شُتات انثى

الاول

#شُتات_انثى

nada hs

adaena7 واتباد

الجزء الاول

...

كان يوم مميز.. غايبه من المدرسه.. عاجبني الجو كلش..
يوميه اروح للدوام واطير النومة الحلوة.. هل يوم بقيت بفراشي .. كعدت لل10.. مااعرف شعجب خلتني امي نايمه لهل وقت..
عدوها النوم المتأخر.. سواء سهر او كعدة..
كعدت فرحانة. ماكو دوام.. لسه اتمدد واطكطك بأديه بفراشي..
كمت صبحت ع امي.. كانت مشغولة .. تركض وتشتغل .. والمسعده مرت اخويه هيثم مخليه رجل ع رجل وتباوع ع مسلسل مصري..
شفتهه هيج.. عصبت.. امي كبيرة.. مو مال هيج شغل وركض.. وهاي مسفطه وكاعده.. الله اعلم شتسوي بأمي من نكون مموجودين اني واختي..
كملت ريوك وكمت اساعد امي.. امشي واذب حجي لحنان..
شلت العاب ابنهه وهوسته.. شمرتهن ع الدرج.. الي زادني غضب انها ممهتمه.. طلعت تلفونهه وكعدت تخابر..
حاولت الهي نفسي باي شي اتكفى الشر واسكت.. هيثم اذا عرف احد غاث مرته بعد هاي الالله يكتبها علينا..
رحت طلعت ملابسي مال مدرسة.. طبعا اكو غساله.. بس محد يستخدمها بس لاخواني ال2 وابويه.. اما اني وامي واختي بأدينا نغسل..
خليت الطشت وبديت اغسل ع كيف كيفي.. اصلا باجر جمعة..
لا امتحان لا شي.. ادندن ب ياطيبة. ياطيبة ياداوى العيانا..
اسمع عياط كلش قوي..
مصدكت اذني.. نعاد الصوت.. هاي امي دتصرخ..
رجليه كوه شالتني.. نشفت ايدي بثوبي ورحت اركض..
وصلت للمطبخ..
صفنت..عبالك مو حقيقي الي شفته! شلون وليش؟
اخويه هيثم شايل اختي كوثر.. شمرهه بالكاع..
صدرهه متروس دم.. وكعت من ايده جثه .. لا نفس ولا روح..
اريد اقرب واخاف.. مدداعرف شصاير؟!
ابويه نار صاير.. رفسها ابطنها وراد يكطعها وهي منعرف اذا صدك ماتت لو بعدها!
امي تصرخ ومكابلته وادك ع وجهه.. اخويه فيصل دخل للبيت.. مفجوع
مرت هيثم هم تباوع بوجهي وعيونه تسأل شكو
شبيهه كوثر ومنو سوه بيهه هيج..
كانت لابسه جبة لونها رصاصي.. اكو زروف من صدرها.. مااعرفت هاي مال شنو.. بس اشوف الدم نابع من هل مكان ومنتشر ع كل بطنها..
بقيت صافنه ومامنتبهه لليمي.. اريد افسر الي صار!
مااشوف اله ابويه نزل ع امي دك ضرب.. شنو الي اجه بيده ضربهه بي..
شال الطاوة وركعهه ع راسهه اكثر من مره..
عبالك اني انشليت.. مااكدر اسوي شي.. ولا اكدر اصرخ..
اشوف حنان ادخلت وتريد تبعد ابويه عن امي.. استلمها هي الثانيه دك..
زين شكو.. شصاير..
ومااحس نفسي اله صرت بينهن.. والدك علينا صار بفلس..
ابويه يضرب ويكفر ويغلط..
-ولج تربيتج هاي! ولج صخمتي وجهي الله يصخم وجهج..
ماصرت اعرف منو الي ديضرب.. تكومنا بنصهم.. والضرب اكثر من ايد تنمد علينا..
اسمع ناس دخلت للبيت.. جرونا جر من بين اديهم.. شمرونه بغرفه امي وانقفل الباب علينا.. صوت وصياح بره!
ابويه يسب ويغلط ونوب يرجع يكول غسلت عاري بيدي..
