شُتات انثى

العاشر

#شُتات_انثى

العاشر

واتبادadaena7

Nada Hs

رحت وياهم ومااعرف شكو.. مشينا مسافه..
-ياجماعه شكو؟!
هيثم:عرفنا منو..
يقصد ع الي كان ويه كوثر..
-شنو؟ شلون ومنين عرفت!
هيثم يحجي وع غفله احسه راح ينكطع نفسه.:الجماعه الكلفتهم.. طلعو السجل مال التلفون.. وعرفو الرقم بأسم منو.. وجابولي كل المعلومات. اسمه عدي.. وهسه رايحين نفض السالفه
-شنو؟ وين رايحين احنا؟ شتريد تسوي؟!
هيثم:اقتله واحرك الخلفه..
-لحظه لحظه! هيثم لا تتهور.. هذا مو حل .. تروح هيج شنو كوتره هي!
فيصل:لا خل نروح نقتله ونرفع روسنه..
-صدك تحجون! عمي انطو مجال.. ميصير هيج..
هيثم:هسه هو بالبيت.. راح اطب لنص بيتهم اقتله واخلص..
-وكف السيارة هيثم.. خل نروح لابويه وعمي ونشوف شيكولون.. ميصيرتمشي من راسك! قتلته وتالي؟ اهله يسكتون عود!
هيثم:لعد الي سواه بينه شويه! والله احركه واحرك اهله وعشيرته هم!
-هو من ياعشيره؟
هيثم:من.......
-ومصدك رايح بهذا مسدسك الهم! غير يشيلوك من كاعك!
شفت فيصل متردد.. ضغطت علي ..
-فيصل.. احجي ويه اخوك وفهمه هذا الي يصير غلط! راح تفتح ع روحك باب مينسد.. عمي همه ينكدرون ذول! عشيرتهم كلها عراكة ومشكلجيه.. ورايح تقتل وتذبح وتحرك ابيتهم!!!
هيثم:انته خايف ع روحك مو؟
-شدتحجي انت! اذا هيج امشي لعد.. وخل نشوف شلون راح تحلها حضرتك!
فيصل:هيثم.. خل نرجع.. راح نصير احنه الغلطانين .. ويجون هم ع الجاهز يذبوك بالسجن وتروح بيهه..
-لاتنسى ترى ماعندك اثبات انو هو الي سواهه .. اختك ودفنتها محد يعرف وين.. ولا اكو شهادة وفاة ولا شي! شلون بعد تخلص منهم اذا اشتكو عليك!
سكت هيثم.. داس سرعه ع شوي انكلبنا.. اباوع لوجه صار دم..
وصلنا الاستداره لاف لوفه مال مخابيل.. انكلبنا لوما الله لطف بينا..
رجع بينا ع طريقنا.. وطول الطريق هو ساكت ودايس الها.
وصلنا ع بيت اهلي..

اسيل..
بعد ماراح مأمون .. بقيت وحدي.. صافنه واتذكر شلون وصلت ذاك المكان وشلون فيصل اجه ضربني.. وكل مااوصل الجزء الي لزمني بي مأمون وكعد يشوف حلكي مااعرف شنو يصير بيه.. حتى حيلي يروح من اذكرهه.. سمعت صوت حنان اجت.. وكعدت تغدت نوب اسمعها كامت تلعلع.. ها الاكل لعبان نفس وشنو هل طبخ وليمته تتعلمين..
سىيت نفسي مااسمع.. لان اذا اكوم الها اطشرها وبعدين يجي هيثم يرجعهه الي..
دخلت غرفتهه والبيت صار هدوء.. لا فيصل لا هيثم..
بس صوت الاجهزه المشتغله..
اسمع باب المطبخ انفتح كلش قوي.. وصوت هيثم وفيصل يصيحون..
مفهمت شنو يحجون..
لحد ما دخلو الصاله قربو من غرفتي..
هيثم:دجيب مسدسك هسه وامشي!
اني سمعت صوت مسدس وكع كلبي.. كبل كمت من مكاني وطلعت من غرفتي..
اباوع فيصل راح يركض لغرفته.. وهيثم همين دخل غرفته..
بقيت اروح وارجع.. صوت ركع بيبان كنتور هيثم.. صوت حنان تصيح وتكله لتروح الله يخليك لا تيتم ابنك.. ع الاقل كول لابوك..
متت قلق.. اطرافي ثلجت ومنا اني شابعه دك هل يومين.. باقيلي شويه واوكع..
طلع فيصل مسدسه بخصره..
وهيثم هم طلع.. حنان تجلب بي وتجر بيده وهو يشمرها عنه..
وصلت لحد باب المطبخ وتعيط تكله لتروح..
اريد اوكف احد بيهم واسأل مكدرت.. عبالك انشليت بمكاني..
انعادلي منظر كوثر وهي مقتوله ..
راحو وحنان بس تعيط.. عياطهه يرن بالبيت رن..
وكفت كبالي وكامت ادك ع وجهه وتعيط:الله لا يوفقجن! الله لا يرضى عليجن وع الربتجن! ولج راح هيثم راح.. هسه يكتلونه!
-وين راح! وج منو يقلته!
حنان:عرف الكواد النام وي اختج! ولج اخذ مسدسه وراح يقتله.. ميخلو يرجع سالم ادري.. وج كلبي حاسني راح يصير شي..
ابن هيثم هم اجه ودك بجي..
مدافهم شيصير.. منين وشلون عرفو.. ومنو هو.. وهيثم منو الي يقتله..
احس عقلي وكف.. بعد مااكو ذرة تفكير وعقل بقت..
شويه شويه بديت افهم شصار.. من خلال عياط حنان كدرت افتهم..
خوف تملكني.. خايفه لا حجي حنان يصير صدك وينقتل هيثم.. بقيت كاعده ع حافه الدرج وابجي.. وحنان ماقصرت بيه ..
ماخلت فشار لا حجي لا مسبه وغلط.. وكل شوي وصاحت راح يقتلو.. راح اترمل.. كمت الها عطت بيها عيطه.. طلعت قهر كلبي..
-كاااافي! اسكتي ! بيش مفاوله عليه! رادت تحجي كلت الها اششش ولا حرف البيه كافيني!
درت وجهي ورحت للغرفه.. بقت هي ادردم.. نوب سمعت باب المطبخ نركع مدري وين راحت هي..
ساعات واني الوب ع نار ومااعرف شسوي.. اخواني وين صفو وين راحو.. يارب لا تكسرني عليهم .. حتى لو مأذيني اريدهم..