#روايه_كشف_حساب
الحلقه التاسعه
يس / لقيتوا الفلوس او طقم السوليتير
الظابط / لا بس يعنى معلش استحمل رزالتى انت قولت لاى حد تانى عن انك رايح فين اليوم ده غير ميرنا والدتك مثلا
فريده / افندم
.......
الظابط / انا بسال بس مش بوجه لحضرتك اى اتهام بس اللى اعرفه ان علاقتك بيها مكنتش حلوه و انك مكنتيش موافقه على جوازهم
يس / ايوه بس مش هتخطفها يعنى والدتى عمرها مهتعمل كدا ابدا مش كدا يا ماما
فريده / دا تخلف مجرد انكوا تفكروا انى ممكن اعمل حاجه زى دى دا فحد ذاته تخلف
الظابط / يعنى حضرتك بتقول يا استاذ يس ان والدتك كمان كانت عارفه انتوا رايحين فين
فريده / انا مليش اى علاقه بالموضوع ده و كلامك ده انا هحاسبك عليه
الظابط / طب ياريت حضرتك تفكرى معايا بصوت عالى مين له مصلحه فى خطف عروسه ابنك
فريده / دى مجرد حادثه بالصدفه عادى جدا الخطف و السرقه فكل مكان حظ ابنى الوحش وقعه فى ايدهم
الظابط / بس ابن حضرتك سليم تعويره صغيره و كمان العربيه كل المفقودات هى العروسه و شبكتها و فلوس فستانها يعنى كلهم حاجاتها هى
فريده / ميمكن هى اللى عملت كل ده
يس / و هى تعمل ده ليه
فريده / طمعت فى الفلوس
يس / طمعت فى ملاليم و سابت الملاين
الظابط / بالظبط ده اللى بقوله
فريده / انا مليش اى دعوه يا حضره الظابط لو حضرتك عندك دليل واحد ضدى ياريت تقبض عليا اى كلام تانى معنديش و مش هسمحلك تتهمنى
تليفون الظابط يرن
الظابط / الو ... يعنى ايه ... مش معقول .... طب تمام سلام
يس / خير
الظابط / مش عارف اقول لحضرتك ايه تخيل ملقيوش و لا بصمه فى العربيه و سبحان الله و لا حتى بصماتك انت او بصمه الانسه همسه
يس / بمعنى
الظابط / ان اللى عملوا كدا ناس محترفه
يس / و المطلوب منى
الظابط / حضرتك واضح انك بقيت كويس و تقدر تيجى معايا هعرض عليك صور يمكن
يس / يمكن ايه كلهم كانوا لابسين خوذ انا مشوفتش اى حد
الظابط / انا بحاول اساعدك بس ياريت حضرتك تتفهم الموقف حضرتك مشوفتش الخاطفين و لا فى اى علامه بتميزهم و مفيش و لا دليل فى مسرح الجريمه و العربيه سليمه و مفيهاش اى بصمات
يس / والله دى شغلتك انك تلاقيها
الظابط / بص لو ليك اعداء او اى خلافات مع اى حد
يس / مليش
الظابط / يبقى قدامنا احتمال من اتنين الاول ان كل ده صدفه زى مالست الوالده مبتقول و ممكن الانسه همسه تكون قالتلهم انت مين و فى الحاله دى هيطلبوا فديه و التانى انه حد عارف كويس انت مين و برده اكيد هيطلب فديه
يس / ايوه بس مفيش حد اتصل خالص
الظابط / مفيش قدامنا غير اننا نستنى و على العموم احنا وزعنا صوره الانسه همسه و صور الطقم السوليتير فى منشور يعنى اى حاجه منهم هتظهر هنعرف علاطول
يس / يعنى هفضل حاطت ايدى على خدى لحد ميحاولوا يبيعوا الطقم
الظابط / حضرتك تعرف ان لو مكنش تليفون الانسه همسه وقع منها يوم الحادثه فى الشارع كان ممكن نلاقيها بس للاسف الراجل اللى لقاك فى الشارع افتكره تليفونك و جابه معاك
يس / انا تعبت كل ده كلام اللى يهمنى همسه
الظابط / لو اتوفرتلى اى معلومات تانيه اكيد هبلغك
الظابط يمشى
فريده / دا ظابط فاشل اصلا قال جاى يتهمنى انا قال
يس / انا متهمتش حد بس و رحمه بابا اى كان اللى عمل كدا مهرحمه ابدا
فريده / طب قوم ارتاح
يس / سيبينى شويه يا ماما لو سمحتى انا بجد مش طايق نفسى
فريده / انا مقدره مشاعرك
هايدى تدخل
هايدى / ازيك يا خالتو عاملين ايه ازيك يا يس انا كنت فى لندن بعمل شوبينج و جيت جرى اول معرفت اللى حصلك
يس / انا كويس يا هايدى
هايدى / مفيش اى اخبار يا خالتوا
فريده / لا يا حبيبتى
يس / هايدى انا محتاج منك خدمه العمر مش انتى ليكى اصحاب فى القنوات الفضائيه
هايدى / اؤمرنى طبعا اى حاجه عشان خاطرك
يس / انا عاوز اطلع فى التليفزيون
هايدى / بسيطه انت قولى عاوز تطلع امتى و انا اظبطلك الموضوع كلهم صحابى و حبايبى
يس / حالا هطلع حالا عاوز اطلع احكى اللى حصل يمكن حد يساعدنى ارجوكى ساعدينى
هايدى / طب ادينى عشر دقايق هتكلم فى التليفون
هايدى تطلع بره الاوضه و فريده وراها
و شويه و هايدى تدخل
هايدى / ابسط يا عم انا كلمت معده برامج صحبتى و قالت انك هتطلع النهرده بالليل الساعه عشره بالليل
يس / تمام اوى انا لازم اروح البيت اجهز نفسى هى فين ماما ثانيه هطلع اناديها
يس يطلع بره يلاقى فريده بتتكلم فى التليفون
فريده / لا خلاص مفيش داعى ... ايوه هى جت من عند ربنا ..... فلوسك محفوظه ... مع السلامه
يس / بتكلمى مين
فريده / ايه ده انت هنا من امتى ادخل عشان ترتاح
يس / كنتى بتكلمى مين
فريده / يا حبيبى انا كنت بكلم واحده صحبتى فى شركه سفريات كنت مجهزالكوا رحله شهر عسل تحفه فقولت اللغيها مؤقتا لحد مهى تظهر
يس / طب يلا عشان نروح
فريده / يلا يا حبيبى
......
