شُتات انثى

الثالث

#شُتات_انثى

Nada Hs

adaena7 واتباد

الثالث..

كعدت للعصر.. ومدري شعجب سليمه خلتني نايمه.. طلعت للصاله.. البيت فارغ والوحشة تكتل.. دورت امي.. لكيتها بالحمام تغسل..
رحت للمطبخ.. لكيت مواعين الغدا مالتهم كلها باقيه.. بلشت بيهن .. ماخليت شي.. المطبخ صار يلمع.. رتبت كم شغله همين.. من انتقلنا صارت هوسه ومعرفنا نرتب عدل..
اشتغلت وخلص الشغل.. وافتريت ومليت.. وحتى الملل مل مني..
محد يمي.. لا اخت بقت الي.. لا دراسه.. لا مرت اخو مثل البشر.. لا اخوان يشوفون وجهي.. كعدت بالصاله.. صايره كلش كبيره الصاله..
طولانيه وبنص البيت مفتوحه.. بيها شباك طالع للشارع.. اقصد الساحه..
باوعت.. حتى المكان الموجودين بي مابي بشر.. اسمع صوت سيارات بعيد.. صوت اطفال يلعبون بس مااشوفهم.. صوت عصافير..
تمنيت اطلع.. اشوف شكو برا.. اعيش مثل البشر.. انحكم عليه بذنب مو ذنبي..
بدت الدنيا تظلم.. كمت افتر بالمطبخ.. مااعرف اطبخ.. وهاي المسعده لهسه ماطلعت من غرفتهه.. زين شطلع.. رحت لامي..
اخترعت من شفتهه.. كاصه شعرهه كله.. ولاعبه بي طوبه.. ومخليه ظفايرهه بصفهه وكاعده..
اخترعت وعطت:يمه ليش هيج سويتي؟!
امي:اشششش.. لا تحاجيني..
-كافي يمه.. الله يخليج كافي.. ارحمي حالج وارحميني.. راح اموت عليج والله!
امي اشرتلي بيدها اطلعي وكالت:روحي.. روحي.. لا تظلين يمي.. خلوني وحدي..
عفته وكمت.. صدك طلعت روحي.. وين كنت وشصرت.. ليش هيج صار بينا.. ليش ياكوثر ليششش.. شنو الناقصج وترحين هيج تسوين..
شناقصهه؟ لا الصدك.. كل شي ناقصهه.. حنان ماشافت.. خدمتهم من هي عمرها 9 سنوات خدمة مال مره عمرها 30 سنه..
امي.. بس نتر وياهه.. من تحجي كبل تسكتها.. حتى اني احسن منها احجي محد يسكتني..
اخواني.. مسويها خدامة عدهم.. اكويلي حطيلي غسليلي.. وماتشكي ولا تمل.. حتى لو عدها امتحان تعوفه وتكوم تشتغل..
اما مرت هيثم.. هاي بحث اخر.. من اذكرها شلون كانت تعامل كوثر لو اخليها بتنور همين ماارتاح..
ابويه.. شوي الين وياهه.. يسألها شمحتاجه وينطيها .. ولوما هو اخواني ماخلوها تكمل كليه..
مداكول هذا مبرر كافي حتى هيج تروح تسوي.. بس مرات من اصفن اكول لو عدنا اهل مثل البشر ماسوت هيج.. لو كانت عايشه ويه عائله تفهمها وتخليها تحجي الي بداخلها يجوز ماوصلت هيج.. لان اختي واعرفهه شنو.. تخاف.. وماتحب الوحدة.. خجوله كلش.. اتذكر حتى من بلغت وبرز صدرها.. كامت تثني ظهرها.. تحدبه علمودلا يبين.. وظلت هيج .. محدبه نفسها خاف يبين كدام اخواني وتستحي..
بس مااعرف شنو الصار الها.. وبيا طريقه انجبرت هيج تسوي..
خطرلي يجوز مغتصبيها.. يجوز مو برضاتهه.. بس كلها تكول عدها علاقه.. والي يأكد هل شي انها ماحجت قبل لا يقتلوها..
من اذكر قتلهه.. انخيل ادين اهلي ملطخه بدمها.. اذا اشوف احد بيهم عيني كبل تروح ع اديهم.. وابدي اتخيل الدم ينكط منها..
رحت افتر.. اكعد بالكاع.. اروح للمطبخ.. ارجع للغرفه..
واخيرا كعدت المسعده.. تباوعلي وتضحك.. رحعت تذكرت سالفتهه وي الغده.. ماردت اسألها واكبر راسهه.. ومااريد احجي وياهه اصلا..
