Poetry

Paalam

Sisimulan ko sa salitang paalam hindi dahil sa gusto ko ng mamaalam kundi dahil gusto ko lang mapanatag kaya, Paalam

Paalam sa mga tawanan at asaran natin sa isa't isa na tila may sarili tayong mundo kapag tayo lamang dalawa

Paalam sa mga kamustahan na laging ako ang nauuna dahil ako lang naman talaga ang may gustong lubusan kang makilala

Paalam sa lahat ng ating pinagsaluhan  na tila isa na lamang magandang alaala

Ngunit hayaan mo naman akong sariwain at muling manumbalik sa panahong akala ko ay tayo na

Naalala ko nung nakita kita, nakaupo ka sa isang sulok, nakatungo habang nakapikit ang iyong mga mata, nilapitan kita

Hindi ko inakalang sabay nating sasariwain ang sakit na dulot sa atin ng nakaraan

Naging sandigan sa bawat hampas ng kapalaran

At unti-unti kong natagpuan, unti-unti kong natagpuan ang aking sarili na nakangiti habang ika'y malayang pinagmamasdan

Naalala ko pa noong sinabi mong mahalaga ako sa'yo abot tenga ang ngiti at kilig na nararamdaman ko

Magkadaop-palad ang aking mga kamay at umaasa, umasa ako, at ayun na nga, umaasa lang ako

At pinaniwala ko lang ang sarili ko na parehas na yung nararamdaman natin dahil hindi na biro yung nararamdaman ko para sayo

Naniwala ako na pinagtagpo tayo na kahit mali ang panahon ito yung tama para sa atin, ikaw yung tama para sa akin

Pero mali na naman ako, mali na naman yung inibig kong tao

Kaya ito ako ngayon nag-iisa, mag-isang  sinasariwa lahat ng mga alaala

Alaalang nakatatak na sa isip at nakatarak sa puso kong walang tigil ang pagdurugo sinta

Paalam sa mga alaalang hindi na natin kayang burahin pa

Pero salamat dahil ikaw ang pumawi sa mga luhang ikaw din ang dahilan

Salamat dahil ikaw aking naging sandigan sa mga oras na wala akong masandalan

Salamat sa mga alaalang iyong iniwan kahit ako yung naiwan na kahit gusto kong sumama ay hindi na pahihintulutan

Salamat sa mga alaalang aking babalikan kahit nakakapagod na at wala na kong aasahan

Kaya magpapahinga muna ako dahil nagdurugo na ang puso ko

Dahil hindi ko na din kayang makipaglaro sa tadhana na lagi naman ako ang talo

Hindi ko na din kayang itago pa yung sinisigaw ng puso ko

kaya heto ako ngayon sa harap ng maraming tao sinasabi ang mga nais kong sabihin sayo

Gusto ko sanang ipaglaban ngunit wala naman talaga akong laban

Pasensya na, hindi ko kasi kayang sabihin sayo ng harapan na mahal kita

Hindi ako nandito para sumbatan ka 

Nandito ako para magpasalamat, nandito ako para magpaalam

Paalam kasi alam kong masaya ka na

Hindi nga lang dahil sakin

Masakit man sabihin

Na mas masaya ka sa piling n'ya

12/04/2017
jemayfernz