شُتات انثى

الخامس عشر

#شُتات_انثى
الخامس عشر

واتبادadaena7

Nada hs

اسيل..
ومرت ايام تركض ركض.. يمكن لان بيها اسوء حدث بحياتي استعجلت عليه هل الايام..
كانت ايام مره حيل.. صعبه وماتنجرع..
مدخلت عقلي فكرة الزواج..
لا الليل بي نوم ولا النهار بي راحة..
مادري شلون خلصت..وشلون مرت.. بس كانت حنان تفتر ورايه يوميه تريد اذب الاسود لو اف لو اعدل وجهي..
كنت اصرفها مني ومرات اعيط بيها ..
لحد ماملت مني..
وصار يوم الاسود.. يوم زواجي ..
اجه فيصل للغرفه..
يحاجيني بنتر بس احس اكو داخله غصه من يحجي.. مدري اني الكنت غاصه بالهوى وتخيلت الناس مثلي...
فيصل:لا تشمتين الناس بينا خوش؟ اريدج تصيرين خوش مره.. بعد شوي راح يجون ياخذوج ويجيبون بتهم..
سكتت وصفنت بي حيل..
مااكدر احجي.. ولا اطلب منه يخلصني..
مثل المحكوم اعدام وهو بحبل المشنقه .. ميكدر يطلب يعوفوه ..
هزيت راسي بأي..دنكت وسكتت بعد..
شويه وطلع..
اجت حنان ورا..
حنان:شوفي جهزتلج كل شي.. جنطج هسه اوديهن وياهم..
باوعت الها.. هاي شتحجي؟ اني وين الدنيا وين..
حنان:يله كومي ذبي هذا الاسود منج.. ميصير ترحين بي..
-روحي حنان..
حنان:يله كومي..موزين ترحين بي والله!
ام حنان اجت .. مادري شوكت اجتنا ووين كانت ..
ام حنان:يله حبيبه! كومي بدلي.. عيب ومايصلح عليج..
ظليت بس ساكته واباوع الهن..
ام حنان طخت ايدهه بحنان عبالهه مشفتهه..
كالت:ولج يمه هاي البنيه مو طبيعيه؟!
حنان:لا مابيهه شي..
حنان:يله اسيل كومي.. لخاطر ابوج.. لا تسودين وجهه!
كومي وبدلي يله!
-عوفني وروحن! مااريد احد يمي!
ام حنان:عوفيهه .. تروح هناك وبعد هي ورجلهه.. شعلينا؟!
طلعن مني..
كمت.. حتى حيل ماكو .. احس بنفسي بس جسم يتحرك..
رحت ع خانة.. بيهه ملابس امي كانت..
فتحتهه.. وكعدت بيهه..
ريحة امي باقيه بيهه.. احس كلبي انمرد..
شي يصعد لراسي يخليني اكب نار..
ريحت كلبي بالبجي.. حجيت هواي.. ولطمت اكثر..
يمه وينج اطلعي وشوفي شراح يصير بيه..
هواي شكيت.. بس منو اليسمع..
اسمع هوسه صارت بالبيت..
اصوات غريبه مسامعتهه.. من بينهم كلهم دورت صوت مأمون يجي.. يصيح ويخرب كلشي وياخذني منهم..
اجت حنان.. من فتحت الباب جمد كلشي بيه وسكنت ..اريد اسمع شتكول..
حنان:يله.. البسي..
شافتني بصفنتي وع نفس وكفتي..
اجت .. طلعت ردائي.. لبستني.. لفت شالي ع راسي..
مثل لعبه بيدها وتلبس وتخلي..
احس بلعومي كام يطك.. من كد الحسرات..
مشتني خطوات..
مدنكة مااشوف شي.. واذاني انسدت ماعاد اسمع شي..
بس اباوع للمكانات الي ياما ضربني بيها هيثم..
