نساء في بلادي ٢
زينب الموسوي
كانت ظروف حياتنا قاسيه محرومين من كلشي وبدا الجو يبرد والبيت لاشبابيك ولا ابواب واحنا بس نسوان امي دخلت سلف حتى نكمل البيت حچيت وياها
يمه هو البيت النا حتى نكمله خلي من يجي ستار نشوف حل
شنو الحل البيت صح مو النا بس صاحبه لايگدر يبيعه ولا ياجره واحنا الي عايشين بيه نسگفه حتى لو سگف بسيط وبعدين نشوف
كنت بالمدرسه وصاحتني ست فاطمه مديرة المدرسه سالت عن وضعنا وبعدين گالت
تعالي وياي البيت عندي شغل الچ
بس امي متدري بيه
اتصلي بيها
ماعدنا موبايل بالبيت خلي صديقتي نور تمر عليها بالطلعه وتگللها
خلص گولي لنور تعرفين تطبخين مو
اي اعرف كلشي اسوي
باچر عندي ناس اريدچ تساعديني بالطبخ والتنظيف وانطيچ ٢٥
٢٥ هواي ست ١٠كافي
لا ميخالف لان باچر ماعندچ دوام تجيني وعندي ملابس قديمه مالتي اخذيهن الچ
الله يطول عمرچ ست
رحت وياها بعد الدوام هي بيتها قديم كان البيت فارغ بس اني وياها گلتلي نزلي البردات الصاله وغسليهن بيدچ غسلتهن ونظفت الشبابيك حضرت وياها كم اكله بديت من الساعه ١٢الظهر لحد ساعه ثمانيه باليل رجع زوجها وابنها وبناتها اثنين طلعت وصتني باچر بالسبعه الصبح يمي مو تتاخرين
حاضر ست بالسبعه اني يمچ
انتي شلون تروحين بهاليل خلي اصيح ابو علي يوصلچ
لاست ميحتاج تدرين البيت قريب
شنو ميحتاج الدنيا مو امان والخطف ومصايب الدنيا هواي انتظري البس حجابي واوصلچ
وصلتني بالطريق عرفت الناس الي جايين هم ناس خاطبين بتها وتريد عزيمه ترفع الراس بتها اسمها علياء حلوه عبالك مامر على وجهه غبار لو عجاج واختها الثانيه غيداء هم حلوه
وصلت البيت انطتني الفلوس ودخلت للبيت فرحانه انطيتهن لامي
ثاني يوم رحت من الصبح بس اني وياها نطبخ ونظف الباقي نايمين قريب العشره يله گعدوا گلتلي
بعد لاتطلعين من المطبخ وسدي الباب ومن تسمعين الضيوف وصلوا اطلعي من باب المطبخ
حاضر ست كملت شغلي قبل ليوصلون الناس
ست اني راح اروح كلشي كمل تريدين بعد شي
انتظري اخذي هاي العلاگه وياچ
ردت اطلع صاحت تگدرين بعد الاربعه العصر ترجعين تغسلين المواعين وانطيچ الفين واخذي الاكل الباقي
الحچايه الاخيره مردت گلبي
ست ارجع اغسل المواعين بس مااخذ اكل عدنا اكل بالبيت
لچ مو عبالچ الاكل الي يرجع بس الاكل راح يبقى هواي
ست خليه لغير يوم اني ارتبه الچ بالمجمده الله وياچ
طلعت من البيت ودموعي تنزل اسرع من خطواتي لحد ماوصلت بطلت بچي ودخلت امي كانت چايبه نايلون للشبابيك وساعدتها بيه رجعت العصر غسلت المواعين وست فاطمه گاعده يمي ماادري حسيتها خايفه عليه من شي او يمكن عبالها اكسر ماعون بس هي مأمنه بيه ماامد ايدي لكن عرفت سبب خوفها من دخل ابنها علي للمطبخ
هاشعندك هنا اطلع
