شُتات انثى

٣٥

#شُتات_انثى

الخامس والثلاثون..

واتباد adaena7

NADA HS

كلت.. أي حابه نغير جو ونزور..
كرص خدي وكال :موتدللين
شبكته حيل..
بعدها كما ع شغلي ومر اليوم عادي...
لليل اجه طالب..
وكان جايب ويا مسواك اشكال الدنيا..
ممخلي شي مجايبه...
بقى يم مأمون بالاستقبال..
ضيفته ومابقى غير نص ساعه وراح..
لمن طلع واجه مأمون شفته شكد كان مرتاح ويتبسم..
ومرت ايام..
بلش مأمون بإجراءات العقد..
اني ماحضرت غير مره وحده..
كملنا بيها كل شي حتى صور اخذت الجنسيه الجديدة...
طبعا مأمون قطع وي أهله وحتى للمجمع ماعاد يروح اله ماندر...
حاجيته كم مرة يكلي مااريد أروح..وراح ادور شغل وحدي..
لحد ما مليت.سكتت..
صح كنت اخاف من كل الناس الحوالينا..
بس كانت ذيج الفترة احلى ايام بيهه..
بالنهار كله سوا اني وياه..
والليل ليله والثانية نطلع نفتر ونرجع..
وبكل مرة نكون سوا وعيوني كباله اذكر كل المرينا بي...
من اول مصيبتنا ومن اول مابدت عيونه تلمع من اباوع بيها...
لحد اليوم...
ولمن كمل العقد والجناسي الجدد سوه الجوزات.
علمود روحتنا..
وطبعا كان شيخ نجم ع تواصل .
كل يومين تلاثه يتصل  . يسال عن احوالنه ويياكد ع مأمون علمود الروحة ...
ولمن كملنا كل شي...
كنت متوقعه مأمون راح يبطل ومنروح..
لان كنت اشوف محفظته فارغه مابيها فلوس.يادوب يمشن كم يوم مو اله نسافر بيهن..ولااكو بالبيت أو بمكان ثاني عنده..
بس هو قبل لانروح بيومين..
طلع بليل ع غير عادته بكل مرة ياخذني ويا نطلع تتمشى لو نتعشى ونرجع ...
من سألته كال عندي شغله وراجع مااتاخر..
رجع وره شويه خله شدة فلوس بالكنتور..
ظليت افكر منين جابهن..
أهله هو ميحجي وياهم ومرت فترة هو مرايح الهم..
ماكو غير أدين..
واكيد من طالب..
سألته كال عندي من زمان..
حسيته كذب واني اصلا هيج سألته..
اعرفه أدين واجه..
اخ هسه اني شجاني وكلت ع الروحة..
ماهان عليه..
تفطر كلبي عليه..
وهو نايم بقيت أتأمل بي وعيوني تصب..
مااعرف شجاني عليه...
تالي مسحت دموعي ورحت حضنته ونمت..
بعد يومين جهزنا لكل شي..
جاب جنطه شوي كبيرة. 
وخلينا بيها حاجاتنا الضروريه...
خابرر طالب اجه وصلنا وكال راح ياخذ السيارة يمه..
كل ظني حمله  راح نطلع من مدينتا وع الخط البري..
وعبالي سيارة كبيرة أو حمله هي الي راح نروح بيها
بس لما وصلنا الكراج تفاجئت..
لزمت أيده وهمست يم أذنه حتى يسمعني بين الهوسه والصياح..
كلت اله وين رايحين..
ضحك بوجهي وماحجى
توجه لسيارات النجف.
امشي ولازمة أيده مااعرف وين..
صعدنا السيارة كانت تكسي وبس احنا بيها..
ماكدرت احجي ويا لان كان كاعد يم السايق...
والتهى يحجي ويا عن الطريق وعن السيارة..
اني هم شردت ..
اباوع ع الطريق واذكر اليوم الي شردت بي..
اصلا ماعبالك شفت شي بهل تلث ساعات ..
اذكر وأحس كلبي ينغزني من اشوف مأمون وهو يضحك ويسولف..
اخاف عليه لا يروح بالرجلين بسببي..
صح ابتعدت عن مدينتي ويمكن ماكو احد يعرف وينا غير طالب.. ومااتوقع يجينا خطر..
بس ظليت بقلق وخوف..
لحد ما وصلنا لمنطقة سكنيه..
