كانت تبكي بصمت وقالت ريناد: مهما صار..مايصير الرجال يمد يده على بنت.. صح؟؟
•
يترك هتان البنت ويسحب ريناد لحضنه ويقول وهو يضمها: آسسف..
تطير عيون البنت من الصدمه: هتان يعتذر؟؟؟؟ ويضم هالبنت بعد؟؟
ريناد تجمدت من الخرعه.. خيير يضمني..
هتان يدفن راسه برقبة ريناد ويقول قريب من اذنها: خلك كذا لين ماتروح.. اعتبريها رد جميل..
•
تتوتر ريناد زياده وهي تناظر للبنت اللي ورى هتان وكانت تبكي وتشتم هتان.. تحط يدينها ريناد على ظهر هتان وتبادله الضم..
ويلف هتان وهو ضام ريناد ويقابل البنت ويقول: عرفتي ليش ماراح اتزوجك ولا راح احبك؟؟ هذي حبي..
•
تشهق ريناد بخفه وتحاول تبعد عن هتان بس يشد بيدينه عليها..
تهز راسها البنت بخيبه وتطلع من الشقه.. وتسمع ريناد صوت الباب يقفل بقوه.. تحاول تفك حالها بس مثبتها هتان..
ركلته برجلها مع رجله بقوه وابعد عنها وهو يتوجع وقال بعصبيه: شفييييييك؟؟؟ تبيني الظاهر اسوي بك مثلها...
•
ريناد بنفس العصبيه: وش اللي سويته قدامها؟؟ جاريتك بهالشيء.. اعتقادي اني اساعدك انها تبعد عنك.. بس شكلك لقيتها فرصه..
هتان بغرور: لاتخدعي نفسك.. قلت لك من اول.. انتي مووو نوعي المفضل.. وانا سويت هالشيء عشان تبعد عني ذي ولاعاد تفكر انها ترتبط فيني.. فهمتي؟؟
•
ريناد: واذا كان هذا قصدك ليش مابعدت يوم طلعت؟؟ بقيت متمسك فيني لين ضربتك لييييش؟؟
هتان يروح لغرفته ويقول بسخريه: مو شغلك؟؟ ويالله تجهزي بنروح المدرسه.. عشان نفتك منك..
ريناد بنفس النبره: احسن بعد.. وش بفقد؟؟؟ نومة الصاله مثلاً؟؟ والا عدد البنات اللي يدخلن ويطلعن من غرفتك؟؟ والا عدد المرات اللي اصحى بها على وجود شباب فوق راسي من اخوياك؟؟؟
•
هتان كان واقف عند باب غرفته بيدخل بس وقف يسمع كلام ريناد... عصر مسكة الباب بيده... يعني ماكانت مستانسه بالعيش معي؟؟؟ دخل غرفته بدون مايرد عليها وسكر الباب بقوه..
•
تغمض ريناد من صوت الباب وتقول: الا تطيح هالشقه لها يوم.. كل من جاء سكر الابواب بقوه.... سكتت شوي وبعدين قالت بصوت عالي: وش دخللل امي بالشقه ان شاءالله تطيح فوق روسكم انا وش علي؟؟...