هنا عاط بيه وهنا ضربني.. هنا كعدت من ماتت امي..
هنا اول يوم نزلنا بالبيت كعدت..
مدري شلون وصلت لسياره.. نسوان غريبه لازمات ايدي يدلن بيه ويكعدن..
كعدت .. احس نفسي مو اني..
هاي مو اسيل نفسها.. دفنوها وراحت..
والي بقى بس جسم اسيل..
كانت كاعده يمي وحده.. اسمع بس صوتها..
حتى ماعندي قدرة احرك راسي اشوفها..
فقدت السيطره ع نفسي وماعدت احس واسمع شي..
حتى الطريق ماعرفت شكد مشينا..
ماشفت نفسي اله انفتح الي باب السياره..
شلت راسي.. ولد هواي واكفين.. اباوع بالوجوه واكول منو منهم ؟ منو الي اسمه عدي؟ منو الوصلنا لهيج مواصيل؟
ماميزت الاشكال.. حسيتهم يتشابهون حيل..
ويمكن اني مصدعه وفاقده هيج حسيت..
دخلتني المريه.. لازمتني من ذراعي وتمشي بيه..
الف حسره وغصة.. ويه كل خطوه أأيس من عمري كله..
وبقت بكلبي.. وينك مأمون .. شبسرعه تنازلت وسكتت مني..
دخلوني بيت.. منتبهت علي.. اله لمن وصلت ع غرفه النوم.. اول مخليت رجلي بيها حسيت روحي انقبضت..
اجت عيني ع الفراش..
اجتني رغبه قويه اصرخ واكول كافي رجعوني..
مكدرت اصرخ.. استجبنت كلش..
كعدني بالغرفه وطلعن.. ولا وحدة بقت يمي..
شويه واجت وحده كالت ستري نفسج اجه الشيخ..
باوعت لنفسي.. مطالع مني شي.. شتقصد هاي؟
دخل الشيخ ووياه اثنين زلم..
مشفت وجوهم.. يادوب شلت راسي وكبل دنكت..
كعدو بالغرفه..
جسمي كله كام يرجف خوف وحزن ولجمات قديمه..
بده الشيخ يحجي ويقره احاديث وايات..
ونوب سألني...
بقيت صافنه.. معقوله اتزوج من اخو ؟ واقبل واسكت؟
ليش اقبل؟ وشنو يصير اذا ماقبلت؟
ويه ماافكر احس جسمي ثلج وسنوني تصك..
رجع سألني..
اصريت ع افكاري اكثر.. وتشجعت..
سأل مرة لخ.. كبل وبدون تردد كلت لا.. مااقبل بهل زواج..
دنك الشيخ..وكال:استغفر الله واتوب اليه.. ياجماعه ميصير هيج.. اذا البنت مجبورة فزواجهم باطل! بنتي اسألج للمرة الاخيرة وجاوبني ..
رجع سأل هم كبل رفضت بدون تردد..
اعذروني مااكدر اشارك بهل ذنب.
خله وكام..
طلعو يحجون وياه.. اجت مريه.. عاطت بوجهي:ولج شكد صلفه أنتِ؟ شلون هيج تسوين؟ رجعي لملتج الجايفه احسن!
بقيت ع كعدتي وبس النفس يطلع مني..
خفت حيل .. اجه كبالي منظر فيصل وهيثم وابويه..
شراح يسوون اذا يعرفون..
فرغت الغرفه .. كلها طلعت ..
بالساعه اني وحدي..اكو هدوء برا عجيب..
اجت نفس المريه الرزلتني.. كالت كومي يله نرجعج..
احس كلبي وكف ميدك..
شراح يسوون بيه واني راجعه الهم.. ردت اكلها واتوسلها مترجعني يمهم.. بس الكبرياء منعني..
كمت وياهه.. وكل ماابلع ريك احس اكو شي واكف مدينبلع.. الدمعه طرف عيني ومكابرة كوه ع نفسي ماابجي..