راحت للمطبخ رحت وراهه..
بدت تحضر للعشا.. واني وياهه..
من وحدها كالت:حضري روحج..
-لشنو؟
تحاجيني وهي دايره وجهه ع الطباخ:ابوج راح يزوجج..
-شنووو؟ ليش؟ المن؟ شوكت؟
حنان:اي.. احسن ماتظلين وتسوين مثل اختج.. خل يزوجج ويخلص منج.. راح يحاجون عمج ابو فلاح.. ياخذج لو لاوس لو مأمون ..
جسمي كله رجف ع السمعته..:تشاقين مو؟
التفت عليه وضحكت:اي اتشاقه! عيني ابوج راح ينطي فوكج فلوس حتى ياخذوج!
ماصدكت.. هيج يذبني! لا وينطي فلوس علمود يخلص مني! زين خو يموتني مو احسن...
اروح منا واجي منا.. مامصدكه.. ولكم عمري كله ماواصل17 سنه..
بيا ذنب هيج يصير بيه.. نوب تكول اذا رضه بيه؟ ليش شبيه اني..
احس روحي اختنكت بالمطبخ كلش.. اتمنى اركض بكل قوتي واخلص من هذا البيت ومن الي بي ومن كل السمعته بهل لحظة..
بقت هي توجهني واشتغل بس بلاا وعي..شسوي وامنع هل شي..
كملنا العشا وصبت واخذته..
اني رحت لامي.. كعدت يم رجليهه.. كلت الها:يمه اكعدي.. شوفي مصيبتي!
فزت خايفه:هااا! يا مصيبه ولج!
- راح يزوجوني! وانطو فلوس حتى ياخذوني!
رجعت مددت:اي .. ميخالف..
-يمه شلون ميخالف! مااريد اتزوج مو كوه هي!
سكتت.. احاجيهه واشكي وابجي وماترد عليه.. عصبت كلش.. كمت ادك ع وجهي وابجي.. وهي ولايمهه...مليت وهي مامهتمه الي.. رحت مددت..
ساعات واني افكر .. لحد ماتعبت..خليت ونمت.. امي ع نفس حالهه ماتقبل تنام ع فراش.. كله ع الكاشي..
نمت نوم طويل كلش.. وماحسيت ع شي.. ولا شفت كوابيس..
كمت من فراشي.. تذكرت المصيبه مال الزواج الجايتني..
اني وين والزواج وين.. اني روحي ماجارعتهه هنوب زواج!
تريكت وبلشت الروتين مال الشغل.. يوم والثاني والثالث.. سكته ماكو شي جديد.. امي احسهه انفصلت من هذا العالم كلش..
سكته.. ومن تكون وحدها تبقى تحجي بس مامفهوم شنو تكول.. وابويه من ذاك اليوم الاسود بعد مادخل وشافهه.. يخلص كل وقته بالاستقبال المعزول..
ام حنان كثرت جياتهه علينا هوايه.. صارت تتدخل بكل شي
وامي لا تهش ولا تنش.. واني ع اعصابي ساكته الهن..
صارت حتى تبات يمنه.. وليليه تريد تلزمني وتبقى تسولف وياي..
بس اني مااريدهه.. لان اعرف كل كلامهه راح يكون ع اختي..
بذيج الليله لزمتني بالغرفه.. دخلت علينه اني وامي..
عيونهه تفتر بكل مكان.. وحركاته وكل شي بيهه مامستقر ومضطرب..
اني انطيتهه ظهري وفتحت كتاب .. بس بالي يمهه.. اريد اعرف شتريد تحجي..
لزمت امي.. خيه وخيه وانت مريضه وانتو عيب تسكتون ويوو.. كوه استحملت.. بقيت اتأفاف.. سمعتهه كالت..
ام حنان:خيه كلي لبتج تجهز روحهه.. منا وهيج بيت عمهه ياخذونهه..
درت وجهي بسرعه عليها:منو كالج؟
ام حنان:البنيه مردهه لبيت رجلهه.. اقبلي واسكتي.. احسن ما يصير بخوتج شي من جديد..
-وانت منو دزج عليه؟؟؟ عود تردين تقنعيني لو شنو؟
ام حنان:اخاف عليج واريد مصلحتج.. قابل شعدي وياج؟!
-شكرا حزيلا.. محد طلب منج تخافين عليه.. خافي ع بيتج العايفته وجايه كاعده يمنا! روحي لبيتج ريحينا منج!
