بصيص أمل

البارت 11..

البارت 11
بصيص أمل
بقلمي روسكان
لبيج قصص روسكان
كالتلي اني طليقه زوجج ..
اني ظليت صافنه مصدومه ..
عبالك انربط لساني ماعرفت شاحجي ..
وهي البنيه ظلت تدعي ..الله لايطيكم الله لايوفقكم خربتوا حياتي ..
اني بجيت ماعرف شنو سالفتهه بس انقهرت عليهه ..
وماعرفت بهيج موقف شلون الواحد يتصرف ..
ظل حمزة يطرد بيهه ويغلط عليهه ويصيح وكولهم طردوهه طلعوهه من البيت ..
والبيت جان مابي بس كرايبهم المقربين بيت عمهم وخواتهم المزوجات حته اهلي جانوا رايحين مموجودين ..
بقيت ع سكتي ..
تقربلي حمزة كلي  ..
اني اشرحلج كولشي ..
كتله موهنا ..وديني لبيتنه وارتاح شويه وسولفلي شنو الي صار هسه ..
كلي حاظر ..
بكل هدوء كمنه رحنه لبيتنه ..
طبيت غرفتي اخذت تراكسود مستور ودخلت الحمام نزعت بدلتي ومسحت مكياجي وغسلت وجهي ..
طلعت لكيت حمزة مبدل ملابسه ولابس تراكسود ..
باوعتله نظرة عود يعني معناه ..احجيلي داانتظرك ..
كعد ع قنفه تخم جانت بالغرفت واشرلي اجي اكعود قريبه عليه ..
اجيت كعدت ..
كتله ..تفضل احجي ..اسمعك .. منو هاي الي اجتي ؟
كال هاي طليقتي ..
صفنت عليه ..ماحجيت شي ..ردته يكمل ..
قبل اكثر من سنه تزوجتهه ..
اخذتهه غصب عن اهلهه وراحت وياي بدون ميدرون اهلهه ورحت عقدت عليهه سيد ..
هدوا عليه اهلهه وعمامهه وصارت مشاكل بين العائلتين ..
سالته ..زين انت جنت تحبهه وخطبتهه ؟
اي جانت طالبه وياي بالكليه وحبينه بعض 4سنين ومن تخرجنه خطبتهه اهلهه رفضوني لان همه سنه واني شيعي ..رفضوني ..
جنت طايش واخذت البنيه غصب وهي جانت تحبني ووافقت نتزوج ونخليهم كدام الامر الواقع ..
لاعائلتي تقبلت الموضوع ولا اهل البنيه ..
عشنه بس شهرين ومارتاحينه استمرت المشاكل رادوهه مني رادوا بتهم ترجعلهم وماعافوا اهلي وحته اهلي وكفوا ضدي بس اختي الجبيرة جانت وياي وماعدهه مانع ع زواجي ..
المهم شهرين وطلكتهه ..
بس من اهلي سألوا عليك محد كاللهم انو انت مزوج ..
لان محد يدري ماسويت عرس بس اخذت البنيه غصب وعقدت عليهه واهلي ضغطواعليه حته اطلكهه رادوا يلمون السالفه حته محد يعرف وطلكتهه ..
بس ..بس هذا يسمونه غش ..انتو كذبتوا علينه ..
هذا الي صاار بعد ..
انتي هسه سمعتي مني وبكيفج انتي تقررين مصيرج يأما ننفصل كلمن يروح لحال سبيله او تكملين وياي ..
بس اريد اكولج شغله ..
يابنت الناس ترة اني حبيتج ..من اول مرة شفتج بيهه حبيتج ودخلتي عقلي وكلبي ..
والماضي راح وجنت طايش وماحسبت حساب لتصرفاتي الطايشه ..
جاوبته ..
بس هذا ميغير واقع انك كذبت عليه وغشيتني ..جان لازم تكولي من حقي اعرف ..
صحيح حقج ..ولهذا اني تركت الخيار الج تكملين وياي او تنفصلين عني ..
طيني وقت افكر ..
اوك ..
كام ع حيله اخذ مخده وفراش وغطا وراح نام بالصاله ..
كالي اخذي راحتح ..تصبحين ع خير ..
وانت من اهله ..
خلالي غرفة النوم اليه انام بيهه لوحدي وهو راح نام بالصاله ..
ثاني يوم الصبح جابولنه ريوك والظاهر هو مفهمهم السالفه وانو هو ممتقربلي لان عدنه من العادات الضروريه انو الزوج يشوف لاهله نيشان زوجته ثاني يوم الصبح ومن بعدهه ياخذون النيشان امه او اخته ويروحون يراووه لاهل البنيه بس مصار هذا الحجي ابد لان فهمهم ماتقربلي ولسه دا افكر استمر وياه او انفصل عنه ..
مرت الايام واحنه عايشين سوة بنفس البيت بس علاقتنه كاصدقاء سوالف وضحك وشقا ويسولفلي شصار بيومه بالدوام او المحل وننام بغرفتين منفصلات وابد متقربلي كوله مخليني براحتي ومدللني واي شي اطلبه يجرالي وميتاخر عني ..
صار ميكمل يومي الا من اشوف وجهه تعودت عليه رغم جنت ساعات قليله من يومي اشوفه ..
جان يطلع الصبح للدوام يشتهل بشركه ع شهادته هو مهندس ويرجعلي الظهر نتغده سوة ويرتاح مرات ينام ومرات يقضي الظهريه كولهه يسولف وياي وضحك وشقا والعصر يروح للمحل ويرجعلي بالليل نتعشه سوة ..
ماعرف ليش تعلقت بي صرت ماحب افاركه ضحتي وياه وسالفتي وياه واتعمد ما اكل وجباتي الا وياه علمود خطيه يصيرله واهس لان دائما يكولي ماعرف اكل وحدي ..
ومن جان يروح لشغله اولدوامه جنت اخلص شغلي ببيتي واروح يم عيالي خالتي ورده مال الله مرات اساعدهه مرات تكولي مخلصه كولشي ماعندي شي لاتعبين نفسج خواته الصغار طالبات اعداديه بعدهن ويحبني ومرات اساعدهن بالدراسه بس اخته الجبيرة لسه متحبني وصارت عندي فكرة ليش تكرهني من سولفلي حمزة هي الوحيده الي جانت قابله ع زواجه من طليقته ..
فجنت من تجي اخته الجبيرة اسحب نفسي وارجع لبيتي وعمي جان انسان جدا راقي يحبني ويحترمني ويصيحلي يابه حسيت بي حنان الاب الي فقدته ..
خلال هاي الفترة جنت اروح لامي ساعات وارجع مابات لان تعودت ع وجود حمزة وهو هم تعود ع وجودي فجنت اروح الصبح هو يوصلني ارجع ورة الغده او مرات لليل وهي امي هم مرات تجيني لان بيتي قريب من بيت اهلي بعد 3شوارع عنه .