كابلت امي وكمت ادك ع وجهي..
-يمه احجي شكو! يمه شبيهه كوثر يمه من سوه بيهه هيج!
اباوع لامي كل خرطة بخدها تعوف الدم ينبع..
ماتحجي بس تخرط بوجهه..
-وج يمه احجييييي! شصاير؟ شبيهه كوثر جاوبني!
حنان تشهك وتبجي.. وجهه احمر من الضرب وشعرهه منفوش..
وكفت كبالي وعاطت:اختج الله اعلم شمسويه! الله لا يرضى عليج انتي وبناتج! الله لا يوفقجن..
اباوع لامي انتهت.. بس تملخ بروحها.. لزمتها من اديها اثنينهن..
-كافي اروحلج فدوة.. دفعتني.. ماتخيلت امي بهل قوة.. دفعتني وكعت للكاع..
تخبلت واله شوي انجنيت.. بس عياط وصراخ وهوسه برا مال زلم..
منظر كوثر مايروح من عيني.. شبيج ياكوثر..
الصبح رحتي شحلاتج.. لبستي وضحكتي .. كنت اباوعلهه مسويه نفسي نايمه.. اشوفهه هيج وارجع اغمض عيني فرحانه..
كعدت ع صفحة.. خليت راسي بين رجليه.. محد يجاوبني .. امي كطعت روحهه.. لا بقى شعر براسهه ولا وجه سالم..
حنان تروح وترجع داخل الغرفه وتدعي علينا احنا وامي..
اله شوي اكوم اكطعها..
انفتح الباب.. ودخلن جارات امي كومنها..
اني ع صفحة وبس اباوع ماعرفت شكو..
رحت ورا امي.. كعدنهه بالصاله.. لمن شعرهه وذبن الشيله عليهه..
وهي مستمره بس تريد تكطع روحهه..
بقيت اباوع وابجي..
وحده من الجارات كالت:الله يغفر الهه.. كافي ياام هيثم كافي..
تجاوبهه امي وادك ع وجهه:فضحتني.. يمه طينت راسي.. يمه منين هذا العمل بيج هيج.. منيييييين!
اسمع اثنين يتهامسن.. مايدرن بيه اني وراهن..
تكلها:ادري ماحسو بيهه ماشافوهه ! نوب حامل 3 اشهر؟!
ترد عليهه:والله حرامات ذيج الزلم هيج ينحط راسهم بالكاع من وره هيج وحده استغفر الله استغفر الله!
كوثر حامل؟ منين؟ ولكم شنو الي ديصير!
كوثر شلون تسويهه! وشلون عرفو بيهه حامل..
كرصت نفسي.. اريد اطلع بحلم.. مااريد السمعته يطلع صدك...
بس لا .. هذا صار.. نسوان شي تبجي ويه امي وشي تتهامس..
اجو نسوان بيت عمي.. كابلن امي ودك لطم.. اشوفهن وازيد بجي ومااعرف شسوي.. حتى محد شايفني اصلا بنص هاي الهوسه..
خفت اتحرك خطوات.. خفت امشي شويه ويصير كبال عيني الدم مال كوثر..
اعرف هم اخذوهه لان مابقى واحد من الزلم بالبيت.. بس زلم غربة بالطرمه.. تقدمت.. شفت مكانهه الذبوهه بي اول ماجابوهه..
انعصرت عصر.. اختي تروح وتموت؟
وموت بفضيحة؟
رجعت يم النسوان.. كعدت بصف امي وانحب وابجي صوتي راح..
ولج كوثر شلون هيج صار بيج شلون.. مو اني اختج.. ليش ماحجيتيلي..
ليش ماكلتي..
رجعت كلت منو يكول كوثر صدك هيج؟ منو يكول حامل..
بعد ساعات من الدك واللطم.. البجي والصراخ..
امي انتهت.. لزمنهه كوه.. غطنهه بعبايه ومدري نامت مدري فقدت..
رحت لمرت عمي.. كعدت كبالهه..
مدنكة ومكسوره.. هي منا شلون تحبنا..
-عمه احجيلي شصار.. كوثر شبيهه ..
