نساء في بلادي ٣
زينب الموسوي
صعدت الطابق الثاني البنات كلشي عدهن بغرفهن حتى ثلاجه زغيره زوج ست فاطمه محامي معروف وغني والقذاره والوسخ الي بغرفهن مينوصف بس من تشوفهن يطلعن الصبح عبالك عارضات ازياء بديت انظف بعد نص ساعه حسيت احد فتح باب البيت نزلت اشوف منو تفاجات بوجودعلي بالبيت.
شتسوي هنا مو رحت للكليه
ورجعت شنو بيتچ وتحاسبيني
اني اروح وخابر ست فاطمه گولها احلام راحت
اگولچ ليش راسچ يابس خلينا نتفاهم بلا ست فاطمه ولغوتها اخذي هذا موبايل جديد وياه شريحه حتى اخابرچ يمتى مااريدچ
مارديت عليه ردت اطلع سد الباب وگف بطريقي
شوف علي الي بالك ميصير مستحيل واحد منا يموت لو روحك لو روحي عيب انت ابن ناس معروفين واختك على وجهه زواج ليش تجيب الهم والك مصيبه
والله واثقه من نفسچ لچ والله غيرچ تتمناني
بدا يقترب مني ركضت على المطبخ اخذت سچين بيدي بس كنت خايفه اضرب بيه لكن من شفته لزمني بيديه اثنينهن امتلكت الشجاعه وضربته بالسچين بطنه وبأيده وگع وطلعت ركض من البيت نسيت جنطتي بالبيت بس ماارجعت وصلت للبيت امي كانت بالشغل بالسوگ واخواتي يدرسن شافتني انسام اختي شبيچ وجهچ اصفر وشفتچ بيضه شبيچ احچي ليش تبچين ملابس شبيها مشگگه ظليت ابچي وعيني على الباب اعرف راح تصير فضيحه صارت بالوحده امي رجعت بعدها وگفت سيارة الشرطه بابنا
دخلوا سالوا امي هذا بيت احلام جليل اي بيتها خير شرايدين من بنتي بنتچ كاتله رجال ومهزومه
يا شتحچي بنتي تكتل اي حچيه لاتطولينها خلي تجي ويانا بدون قوه تعاي وياها اذا تردين دخلت السياره والجوارين كلها طلعت تتفرج علينا وتسال شصار وصلت لمركز الشرطه ابچي وجسمي يرجف دخلوني على ضابط اسمه نقيب اسامه شافني حالتي وخوفي گال
تعاي بابا انتي احلام اگعدي واحچي شصار شتسوين بيت المديره لاتكذبين لان محد يكدر يخلصچ من السجن غير الله واني
والله راح احچي الصدگ احجي اول مره وبعدين اني ادون اقوالچ واشوف الي يفيدچ اكتبه والي يضرچ مااكتبه اني هم عندي بنات والله يحبج قضيتچ عندي صارت
سيدي اني اشتغل بيت ست فاطمه من بداية السنه انظف البيت
بفلوس لو مجاني تنطيچ درجات عليها
بفلوس لا گولي مجاني حتى تنجحني بس ست فاطمه حبابه حرام ادعي عليها. لاتصيرين غبيه خلصي روحچ ست فاطمه رجلها محامي خلي موقفچ قوي
بكيفك هي عافتني بالبيت ورا ماطلعوا للدوام اولادها وزوجها طلعت ابنها علي مراقب البيت رجع ورا نص ساعه وحاول يعتدي عليه رحت للمطبخ ضربته بالسجين
هو يكول انتي وياه متواعدين بالبيت وامه متدري انتي بالبيت
يعني هو عايش ماميت الحمد لله ياربي يعني اني بريئه شنو بريئه انتي ضربتيه بدافع القتل والسرقه وهو يگول اتصل بيچ وجيتي للبيت
شلون اتصلت بيه اني ماعندي تلفون وفتشوا جهازه اذا بيه مكالمه مني هو واحد حقير يتحارش بيه على طول
لا تگولين هذا الحچي لان هسه القاضي يگلچ ليش مابطلتي تجين على بيتهم
بكيفك سيدي
اذا طلع تلفونه مابيه مكالمه منچ وامه عرفت انتي تگولين تستغلچ مقابل درجات اكو امل يتنازلون بس يبقى الحق العام احاول ااجل القضيه تصعد للقاضي صاح شرطي وگلي راح اروح للمستشفى واشوف اهله موقفهم واني وياچ مو عليچ تعال حسن البنيه هاي تخليها بغرفة الخفر هي وامها واذا احد منكم اتعرضلها حسابه وياي يصير ظلينا اني وامي ننتظر بعد ساعتين رجع الضابط شرحلي الصار. انتي محظوظه ابو علي درس القضيه من كل الجوانب شاف نفسه خسران ابنه منطي افاده كذب انتي ممتصله بيه وامه تكول اني گتلها تجي تنظف رادت تتهمچ انتي عندچ علاقه وياه گتلها احلام تدعي انتي تستغلينها بالشغل علمود تنجح وهذا اذا انفتح بيه تحقيق تخسرين وظيفتچ. وهمه خايفين من الفضيحه اكثر منچ لان بتهم تريد تتزوج تنازلوا عن القضيه وانتي تگدرين تشتكين عليهم بتهمة الاعتداء. لا سيدي الله يخليك اريد اطلع وحچى ويه امي خاله ديري بالچ عليها بنتچ زغيره مو مال تشتغل بالبيوت الله سترها هالمره بس يمكن المره ااجايه شمدريچ شيصير
ياوليدي على عيني تشتغل وست فاطمه مديرتها ونعرفها وتساعدها
انتم شنو قصتكم احچيلي يمكن اساعدكم الگالها شغل حچت امي القصه كلها وظلت تبچي على اخواني جاسم وستار الضابط تعاطف ويانا وحتى ماصعد القضيه للقاضي گلي اطلعي واني افهم القاضي حتى اهل الولد ميريدون يشتكوون واخذ العنوان البيت وراد ينطي امي فلوس امي ماقبلت وگلها خاله ادعيلي تجي رتبتي لان اني مو بالاحزاب ومامنطيني استحقاقي الا انتمي لحزب ظلت امي تدعيله وصلت على البيت ممصدكه رجعت والله خلصني من السجن
علق خلينا نسمع كلماتك الحلوه
