#ثمن_حريتي

الجزء 17 والاخير

#ثمن_حريتي
بقلمي فردوس عبد اللطيف
الجزء 17 والاخير حقيقيه
ياصاحبي خذ للحبيب رسالتي
فعسى يرى بين السطور الادمعا
بلغه اني في الغرام متيم
والقلب من حر الفراق تصدعا
مافي النوى خير لنرضى بالنوى
بل إن كل الخير ان نحيا معا
في العمر مراحل ،ومشاعر،ومواقف،واحلام ،ووجوه،وعشره مخزيه
اتمنى لو نلقيها في محرقه لتتحول الى رماد وكأنها لم تكن شيئا مذكورا
يسرى بقيت ذاك اليوم حزينه مارحت للشغل بس اسامه اتصل بي مجاوبته
غسق اتصلت بي ....الو ولج يسرى اسامه سالني عليج وكأنه ضايج شكو شصاير بينكم ؟
يسرى بين فرحت وبين مقهوره صوتي رجعت الفرحه بي
اي كوليله تعبانه ومريضه
غسق يعني ماتجين اتصلي بي ترى كاعد عينه عالباب وكلسع يسألني عليج
يسرى راح اتصل بالسائق واجي
من عرفت اسامه يدور علي حنّيت كلبي مشتاقله لان هو روحي بالدنيا اكو واحد يعوف روحه
رحت وصلت للصاله بس دخلت وكف اسامه واشرلي
اني سويت نفسي ضايجه وامشي خطوات بطيئة لكن كلبي وروحي تريد تطير حتى توصله
اسامه هاي وينج ليش طلعتي من غير ما اشوفج
يسرى انت البارحه ضوجتني من كتلك تزوجني فزيت عبالك كتلك انتحر لهالدرجه اني أخوف
اسامه حبيبتي انت تعرفين وظعي من الاول اني متزوج وعندي طفل ما اكدر اخرب بيتي خلينا نبقى هيج
يسرى بس اني اريد اعيش بالحلال هذا الوضع ماذيني نفسيا
تعبت كرهت الرياجيل
اسامه حتى لو تنهزمين من ام غسق منين تعيشين وحتى لو تشتغلين مراح يوفي ايجار ومصرف اطفالج
يسرى اعرف هذا الشي بس انت الانسان الوحيد الي حبيته كلبي ما انفتح لشخص غيرك
اسامه لا تتأملين مني زواج اذا اجالج عرض للزواج وأفقي لان تعتبر فرصه الج للتوبه وحتى تخلصين من هذه الشغله
يسرى شكرا للنصيحه حا افكر بيهه
كان ودي اكوم من يمه لكن كلبي ميطاوعني لان روحي ترفرف حولينه
بقيت بنفس شغلتي وعلاقتي باسامه مستمره لان هو الدواء لجروحي بكلمه منه تطيب كل جروحي
قاسم مستمر يتردد علمودي وكل مره يجيبلي هديه لحد ما فد يوم
قاسم. يسرى اني احبج واجي لهنا علمودج تتزوجيني ؟...
يسرى انت فاجئتني قاسم
قاسم باعي حبيبتي اني مطلق وعندي اربع اطفال وعندي محل وعايش خير من الله بمحافظه (....) وجاي اتعب من السفر كل كم يوم اجي حتى اشوفج انت اخذتي عقلي وكلبي
حتى من اروح واشتغل تفكيري يمج وبصراحة اغار عليج من اشوفج تتكلمين مع اي زبون وبعد مجاي اتحمل
يسرى بس الي متعرفه اني ملك ام غسق مو ملك نفسي
قاسم ما افتهم ممكن توضحين
يسرى ام غسق اشترتني بسعر 2600$ دولار اني وجهالي وحاليا احنا عبيد عدهه
قاسم انت تحجين صدك شنو اشترتج احنا بيا زمن وانتي تشتغلين حتى هي تستلم فلوس شغلج
الله واكبر انت شكد مظلومه
يسرى قاسم اذا تعرف قصتي يمكن ما تصدكني بس خلينا ما نستعجل خلي نتعرف على بعض اكثر ....
