مريم

٢٦

الهند جاييييك نفر

تعلن الخطوط الجوية البريطانيه عن قيام رحلتها المتوجهة لمدينه مومباي علي جميع الركاب التوجه للبوابة رقم 5، غايتو كان في شله كدا عاملين شغب جامد اكيد عرفتوهم منو طبعا.. الرحله 9 ساعات، الناس مبتهجه وما حاسه بالزمن كل مره بتتبادل دا يتونس مع دا، طبعا انا لسه مع نوتي وفي نص راني ونميش بعد نص الرحله مشيت قعدت جنب مهند

مهند : خلاص خلصتي حصه اللغات بتاعتك

انا : ياعوير عشان اعرفهم لما يقطعوا فينا ، وبعدين مش ممكن القي لي هندي يخلي قلبي يعمل شح

مهند : الله يجيبو الحيخلي قلبك يعمل شح ويريحنا منك، هندي صيني اي مصيبه بس، انتي امبارح كنتي بتقولي في شنو لحسام واحمد صارين وشوشهم عارف لسانك الطويل دا

انا : بري والله ولاشي كنت بفتش فيك ولاقيتهم واحمد بالعكس ما كان صاري وبشاغل فيني كالعاده لكن ابو نفسيات التاني هو الركب وش وكدايسو قامت عليهو عشان تصدق كلامي

مهند : ههههه كان نضموا للشله عشان يفك ذي فكه نميش

وصلنا الهند لقينا اخو راني منتظرنا مشينا البيت ، صراحه اتفاجنا بالقصر بتاع ناس راني حاجه فخمه جدا واسرتها راقيه واستقبال حلو جدا امها وابوها واخوها بتكلموا الإنجليزيه بطلاقه لكن باقي عيلتها بتكلموا هندي وعندهم جكس ذي الورد

انا : يامهند شوف جنس البزار دا كنت داير تضيعوا علينا بركه الاتعلمت لي كم كلمه هنديه امشي بيها نفسي

ايليف : كدا مراد ممكن ابيعوا عادي

مهند : احترموا نفسكم انتو الاتنين

بعد الاستقبال الحافل من اهل راني مشينا نمنا من التعب

الليله الخطوبه عاملنها في الحديقه بتاعت قصر ناس راني نحن كلنا من الصباح واقفين مع الشركه المنظمه بنظبط في الحاجات. الظهر راني نادتنا انا وايليف عشان نتجهز معها هي وبنات اهلها..لقيناها جايبه لينا ساريهات هنديه عجيبه وقالت الا نلبسهم.. الساريهات عملت شغل جامد والحمدلله والعرق التركي ماقصر معانا انا وايليف من ناحيه الشعر لكن كمان ما بنحصل الهنديات ديل.. اما راني كانت حاجه تانيه خالص

ابتدت الخطوبه ولما جوا الشباب لابسين هندي مع اخو راني نحن متنا من الضحك وانا طبعا مع الكم كلمه الهندية الاتعلمتها دي شغاله ليك مشاغلات من طرف لاهل راني.. جاء راديش خطيب راني واهلو، راديش دا كمان بس استغفر الله من سماحتو ،انا وايليف في نص الزفه مع النقطه الهنديه الفي الجبهه ما بتفرزونا ههههه.

عندهم طقوس كدا جميله عملوها واشتغلت الاغاني والرقيص ومن غير ما تسالوا اكيد انا وايليف حتيناهو قرض ، وحددناها معاهم بالاغنيه الغنينها انا وايليف ونميش ، لما راني دمعت وجات حضنتنا انا وايليف..مصطفي المصري اجن مننا شايل ليهو فلاش فيهو اغاني مصريه شعبيه قال الا يشغلها ، ياخ دا كان برنامج تاني بدينا الرقيص انا وهو ومهند وايلي وجرينا معانا راني بعد شويه لقينا الامه كلها بترقص..انتهت الخطوبه بعد يوم طويل وبالجد لمه الاصحاب غيييير