اخذوني المريه ووياهه اثنين زلم كعدو ليكدام..
بس حركت السياره صبت دموعي.. مردت احد يشوفني كبل درت وجهي ع الجام..
سمعتهم يحجون بينهم:العلينا سوينا! بس البنيه مو راضيه!
ردت المريه:بعد احسن نخلص من هل ملة وطلايبهم!
جاوبهه واحد:عزام ماقبل نرجعهه..
المريه:بكيفه شنو؟ لعد شلون تبقى يمه وهم ماعاقدين؟!
ظليت اسمعهم ودموعي تصب..
دنيا ليل وبارده..
وصلنا بيت اهلي.. كلشي بيه خايف..
اتمنه مأمون يطلع بوجهي قبل لاادخل البيت.. ياخذني من ايدي ويخلصني من كل هذا..
دخلت المريه كدامي من المطبخ.. والزلم بقو برا..
منتظرين هيثم يحجون ويا..
نص عمري ضاع.. بهل خوفات ولهبطات..
اول مدخلت كانت حنان بالمطبخ وامها ومرت عمي ابو سلام وبناتهم.. كانو كاعدين يتعشون..
شافوني كلها سكتت وصفنت..
الي عافت لكمتها والي بقت ساكته والي صفنت بوجه غيرها.
حجت وياهم المريه:مساء الخير..
حنان طفرت يمي:ياهله.. خير خاله؟
ردت عليها:هاي بنيتكم رجعناهه.. ماقبلت بأبنا.. وحرام نجبرهم..
حنان صوفرت كلش.. وعين عليه وعين ع المرة:ياا.. لاهي منو جابرهه؟ شو كيفت واجتكم!
ردت :خاله صيحيلي اي واحد من الولد.. الزلم بره متناين!
راحت حنان تركض جوه..
شويه واشوف هيثم طلع كبالي..
صار لونه احمر دم..
ليكدر يحجي الجماعه بعدهم..
راح طلع الهم.. خطف من يمي.. جسمي كله كزبر.
حنان:ولج شصخمتي الله لايوفقج كون! شراح يسوي بيج هيثم هسه؟
-فدوة لتخلي يضربني.. شيسوي خل يسوي بس لا يضربني!
مرت عمي ام سلام كامت يمي:ولج شلون تسوين هيج؟ اذا خايفه مافكرتي ماكلتي؟
حنان:والله اني مالي شغل.. بعد أنتِ واخوانج وابوج..
مشيت خطوات لغرفتي.. مااحس اله الضربه اجت بظهري..
شي صلب انضربت بي..
صحت اخ يابه..!
عاط هيثم:انعل ابوج لابو عشيرتج..
-مو كوة تجبرني! مو كوة تفهم؟!
جر راسي بيده..:ولج وتصيحين بوجهي! لعد شكد ادبسز وشكد****
مخله حجايه محجاهه.. استلمني دك بالحزام..
اول ضربة وكعت للكاع..
كل ضربة منه تشلع روحي من جسمي..
صرخت صرخات.. من كلبي طلعن مو من حلكي..
كمت اصيح ولج يمه تعاي اخذيني يمج.. يمه الحكيلي..
مادري شوصلني لغرفتي وشلون صفيت بس اني وهيثم..
اسمع صوت برا الغرفه يصيحون كافي عوفهه راح تموتهه..
كنت اسمعهم واصرخ اكثر خليييي خلييي يموتني واخلص..
موتني هيثم موتني! كافي عذبتوني !
يسمع هيج ويزيد خباله عليه..
خدر جسمي كله ونمل.. صوتي راح مكدرت اصرخ.. غمضت عيني بعد مااكدر افتح..
معرفت شصار بعدهه صحيت بين ادين النسوان..
منكعيني مي.. وريحة عطور تضرب براسي..
اول ماجت بخشمي لعبت نفسي..
