#zainab_alnajar
لـن تتخـلــصي مِنــي ..
فَـ أنـــا :
أعيـشُ فــي ذاكـــرتِـكَ فـي الجــزءِ الـذي لَـم تُخبــري بــهِ احــــداً !!
مثل كل العوائل بذلك الوقت الجو حار والكهرباء مو زينة كل يوم المغرب تصعد جوان ترش السطح بماء وتفرش فراش حتى يبرد و يصعدون اهلها ينامون بالليل
كانت عيون جلال تراقبها كل يوم و ماكو وسيلة اتصال بينهم غير اشارات بأيده وابتساماتهم ومرات تروح لبيت جدها تتصل بي
_ جوان حبيبي مشتاق اشوفج من قريب والله عذاب انتي مقابيلي وما اگدر اتقرب واشوفج
_ جلال لا تتصور بيوم راح اطلع وياك صح اني صغيرة بس ما اغلط وما اگدر اسوي شي بدون علم اهلي
_ حبيبي واني ماريد أأذيج اصبر شوية تكبرين واخطبج اريدج حلالي واكيد اذا خطبتج هسه اهلج يرفضون...
_ واني هم انتظرك العمر كله حبيبي
...
..
..
مرت الأيام وهاي بدأت سنة دراسية جديدة .. جوان بنفس مستواها .. مرحه ومحبوبة .. وجلال بنفس عادته ينتظرها من تروح وتجي للمدرسة ويملي عيونه بشوفتها .. كان حبهم طاهر مو اكثر من نظرات بريئة وابتسامة وكان كافيهم وماطلبوا اكثر .. ولحد هاي اللحظة حبهم سر بين قلوبهم البيضة .. كل يوم يصعدون بالسطح يأشرون بأيديهم واحد للثاني السطوح بعيده اصلا مو قريبة
بيوم صار الي مو بالحسبان .. كانت بنت جيرانهم بصف بيت جلال بالسطح اسمها حلا اكبر من جوان بثلاث سنوات وياها بالمدرسة بصف سادس اعدادي انتبهت عليهم وجن جنونها لان كانت تحب جلال وصديقة اخواته وتروح لبيتهم .. نزلت بسرعة وبلحظتها راحتلهم وحجت الخواته كل الي شافته .. الاخوات اكيد ينحازون لصديقتهم وصديقتهم ماقصرت وضافت من عدها كلام تكرهم بجوان اكثر .. التزمن السكوت ماحجوا لأهلهم
جوان وجلال مايعرفون ب حلا شافتهم
الصبح طلعت جوان للمدرسة مثل كل يوم بس بالواقع ماكان مثل كل يوم.. منين ماتفوت تشوف نظرات البنات غريبة .. او تشوف يباوعون عليها ويتهامسون .. دخلت صفها .. شافت صديقتها گاعده بغير مكان
_ هلو نور .. ليش هنا گاعده تعالي ارجعي يمي
_ لا هنا مرتاحة خليني
استغربت .. خلت حقيبتها وطلعت وگفت يم مجموعة بنات يسولفون .. تفرقوا وتركوها .. راحت يم غيرهم وصار نفس الشي .. بهتت جوان ماتعرف شنو القصة صارت غصة بصدرها تريد بس تعرف شنو الصار
شافت بت خالها اجتي عليها
_ جوان المدرسة كلها تحاجي عليج .. سمعت زهراء وفاطمة بيت ام جلال يحجون عليج وحلا يمهم مبتسمة يگولون عدها علاقة بأخونا يضحك عليها شوية ويعوفها .. انجنت جوان شلون وشنو راح تسوي .. ما تحس غير دموعها تصب والعيون كلها عليها .. دخلت الدروس مثل شخص مذبوح على النص تريد الدوام ينتهي حتى تروح تتصل بجلال ضايعة ماتعرف شنو تحجي .. تنفي الكلام .. بس منو يصدگ بيها بعد الكلام الي نشرته خواته وحلا
خلص الدوام وطلعت تمشي بسرعة ودموعها تنزل اسرع من خطواتها .. جلال منتظرها مثل كل يوم بس اليوم نظرتها عتب وحسره وقهر وتحاول تبعد نظرها عنه .. صار مو بعقله هاي شبيها بنيتي اليوم هيج كان يسميها
مشت تجاوزت بيتهم وراحت لبيت جدها عرف راح تتصل بي دخل لبيتهم بسرعة وفعلا اتصلت .. ما يسمع غير صوت شهقاتها
_ حبيبي بس فهميني شبيج ياعمري الصبح مابيج شي .. شنو مامجاوبه بأمتحان .. طمنيني ليش دموعج موتيني من شفتهن
_ جلال المدرسة كلها اليوم تدري بينا وبعلاقتنا ليش حجيت الخواتك بس گولي وصدگ تضحك عليه وتعوفني .. ليش شسويتلك اني بس گولي ليش تأذيني
_ لج فهميني شويه شوية شتحجين محد يعرف الله يشهد عليه .. وشلون ااذيج وشلون اگدر اعوفج هو اني مصدك قبلتي تحبيني جنتي حلم بالنسبه الي وتوني اريد احققه
_ منين عرفوا لعد فاطمة وزهراء وحلا انفضحت بكل المدرسة جلال كل صديقاتي مايحجون ويايه وكل وحده راح ترجع تحجي لأهلها .. شلوووون
_ روحي جوان شويه واتصل لا ترجعين لأهلج ابقي قرب التلفون
شويه ودخلوا اخواته يضحكون وياهم حلا
_ هههه شفتي شكلها شلون صارت .. حيل تستاهل .. مايدرون بجلال ينتظرهم
_ شنو هذا الحجي الي حاجياته على جوان منين جبتوا
_ اهااا شبسرعة نقلته الخاتون تونه دخلنا .. اي قابل جذبنا .. صاعده السطوح وادور ولد اسكت اسكت هاي يومية ويه واحد
_ انجبي زهراء منين جبتوا هذا الحجي ،، ويصرخ بصوت عالي ..
