نساء في بلادي ١
زينب الموسوي
النساء مخلوق مهم بالحياة ومن كثر اهميتها ربنا خصص سوره بالقران باسم النساء ياترى النساء تختلف من مكان لاخر تعتقدون في نساء بالعالم مرت بمعاناه مشابهه لمعانات العراقيات العراقيه ليش رغم ظروفها القاسيه تبقى مثل الشجره الوارفه تفيي وتظلل على الكل نشوف نموذج من نسائنا ونسمع قصتها
احلام من عائله تعتبر متوسطه عدها اخوان اثنين اكبار واحد مات بالانسحاب من الكويت اسمه جاسم وكان متزوج وعنده بنيه زوجته بعد وفاته تزوجت وتركت بنتها عدنا اسمها مروه مواليد تسعين
اخ ثاني ستار بالقصه نعرف تفاصيل عنه اكثر
احلام اني مواليد ٨٧ و انسام اصغر مني وبيداء واشواق توام واخر انتاج امي وابوي الي كان موظف بسيط بدائرة البريد بغداد الجديده كنا ايجار ماعدنا بيت ملك ولمن توفى اخوي جاسم ابوي تاثر عليه هواي وصار عقله مو تمام يعني مجنون نضطر نحجزه بالبيت ونراقبه حتى اطفال المنطقه متضايقه وتصيح وراه اخوي ستار كان معلم اسلاميه بعد سقوط بغداد تحولنا من الايجار للتجاوز بناية الدفاع الجوي بنايه حكوميه وعوائل تحولت بيها وكل عائله اخذت غرفه احنا اخذنا تلث غرف
وبسنة ٢٠٠٥ انهارت الاوضاع الامنيه وغابت الدوله وبدت حملة ضد الشباب بحيث الي يطلع من بيته مايامن راح يرجع لو لا بغداد تقسمت مناطق حسب الطائفه جماعات شايله سلاح متعرف شتريد مداهمات بالليل ستار قرر نطلع من التجاوز ونروح بيت هيكل قريب لصديقه مهزوم من بغداد للاردن ويخاف بيته يصير حواسم گعدنا بيه احنا البيت مكامل بس احسن من الگعده بنص العوائل بعد شهرين بالليل نايمين البيت كله مسلحين اخذوا اخوي ستار بسياره وراحوا ماعرفنا شنو السبب ولا منو الي اخذوه كان عنده موبايل اتصلنا بيه ميجاوب باليل اتصلت بيه جاوبني.
ولد حچيت وياه
اخي هذا تلفون اخويه ستار الله يخليك تعرفه وين اخذوه
انتي اخته لو زوجته. اخته هو ممتزوج. وشتريدين تتصلي باليل وعندچ موبايل متستحين الظاهر انتم كلكم عائله فالته ويرادلكم سحل
والله الموبايل مو الي لجوارينه بس اريد اسال عن اخوي فدوه وينه اخوچ بالتحقيق اذا ماعنده شي يرجع الكم. ياتحقيق هو شمسوي ومنو الي يحقق وياه
اخوچ ميعرف يدرس دين كافر وكافي تسالين يله ولي بقينا ننتظر تلث ايام ومخلينا احد مارحنا عليه لحد هذا اليوم الي اكتب القصه منعرف وين كان عمري ١٨ سنه والبيت مابيه مصدر رزق وابوي يحتاج ادويه وعلاج ظلت امي تبيع بالسوگ خضرا والمدرسات وياي ياخذني لبيوتهن انظف اشيل فراشات اغسل ملابس ومن اخلص ينطني فلوس بس كل هذا كان مو كافي للعيشه وخاصة البيت ماكامل وحاره ونحتاج مولد واخواتي بالمدارس امي گالت بطلي هاي السنه من المدرسه بلكي اخوچ يرجع السنه الجايه وترجعين
بس اني زينه بدروسي والمدرسات يعرفني وينطني شغل اذا بطلت ميدزن عليه لا يدزن عليچ عرفنچن نظيفه وحبابه وذني ميامنن بأي وحده بس يمه مااترك المدرسه فدوه لعينچ اني قصدي تركيها وتشتغلين شغله تعيين وهم تنظفين بالبيوت. يمه شنو اشتغل اذا هي الزلم گاعده انوب اني خلي تجي العطله واشوف شغل استمريت بمدرستي ومابطلت
التعليق واجبك حتى نستمر