هزت ايدهه وبرطمت معاجبهه:ههي.. وانتي وين عنهه؟ ماحسيتي ع اختج! ماشفتي بطنهه صخامهه!
-الله يخليج احجيلي شكو اريد افهم كوثر منو كتلهه!
كالت:داكين ع ابوج من المستشفى.. يابه تعال بنتك متخربطه.. راح الهه ابوج طلع تحليلهه وكلوله حامل..
اسمع وعبالك مدايحجون عن كوثر.. لان ابد مااتوقع ولااتخيل هيج تسوي..
اخذهه ابوج.. بنص الطريق نزلهه وشبعهه دك.. وخابر اخوانج وكتلوهه وغسلو عارهم بديهم..
تحجيها كأنها منتصره ع عدوها.. تكمش ايدهه حيل مثل الي لازم سلاح وتأشر:غسلو عارهم السباع والله!
دنكت..
هه صدك هذا عود لو شنو؟
كوثر ..اختي الاكبر.. طالبة جامعه.. ترجمة..سنه ثالثه..
هادئه كلش.. مانسمع صوتهه.. من صغرها معزوله وتستحي من اخواني وابويه.. بس ويايه كانت تلعب لو نسولف بالليل بغرفتنه..
سوالف عاديه.. عن دوامنه وعن البيت ..
حتى لبسها.. ماتلبس التنوره.. ولا البنطرون.. كله جبب عراض.. حتى من تمشي بس مدنكه.. ماتشيل راسهه..
شلون صار وهيج طلعت حامل ماادري.. ومن شوكت هل علاقه وويه منو؟
تذكرت ايامي وياهه.. لحظة لحظة..
ماكنت منتبهه.. كانت تسولف الي بالحب مرات.. بس ماتحجي عن نفسهه..
لا تكىل صديقتي تحب واحد.. وهل واحد مو كلش وياهه..
يريدها تطلع ويا لو يخابرهه بالليل.. كنت اكولها صديقتج ماتستحي شنو؟
تكلي لا الحب عاميهه..
ماكنت اعرف ولاافهم هي تقصد نفسهه.. عبالي صدك صديقتهه..
وتذكرت ايام مرت بيهه هي.. مخنوكه وبس تريد تبجي.. اشوفهه وانقهر اكول يجوز من كد ما اهلنا متشددين لو ضايجة من مرت هيثم لان دوم تذب حجي يمهه...ماتشتغلين.. بس دوام.. وقابل كليتج راح توكلنا خبز ووو..
كانت مجزعتها.. مافكرت ليش لهدرجة تتأثر وتضوج ومرات تبجي..
كنت اثق بيهه.. وبنظري هي اشرف البنات..
هادئة وثكيله كلش.. بس مااعرف شلون وكعت هل وكعه..
دخلت غرفتنه اني وياهه.. كعدت ع فراشهه..
مرتب ومسفط.. متعلمه من تكوم لازم ترتبته.. متعوف شي هوسه..
فتحت كنتورهه.. ملابسهه معلكة ومال بيت جوه..
طلعت ثوبهه الي كانت لابسته.. نزعته الصبح وبدلت وراحت..
راحت مارجعت بعد.. شميته حيل..
احس روحي رادت تطلع..
شنو هذا اليوم الاسود.. ووين كان مكتوبلنا هل مصيبه..
التفتت.. كتبها وملازمها مصفطه.. اقلامهه.. تحفيات صغار كانت تحب توصي امي تجيب الهه..
مادري شصار بيه.. احس روحه باقيه بكل مكان من الغرفه..
بكل جزء هو الها.. بثيابهه بكتبها بكل شي..
طلعت من الغرفه.. اشوف بنات عمامي يباوعلي باحتقار..
وحده تبسبس يم الثانيه..
دنكت.. مشيت خطوات ماادري وين اولي..
مااشوف بس فيصل كدامي.. فتح عيونه بكبرهن..
ركعني راشدي اذني انسدت..
لزمت وجهي وباوعلته..
فيصل عاط بيه:باب الغرفه ماتطلعين منه.. يله جوه!
باوعت.. اني بعدني بالمطبخ.. وماكو لا زلم ولا شي.. بس نسوان واطفال وهوسه..