_ حلا شايفتكم بعيونها شلون تأشرلك من سطحهم الماتستحي المامتربايه
_ ولج منو على هاي جوان تحجين .. لج هاي اشرف من هاي صاحبتج المنافقة .. تدرين صارلي شگد احبها وماتقبل تحاجيني لج ضليت اتوسل يلا قبلت بس تأشرلي .. التحجين عليها گلبها ابيض مو مثل گلوبكم السوده .. لج هاي تسوى مئة وحدة مثل حلا .. امشي اطلعي برا وديري بالج تعتبين البيت ترى اروح انطي لأبوج واخوانج رسائل الغرام الي دزيها الي واحجيلهم حركاتج الخايسة
حلا ودموع التماسيح _ .اني شعندي وياك كذب هذا الكلام وفاطمة وزهراء انضموا الصديقتهم وتهجموا على اخوهن بالكلام لحد ما ثارن اعصابه فتح الباب طلع حلا ورجع ضرب خواته وهنه مستمرات بالغلط على جوان .. فجأة دخل ابوهم وسمع الهوسه صاح بصوت الكل سكتوا
_ هاي شكو شصاير ،، بدأت تحجي زهراء وسمعوا الباب ادك طلع جلال يشوف منو وتركهم واكيد راح يحجون لابوهم الي يريدوا يعرفه
اول ما فتح الباب ليث صديقة لزمه من قميصة وعيونه حمر من العصبية .. ولك جلال امشي ويايه بدون ماريد احد ينتبه وكافي فضايح لحد هسه
عرف قصد ليث صعد وراه على الدراجة وراحوا بمكان هادئ من منطقتهم نزلوا وضربه ليث حيل .. _لك ليش .. ليش دنس برائتها .. ليش هاي الفراشة سيرتها تصير على كل لسان .. تدري جان كل شباب منطقتنا يتمنون نظره منها اذا ماتگدر تصونها ليش تأذيها ويضربه مره ثانية .. جلال ما رفع ايده ولا دافع عن نفسه حاس بذنب ويمكن ضربات صاحبه طهر روحه من هاي الذنوب .. بس نزلت دموعه اول مره ومو اخير مره .. شنو عبالك ما منتبه عليك من تتبعها تدري بيها اقاربي بس جنت مأمن عليها گلت راح يصونها .. بس تنفضح من وراك تالي !! واليقتلني الناس صارت تحجي حجي ماصاير
_ ليث والله احبها واريدها والله ما اضحك عليها .. هاي حلا شايفتنا من السطح ونشرت السالفة
_ وهم انت السبب غير تأخذ حذرك وتحافظ على البنية اذا هي طفلة وفتحت عيونها عليك مو تستاهل تحميها حتى من نفسك بس انت شسويت ماهتميت للناس لو ماكانت حلا كان غير شخص وتعرف منطقتنا شنو ..
_ هسه گولي شأسوي ليث
_ وحده من اثنين لو تروح تخطبها اليوم .. لو تتركها فترة خلي ناس تنسى السالفة شوية وهم ما اعتقد ينسون
_ اي راح ارجع احجي ويه امي وابويه واروح اخطبها يكون يقبلون اهلها
_ بالاول گول اذا يقبلون اهلك واعرف ابوك وتفكيره الطائفي گوم جلال شوفلك حل لا تضل گاعد البنية راح تتأذه من وراك هواية
رجع جلال اول ما دخل جان ينتظره ابوه
_ يابه عندي حجايه وياك
_ اي لو تموت ما اروح اخطبلك بت ال… . امشي كلب مالگيت الا هاي تحبها .. والله تحلم تخطبها بيوم ونقاش ماكو .. هسه تخابر او تروح تگولها بطريقتك وتعوفها افتهمت لو لا .. واذا بقيت وياها اني بنفسي اروح اگوله لأبوها بنتك مسويه علاقة ويه ابني واحجي الي ماصاير
قِيلَ البقاء للأقوى
إنقرض الديناصور .. و نجت الفراشة
هل ستنجو فراشتنا يا ترى