فى الفيلا
ميرنا / هو الاستاذ يس جاهز
يس ينزل من فوق / انا جاهز جبتى الفلوس
ميرنا / ايوه مكنش سهل فى الوقت ده بس الحمد لله قدرت اللم المبلغ المطلوب و طبعا احتجت تلاته من حراس الشركه عشان يجوا معايا ينقول مبلغ زى ده
يس / شكرا يلا بينا
فريده / ابقى طمنى
....
فى التليفزيون
المزيع / النهرده معانا حادثه كل اللى اقدر اقوله عنها انها غامضه و ابعادها مش مفهومه واحد و خطيبته رايحين يستلموا فستان الفرح فجاه يطلع عليهم حرميه و يخطفوا العروسه و يمشوا و معانا الاستاذ يس بدران العريس يحكيلنا ايه اللى حصل
يس / والله انا معنديش اى معلومات اكتر ماللى حضرتك قولتها كل اللى حصل اننا لقينا موتوسيكل فى الطريق وواحد مرمى جنبه فرملت و نزلت اشوفه لقيت اتنين تانين بيثبتوا همسه خطيبتى بالمطاوى و ضربونى على دماغى و سرقوا العربيه و هى جواها و مشيوا
المزيع / و لقيتوا العربيه و جواها هدوم الانسه همسه
يس / ايوه البوليس لقاها
المزيع / تمام و بعدين
يس / المشكله ان مفيش اى بصمات او اى حاجه توصلنا ليها فمكنش قدامى حل بعد ربنا غير حضرتك المذيع / قدامكم على الشاشه صوره الانسه همسه المخطوفه
يس / اى حد عنده اى معلومه عن همسه او عن الخاطفين ياريت يبلغنى و دى جايزه اتنين مليون جنيه كاش مقابل اى معلومه صحيحه عنها
يس يطلع شنطه الفلوس عالمكتب و يفتحها
المذيع / اتنين مليون مبلغ كبير
يس / انا جهزت رقمين هما مع حضرتك
المذيع / ياريت المخرج يطلعهم عالشاشه
يس / اى حد عنده اى معلومه ياريت يبلغنا الرقمين دول شغالين اربعه و عشرين ساعه
المذيع / رقم زى ده ممكن يخلى اى حد يتكلم طبعا
يس / و من هنا يناشد الناس همسه بجد بنت يتيمه و ملهاش حد ارجوكوا ساعدونى اساعدها الفلوس مش مهم المهم عندى همسه ترجع سليمه
المذيع / حضرتك هتعمل ايه دلوقت
يس / انا هلف على كل القنوات النهرده و بكره عشان اتاكد ان كل الناس شافتنى و هتساعدنى
المذيع / شكرا يا استاذ يس و انا من كل قلبى اتمنى انك تلاقى خطيبتك باقصى سرعه و كمان اتمنى من الناس انها تتحمل المسؤليه و تتحرى الدقه فى المعلومات اللى هتيجى
.....
فى العربيه
ميرنا / تفتكر حد هيتصل
يس / معدش فى قدامى اى امل تانى و مش عارف اعمل ايه اكتر من كدا على يدك
ميرنا / على كل فى اتنين موظفين قاعدين على الرقمين دول زى محضرتك امرت
تليفون يس يرن
يس / الو .... حاضر هاجى لحضرتك حالا
ميرنا / خير
يس / اطلع يا عم نجيب عالقسم من فضلك عاوزينى هناك
.....
فى القسم
الظابط / كان المفروض تستشيرنى قبل متعمل حاجه زى دى
يس / انا مستعد اعمل اى حاجه عشان همسه ترجع
الظابط / اللى خطفوها ممكن يخافوا و يقتلوها انت متخيل انها سهله
يس / مكنش قدامى حل تانى
الظابط / على كل احنا حطينا رقمك انت و الرقمين اللى طلعوا عالشاشه للمراقبه و هنتابع معاكم المكالمات اللى هتيجى
ظابط تانى يدخل
التانى / بعد اذنك يا فندم
الظابط / خير
التانى / فى مكالمه جت عالرقم اللى الاستاذ يس اعلنه و يتقول ان البنت موجوده فى المكان ده
الظابط ياخد ورقه من الظابط التانى
الظابط / حدد مكان المكالمه جايه منين و ابعت قوه تجيب اللى اتصل و جهزلى قوه تانيه تطلع معايا حالا للعنوان اللى فى الورقه
يس / انا هاجى معاكم
الظابط / دا فيه خطوره كبيره على حضرتك احنا هنروح و لو فى اى جديد هنبلغك
يس / انا مش هسمحلك تروح منغيرى انا من حقى اجى
الظابط / يا سعيد احبسلى الجدع ده هنا فى المكتب و متخرجوش الا لما اجى عن اذنك
انتهت الحلقه اذا اتممت القراءه متابعه مع ذكر الله.