رجعت للغرفه.. تمددت ع فراش كوثر.. شبعت بجي..
ممصدكة الصار بينا لحد اللحظة.. وين كنت..
اغني ومكيفه ماعندي دوام.. وشطلع النا من هم..
غفيت.. اسمع اصوات وهوسه.. بس نمت ونيمت نفسي كوه بس حتى مااواجه الواقع المر..
كعدت.. مادري هي ليل لو شنو.. حتى الوقت ضيعته.. مخنوكة وصدري مقبط.. عبالك جبل نايم ع صدري..
كمت فتحت البردة.. دنيا ليل.. ماكو صوت بالبيت..
طلعت لكيت مرت هيثم ويمهه خواتهه وامهه.. يبسبسن..
دنكت راسي منهن.. رحت لغرفة امي..
نايمه ومتغطيه بعباتهه..
رحت قربت يمهه.. انحصرت الدمعه بطرف عيني..
ردت امد ايدي عليهه .. سمعتهه تشهك وجسمهه اهتز ..
تبجي..
خالاتي كاعدات ع صفحة .. صاحن بيه كومي خليهه نايمة وتخلص من ضيمجن!
حيلي راح..اباوع بوجوهن.. واريد احجي مااكدر..
ببالي اكول اني شذنبي.. وليش هيج يحجن. وليش اني ساكتة الهن..
عفتهن وكمت.. بالي يم امي.. يم ابويه.. يم اخواني..
شحالهم ؟ ووين هم؟
احس راسي راد ينفجر وبطني وجعتني حيل.. استفرغت.. وبقيت كاعده بالحمام.. مااريد اطلع ولااتذكر هل مصيبه..
شلون راح اداوم.. وبيا وجه يتلكني الطالبات؟ والمدرسات شلون راح يعاملني..؟
بجيت بحركة.. ع كوثر.. احسها انظلمت.. وممصدكه هل شي يطلع منها..
اندك باب الحمام عليه حيل.. صوت خالتي تصيح تعاي اطلعي..
تردين تبلين اهلج. شدتسوين..
طلعت.. وكفت كبالهه وماادري شحجي..
دارت وجهه وكالت تعاي اكعدي يم امج واسكتي..
رحت كعدت يم امي..لكيتهه كاعده.. وجهه صاير خارطه.. تخوف وميتباوع بوجهه.. من شفتهه فزيت.. شهكت ..
باوعتلي ودنكت..
كعدت يمهه.. ساعات وهي تون وتصرخ..
صار الصبح وامي فد كعده وفد دمعه.. اني تعبت وهي بعدهه.. حتى لحظات غفيت بيهه وهي كاعده.. خالاتي يمهه بعدهن..
اسمع صوت سوالف بس مامركزة وياهن... اصفن بأمي لو بمصيبتنا وافصل من الدنيا ومابيهه..
بالصدفه سمعت.. خالتي تكول :اي بلكت يعرفون منو هذا الصخم وجهنا ويكتلو..
خفت.. تخيلي منظر دم.. صوت مسدس.. ريحة قتل وجريمة..
تخيلت كوثر.. شكد عانت قبل لا تموت.. من اجت وجهه مزورك وعينهه مورمه تخوف.. اتخيلها شكد توسلت ابابا.. شكد بررت وشكد بجت..
كوثر هي نسمة هوى كانت.. مرت وراحت بسرعه..
شكد كانت هاديه.. وراحت برمشه عين..
عكسي اني.. مشاغبه ومااسكت.. اقل شي يفور دمي واحجي..
مااقبل بالظلم ولا اسكت عن شخص يضرني ويضر امي واختي..
وياما صكيت قبل ويه مرت هيثم..لخاطر كوثر..
الي كانت تسكت ومتحرك ساكن..
حتى بالمدرسه.. كنت اني المتكلمة بالشعبه.. والمدرسات ياخذن الحجابه مني ع كد ثقتهن بيه.. قبل امي تحجي عليه وتكلي لا تصرفين مثل الولد وتتعاركين ع اقل شي.. وكوثر تخاف مرات متحجيلي عن مواقف مرت هيثم وياهه لان تعرف مااسكت..
