بصيص أمل

البارت 10..

البارت 10
بصيص أمل
بقلمي روسكان
لبيج قصص روسكان
الولد الي خطبني اسمه حمزة صح ارتاحيتله بس مچنت حاسه ناحيته بشي احس من بعد سيف والي صار بيه من وراه گلبي مات ومابقالي گلب احب بي .
ماحظيت بفترة خطبه طويله كل التحضيرات صارت بسرعه بسرعه كولشي چان جاهز واتفق وياي حمزة نستقل ببيت وحدنه والبيت بصف بيت اهله وجاهز من كولشي من الابرة لحد اكبر شي ..
بقه بس غرفتنه مال الاخشاب رحنه سوة اختاريناهه غرفه تركيه ضخمه صاج اسود ومطعم بابيض ووياهه اخذنه بردات مطعمه بهاللونين وفرشه بيضه واشترينه الذهب ..
اتفقنه بيوم الحنه نعقد عقد سيد وثاني يوم تصير الزفه وقبلهه باسبوع نعقد محكمه ..
تم كولشي بسهوله وجانت علاقتي بحمزة عاديه نطلع نجهز ونشتري غراض وعقدنه محكمه ..
خالتي ام حمزة انسانه جدا راقيه وعمي ابو حمزة همين حباب بس عنده اخت جبيرة مزوجه حسيت من جنت التقي بيهه متحبني ومو طايقتني ماعرفت ليش سبحان الله وين ماروح ورغم زيني ويه العالم ورغم مامأذيه احد رب العالمين لازم يطلعلي وحده صفح متحبني لسبب غير معروف وبالنسبه لاخت زوجي ماطول عيالي محترميني ومخلين كولشي براحتي وشنو الي يجرا ع لسان امي من طلبات مُنفذ وبيتي وحدي هاهيه حب حماتي لايقدم ولا يأخر شي ..
ماهتميت للموضوع بين قوسين ..
قبل يوم من الحنه رحنه اني وامي ننقل غراضي وملابسي لبيتي الجديد وجانت خالتي موجوده وحمزة همين ..
امي لاحظت شي ..البيت مأثث من الابرة لحد اكبر شغله حته الشخاطه ومواعين وخوشيك اكو يعني قبل لا انقل غراضي وكأنه اكو احد چان ساكن بهالبيت ..
امي كالت لام حمزة ..
شو البيت بي سالفه غريبه ..
شنو هي ؟
عبالك جان احد ساكن بي ..بي لمسه مرة ..
هيج امي حجت ووجوهم كامت تطي الوان ..
كالت خالتي ام حمزة ..
لاماكو هيج حجي محد جان ساكن بهالبيت احنه مجهزينه لحمزة من زمان علمود يتزوج بي ..
عاديه سكتنه يمكن امي احساسهه غلط وكملنه فرش البيت وفرشت فرشتي البيضه وعلگنه البردات وحمزة ساعدني بيهن وساعدني اصفط ملابسي وباقي غراضي بالكنتور وكولشي صار بمكانه ..خلصنه ..تغدينه كولنه سوة ببيت عيالي ورجعنه حمزة اني وامي لبيت اختي واتفق وياي باجر من الصبح يجي هو ياخذني للصالون ويرجعني لان باجر الحنه ..
ثاني يوم الحنه مالتي روتينيات وماحسيت بشي مو عبالك الحنه مالتي مر عليه اليوم مرور الكرام ولاعبالك هذا زواجي اني وهاي فرحتي اني ..
مر اليوم ع خير وثاني يوم الزفه ..
هم تريكت وقريب وقت الغداء اجاني حمزة واخذني للصالون ..
جنت اكعود ع الكرسي واسلم نفسي لصاحبه الصالون وهي تهتم بكولشي ع ذوقهه ..
الي صار اليوم شفت صديقتي تمارا عروسه وياي بنفس الصالون شفتهه وشافتني كمت سلمت عليهه وتحاضنه وكالتلي اليوم زواجهه صارت بكلبي غصه لان اعرف عبدالله وسيف بنفس اليوم يزوجون هي فهمت نظراتي اشرتلي ع بنيه جانت كاعده وتشتغلهه ام الصالون صالحتلهه تمارا التفتت علينه شفتهه وغصيت اكثر مبينه عمرهه اكبر مني واليوم زواجهه من سيف ..
هو سيف شسوة بيه وشعاف بروحي جرح ..
تكدرت وانهضمت وانكسر خاطري ع نفسي عبالك جروحي انفتحت عبالك البارحه صار الي صار مو قبل سنه واكثر ..
كملت ام الصالون شغلهه وياي ودكيت ع حمزة يجي ياخذني سلمت ع تمارا واتمنيتلهه السعاده ورحت ويه حمزة ..
حفله العرس مختلطه ومسويهه بقاعه واني وحمزة دخلنه سوة للقاعه وهو لازم ايدي رأسا بدخلتنه للقاعه دكت اغنيه ظلينه نمشي الى وصلنه للكوشه كعدنه عليهه وبدت الحبايب والكرايب تجي تبارك النه ..
كمنه ركصنه سوة ع انغام اغنيه وبعدين كصينه كيكتنه سوة ..
جان حمزة طاير من الفرح واني جنت اتصنع الابتسامه ماريد يبين عليه ..
من كرايبي حضروا بس المقربين وامي واخواتي عدا ميسون وامير ..
بعد ماخلصت الحفله بالقاعه زفونه لبيت عيالي هناك مسوين عشه للمعازيم ولكرايبهم الي بقوا يباركولنه ..
تعشينه وبدت تفض الناس وكلمن يروح لبيته ..
اهلي وامي واخواتي باركلي وبوسني وامي وصتني ع هواي شغلات وراحوا ..
ورة شويه اجتي بنيه عشرينيه لبيت عيالي ماعرفتهه منو بس شفت الوجوه حمرت وصفرت ماعرفت شكو ومنو هالبنيه ..
ظلت تصيح وگلبت العرس گلاب بصياحهه ..
تقربت مني كالتلي انتي زوجته ؟؟
جاوبتهه اي وانتي منو ؟
كالتلي اني طليقه زوجج ..

للحكايه بقيه ...