أشوفك حلم

الفصل الخامس

#اشوفك_حلم
الفصل السادس
#بقلمي_اسراءالجميلي

صلاح مقصر وياية بشئ ابد ..
كل الي اريده يجيبه و يسوي ..
و هذا الشئ جان اموت هناء من الغيرة ..
و كلما اطلع اسمع جمله شكل ..
اتقلد على ام صلاح ( تعاي عمة الزمي القماش الفوك راسه انتِ مسعده ) هيه المسعدة عيني ..
يلوك لم حجول ..
خلفله على العباس تعلمت خبز بنذره ..
اي هو حظ الهالشكول كاعد خو مثل حظي ..
اني جنت اطنش و ما ادير بال ابد ..
امي خطية تصبرني و تكلي لا اديريله بال ..
لا يمه لا يظل بالج ..
حشاج الجلب ينبح ينبح و يسكت من كيفه ..
يمه اقري المعوذات من عيونه ..
حاضر ماما .. الله يحفظج اليه ..
و طلعت كالعادة اليومية وي صلاح اليوم عزمني بمطعم يم ابو نؤاس ..
جانت اخر عزومة لان باجر راح يلتحق ..
طبعاً جنه نطلع العصر نرجع بعد العشة ..
انبدل و نغسل .. نرجع نحجي بالتلفون لحد اذان الفجر انصلي و انام ..
تقريباً عرفت كلشي عنه و عرف كلشي عني ..
اكتشفت علاقته ب صباح اقوة علاقة اخوة شايفته بحياتي ..
من همه و صغار محد يريد زعل الثاني ..
و واحد يدافع عن الثاني ..
تحس قلبهم واحد ..
و صدك هواية كلمات استعمله صلاح سامعته من صباح من جان يدرسني ..
همه بينهم سنتين ..
صلاح كمل علوم بايو و اطوع بالجيش يدافع عن الارض و العرض ..
صباح كمل هندسة معماري و قدم على الماستر و كمله ..
فاجند ست شهور بس ..
و بعدها فتح مكتب هندسي وي صديقة و شغلة خير من الله ..
وصلنه للمطعم ..
يابه منظر النهر يجنن ..
صح من جهة وحدة دا اشوفه بس تحس الموج بداخلك ..
صوت المي عبالك الدم يمشي بعروكك ..
تدرين وردة انتِ ابد مجنتي ابالي ..
هااااا كلش زين ..
وج اصبري لحظة ..
من حجولي عليج ..
كلت شكو بيه بت عمي مؤدبة عده اعدادية يعني واعية ..
تخاف الله و حلوة ..
بعد شريد ؟
اي كمل صلوحي ..
هههه بعدين طلعتي احسن بكومة من توقعاتي ..
طلعتي وردة بالاسم و الداخل و الفعل ..
اممم كافي تمدح بيه تره انغر عليك ..
يابه انغري اني راضي ..
مع انو متأكد الغرور مو طبعج ..
زين انتِ شنو موقفج مني ؟
الصدك .. الصدك ؟
اي عيني الصدك ما اريد ابن عمه ..
جنت مراضية و انصدمت ..
بس من صار موضوع الكلية ..
رضيت و حسيت بيك شكد شهم و سبع و متخاف احد بالحق ..
هههه يعني بت عمي اخذتيني جسر يعبرج للكلية مو ؟
امممم يعني بالبداية اي ..
بس بعدين و الله لا ..
العمر فدوة الك يروح ..
لا حبيبتي اسم الله عليج ..
بعدين محد ياخذ من عمر احد ..
صحيح حبيبي ..
صدك صلوحي اشو صباح مختفي !!!
تدري اخر مرة شفته بيوم جنت يمكم و كالتلي عمتي على زواجنه ..
اي حياتي صح مو اجاله شغل بالشمال و راح ثاني يوم الخطبة ..
هااا يعني بعد ما يرجع ..
لا ليش يرجع بس يكول مو هسة ..
هااا الله يسعده ..
( ما ادري ليش حسيت بانزعاج و ضوجة من عرفت صباح مدا يشتم نفس الهوة الي اشمه ) ..
رجعنه للبيت و اني طول الطريق لازمه كف صلاح اليمين بايدي اليسار و لافة اليمين عليه ..
وج راح نوكع و الله ما انهزم منج ..
وخرت ايدي ..
امممم مو صوجك .. صوجي الازمتك ..
ديلا يلا هاج ايدي تروحين تزعلين ..
ما اريده خليها الك ..
بقيت ضايجة لحد ما رجعني للبيت حاول وياية كومة مرضيت ..
ثاني يوم اجه صلاح ديودعنه لان راح يلتحق ..
سلم على امي و ابوية و هناء و مهند ..
محمد جان رايح قبله ..
طلع و طلعت وياه للباب الصغيره الخارجيه ..
يمشي و يتلفت عليه ..
عبالك يريد يحجي شئ لو يسوي شئ ..
و مدا يكدر ..
وصل للباب ديروح جريت ايده اليسره خليته على ركبتي و حضنته قوي ..
لفني بيده اليمنه على خصري ..
اووف وردة شكد جنت محتاج هالحضن ..
ههه و اني اكثر ..
يعني مزعلانه مني ..
لا حياتي .. ادلع عليك غير انت روحي ..
هههه صحيح .. عشت برعب من البارحة لليوم ..
ديربالج على نفسج حبيبتي ..
بس ارجع نتزوج بعد ما اتحمل ..
احبج موت ..
قلبي وجعني من كلي هيج ..
اسم الله عليك من الموت ..
احبك اكثر ..
سكتنا ..
راح و روحي راحت وياه ..
احس النفس صعبه اسحبه ..
بقيت بين التنظيف و المناكر وي هناء الي ما يهده شئ ..
الى ان فديوم هي دتنظف الصالة و اني دا اخبز ..
كملت نص الخبز بخير و سلامة ..
لزكت الخبز بالتنور ..
سديت القبغ بين ما اشنك باقي العجين ..
بعدها اشتميت ريحت حرك ..
فتحت التنور و الكه الاربع كرص واكعات بالتنور ..
يمه اسم الله هاي ليش اول مرة يوكع عدي الخبز ..
و اسمعلج صريخ هناء ..
وج وريده الحكي ..
عفت التنور و رحتله ركض ..
وج خيرج ؟
اسمعي بيت عمج عياطهم ما اله والي ..
طلعت بره الصالة قربت راسي على الحايط المشترك بينه ..
و اسمع عمتي تولول بكلام مدا افهمه و بعياط و صريخ ..
رجلي احسه بعد ما تشيلني ..
ارتجيت على الحايط ..
حسيت كون واحد لزم قلبي بقبضة ايده و جعصه جعص بليه رحمه ..

فالقصة عذاب من نوع اخر ..