اني رابع علمي..عندي اسمين.. اسيل.. واسماعيل.. اسماعيل من اعصب يصيحولي بي.. وهل اسم فيصل الي طلعه اليه.. هه
فيصل عكس هيثم.. يضحك ويشاقينا.. سبورت نوعا ما مو مثل هيثم..
بس ماانسى الراشدي الاكلته منه.. يمكن هاي اول مرة يضربني بقصد مو شقى..
سرحت بفكري حيل.. مااريد اذكر مصيبتنا ولااريد افكر شراح يصير..
بس اريد ارجع للماضي.. مثل ماكنا.. اريد ارجع اعيد هذا اليوم الاسود..
مااغيب .. اداوم.. ارجع مثل كل يوم.. اصلي واتغذه وانام..
اختي يمي.. وبيتنا دافي ومااحد يمرنا ولا يجينا..
مادري شلون اخذتني النومه واني افكر بالماضي..
المواقف.. الضحكات.. اللمات.. بالرغم اهلنا شوي متشددين.. وماعدهم احترام للبنت.. بس مهما يكون احسن من هاي الايام المشؤومة..
كعدت.. لكيت نفسي وحدي بالغرفه..
امي بالصاله.. وخالاتي رايحات.. مرت هيثم هم ماكو..
كعدت كبال امي.. لزمت ايدهه.. كبل دفعتني..
امي:احتركت البطن الشالتجن.. اخخخخ اخخخ يانار كلبي شيطفيج..
-يمه اني شعليه؟ يمه ادري بيج مكسوره .. بس اني بنتج..مااريد احد يأذيج يمه.
دارت وجهه مني وجرت نعاوه طويله.. كلماتهه ممفهومه..
عفته وكمت.. رحت غسلت وجهي ووكفت شويه بالطرمه.. صفنت صفنة طويله.. فزيت ع صوت فتح الباب..
دخل ابويه.. باوعلي ودنك راسه.. اجه قريب يمي.. اني كيفت.. عبالي راح يجي يحضني لو يشكي يمي.. حضرت نفسي لهل شي..
ماادري شوكت رفع ايده وضربني..وجهي خدر من الضربه..
بابا:روحي الله ينتقم منج ومن اختج.. الله لا يوفقج.. الله لا يرضى عليجن..
اسمع صوت ابن عمي مأمون  ورا:لا عمي لا..
اجه بصف بابا.. اشرلي براسه فوتي..
بقه هو يحجي ويه بابا.. اني خليت ودخلت.. مخنوكه خنكه للستار..
احس شي واكف ابلعومي.. اريد ابجي ومااكدر..
شربت مي ورحت للغرفه.. مكدرت ابقى بس شوي.. بديت افتر بالبيت الوب.. كعدت بالترك.. مخنوكة وروحي طالعه كلش..
ارتيكت ع الحايط وخليت رجليه بين راسي..
اتذكر كوثر.. ومااعرف شنو يصير بيه.. كل جسمي يكز..
شلون هيج.. وشبسرعه.. اخ لو لو اعرف ليش هيج سوت ليش؟
سرحت كلش.. كوثر.. قتلها.. الحمل.. منو الي سوه بيهه هل مصيبه وعافها.. فكرة تجر الخ..
مااشوف بس مأمون بصفي.. منصي يمي وساكت..
-ها؟
مأمون:شتعرفين احجيلي..
-عن شنو؟
مأمون :عن كل شي.. شسمعتي شنو حجتلج.. كولي.. لاتضمين..
-مااعرف.. ولا حجت الي.. مأمون مدااصدك .. اني بحلم لو علم؟
هز راسه ودنك.. كال :ماادري شكولج.. اني همين ممصدك.. كوثر الي تستحي من خيالهه والي تستحي تسلم عليه هيج تسوي؟!
-هذا الي مايدخل عقلي.. شلون وليش؟!
مأمون :مادري .. بس اله مانلكاه لهذا الكلب..
-تلفونهه وين؟
مأمون :يم ابوج.. بس المشكله مصفر مابي اي شي.. منتظرين بلكي يدز شي يخابر بالخطأ!
-انت مصدك انه كوثر تسويها؟
مأمون :الشيطان شاطر..