احس روحي ارتاحيت من هيج كلت.. ركزت بعيونهه حيل..
سوت روحهه تتمضحك نوب عصبت.. كامت ماتعرف شتحجي..
انت اطرديني.. واني جايه يم بتي وماجايه عليج.. وعيب اني بكد امج..
حجيهه ميوكل خبز.. يضر ماينفع.. مابقى عليه بس هي!
طلعت من الغرفه.. امي تباوعلي ومتحجي..
صفكت ايد بايد وكلت الها بعصبيه:خو انتي ظلي ساكته! ظلي ظلي!
درت وجهي ومددت..
مااريد اتخيل روحي اتزوج هيج.. لا وابن عمي! خاصه ولد عمو ابو فلاح.. احسهم مثل هيثم وفيصل.. مادري شلون يفكرون.. يردون يسوهه كوه..
اخ لو يجي احد منهم اله العب جولة.. ظليت افكر من يجون شلون اشردهم.. ومااخليهم يذكروني ولايفكرون بيه ابد..
نمت من كد مافكرت.. مااحس اله دفره بخاصرتي.. بزة كلش قويه.. مثل الشنطه او الخدر صار بخاصرتي.. حتى لعبت نفسي..
باوعت هيثم دفرني.. عيونه تجدح ويباوعلي بحقد..
هيثم:ولج ياسكط.. ياعار.. شلون تحاجين ام ناظم هيج!!!! ولج شلون اطرديها! اليوم احركج واحرك الخلفج!
اباوع لامي كاعده ع صفحة تباوع وسكته..
ترجيتهه بنظراتي يمه كوميلي.. ولا كأنها..
حرني بيده مثل طلي ماخذي للذبح.. استسلمت.. يموتني واخلص احسن.. هي موته وحده.. احسن من الف موته يوميه..
اخذني سحل من شعري.. وصلني للمطبخ.. بيد لازم شعري وبيد فتح الجداحه وشعل الطباخ.. اسمع صوت السجاجين والخواشيك.. بس مااعرف شيسوي بالضبط.. لان راسي يفتر بيده ع الجهة العكس..
بجيت واني بين اديه.. تشاهدت وقريت سور من القران.. حتى خطا.. بس ردت انهي خاتمتي بشي زين عاد..
واني ابجي وسارحه.. احس شي بارد مثل الثلج انحط ع ركبتي.. هنوب البروده حسيتهه صارت تحرك.. وتبز.. نار وكبت بيه..
صرخت حيل.. مادريت بنفسي.. اريد الزم المكان واخاف.. لان حسيت وكع جلد مني.. درت وجهي عليه.. شفته يحمي بالسجين يريد يرحع يحركني..
عطت حيييل.. كل مابيه عطت.. ضربني ع راسي برجله..
ورجع يحمي بالسجين عليه.. جابهه.. قاومته كل قوتي.. ردت اشمر السجين منه مكدرت.. جابهه ولطشهه ع ايدي واني ااريد اذبها منه..
روحي شاغت.. مااحمل هيج مااحمل.. لو اموت احسن..
عطت حيل.. وماكو احد اجاني.. ظليت اصرخ بين اديه.. وهو ولا كأنه..
رجع يحمي.. بذيج اللحظه طلعت خوته من عيني.. كرهته..
اريد اخلص نفسي مااكدر.. احس روحي فقدت كلش.. مااكدر اقاوم ولااسوي شي.. استسلمت .. صار كل شوي يجويني بمكان.. راد يخلي السجين ع حلكي كبل درت وجهي.. عاد شسوه جابهه وخلاهه ع علباتي..
متت.. والموتني اكثر.. اهلي كلهم بالبيت.. محد طلع لصرختي.. لا اب ولا ام ولا اخو.. صدك كرهت روحي بوقتهه.. شذنبي اني ..
غمضت عيني.. وصرت اتخيل باي مكان راح تجي جويه.. لحد ماسمعت باب المطبخ انفتح.. صاح:لك يمعود شتسوي! صدك حذب!
حتى ماميزت صوت منو الاجه..
وخره عني.. باوعت هذا مأمون .. مابيه اكوم ولا احرك نفسي.. اشوفه دفع هيثم وطلعه.. عاط بي وطلعو من المطبخ اثنيهم..
كمت بيه مابيه.. كل جويه عافهه بيه يمكن لحمي انزرف..
امشي ودموعي تصب.. رحت للمرايه.. شفت جويات..
مو مثل مااني تخيلت بس صاير المكان احمر حيل.. بس المهن كان فضيع..