مو ليله مريت بيهه.. امر من المر..
طشت الناس وراحو لبيوتهم..
هيثم مادري وين اختفى.. فيصل اجه من برا..
باوع عليه وتفل بوجهي..
فشر وسب وغلط..
ماكفاه.. اجه ودفرني بصفحتي.. واخذله كم كفخه وراح..
شويه واشوف ابويع واكف اباب المطبخ..
رجف كل جسمي من شفته..
وجه اسود صاير ومكدر والحزن مبين عليه..
باوعلي بغضب..
تقدم خطوات.. ويه كل خطوة منه اتمنى يوكف كلبي واموت.. لان خلص بعد مااتحمل ..
وكفت ع حيلي من صار كبالي..
انطاني راشدي .. طارت صفحة وجهي بي..
اذني وشت وثكلت حيل.. متوقعت بي كل هذا الحيل..
بابا:يا ادبسز! اني اربيج اليوم من جديد.. هاي تربية امجن هيج تسون بيه..
هيثم شال الحزام وانطاه اله.. واشتغل الدك عليه من جديد..
كنت اخطف نظرات واشوف وجه ابويه وهو يضربني..
وجهه معتفس.. ويذب نفس قوي من يضرب..
احس روحي رادت تطلع ..
وياريتها تطلع وتخلصني.. احسن مااخلصها بس كفخ..
فقدت كلش واستسلمت لا بيه ادفع ولا احجي..
ماعافني لحد ماتعب..
وماسكت مني.. ظل يغلط ويسب..
وكأن سويت جريمة..
اول ماعافني.. اخذت نفس..
وعيت ع نفسي اكثر .. هاي اني بعدني عايشه؟
زين المن وليش؟
فزيت ع طولي وركضت..
اسمعهم ركضو وراي.. طلعت المطبخ..
اكو دبات مال دهن سيارات مخلين بيهن نفط
كبل جبت دبة وفرغتها ع نفسي..
من شافوني هيج وكفو وسكتو.. كأنهم منتظرين احرك نفسي..
رجعت اركض للمطبخ.. اركض واصيح اذا مابيكم خير تموتوني اني اموت روحي.. اني اموت روحي واخلصكم..
هسه اريحكم..
جريت الجداحة مكدرت اضغطها ع كد ماايدي ترجف وحيل ماكو.. اخذت شخاط من جرار الكاونتر وطلعت برا كبال هيثم..
-هاك راح احرك روحي.. ارتاح مني.. ارتاح من اختك..
غمضت عيني حيل.. كل جسمي صار يحركني.. عبالك النار صدك اشتعلت..
فتحت الكبريت.. اريد اشخط عدل ماكو..
تشاهدت.. ربي سامحني.. هذا حدي بالحياة..
صغطت اكثر ع الشخاط.. اشتعل العود..
باوعت لاخواني.. منتظره دمهم يحن عليه..
واحد يجي يلزم ايدي ويذب العود منها قبل لا اشتعل..
ايست.. شفت نظراتهم هي الي منتظره موتي باسرع وقت..
شمرت العود بالكاع يم  رجليه.. مالسمع بس صوت عاط لااااا اسيل ولج لااااا!
احس واحد ولزم رجليه كل قوته..
هه داتخيل.. يمكن من كد ماتخيلت اخواني راح يمنعوني وراح يسامحوني هيج تخيلت..
غمضت عيني حيل وابتسمت.. للموت الجايني يركض..
محسيت بحرك.. ولا حراره.. ولا شميت ريحة حرك..
فتحت عيني.. اشوف صدك هاي ادين دتطفي بيه..
التفتت .. مأمون ورايه ولازم قمصلته مخليها ع رجليه..
منين طلع؟ وشوكت اجه ماادري؟
فشلت اموت نفسي..فشلت حتى اخلص نفسي..
حياتي كلها فاشله اصلا