-اخ راح ينفجر كلبي من القهر.. ماشفتها شلون جابوهه.. زين منو يكول هي صدك حامل؟ يجوز خطأ يجوز تحليل لغير وحده؟!
مأمون :لا.. عمي متأكد اكثر من مره.. ويكول رفضت تكلي منو الي .....
-بابا هيج كال؟
مأمون :اي..
-وهسه شراح يسوي؟
مأمون :مااعرف.. بس هو صاير نار..حاولي لا تقربين منه.. كوه اليوم قنعته اكل لكمه..
احس حسمي كله رجف.. ع المصيبه الي اجتنا.. نزلت دموعي .. واول مره كانت دموعي تنزل كدام احد.. بس الي اسمعه ماينعقل.. ولا يتصدك..
ولا كنت بيوم من الايام اتخيله..
من حجالي مأمون يله عرفت.. وافتهمت .. كانت الاسئله ماكله راسي..
مأمون :اروح اشوف عمي.. وانتي لا اتركين امج ..
-هيثم وفيصل وين؟
مأمون :ابيتنا.. يكولون منكدر ندخل البيت..
سكتت.. احس الحسره الصارت بكلبي اله شوي تخلي ينفجر..
غيض وقهر وخوف.. كلهن انخبطن عندي.. حتى الحايط الي مرتكيه عليه تمنيت اضربه.. راح مأمون يم ابويه.. بقيت اباوع للسما..
ماادري ادعي.. لو اندعي.. بس اختصرتهه وكلت بكلبي..
يارب انت اعلم بالصار بينه..
شويه واسمع صوت ابويه صاح.. وينهاااا.. ولكم وينهاااا..
وكع كلبي.. اول شي خطرلي انه كوثر ماميته.. ويجوز اني بحلم..
خطرلي يجوزاتخيل.. وهسه وعيت ع صوت بابا..
للحظة حسيت جسمي باد.. ماكو حيل اشيل نفسي.. وصدك فرحت.. عبالي حلم.. كمت كوه.. اريد اشوف وجه بابا..
هستوني فتحت الباب.. داريد ادخل شفت بابا كبالي.. اتذكر ابتسمت..
ومااحس اله طراك ع وجهي.. غلط عليه.. وتفل.. وفشر..
ماخله شي ماكاله.. جرني من شعري بأيد.. وبأيد الثانيه قفل باب الترك..
مأمون يمه.. توسل بي يعوفني ومايرد علي.. كل شوي يكله خل اربي.. ولك خل اربي اني الصرت عار .. خل اربي..
اخذني شمرني يم امي بالصاله.. لااراديا كمت اعيط..
وصوتي صار عالي.. وبابا بي وماينجن عليه.. جاب صونده كصيره كنا مخليهه للمبرده.. ولزمنا دك اني وامي..
ماعدت اشوف شي.. بس اسمع اصوات ولد عمي.. اخوان مأمون ولد عمي الخ.. كوه جروه.. بس بعديش.. بعد ما جسمي كام يون.. وروحي طلعت ويه كل ضربة اكلتها...
فوك هذا.. اريد اقرب من امي اشوف شبيها تدفعني وتغلط عليه..
ايست منهم.. عفتهه ورحت للغرفه.. كوه امشي وكل مكان بجسمي يوجعني.. كعدت اباوع ع مكان كوثر.. شذنبي اني.. ليش سويتي هيج..
شنو الخلاج تضيعين نفسج وتضيعينا.. بجيت بحركة.. وكلب موجوع..
بلحظتها تمنيتها كبالي واعاتبهه ..
خليت راسي ودوخة فضيعه صارت براسي.. حتى لعبت نفسي..
برغم اني مماكله شي.. يمكن يومين مداخل بطني غير المي..
غفيت.. ومادريت شصار بعدهه..

يتبع...

مساكم سعادة
ورجعنا من جديد.. ولو الوقت متأخر..
شاركوني برأيكم وتوقعاتكم..
اذا شفت تفاعل انزل بارت لُخ
❤️❤️❤️❤️❤️❤️❤️❤️❤️❤️❤️❤️❤️❤️❤️❤️