كأني شايفتها قبل..
لمن وكفت السيارة كبال الباب.. عرفت هذا بيت الشيخ.. فرحت.. وممصدكه يمتى توكف السيارة.وانزل اشوف امي...
نزلنا الجنطة..
السايق راح..
دك الجرس..
ماكو شويه وطلع النا يوسف..
مدنك ويسلم ع مأمون.
اني همين درت وجهي وسلمت من بعيد..
دخلنا ودنمشي بالكراج..
مااشوف بس امي جايتني...
فاتحه اديها وتكول ياهلا ومرحبا..ياهلا بالعزيزة..
كمت بيه ومااسرع خطواتي..
احس نفسي انكطع لحد ماوصلتها  وشبكتها...
جريت نفس..
مثل ريحتها ماتغيرت.. مي ورد وبخور..
دخلنا جوه كان الكل منتظر..
سلمت عليهن وحدة وحدة..
مبين أنهم يعرفون بجيتنا..
ولمن كعدنا اني وام يوسف وام حيدر..
عرفت من سوالفهم مأمون والشيخ مسويهه مفاجأة إلي..
شكد فرحت.. فرحة كافيه تمحي كل وجع مريت بي..ماتترك منه غير بس ندب صغار..
خلو الغدا اشكال وانواع...كان من وقت شوي علمود احنا جايين من مكان بعيد..
وزوجات ابو يوسف حايرات وين يخلني..
البنات كذلك..
ع لمتنه وسوالفهن والكعدة دموعي باقيلها شوي وتنزل ماادري شلون سيطرت..
حتى الوقت ماحسينا بي..
ولمن صار وقت الصلاة توضيت وغسلت.. كلنا رحنا ع المصلى..
ع نفس ماعفتهم..
حتى كلمن مكانه يعرفه يروح يصلي بي..
اني هم. ع مكاني الدائما كنت اوكف بي واكعد من اكمل أقره...
وكفت بمكاني.. ابتسمت.. وكلت بصوت ناصي..
شكرا يا الله.. لاتحرمني من هل النعمه..
كملنا الصلاة .. وبقينا بالغرفه اني وام يوسف..
ظلت تسألني عن علاقتي بمامون.. وكل شوي تسألني يصلي لو لا..
بكلبي اكول يارب سامحني مااكدر اشوه صورته حتى لو هو غلطان.. اضطريت أكذب..
ويمكن هي حست عليه..
لذلك سالتني اكثر من مرة..
صارت الظهريه.. كالت ارتاحي ونامي..
اخذتني يم البنات..
وعود وصتنا منحجي وانام شويه..
بس ماكدرت.. احسهن خواتي ومفاركتهن..
بقينا نسولف..
ومر الوقت ماحسيت بي.
بين سالفه منا ومنا..
اجت ام يوسف.. كالت اني مو كلت الجن نامن!
وانتي موزين عليج هلكد اتعبين نفسج..
باجر وراج سفر..
ضحكنا كلنا ودنكنا..
نوب كالت يله تحضري راح اطلعون..
كلت وين؟
ابتسمت وكالت مفاجأة..
يله زوجج منتظر..
كمت.. رحت غسلت.. وغيرت ملابسي..
طلعتني امي.. شفت يوسف ومأمون منتظرين بالكراج..
من شافني يوسف طلع وكله انتظركم برا..
وصلت يم مأمون..
ضحك وكلي ها..
رديت..هاا.  تخطط من ورايه..
لزم ايدي ع سريع.. جريتها..
امي ورانا واستحي منها..
ام يوسف:مو تتأخرون.. هم يله ترتاحون وتغسلون ..
مأمون:أن شاء الله.. يله مع السلامه..
سويت الها باي بيدي وكلت:مع السلامه..
ضحكت وكالت الله يحفظكم...
طلعنا..
كان يوسف منتظر بالسيارة..
حاولت بها مسافه القصيرة من الباب السيارة اعرف مأمون وين ناوي نروح..
سألته ضحك وكال هسه تعرفين..
فتح لي الباب وصعدت..
كعد هو كدامي..  يم يوسف..
مشت السيارة.. هم يسولفون واني اباوع ع البيوت.. والمحلات...
ع غفلة انقبض كلبي..
قربت راسي يم مأمون وكلت ..
اريد اروح لاهلي..
كان صوتي واضح.. اثنينهم سكتو من سمعوني..