بصراحه اني كارهه هاي الشغله وأريد اعيش بالحلال اريد اكون مثل باقي النسوان عندي بيت وجهال ورجال انتظره يجي من شغله واتلكا واكوله الله يساعدك
قاسم يعني احنا ما مختلفين انتي فكري وردي علي بس عندي بعض الشروط قبل كولشي
يسرى وضح كلامك
قاسم اولا موبايل ممنوع
ثانيا شرب خمره ممنوع
ثالثا تلبسين حجاب وعبايه لان بمحافظتنه هذا زي النساء
رابعا طلعه وطبه ممنوع الا وياي
يسرى خامسا اطفالي وياي لان ما أتخلى عنهم والموبايل ما اكدر استغني عنه
قاسم مو مشكله بعدين نتناقش بموضوع الموبايل
يسرى راح افكر وارد عليك
عرض قاسم كان مغري لكن وكلبي مو ملكي
اصعب اختبار مابين كلبي وعقلي بقيت افكر وأحسبها
هذه احسن فرصه بالنسبه الي اخلص من بؤره الفساد واسلك طريق الستر يمكن كان الاختيار صعب
بس لازم انطي لنفسي فرصه افكر قبل ما اتخذ القرار حتى لا اتندم وجود اسامه بحياتي خلالهه طعم يوم الي ما يكون موجود مابي طعم ومن اعرف بي مايداوم اني هم ابقى بالبيت
صار هو النفس الي اتنفسه اكو انسان يكدر يستغني عن الهوى اكيد حايموت كلشي حلو بداخلي كان بوجود اسامه
طلع قاسم بقيت ابجي وابجي اجاني اسامه
اسامه اشبيج يسرى ليش تبجين
يسرى لا ماكو شي
اسامه تضمين علي
يسرى اكو شخص طلبني للزواج
اسامه يا الله بلكي تتزوجين وتخلصين من هالعيشه
يسرى باوعتله يحجي شكل وعيونه بيهه كلام غير
اسامه من كالت شخص خطبها غرست سكين بكلبي تعودت عليها اشلون راح افاركها ؟ بس خليها تعيش بكرامه وشرف
لان اني ما اكدر اوفرلهه هذه العيشه
صعب تتعود على شخص ويبتعد عنك بلا رجعه
القدر جمعنا اني ويسرى بوقت غير مناسب ولا ظروفنه تسمح لان نرضي مشاعرنه الي انبنت عالحرام وكل حرام اله نهايه حزينه غير عقابه يم رب العالمين
لازم أشجعها تتزوج واني أغلق على كلبي وما اكون اناني معاها لان الي يحب انسان يتمناله السعاده والامان ..
واني التفت لبيتي وزوجتي
يسرى بقيت اباوع عليه واسأل نفسي معقوله بعد ما اشوفك
اشلون اهجرك وانت روحي
وانت تدري الروح ما يمكن هجرها
اشلون املك وانت شمسي وانت تدري
الشمس ما ينمل فجرها اشلون اعوفك
وانت عيني وانت تدري العين ما ينمل نظرها
بقيت ذيج الليله مع اسامه كنت أتألم واروح ابجي بالصاله
اسامه كنت اتمزق بداخلي من افكر يسرى حا تروح وبعد ما اشوفهه تاذيت تألمت لكن ما حجيت الي بداخلي حتى لا تضعف وتغير قرارهه ..خليها تروح يمكن تلكي السعاده مع قاسم اتمنالهه السعاده من كل قلبي
يسرى خلص اسبوع واني افكر وسالت ام غسق وكالت حانخسرج اني اريد فلوسي وروحي الله معاج
البنات هم شجعوني لان كل وحده تتمنى تعيش بيت واسره وتعتبر هذه فرصه
اجاني قاسم
ها يسوره حبيبتي كنت قلق واندعي توافقين
يسرى قاسم اني موافقه وطفرت الدمعه من عيني
وكف على حيله قاسم صدك يسوره موافقه
يسرى اي اشبيك بس عفيه الموبايل صعب استغني عنه
قاسم ولا يهمج خلي الموبايل بس تحت رقابتي
يسرى اكيد تكدر يوميه تجيك الموبايل ولا تخاف
قاسم يالى امشي لبيت ام غسق اني فرحان ومجاي اعرف شسوي
يسرى اوكف خلي اكمل اليوم
قاسم لا لا امشي ناخذ موافقه ام غسق
رحنا لام غسق واتفق ينطيهه ال 26 ورقه ويجي بعد يومين
ياخذني نتزوج لان وعدني يسويلي حفله عرس يم اهله
اخر يوم دوام رحت وشفت اسامه
بيومهه دموعي ما وكفت طول الوقت ابجي واخذت هديته الي جابهه الي وخليتهه على كلبي واشتم ريحته بيهه