هسه اني وين داخل بابا يريد چاي
روح واني اجيب چاي
ماما شبيچ غير اسلم على هاي البنيه شسمچ حبابه
احلام
كافي اطلع منا وانتي لاتجاوبيه خلصي شغلچ واطلعي بسرعه
خلصت شغلي وطلعت لبيتنا ست فاطمه تخاف عليه وعلى ابنها حقها الولد الوحيد واني بنيه شابه لازم تراقب الوضع ارتاحيت من تصرفها هذا دليل هي انسانه محترمه
بعد اسبوع دزت عليه ست فاطمه افرش وياها البيت كان يوم جمعه وكل شويه تگلي بدون صوت مااريد احد يگعد
ست علياء وغيداء ميساعدوچ
يساعدوني هسه مااريد منهن غير ينظفن غرفهن حتى غرفهن هم عليه
ست لعد من يتزوجن منو ينضف الهن
ندز عليچ انتي تنظفين والله هنيالي لو انتي بنتي نادره ونظيفه ومؤدبه وشاطره هسه سنه الجايه تطلعين معدل وتصيرين دكتوره وبعد حتى متسلمين عليه
لا والله ست ماانساچ ابد ومدرساتي كلهن ماانساهن
بقيت اشتغل وياها لحد نزل علي اشوفها مثل التكهربت عبالك من وجوده صاحتني للمطبخ
شوفي احلام انتي هسه دخلتي بيتي اريد اگلچ شي علي ابني ترى يموت على البنات ويحب يلعب عليهن وانتي اهلچ ناس فقره مناقصين مصايب كوني حذره منه بنتي وابد لاتنطيه مجال حتى لو يضحك يتشاقى انتي معليچ بيه
حاضر ست معليه بيه
بمرور الايام اكتشفت حچيها حقيقه وعلي حاول باكثر من طريقه يوصلي وحتى من اطلع من البيت يلحگني مره طلع قبلي وظل منتظر براس الشارع طلعت بدا يحچي وياي
هلو احلام تاخرتي صار ساعه انتظر
ومنو گالك انتظر
گلبي گلي انتظر احلام هنا
شوف هسه من تمشي بعد خطوتين اكو مسلحين واگفين يفتشوون السيارات قبل صلاة ااجمعه بس اوصل هناك واشوفك اگلهم هذا يتحارش بيه يصير موتك رجم بالحجاره وبعدين نلگاك جثه بالسده فروح احسلك ابو گلبي جاي يبيعهن عليه
شدعوه صايره عصبيه فوگ مخايف عليچ واريد اوصلچ لبيتكم
لاتخاف عليه خاف على روحك الي گدامك رجال مو بنيه
هو اني صوچي مضيع وقتي انتظرچ
رجع لبيته بس متراجع عن الي باله تقريبا كنت كل جمعه بيت ست فاطمه اخلص وياها شغل وعلي ظل يتعمد يگعد من وكت ويظل يسولف ويه امه ويفتر ورانا حتى يباوع عليه وست فاطمه تشوفه وترزله وابد متخليه قريب مني وصلنا لامتحانات نص السنه امتحنت شفهي وكل البنات گعدت بالبيت تراجع منداوم اخر يوم صاحتني ست فاطمه
احلام عرس علياء بالعطله والطابق الفوگ صاير مزبله باچر الصبح من يطلعون للدوام تبقين بالبيت تنظفين واني ارجع ب١٢الظهر عليچ مااگدر اعوف المدرسه تجيين لولا
اجي ست انظف واخلص واروح للبيت اقرا بعد مااگدر اجي لان اراجع دروسي
ميخالف بس اهتمي بغرفة علياء صديقاتها يجوون وعيب يشوفنها وسخه
حاضر ست بعيني
خبرت امي وثاني يوم رحت لبيتهم ست فاطمه ماتركت البيت الا تاكدت الكل طلع خاصة علي
اذا تحب البيج يستمر ادعمنا بلايك وتعليق
