#ثمن_حريتي

الجزء الاول

#ثمن_حريتي
بقلم فردوس عبد اللطيف
الجزء الاول. حقيقيه
قد يجد الانسان نفسه امام سلسله من الفروض المقترحه للخروج من ازمه وقد يقلب النظر فيها فيجد ان أحلاها مر وقد يكون كالمستجير من الرمضاء بالنهار .وقد يدور حول نفسه لايرى مخلصا وقد يرى المخلص فادح التضحيه
والامثل ان يختار الانسان افضل الطرق واقرب الحلول ولايبالي مايحدث بعد ذلك .
وأكثر العوامل تضعف الانسان عندما ينهزم داخل نفسه قبل ان تهزمه واقع الحياة
الحريه توخذ ولا تعطى
بطله قصتنا اسمها يسرى تعرضت للاستغلال من اشخاص كثيرين .. فقدت ثقتها بالناس خسرت امور كثيره
كانت تتمنى حياة افضل لان بداخلها بذره طيبه بذره ايمان بسلك طريق الصح ولكن الظروف الي تمر بيها تجبرها تمشي بطريق الغلط
خلي نشوف القصه وبالنهاية يمكن رب العالمين يلتفت عليهه ويمنحها الي تمنته
نبدأ بيسرى
أنا يسرى مواليد 1995 بيضاء وجهي مدور شعري اسود طويل جسمي ممشوق الطامعون بي كثيرين لان شكلي وجسمي خلاني محط أنظار واستغلال بعض الذئاب البشريه
فتحت عيني عالدنيا اعيش مع والدي ووالدتي بس كبار بالعمر لا ابوي يكدر يشتغل ولا امي تكدر تسوي شي يعيشنه عيشه محترمه .....
الاثنين محتاجين رعايه ماديه وصحيه نعيش بأحد القرى بالموصل وضعنا المادي تعبان يعني حسره علينا كسره الخبز اخوي يشتغل (فلاح )
بس يفكر بنفسه حتى يتزوج وياريته ماتزوج . من دخلت علينه زوجه اخوي
سيطرت عالبيت وعلى اخوي سيطره تامه ... طبعا اهلي مدخلوني مدرسه لان القريه بعيده عن المدرسه ولازم
ملابس وجنطه وكتب ولوازم الدراسه
اهلي اختصروها مادزوني للمدرسه
بلغت من العمر 14 سنه
تغير شكلي وبدء ت الأنظار علي ... خصوصا عدنا بالقريه
اي بنت تصل مرحله ١٢ سنه تبدي العيون عليها والخطابه تدك بابها .... اني مجنت أطلع ومحد شايفني اخوي مانعني من الطلعه من باب البيت بسبب
كوني جميله وجسمي جذاب لذلك كنت مطمع لعيون الذئاب البشريه ولان القريه صغيره وكل حجايه تطلع يكبروهه ويصير قيل وقتل
مع احترامي للرجال اعتذر عن هذه التسميه (الذئاب البشريه ) لكن من تقرون قصتي راح تعرفون سبب هذه التسميه !!!!!
زوجه اخوي شغلتني خدامه بالبيت وتربيه اطفالهه وكل هذا من يرجع من شغله تعبان تشتكي مني ومن ابوي وامي على اساس هي تخدمهم لكن الحقيقه اني كنت شايله البيت بس من كثر ما تزن براس اخوي
صار اخوي ما يطيقنه ويتحجج وكل يوم يسويله هوسه وعركه يفتعل اسبابها هو ويطلع حركته بي ويضربني وابوي ميكدر يحجي كونه هو الي يصرف عالبيت وهو الي معيشنا
بدت الخطابه تتقدملي ...صار عمري 15 سنه ...اخوي كال بعد شتنتظرين ؟
هذا حسام خطبج
اني بهالوقت ماكنت افكر بالزواج بس ابن جيرانه قصي كان معجب بي ويتمنى يخطبني ويتزوجني بس وظعه ميسمح لان يشتغل ومعيش عائلته عنده خوات 6 كان ينتظر يزوجهن يعدهه يكدر يتزوجني العلاقه الي بينا كانت مجرد إعجاب مو اكثر ....
اني بوقتها كنت استلطفه حتى مشاعر الحب مكانت بداخلي
من تقدملي ابن خالتي اهلي بس رادو يخلصون مني
حسام. شاب عمره 20 سنه عايش على اهله يصرفون عليه و ابن خالتي موغريب
لكن شخص مكروه وتصرفاته مو طبيعيه ومن يجي يمنه نظراته مقرفه احسه يباوع على جسمي نظرات غريبه ...يريد يأكلني واي بنت مثل حالتي اكيد تقرف من نظراته .... ما احبه كرهته
رفضت بقيت ابجي والطم
يسرى بابا الله يخليك ما اريده انسان مكروه
يمه عفيه احجي ويه اخوي ما اريد اتزوج خلوني يمكم
ابوي ساكت يباوع على
بعد ما نفذت دموعي وصوتي اختفى من الحجي
حجاها ولج منين نصرف عليج ؟
هو احنا عايشين كوه يوم نأكل ويوم مناكل تزوجي خلي يخف الحمل على اخوج اشو يوم يشتغل وعشره لا وبركبته عائلته
تتزوجين حسام وغصبا عليج !!!!