كررت.. مأمون اريد اروح لامي وابويه..
كال:خليها غير مرة..
يوسف:لا اوصلكم هسه.. ماعدنا شي بعد هواي وقت..
مأمون:اسيل عوفيها مرة لخ..
كلت لا.. اريد اشوفهم.. مااكدر بعد..
يوسف:زين خل خل اوصلكم للإمام عليه السلام وبعدين اوديكم المقبرة..
مأمون:براحتك. الي تشوفه..
تغيرت من راحة وفرح لقلق وعد للوقت والدقايق.. اريد بسرعة يمشي الوقت والكي نفسي يمهم..
وصلنا للإمام..
زرنا ع السريع حتى لااتاخر اكثر..
كملت قبلهم وطلعت وهم بعدهم..
انتظرت شوي ع ماطلعو..
كل دقيقه تمر كلبي يسرع اكثر وأحس راح ينفجر.. نسيت كل اليمي.   همي بس اريد اوصلهم..
صارت مغربيه ع مادخلنا المقبرة..
من شفت القبور لاااراديا كامت دموعي تصب.. عليهم
امي وابوي..
مشيت بهمه.. لحد ما وصلت..
ظليت ابجي لحد ماريحت كلبي..
مأمون كاعد يمي وبس يريدني اكوم ونرجع.
يوسف ماشفته ولاادري وينه..
مر وقت.. وظلمت الدنيا..
تذكرت الساعات المرت عليه وحدي واني بنص الظلمه والخوف الاكل كلبي..
انعاد نفس الخوف.. ونفس الفزعه البكلبي..
مأمون يضوي بتلفونه..
لزمت أيده وضميت راسي بصدرة..
سديت عيوني حيل.. وصرخت اكثر من مرة ..
طلعني منا .. فدوة طلعني منا داختنك
طلعنا بسرعة ...
كنت منهارة فد مرة.. مااعرف شصارلي..
مأمون أجه يمي..
كنت اضم راسي بين رجليه حتى لااشوف الظلام والقبور..
انكطع كلبي ع وصلنا ..
نزلت منتهيه.. حتى حيل ماكو اوكف...
يوسف كال لمامون ابقى لازمهه خل اسوي طريق..
دخل قبلنا واحنا بقينا بالكراج..
مخليه راسي ع كتفه وهو يهمس لي..
شبيج ياروحي شجاج. لاتخافين.. كافي تبجين..
رجع يوسف كله تفضل.. امي جوه.. راح ادليكم..
دخلنا اني ومأمون..
وصلتنا ع غرفه.. بيها سريرين..
مبينه مال ضيوف..
بقت يم راسي شويه قرت لي ايات.
شوي هديت..
نوب وصت مأمون كالت:شتريدون بس صيح علينا..
خلت وطلعت. مأمون قفل الباب
واجه يمي..
فتح حجابي. . ذب من ملابسي..
فتح الخانه لكه جنطتنا بيها..
طلع لي ولبسني..
نوب اجه حضني من ظهري واني كاعده عحيلي ع الجربايه..
كال:اسولتي. خوفتيني عليج..
شبكت اديه الي محوطه خصري.
كلت:خفت من الظلمه..
ضمني اله اكثر.
ياروحي .. اني مو كلت خليها غير مره. 
يله كافي.. خلي راسج.. نامي..
كلت:لااطفي الضوة حتى من انام!
كال تدللين حبيبتي..يله رخي أعصابج ونامي..
بعدني مخليه راسي ع صدره ومغمضه عيوني ..
اندك الباب.. فزيت فزة وشهكت حتى مأمون فز ويايه..
مسح ع وجهي شبيج لاتخافين ماكو شي الباب يدك لاتخافين.
اخذت نفس وهزيت راسي اي..
فتح الباب.. كانت أم يوسف.. وبيدها صينيه اكل..
اجت يمي.. مسحت ع راسي ..
ظلت تسولف ويايه بهوايه سوالف.. تريد تنسيني..
نوب كالت تعالي اكلي وغذي نفسج..
عافتني وكامت..
كالت مأمون لاتعوفهه بلااكل واذا مكدرت الها صيحلي..
كلها شلون متاكل..
باوعت لي ابتسمت وراحت...
نوب اجه يمي..
لزم ايدي وكومني..
كال يله حبيبتي.. تعالي اكلي..