مااكدر الزمهن ومااعرف شنو الي يهدي الحرك..
رحت للغرفه.. امي مسويه نفسهه نايمه.. ردت اعيط بيهه بس كلت عليش.. اتعب نفسي.. وهي تتمنى اموت..
تمددت.. رفعت ذراعي ليفوك.. متروس جويات.. دعيت علي من كل كلبي.. الله لا يوفقك هيثم.. ابجي حركه ووجع..
اسمي عايشه.. انتهت حياتي.. ياريت عاد صدك يموتوني واخلص..
شويه واندك باب غرفتي..عبالي حنان.. بس المفروض مااتوقعها هي..
لان حضرتها ماعدها هيج اخلاق ادك الباب يله..
كمت فتحت.. شفت مأمون كبالي.. يباوعلي بقلق..
دنكت راسي.. عيوني مليانه دموع..
دخل للغرفه.. باوع ع امي.. ذبله حسره..
مأمون :.. كافي الي يصير بيكم! ليش تخلين هيثم يتجاوز عليهه؟ شوفي شسوه بيها؟ اله شوي موتها لوما سامع عياطهه وملحكهه..
برطمت ورفعت اكتافهه وصفكت ايد بيد:وشبيدي؟!
مأمون :لا بيدج! لا تعوفيهه هيج! محد يرحم ترا!
دارت وجهه عبالك متسمع..
هو هم عافهه.. اجه قرب يمي.. باوع لاديه.. رفع راسي بيده.. شاف ركبتي.. مااستحي منه.. وعادي عندي مثل اخواني.. وهو همين هيج يعاملني..
قبل حاله من حال فيصل.. حتى كان كله يصيحني  خويه اسماعيل..
فمااستحيت منه.. يشوف ويسوي چچ! شمسوي بيج! طاح حظك هيثم ع هل دكه!.. مأذيتج حيل مو؟
هزيت راسي اي..
مأمون :راح اجيب الج مرهم.. واذا مكدرت ارجع الكم ادزه بيد اوس لو فلاح.. بالليل جاييكم..
وكف كلبي اله شوي من كالي اهله جايين.. كلت اي هاي هي.. اجو يخطبون ماكو غيرها..
-مأمون الله يخليك لا تخليها تصير فدوة!
عوج حواجبه وكال:شنو هي؟
-الخطبه..
مأمون :هااا.. لالا وين راح بالج! كل شي ماكو واصلا مراح تصير.. جايين هيج تسيوره..
اخذت نفس.. الحمد لله.. مااريد اسأل اكثر المهم ماكو خطبه حسب مايكول..
ساعات خلصتهه واني الوب من الحركه.. كوه كعدت واستقريت..
لحد ماصار الليل.. وتعشو الكل.. اني رفضت اكل.. مالي نفس..
اجتني رواء للغرفه.. بنت عمي ابو فلاح..
بوستني وكعدت يمي.. شوي هي احسن من بنات عمي الثاني..
انطتني عصاره.. وبقت تتفحص كل مكان محروك بيه..
رواء:چچ! صدك جذب! هذا شبي..؟!
تعالي اني اخليلج..! قربت مني.. خلت الي وطول ماهي تخلي تحجي ع هيثم..
رواء:احجيلي هذا الغبي شلون هيج سوه؟ من وحده لو حجيتي ويا شي؟
-علمود ام حنان.. الله يعزها ويقويها بعد علينا!
رواء:شنو؟ شلون هيج صار؟
حجيت الها.. وحجيت عن موضوع الخطبه الي كانت تحاول تقنعني بي..
رواء:عيني ياخطبه! هاي تحجي وحدهه! اصلا ماكو هيج حجي! كالو لبابا وبابا ماقبل.. دنكت وسكتت..
-صدك؟ الله عليج؟ لا تضمين  عليه!
رواء:والله شبيج حتى مأمون من كالوله كلهم مااكدر اتزوجهه..
-فدوة لكلبه..
رواء:بس كليلي شلون راح تعيشين ويه هذا الخبل! عاد لو صدك صارت واتزوجتو يمنا هواي احسن الج!
-لا عفيه مااريد.. مو مستعده ابد..
رواء:خطيه مأمون بقه باله يمج.. هو الي دزني الج.. وحجالي شصايربيج
-فدوة الج.. كل الهله بيج..
رواء:صدك امج وينها؟
-ماادري.. طلعت من الغرفه.. ومايهمني وين راحت.. اصلا راح تجلطني بتصرفاتهه!
