مريم

٢٣

( الاصدقاء حظ ونصيب..! يختارهم الله لك

إما درسا او سندا علي مدي العمر )

ابتدا صباح جديد كالعاده صحينا انا وسمر وقاعدين بنشرب في عصير وبنتونس

انا : انتي الليله ماماشه الجامعه؟ مالك قاعده بمزاج كدا

سمر : عندي وجع ظهر فظيع من القعاد طول اليوم في المكتبه ما بقدر امشي الليله

انا : ما تضيعي اليوم لو قعدتي براك ما حتقري.. خلاص اقنعي صحباتك يجوك، اقرو هنا

سمر : كلمتهم رفضوا متحسسين منك قالوا لما نتلمي في البيت بنجوط وماعايزين يزعجوك

انا : سمر متاكده انو ديل صحباتك ههههه

سمر : ما دي نصائحك

انا : اضربي ليهم هسي مش بكونوا وصلوا الجامعه اصلو البيت قريب انا ما قاعده الليله عندي كميه من الحاجات عايزه اعملها و ح ارجع متاخره..

سمر ضربت ليهم وقالوا ليها لو كدا اوكي مسافه الطريق وبنجي

انا طبعا ما كان عندي نيه طلعه ولا عندي حته امشيها كان نفسي اقعد في المرسم لي زمن ما رسمت لكن سمر حننتني وكمان عاجبني اجتهادها في القرايه.. اتوكلت لبست المسافه دي جو صحبات سمر سلمت عليهم وطلعت خليتهم براحتهم..

قاعده في العربيه ماعارفه امشي وين قلت بس اتحرك محل ما الدنيا توديني توديني .. ياخ كون انك تلقي روحك وحيد دي حاجه صعبه خلاص مشيت شارع النيل قعدت لي جنب ست شاي و طلعت تلفوني وضربت ل ايليف و دخلت راني معانا في الخط ياحليلهم اشتقت ليهم اتونسنا زين وضحكوني بدراماتهم ، بقيت بس ماشه في الشارع اي محل بلقاهو بدخلو غايتو كتر خير صحبات سمر الخلوني اتفرج، تعبت من اللف دخلت مطعم ارتحت واكلت ، وواصلت حوامه لما جاء العصر خلاص كنت اتهديت.. ضربت لسمر اشوف الوضع كيف من فتحت الخط الوضع واضح جوطه الف، سالتها من ظهرها بقي كيف وقفلت الخط.. فقدت الامل في البيت، مشيت الفندق لاقاني عمو عثمان في الوش قلت اقول ليهو شنو جايا ارقد هنا اوووف برضو جليت الفكره قعدت اتونست معاهو حبه واتخارجت.. كل منك يا مهند السجم هسي لو خليتني في داخليتي ما كان احسن ، ايوه بس اضرب ليهو ، تاني قلت لا لا ياخ خلي يظبط مواضيعو مع ساره احتمال معها في الجامعه..

في النهاية فكرت مشيت كوافير قلت ادلع نفسي ، لازم اعمل حاجه بعملوها والناس راقده، نهائي ناس شعر وبدكير وحاجات فيها صنقير بعد اللف اللفيتو دا مابتنفع معاي.. لقيت مافي غير الحنه عجبتني حركه النساوين المتكله في السرير وبحننو فيها ههههه تاني استغفرت قلت يابت يامريم اي نعم مجنونه لكن ما للدرجه دي.. مشيت للكاشير..

البت: اتفضلي يا انسه عايزه تعملي شنو؟

انا : شفتي ياقلب اي حاجه مريحه وفيها رقاد لاني تعبانه ولافه من دقش الرحمن..