نزلت بالكاع..
كام هو يسويلي اللكمه ويخليها بحلكي..
كلت اله كافي اني مو معوقه.. اكدر اكل...
ضحك وكال مو صوجج حبيبتي.. خل اكل اني الظاهر صرت ثكيل عليج..
ضربت رجلي برجله .. كافي لا تسوي هيج..
ضحك وكلي وانتي مصدكه ازعل منج..
يله اكلي لا تجي ام يوسف وشيخلصج..
ابتسمت.. واكلت شوي وشبعت.
حاول يخليني اكل اكثر بس مكدرت..
لبست وطلعت غسلت بحمام كلش قريب كان من هاي الغرفة..
رجعت لكيت امي بالغرفه تحجي ويه مأمون عني..
من شافتني ضحكت وأخذت الصينية وطلعت..
مأمون هم طلع غسل ورجع.
تقريبا استقريت.. صرت هوايه احسن من قبل
كم ساعه..
خليت راسي دانام ..
مااحس اله مأمون اجه ودحس نفسه يمي.
ضحكت وكلت هاي وين.. ميكفي ترا المكان صغير
مأمون:يكفي يكفي.. شوفي شكد باقي مجال..
كلت: يعني شلون مااتحرك بالله..
ضحك وكال عادي اذا تردين تندارين بالليل هيج اديرج.. شالني وكلبني ع جه لخ..
كلت خرب اله شوي وكعتني.. وتالي متجوز انت..
باسني وكال: شلون اجوز.. بس كليلي شلون ..
خايف لا يخلص عمري واني لسه ماشبعت منج..
اشششش هم رجعت.. مأمون اني اخاف.  دخيلك لاتحجي هيج بعد كدامي..
كال وهو يمشي بأصابعه ع زندي..
اسف .. مااريد اخوفج.. بعد مااحجي هيج..
اي عفيه وهسه يله خل انام..
صفن بوجهي.. غمضت عيني.
بعده يحرك أيده ع زندي..
رجعت فتحت لكيته ع نفس النظرة..
صافن بوجهي..
ضحكت وكلت..شكووو
كال ابقي كاعده خل اشبع من عيونج.. اليوم هوايه ماشفتج.. كضيتيهه يمهم وماكلتي شلون بي هذا الكلب!
حشاك ياروحي..
ظلينا واحد صافن بالثاني..
ومر وقت واحنا ع نفس الوضع..
ماافكر بشي .  مجرد صفن طويله..
تأخذني لعالم ثاني.  اشياء ثانيه..
كلها حلوة وحياة ..
من اباوع بعيونه اتخيل نفسي بساحه كبيرة مالها نهايه.. أرضها كلها خضار..
واني كاعدة بمرجوحه كبيرة وحبالها طوال..
وهل مرجوحه تنطيني راحه مالها مثيل..
وبكل مرة تنزل تهبط كل اعضاءي  وياهه..
عيونه هي جنتي.
كد ماتاملت بي مادري شوكت غفيت..
يمكن صدك عبالي نفسي بالمرجوحه الي تخيلتها وغفيت ههه...
كعدت ثاني يوم هو لسه نايم..
حركت اصبعي ع خشمه..
فتح عيونه وضحك بوجهي..
كلت صباح الخير
صباح الورد يا ورد
كلت يله اني اطلع اشوف امي..
كال ترا بديت اغار..ميصير هيج .. الصبح مفروض بس يمي وعيونج كبال عيني..
ابتسمت.. كلت ادري ماشبعت.. البارحة شكد بقينا واحد صافن بالثاني..
ضحك وكال ميكفي.. اصلا انتي نمتي وظليت اني اباوع واكول هسه تكعد هسه تكعد وماكو..
ههههه ديله عود الليله ابقى شكد متريد
كمت من يمه
صاح اي شردي شردي بس الزمج لولا..
لبست وطلعت.
نزلت جوه خوفي لاالكي واحد من الولد..
بس الحمدلله وصلت المطبخ ومالكيت بس امي وشريكتها..
صبحت عليها وبستها..
نوب رحت غسلت .. كالت كعدي زوجج كلت الها كاعد.. طالت لعد شكو جايه تتريكين يمي..
روحي يمه وهسه اني اجيب لكم الاكل.
كلت خوش..
نوب كالت ابو يوسف اجه البارحة وسأل عنج..
بس ماحبينه نزعجكم..
