نساء في بلادي٦
زينب الموسوي
الايام الي بعدها كان كل وقتي لدراسة البنات وترتيبهم واعلمهم شلون يسوون شغلات بسيطه بنفسهن يمشطن يرجعن الملابس لمكانها يرتبن الكتب تجاوبن وياي بس شغله التدريس كانت صعبه خاصة بنين كنت اسمعلها جغرافيه واحفظها تعريف الصيهود
يله بنونه سمعيني تعريف الصيهود
هو حركه عنصريه
شنو حركه عنصريه هذيچ الصهيونيه بالتاريخ مو هنا الصيهود حبيبتي رياح حاره عيوني انتي العتب مو عليچ على ابوچ جابچ لهذا الضيم
كانت تحرگ اعصابي يله تحفظ وتكتب حتى مرات اصير عصبيه عليها والصبح شغلة الريوگ عبالك عرايس گوه يفتحن الحلگ لحد يوم الصبح دخل ابو بنين كل المعتاد يسووي ريوگ وزوجته مدده مثل كل يوم رحت على المطبخ ابو بنين لاتسوي ريوگ للبنات وليش مااسوي كل يوم تسوي ومياكلن خليهن هنه يطلبن الاكل من ميلگنه
خطيه ذني جهال شفهمهن هسه جرب اليوم وشوف اني رايحه اشوفهن كملن لبس ارجوك لتسوي ريوگ ذاك اليوم فاضل طلع من المطبخ وترك الي حرية التصرف ويه بناته من دخلن مشافن اكل سألن وين الريوگ تريدون ريوگ ساعدوني نسويه بدينا نحضر البيض والحليب والبنات يساعدن وفرحانات وامهم تتفرج. اموت واعرف شنو دورها بهاي العائله وحتى حچيت لامي على وضعها يمه ام بنين عبالك خطار كلشي متسوي بالبيت نايمه وحتى لروحها ماالها خلگ مبهذله حزينه ماادري شبيها وهي وزوجها ميتحاچون كم كلمه وبس
يمه انتي معليچ بيهم خلصي شغلچ ولاتتدخلين
الفضول كتلني يعني الي عدها هيچ بيت متگوم تنظفه ترتبه المواعين تبقى على السنك ومن ارجع ثاني يوم مااعرف منو غسلهن
زين انتي من يروحن البنات للمدرسه ارجعي للبيت ومن يرجعن ارجعي
مترهم يمه كل شويه مااخذيني مرجعيني
بيوم جمعه كنت ويه انوار ازغر وحده داسبحها بالحمام وادردم
انوار هاي اخر مره افوت وياچ للحمام هسه اعلمچ وانتي تسووين مثلي وشعرچ اگول لماما تگصه حتى تعرفين تمشطيه تحبين شعرچ قصير
لا اريد شعري طويل وظلت تبچي
حبيبتي ليش تبچين احنا هنا حاره والشعر الطويل يأذيچ والله ماادري شگول على ابوچ جريمه ارتكبها بحقكم عندك شغل بالعراق اخلي زوجتي وبناتي بامريكا واروح وارجع عليهن مبهذل هالبنات وخايف عليهن من الخطف شجابرك والله يحب العراق دكلها بالعراق انت وبناتك
اني مكنت طابكه الباب لان بخار الحمام يخنگ. اندگت الباب وصوت فاضل
شبيها انوار تبچي
مابيها شي داعلمها تسبح لوحدها
راح من يمنا وشفته نزل الانطباع الاول على ملامح وجهه مبين سمع الخطاب القومي مالتي والله عيب طلعت انوار من الحمام بدلت ومشطت شعرها واخذتها جوى اعرف ابوها بالمطبخ يسوي ريوگ لازم اعتذر
ابو بنين عوف الريوگ اني اسويه اليوم
اوكي سويه واني راح اسوي نفسي ماسمعت التحريض الطائفي عليه
يعني سمعت اي سمعت مره الجايه سدي الباب ودردمي گعد على الكرسي وانوار جتي بحضنه
اني اسفه هذا طبعي من اشتغل ادردم بس والله لان مقهوره على البنات خطيه
اني هم مقهور عليهن بس الله كريم يمكن يتعودن
انشاالله هن سباعيات بسرعه يتجاوبن وياي وماعدهن اعناد وحتى قراءه الاول حبنها وحب الصور بيها وشاطرات بالرياضيات
طالعت على ابوهن اني شاطر بالرياضيات من كنت شاب احل المسأله بعقلي بدون ورقه
لا عاد مو لهاي الدرجه لازم ورقه
والله اتذكر مدرس عدنا كان ينطيني تلث درجات لكل طالب ويگلي طلع السعي اطلعه بدون ورقه
ماشاء الله عليك
وظل يحمى واني ماخذته على گد عقله وتريگنا سوا وعيني على الساعه ام البيت شوكت تگعد وتشوف رجلها غير اليوم جمعه المفروض تگعد قبله وتحضر الريوگ لو هاي العائله غير شكل من خلصنا لمينا المواعين شفته ديريد يغسلهن هو هذا صدوك الي داشوفه
ابو بنين اني اغسلهم المواعين ميصير انت واني واگفه
لا عادي مابيها شي
شنو مابيها شي ارجوك خليني اغسلهم
قبل ليطلع من المطبخ گلي هاليومين اجيب وحده تساعد ام بنين بالبيت
بگلبي تساعد ام بنين على شنو هي مدده وتباوع تلفزيون
كعدت ام بنين حچيت وياها على شعر البنات
ام بنين البنات شعرهن طويل وميعرفن يمشطنه گصيه الهن حتى يسيطرن عليه ويتعودن عليه وهنا حاره الطفل من يلعب يحتر والشعر ياذي
خلص العصر السايق وانتي اخذيهن وگصي الهن
صار اني اليوم ادرسهن على القراءه والعصر اخذهن
اگولج ابو بنين يدور وحده تساعدني خليچ انتي ساعديني وانطيچ راتب زياده مااريد نسوان تطب عليه وكل يوم اغير وحده انتي على فرغتچ اشتغلي شتگولين
خلص من يروحون البنات للمدرسه اشتغل
خلص اگول لابو بنين حچت وياه گالها بس اخاف وقتها يصير للتنظيف وتلتهي عن البنات
قنعته لا تسوي شغلات بسيطه
عرفت همه معزومين غدى بيت ابومريم واني اروح وياهم بالي سؤال اساله ليش متعتنين بنفسچ فدوه اروحلچ هذا الرجال الي ماخذچ مغصوبه عليه شنو
تعليقاتكم دعم النا استمروا
