ولد حبنا من رحم المعاناة

٢

من طلع مهاب حاچتني بيبي

..رونق بيبي ابن عمچ لو حاچاچ لتتجاهلي لو تغثي عيب وتعرفي يخاف عليچ ويريد خاطرچ شنو لزمة هالحچي الگلتي وخليتي يروح ضايج وهوه عنده امتحانات وكل همه ينجح يابيبي ليش تردين تسوين مشاكل بين الولد وأهله

..هسه اني صرت اسوي مشاكل چي اريد اشوف امي
بعدين ميمهني لاهوه ولا اهله انتو خوش لاگينها بس اني متردون مني مشاكل ومتردون اذكر امي حته لاعمي يضوج گليله بعد ماله علاقه بيه ومن هاليوم اني بعد مااحاجي طلعت اسوي مشاكل

..ولچ رونق موتيني شنو متحاجي هوه اكو يوم يمر ميشوفچ شمحتاجه شتردين وحته هوه وابو يتشاكلون من وراج شكم مره خليتي ابو يطرده بسببج لأن يعلي صوته ويضوج

..هذا هوو بيبي مااحاجي بعد وهم الوحيد الي بهالبيت يهمه امري حرموني منه اني مااريد يصيرله شي بسببي خل يتركني بحالي
اني امشي اموري وي البنات كلش كافي رفيف ورسل يحبني
وذوليج الباقي هم مالي علاقه بيهن بعد بس رحموني

حچي بيبي ضوجني وذكرني بكلشي صارلي من اول ماوعيت ع الدنيا

اتذكر شلون چانت امي عايشه هنا
وياي وچنت انعم بالدلال والراحه وناسيه نفسي اني يتيمه وينقصني اب چنت مرتاحه
بس چانت تصير مشاكل زوجة عمي ابو قائد جانت قبل تحب امي بس من اجت وگعدت سوه وياهم بنفس البيت وابوي متوفي بدت تغار وتخاف منها اخاف ابوي يتزوجها چانت تلح بالمشاكل وياها وتخبث عليها ولمن يجي عمي تبيين نفسها هيه المسكينه
عمو صح جان يحبني كلش بس اتذكر شلون يعامل امي وشلون يحجي عليها اضوج منه
چان من تشكيله زوجته يگلب البيت وحچايه منا ومنا تصير عركه بيبي صح تحكم ومحد يخالف حچايتها بس هيه هم تعبت وملت
اتذكر من چنه جهال
تصير المشكله وبس تعله الأصوات نروح وره البيت اما نلهي نفسنه باللعب او نخلي ايدينه على اذاناتنه منحب المشاكل منريد نسمع شي البيت چان يصير كأبه اموت من هذي الأجواء

چنت بهالمرحله بعد ممتسجله وچانت رفيف اكبر مني بسنه ورسل ونور بيناتنه اشهر كلنه نفس الأعمار
من الولد چان مهند بگدنه بس هذا ابن عمي الزغير وحيد اهله ومدلل يجي يخرب لعبتنه ويمشي

قائد چان چبير بالنسبه النه چان صف رابع اعدادي چنه نخاف منه ونحترمه بس هوه يجبنه وماله علاقه كل همه دراسته وبس
يجي وراه بالعمر مهاب
مهاب اكبر مني بثمن  سنوات جان جبير بالنسبه العمرنه هم ميتقرب النه من نلعب بس يخاف علينه وينصحنه
من يتجمعون ولد المنطقه ونريد نلعب وياها ميقبل علينه يگول انتن بنات لعبن وحدچن
بذاك العمر چنت اموت منه شايف نفسه شوفه ع اساس هوه عمنه لو وصي علينه ميخلينه براحتنه
بس من چانو يعاركون امي وچانت تبچي چان هوه يگعد يمها يهديها ومرات يبچي وياها يصبر عليها
امي چانت حيل قريبه الأولاد عمي يحبوها مااعرف ليش يمكن چانت تنطيهم او تبين الهم حبها
بس الكل چان يخاف من امه ومحد يقربلها بس مهاب يجي يمها ويهديها وميطلع الا لما يخليها تاكل وتفك ضوجتها يلله
چان يتحمل انواع الرزايل من امه ميهتم
من ذاك الوقت بديت اتقبله بس اعاند احب اعانده واضوجه مثل ميضوجني