_ياا ليش ماصحتيني.. والله مشتاقه اله.
كالت هسه يجي وسلمي عليه..
والله بعدنا دنحجي بي.. ودخل من باب المطبخ..
سلمت عليه ...
من اجينا ولهسه مشايفته..
كالو عنده شغل واجه بالليل بعد ماادري بي..
نوب كال يله كعدي مأمون مابقى وقت..
عفتهم وصعدت يمه..
شويه واجت امي جايبه الريوك وياهه..
صبحت ع مأمون وكالت صلو ادري بيكم ماكعدتو وقت الاذان.. دنكت وكالت واذا هاي الحمام جاهز هذا كبالكم..
مأمون باوعيلي وضحك..
من طلعت كال هو اني شمحصل البارحة حتى اسبح.. هي عيونها وحرمتني منهن..
ضحكت.  وكعدنا ناكل.
كلت اله:هم اكو هيج ناس؟ هم يجي مثلهم بعد بشر
كال:اي اكو.  بس احنا تعودنا ع أهلنا ماعدهم حنيه ولا محبه..
اي صح
كال:اليوم شلون بيج بالطيارة.
كلت لاعفيه مواله بالطيارة.  نروح بالسيارة.
ضحك وكال ههههه لعد احنا شكو اجينا هنا.. غير حتى نطلع من المطار.. وفد مرة ابو يوسف راد نمر بيهم ونزور..
كلت خرب من هسه لعبت نفسي.  زين بالله انكلبت بينا الطيارة..
ضحك وكال نموت يعني قابل شيصير
-ايباه شكد سهله عندك..
كملنا ريوك..
واجت امي يمنا...
مأمون أضطر يطلع.. راح دخل حمام ومن رجع هم لكاهه يمي..
من صار وراهه.. هي متشوفه..
كام يحرك بشفافه يحجي..
اني انثولت.. مدري ارد ع امي الي تسألني عن اغراضي مدري أركز اشوفه شديحجي..
اكثر من مرة معرفت شيحجي..
تالي اشرلي ع شفته .. ركزت ..
كان يكلي بس بوسه وحدة ...
ضحكت ودنكت..
امي كالت اله:مأمون انزل عادي محد اكو.. ابو يوسف منتظرك جوه..
انحبست ضككتي.. طلع غصبا عليه..
كملت تحضير جنطتي اني وامي..
نوب دخلت حمام .. بدلت ونزلت وامي ويايه..
سلمت ع البنات كلهن..
نوب طلعنا وامي ورانه وبيدها طاسه مي..
بوستني وابو يوسف هم ظل يوصي بيه وسلم علينا.. اخذنا يوسف بسيارته..
ظليت اباوع ع امي من بعيد وهي ترش بالمي..
وصلنا يوسف ورجع..
كعدنا ننتظر حوالي نص ساعه او اكثر..
كد ما فكرت شلون راح اطير وخاف توكع واذا وطعن شراح يصير بينا نسيت الوقت..
وصارت صدك.. وصعدنا الطيارة..
من دامشي احس رجليه ثكلت حيل وخدرت.
مأمون كل شوي يكلي وجهج صوفر شبيج ..
اني حتى حجي مكدرت احجي نوب الطيارة ضخمه والهوسه والركاب والأصوات شي ع شي احس راح أفقد وعيي..
كعدنا بمكاناتا.. مأمون بصفي.
لزم ايدي وظل يفركلي بيها..
شوي هديت.. بس من أقلعت كان بيني وبين الموت شعرايه يمكن.. حسيت كل اعضاءي هبطت جوه..
ع الرغم مو ذيج الحركة القويه الي تخوف من طارت..
بس اني كد ما فكرت هيج صار بيه..
هههه ووصلت بسلام .. لا ميته ولا واكعه بيه طياره..
مأمون استلمني من اول مانزلنا يصنف عليه ويضحك..
اخذنا سيارة ورحنا ع الفندق..
شوي ارتاحيت وغسلت..
للمغرب طلعنا للإمام ع..
وكضينها فر.. نمشي مانندل شي..
دورنا ع مطعم .. ولكينا. تعشينا وتيهنا طريق الرجعه اخذنا تكسي وانطيناه اسم الفندق..
رغم التعب بس كان يوم حلو..