اسامه اليوم اخر يوم اشوف يسرى تعودت على شوفتها
يسرى اتمنالج السعاده من كل كلبي
يسرى لازمتني العبره ودموعي تنزل بدون توقف شكرا
ربي يسعدك مع عائلتك
بقيت اباوع عليه ردت اشبع عيوني منه خلص الوقت بسرعه
وحضرت نفسي اجه قاسم ودفع الفلوس لام غسق
ابني عبد الله رفض يجي ويانه لانه تعود على بيت ام غسق وعالجهال والهوسه اني هم من شفته ميريدني ما لحيت عليه لان ما اعرف شكو بيت قاسم يمكن هنا احسن اله وأم غسق
وافقت يبقى عبودي عدهه
اخذت بس الصغير ولبست العباءه ورحت مع قاسم لمحافظته
هناك تلكوني اهله وكلشي ما افتهمت لان كانت هوسه مابين جهاله وجهال خواته
اليوم الثاني سوولنه زفه وعرس بعد ما عقدنه من الهوسه كولشي ما افتهمت لحد ما صفت وفضت هوسه العرس وبقو بس اهل قاسم
عنده خمس خوات اثنين متزوجات وثلاثه ما متزوجات
المتزوجات كل وحده عدهه ثلاث اطفال
مرت ايام العرس الاولى بسرعه وبعدهه استلموني شغل وخدمه حتى بناتهم المتزوجات على طول يجون حتى اطفال قاسم اربعه صارو من مسؤليتي لازم اني اخدمهم واداريهم
كل هذا تقبلته
بدء قاسم يظهر على حقيقته اخذ مني التلفون ومنعني اتصل بام غسق واسال على ابني
صار يضربني على أتفه الأسباب غير خواته
يسرى قاسم اني تعبت من خدمه اهلك وخواتك اريد بيت وحدي ميصير هيج
قاسم ميخالف حبيبي تحملي لخاطري
أخواته سمعوا كلامي بس ماحجو وياي لحد ما طلع قاسم
واجوي علي بالمطبخ وهجمو علي كتلوني موتوني ضرب
اني ماتحملت اخذت ابني ولبست عبايتي وطلعت لبغداد لبيت ام غسق
وصلت تلكتني ام غسق
ام غسق لج هاي شصاير بيج وجهج مزورك ليش هيج منو ضربج
يسرى لحكيني يمه
ام غسق هذا قاسم الكلب
يسرى لا يمه خواته هجمن علي موتوني
ام غسق بسيطه اني الك قويسم
اتصلت بي
ام غسق الو هيج تاخذهه البنيه مثل الورده وتبهذل احوالهه بعد ما تريدك ولا ترجعلك
سدت التلفون
بقى قاسم يتصل بس اني أعزز نفسي مره اكوله ما ارجع مره اكوله اريد بيت ببغداد
اتصلت باسامه سلمت عليه دزيتله مسجات جوابه كان جاف وبارد ونصحني ارجع لزوجي
اسامه اتصلت بي يسرى وكانت تتمنى كلمه مني لكن هي الان متزوجه وسلكت طريق الصح زوجها منع عنها شرب الخمر ولبست ملابس مستوره واتصلي وتقرى القران
اتمنالهه السعاده من كل قلبي
شجعتهه ترجع لزوجهه وتكمل حياتهه معاه
يسرى من حسيت اسامه ميريدني ارجع مومس وان احافظ على بيتي واعيش حياتي
غيرت شروطي مع قاسم بعد ما وعدني ان خواته بعد ميضربوني وهو كذلك خلي احاول وانطي فرصه وانطي لنفسي فرصه هاي الحياة ماتنطينه كولشي ولا توهبنا السعاده بدون مقابل يمكن خسرت كلبي لكن كسبت زوج وبيت وستر وهذه كانت امنيتي الي كنت ابحث عنها طول هالفتره
اتمنى من ربي ان يغفرلي ويسامحني على الذنوب الي اقترفتهه وانا كنت مجبره عليها
اشكركم واشكر كل من تعاطف معي اختكم يسرى
................ النهايه بقلم فردوس عبد اللطيف ...............
اتمنى ان عجبتكم القصه واشكركم واشكر تفاعلكم مع الاحداث بعض التعليقات كانت تنتقد يسرى وتنتقد وظعها
بصراحه القصه حقيقيه مئه بالمئه والهدف من سردها هو
العبره للاهل ...قبل ما يزوجون بنتهم او ابنهم لازم يتأكدون
من الشخص الي حا ترتبط بي بنتهم واذا اجتهم بمشكلة عليهم ان يستمعولهه ويساعدوهه
ثانيا كل بنت مهما تتعرض للمشاكل عليها ان تحلها بعقل وحكمه مو تهرب وتتصور انها بالشارع حاتجد الأمان
ترقبوني بقصه جديده
الكاتبه فردوس عبد اللطيف f