بصيص أمل

البارت 6

البارت 6
بصيص امل
بقلمي روسكان
لبيج قصص روسكان

حجينه لامي كولشي وظلت مصدووومه ..
ماعرفت شتسوي
ماجنت خايفه خاف امي متصدكني لان اني تربيتهه هي ربتنه ع الثقه وعلمتنه ع الصح والغلط والاخلاق ..تدري بنفسهه هي تعبت ع تربيتنه وهذا حك تعبهه ويانه وحدتنه تصون وتحافظ ع نفسهه هذا دينه ويه امنه وحك تعبهه علينه ..
امي طلعت من الغرفه ..
وكبل ع زوج اختي جان كاعد يتغده ..
امي صارت عيونهه براسهه ..
كالتله انت حقير وتافه ومامتربي وتفكيرك وصخ ..
ماغزر بيك الزين مالتي حاسبتك مثل ابني وماقصرت بشي وياك وانت شسويت ..خنت الامانه ..
ظلت تصيح عليه وتغلط وهو ابد ماحجه ولا تنفس ولادافع عن نفسه ..
واني ظليت بالغرفه ابجي وارجف واختي تهدي وتصبر بيه ..
جنت خايفه من ردة فعل اختي زوجته شراح تكوب عليه وشلون راح تفكر بيه ..راح توكف بصفي لو بصف رجلهه ..
امي شخصيتهه كولش قويه بحيث اي مشكله او شغله ضروريه خطوبه عركه لازم هي موجوده وكولش اهلهه يسمعون رأيهه ويمشون بي لان يعرفوهه حكيمه وحازمه وذكيه وانسانه فاهمه لذلك الكل من اخوانهه وخواتهه يسمعولهه وياخذون بكلامهه .
اختي ميسون ع الصوت العالي مال امي اجتي كالت ..
شبي زوجي شمسوي ؟
كالتلهه امي انتي طلعلي روحج من الموضوع الشغله مو يمج .
اختي عيبهه الوحيد انو تحب زوجها تعشقه حد الجنون وابد ابد متشوف العيب منه واني جنت خايفه من هذا العيب البيهه ..
ينطبق عليهه المثل الي يكول الحب اعمى هيج جانت ثقتهه عمياء بزوجهه ..
امي كالتلهه زوجج متحرش بثناء ..
هي ماصدكت ابد ..كذبتني اني ..كالت مستحيل امير يتصرف هيج تصرف ..
كل هذا واني خايفه ع اختي مو منهه جنت متوقعه مراح تصدكني حتلو جبتلهه ادله وشهود بس جنت خايفه لينهدم بيتهه وينكسر گلبهه وترجع تتمرض وتتعب من ورة افعال زوجهه ..
ماصدكت اختي ولاكلمه ..
صاحوني طلعت من غرفتي سولفتلهم بالتفاصيل الي صارت ..كامت تصيح عليه ..
كذابه ..تريدين تهجمين بيتي ..عينج ع زوجي ..
وبعد هوووواي كلام جرحتني بي صح توقعت ردة فعلهه بس ماتوقعت هالكلام الجارح يطلع منهه يعني رغم كولشي اني ابقه اختهه والدم ميصير مي .
كالتلي ميسون وليش طول هالشهرين ساكته وماحجيتي شي ..
كتلهه انتي جنتي حامل ومريضه وانتظرتج تجيبين واختي جانت تدري من البدايه خبرتهه ..
كالت لا مستحيل ماصدك بيج خطافه زلم انتي تريدين تهدمين بيتي وتاخذين زوجي مني ..
مرات الضرب
يكون ارحم بهوااي من كلام ينكال ويصير بسامير نابته بالضلوع وكلام ميسون جان هيج تأثيرة عليه ..
كامت تصيح واخير شي طردتني من بيت ابويه كالتلي امشي طلعي برة ..
اختي ولاء ابد مجانت قابله ع ردة فعل ميسون وتصرفاتهه وهي ردت ع ميسون كالتلهه ..
هو احسن شي اني اخذهه يمي لان بعد ماكو امان يمكم  بهذا البيت ..
وباوعت لامير بنظرة احتقار الي جان بعده واكف ويستمع للحجي وزوجته تدافع عن وصاخته بكل صلافه ..
ردت عليهه ميسون كالتلهه ..
اي اخذيهه يمج باجر تتبلى ع زوجج وتكول تحرش بيه هاي ام الزلم ..
احترمي نفسج الي دتحجين عنهه هاي اختج بت امج وابوج لحمج ودمج مو تفضلين الغريب الطايح حظه عليهه ..
ميسون سكتت وطبت غرفتهه بعد ما سبقهه زوجهه وولاء اتصلت ع زوجهه يجي ياخذنه وفعلا رحت ويه اختي ..
ولاء جانت موظفه بالنفط وزوجهه ضابط وعدهه ولد ثنين وكاعده بيت وحيدهه قريبه علينه ..
دقايق لميتلي شكم غرض وشكم قطعه ملابس واجه رجلهه علينه ورحت وياهم للبيت ..
ولاء عكس ميسون تماما حييل كتومه ماسولفت لزوجهه ع المشكله الصارت بالبيت ورحت وياهم ع اساس زيارة عاديه لبيتهم مثل ممتعوده كل مرة ..
امي ظلت تتعارك ويه ميسون وامير من بعد ماطلعنه وطاردتهم من البيت بس مطالعين الظاهر هو الصلف صلف فوك ماهو بيتنه واحنه سکناه بيه هيج يسوي
امي لمت ملابسهه وراحت لبيت جدي اهلهه بس ماسولفتلهم ع المشكله الصارت وهو شتكدر تسولفلهم وشتحجيلهم ..والله فشله لان الشغله مرجعهه علينه وهذا يبقه زوج بتهه وابو احفادهه ..
بقيت اسبوع ببيت اختي ولاء وشكد لحت عليه اختي اتصل بسيف واسولفله ع الي صار حته مايسبقني ويسولفله شي مو صحيح امير عني بس اني ماقبلت لان سيف يموت عليه واخاف اذا كتله يتكامشون هو وامي وهمه ولد عم مارد يصير دم بيناتهم فسكتت بس الغريب بالموضوع انه طول هالاسبوع سيف ابد ماحاول يتصل بيه استغربت الموضوع وبنفس الوكت ارتاحيت لان اني جنت تعبانه نفسيا ومتدمرة ومحتصرة وضايجه وخفت خاف يلاحظ هالشي عليه ويلح علمود يعرف شبيه فتركته ..