رحت على اخوي توسلت بي لكن اخوي يتمنى يخلص مني
المهم اجه شخص وخطبني مو مهم شنو هو المهم يخلصون من مسوليتي ...
المهم هو مصلحته يخلص من لكمتي تدرون حتى دشداشه ماعندي غير انتظر زوجته تشتري جديده حتى تنطيني القديمه الممزقة اخذهه اخيط الزروف واغسلها لان كلهه مدهنه ومتكعه ابقى البس بيهه ومن ادخل للحمام اغسلهه وانطيهه لامي تنشرهه حتى من اكمل سبح البسهه مرات ندفيها عالصوبه ....امي هم مثل كل ام تتمنى بنتها تتزوج وتنستر وتعيش حياتها
ام يسرى بنتي اني مدايمتلج خليني اطمن عليج قبل ما اروح
يسرى ليش هيج تحجين يوم بس اشو اخوي بس يريد يخلص مني هذا الي قهرني
ام يسرى لج بنتي متشوفين زوجته شكد تحجي دوخته يريد يخلص من لسانها
يسرى والله مدري يايمه شمنتظرني
بنتي مهما كان الرجال ستر وغطى للبنيه وانت لا شهاده ولا صنعه يعني لازم تتزوجين والرجال يعيشج ويصرف عليج ء
يسرى يايمه شي يعيشني اذا هو عايش عاله على اهله
ام يسرى بنتي حالج من حالهم بلكي يدللج وترتاحين
يسرى يوم اني مموافقه حرمتوني من هوايه امور كنت اتمنى أحققها .... كنت اتمنى ادخل مدرسه واتعلم قراءه وكتابه
وانجح وانجح وأصير معلمه
نصيحه لكل بنت اهلهه موفريلهه كلشي
وتتكاسل ومتقرى ترى اليوم اهلج موجودين وموفرين الج كلشي تحتاجين
لاتضيعين الفرصه من ايدج بعدين تندمين
يسرى. يوم فدوه اروحلج لا تضيعوني ويه حسام هذا انسان حقير والكل تحجي عليه لا خلق ولا اخلاق. .... دخل اخوي رياض لان زوجته سمعتني احجي ويه امي راحت صاحتله
رياض اخو يسرى سمعي لج تزوجينه وغصبا عليج
يسرى. ما اتزوجه
رياض. كلبه حقيره احنا نعرف مصلحتج
وطاح بي ظرب ويضرب واني اصرخ وابجي
لكن محد يتحرك الكل واكفين يباوعون
ابوي امي زوجه اخوي كانهم كلهم أتفقو على
تسليمي لحسام لاجل الخلاص من يسرى
رياض. لج اني انطيته كلمه احنا موافقين وباجر يجون يجيبون النيشان
يسرى ما اريده
رجع كفخني ولزمني من شعري وركع راسي بالحايط ولج تتزوجي وغصبا عالخلفج لحد ما اغمى علي بعدين امي صبت ماي علي صحيت
يسرى وين انطي وجهي اهلي يردون يخلصون مني عبالك لكمتي مكلفتهم هو اني باقيه بالبيت لا طلعه ولا طبه ليش هيج يسوون بي بقيت ابجي لحد مانمت وما اعرف باجر شمنتظرني هو حسام من اشوفه اتقزز منه من يجيلنه انهزم اروح بالغرفه اشلون اصير زوجته
دنيا غريبه عمري 15 سنه مكنت اعرف شنو يعني الزواج اصلا الزواج مسؤوليه !!!!
وعمر ال 15 سنه كيف تتحمل المسؤليه
شكد حاولت شكد ردت ويه اهلي لكن ميفيد كانو مصممين ان يزوجوني لحسام
اجوي هو واهله وجابو النيشان عباره عن حلقه وكلاده وهاي هي حتى فلوس اهلي اخذوهن مشفت منهم شي بس زوجه اخوي انطتني سيت نوم مال عرسها طبعا قياسه كبير على وأهل حسام اشترو كنتور بسيط وسرير صغير اعتبرو هذا تقديري
طبعا اذا اهلي بس يردون يخلصون مني قابل يكعدون يتشرطون وأهل حسام يعتبرون نفسهم متفضلين علينه وحددو يوم الزواج (يوم الي يقودوني بي الى السجن ) بقيت طول هالفتره ابجي وأتوسل بأمي بابوي بزوجه اخوي لكن محد يسمعلي كل همهم يخلصون مني ...طيب ليش خلفتوني اذا انتو مو كد المسؤليه ليش تخلفون اطفال الي بعمري تلعب بلعابتهه او تفكر بدراستهه واني باعوني ببلاش والسبب ميكدرون يصرفون علي
كانت هذه اول قيد قيدوني بي بحياتي
بقلم فردوس عبد اللطيف f
للحكايه بقيه.