والاحلى من ضعنا ونريد بس واحد يحجي عربي ماكو.. نوب مأمون صار يتقصد يدخل أفرع وهو يضحك ويكلي ضعنا...
كضيناهه ضحك وفر..
تالي رجعنا سبحنا ونمنا من التعب...
الصبح نزلنا لمطعم الفندق.. تريكنا..
ورحنا مشي للإمام .. كان الجو حلو.  صح مايفرق هوايه عن حرارتنه بس اهون والجو انقى..
كان يسوي واهس للمشي..
من شفنا الشغله مو راهمه بلا مترجم..
مأمون اشترى خط وسواه واتصل بالشيخ وسولفله عن حالنا مثل القطيع الضايع ههههه...
فكله انطيني نقطه داله يمك وهسه يجيك مرشد سياحي اقاربي.
انطاه المكان وكعدنا ننتظر ماكو اقل الساعه واجه مجتبى المرشد مالنا طول السفره..
بكل مرة نطلع هو ويانه.. وبكل مرة مايوكف عن مدحه لابو يوسف وعائلته...
بقينا تقريبا اسبوع.
اتصالات الشيخ ماانكطعت من يمنا.  .وكال توجهوا لطهران.. لان ماشفتو شي ترا. 
مأمون عارض وراد يرجع.
بس قنعه وسكته..
مجتبى حجز النا تذاكر طيران لطهران كال طريق طويل احسن بالطيارة...
اخر شي سوينا بمشهد زرنا وأخذنا اغراضنه .. وصلنا مجتبى ع المطار وبعد ماشفناه..
طبعا كل تكاليف النقل بها فترة كانت ع مجتبى وميقبل يأخذ يكول الشيخ اذا عرف يزعل مني واني كلشي ولازعله...
وتشجعت صعدت الطيارة مرة لخ..
شوي نفسيتي كانت مستقرة وماخفت هوايه..
وصلنا لطهران.. عالم ثاني كانت...
حبيتها هوايه..
شوارعها جوها طبيعتها...
حتى الجو يختلف عن مشهد .. كان شوي أبرد..
وكل يوم مر واحنا هناك كنت احسها تبرد اكثر..
وهل مرة استقبلونا أقارب ام يوسف..
من شفت المرية تهيأ لي هاي ام يوسف ورف كلبي عليها...
كانت اختها .. نسخه منها..  اسمها ام حوراء..
عرفتنا ع زوجهه.. وعرفنه قصه حياتهم وشلون استقرو بطهران من سنين.. حوراء متحجي عربي اله ماندر.. بس اخوانهه الاصغر شوي احسن منها بالكلام..
كان عندهم فندق صغير .. انطونا شقه بي...
ويوميه ام حوراء تيجي يمي تكلي خاف تضوجين..
وشكد طلعنا وياهم..
وشكد التمينا ع سفره وحدة..
وشكد كضينا ساعات سوا نسولف..
حبيتها كلش ومافرقتها عن ام يوسف وطيبتها..
خلصنا اسبوع اخر بطهران. 
خلصنا كله جولات..
لا باركات خلينا ولا بازار ولا جبال...
وصار وقت نرجع..
كان اصعب شي عندي فراكهم ولمتهم الحلوة.
بس مو اصعب من بعدي عن مدينتي وحبي لهواهه ..
طلعنا من مطار مهراباد..
عفت ذكريات حلوة بهل مدينه..
و مو جمال المدينه الأخذ عقلي ..
بس الناس الطيبه الي لاكتنا هي سبب سعادتي كانت طول هل فترة...
ورجعنا للعراق ... ع أساس بدايه شتا..
بس كانت حارة.. مو مثل طهران مشتين هناك..
كملنا طريقنا لبيتنا ومأمون ابتسامته متضيع من وجهه وهذا الشي خلاني ارتاح نفسيا وعقليا...

يتبع...

يسعد مساكم..
اليوم صار خطأ بالنشر وهسه صححت..
طبعا فاتحه تك عين من وجع راسي واكتب هل كلمه .. واتمنى الي عندها حجايه طيبه تحجيها و ع عيني وراسي
والي بس جايه بز وتشمر خل تشوفلها غير وجهه لان البيه كافيني...
وحبايبي الي صابرين عليه لهسه بوساتي الكم.
وأسفه مااكدر ارد ع التعليقات. 
بس كلهم اشوفهم يبعد عيوني يا محترمين ياراقين انتو 😙😙😙