رواء:صدك تحجين! بالله سوت بنفسها شي؟
من سمعت هيج خفت.. كمنا اني ورواء.. رحنا ندورهه.. لكيناهه كاعده بالبيتونه وحدها .. مشغله كلوب لونه اصفر وضوه خافت ووحشه تقبض الروح.. نوب منضرها يخوف.. شيبها طالع وشعرها كصير حيل.. وبس عيونها تفتر علينا.. من غير السواد الي لابسته وصايرتراب من كد مامسحوله بنفسها..
-يمه شجابج هنا! مو وكعتي كلبي!
كومناهه اني ورواء.. ونزلنا جوه.. هي مثل الفاقده.. وبديت احسها يوم عن يوم تفقد عقلها وتفقد وجودهه ويانه كبشر.. مادري شسوي.. وشبيدي عليها..
لو اكدر كان اخذتها لطبيب.. اساعدها بكل صوره اكدر عليها.. بس شبيدي اني واديه ورجليه مربطات..
رجعنا نسولف اني ورواء .. عن كوثر.. نريد نوصل لشي منكدر..
تذكرت الدفتر مالتها.. بس ماردت احجي كدام رواء عنه.. كلت من تروح ابلش اشوف شكو بي..
بقيت ع نار.. منتظره رواء تروح.. لحد مااجت حنان باوعتلي باحتقار وكالت الها: الها يريدج ابوج..
رواء:يله جايه..
بوستني ووصتني ع امي وراحت..
بس طلعت كبل اني كمزت لملابسي دورت الدفتر.. مخليته بنصهن..
فتحته.. بي اشعار.. قلوب وملصقات حلوه.. ماادري شنو صارلي.. رجفت والدمعه بطرف عيني.. هذا خطها.. وكانت ايدها تمشي ع هذا الدفتر..
اول ورقة مكاتبه شي.. بس زخارف.. والسنه والشهر..
كلبتهه.. كاتبه اول جمله(الى الطريق الذي قادني الى الموت...)
وبعدين كاتبه اشياء عاديه.. لا هي مذكرات ولا هي شعر..
مجرد خواطر.. قريت اكثر من مره.. اريد اربط شي .. اريد اوصل لشي.. ماكو. كله غموض.. وكتباتهه كله عن الضياع والايام الحالكة والروح المعذبه.. مر الوقت واني اكلب بالدفتر ورقه ورقه.. حرف حرف قريته..
حتى التواريخ الي كاتبهن بالصفحات رجعت ذاكرتي الهن.. مااتذكر كان بيهه شي ولا اشتكت ولا ضاجت..
حلقه فارغه كان هذا الدفتر.. من فتحته عبالي راح الكه كل الاجوبه ع اسئلتي.. بس ملكيت شي.. كله خواطر واكو اشعار همين قليله.. ختمت الدفتر وموصلت لشي..
بجيت عليها وع حظي.. ع امي النايمه بصفي وماتدري بالدنيا وين.. ع كل شي ضاع من عدنا.. اللمة، خوتنا ، عشرتنا، والاحترام وان كان قليل بس كان محد يضربنا ولا يتجاوز علينه لهدرجة..
اخ ياكوثر.. اني اختج وعشت عمر وياج.. حسيت نفسي مااعرفج.. وكنتي مجرد شخص غريب عني.. كله غموض واسرار.. شنو سرج.. وليش ماكلتي ولا بينتي.. وشوكت حملتي وشنو الجرج لهذا الطريق..
وين التقيتي بي لابو الطفل.. وشنو كلج واقتنعتي تضيعين نفسج..
شنو كان ردج من عرفتي حامل.. وكلتي لابو لو لا..
عقلي راد يطك من كد الاسئله الي ادور ابالي.. مصار شهر ع وفاتهه.. وكل يوم اكعد عبالي نفسي داحلم كنت.. عبالي الكه نفسي ببيتنا القديم وهي نايمه بصفي لو اشوفها من تكعد الصبح تبدل بكل هدوء..
مااصدك ياربي مااصدك.. اختي هيج تسوي.. كل مااحاول اقنع نفسي شي بداخلي يكلي لا تصدكين.. هي بريئه .. وماغلطت..
بس همين الكلام الي كالو مو شويه.. وبابا لوما متأكد مايقتلهه..
متت من الحيرة الي اني بيهه.. خليت ونمت... وحتى النوم ممرتاحة بي..
كل شوي افز.. اديه المحروكة وركبتي.. كل شوي اطخ بشي واخاف يتزلغ زايد.. من غير خوفي من هيثم ..

يتبع...

مساكم عافيه..💔