#ثمن_حريتي

الجزء الخامس

#ثمن_حريتي
بقلم فردوس عبد اللطيف
الجزء الخامس (حقيقية)
سأذهب الى المجهول واخلص من قيود الاهل والزوج الاناني
ساهرب بدون اي سلاح يحميني من غدر الزمن يمكن اجد بالمجهول مستقبل افضل من البقاء مع حسام .....
الليله الي هربت بيهه كانت اصعب ليله مرت علي بحياتي
خوف ورعب ومصير مجهول لكن هذا الحل الوحيد الي اكدر اسوي للخلاص من حسام وصلاح
يسرى اغمى عليها من التعب والبرد فقدت كل حواسها
اجوي نسوان الي يجمعون البلاستك وقواطي الببسي
شافو يسرى نايمه لكن خافو يتقربون يمهه
ام فواز امرأة بعمر الأربعينات زوجها استشهد بانفجار وعدهه خمس اطفال محتاجين طعام وملابس وهي لا شهاده
ولا وظيفه ولا راتب تقاعد لا ن زوجها كان يعمل كاسب
باليوميه وبعد وفاته احتاجت مثلهه مثل غيرهه من الارامل
ام فواز شافت اطفالهه جاعو ومحد دك بابها وجابلهم مساعده
ونفسهه ابيه متريد تطلب من احد اخذت اطفالهه وسكنت بخرابه قريبه لمكب النفايات لان ماعدهه تدفع ايجار البيت الي كانت ساكنه بي من كان زوجها موجود
بالبدايه كان صعب على ام فواز تفتر بالشوارع وتجمع القواطي وبطاله البلاستك
اول يوم من طلعت تفتش بالنفايات المرميه بالشوارع رجعت تبجي طول الليل ....لكن بمرور الايام تعودت عالشغله وصارت تكسب من عملها وتصرف على اطفالها بدون ما تطلب من احد
ام فواز شافت يسرى ممده عالارض كأنها ميته جسمها بارد
لكن تلمست نبضها ...شافتها بعدهه عايشه
ام فواز ام سالم تعالي خيه ساعديني ناخذ هالمسكينه للخرابه
ام سالم. هاي اشبيج خيه تورطين روحج بالله وراها مصيبه
خاف شارده من اهلهه وتبتلين
ام فواز خيتي شوفيهه خطيه جنها حوريه تخبل خلي نساعدهه والله كريم مبينه مسكينه
ام سالم ماتجوزين من سوالفج وطيبه كلبج يالى خلي نوديها لخرابتج
ام فواز شلناها شيل ودخلناها بالخرابه شغلت الجوله وعندي منقله شعلت خشبات لحد ما جمرن دخلتهم دفيتهه وغطيتهه
شويه شويه شفتهه بدت تتنفس
يسرى ...كل حواسي ميته ....
يبدو كنت بحاله إغماء بديت احس برجلي بدء الدم يجري بيهن ....
بديت اسمع وشوشه بعدهه بديت اسمع أصوات اطفال هوسه نسوان أصوات غريبه علي بس ما اكدر افتح عيني ولا اكدر اتكلم لان لساني ما اشعر بي حتى ايدي مكدرت احركهه وأشر بايدي
ام فواز بنتي تسمعيني جاوبيني انت تسمعين
يسرى اريد اجاوبهه بس كل حواسي متوقفه ما اشعر بيهن
ام سالم خيه اشلون اليوم مانطلع للشغل هاي البنيه اخرتنه
ام فواز. خيه روحي اليوم وخليني يم هالمسكينه والرزق على الله عدنه خبز والله كريم خلي اسويلهه شوربه
ام سالم تردين اجيبلج شي بدربي
ام فواز اشكرج خيه الله وياج
بقيت بالبيت سويتلهه شوربه
بعد مرور ساعه
يسرى اخ يمه اخ يايمه
ام فواز ها بنتي صحيتي الف الحمد لله والشكر سويتلج شوربه حا اجيبهه اشربج ؟
يسرى اني وين منو انتي شجابني هنا
ام فواز. خاله هذا بيتي هالخرابه لا متني اني وجهالي
جنت طالعه عالشغل وشفتج جامده عالارض لا نفس ولا حركه عبالي مكتوله ميته خفت تالي تقربت عليج شفت وجهج ....كلت مو معقوله هالجمال مال وحده مسويه مصيبه
شنو سالفتج بنيتي ؟ .....
يسرى بقيت ابجي ما اكدر اسكت
ام فواز يمه كافي حبيبه. كطعتي كلبي لا تحجين شي خلي مصيبتج بكلبج ترى كلبي شايل هموم تكفيني
بنتي اذا ما عندج مكان ابقي هنا يمي وحالج من حالنه لحد ماتشوفيلج حل خلي عينج بعين الله
كعدي حتى تشربين الشوربه
يسرى اي همزين شكد جوعانه ....شكرا خاله تسلمين
جابت الشوربه وشربتني شكد حسيت بحنيتها وطيبه كلبها دفيت بدفو حنينهه اباوع لعيونهه شفت الحنيه الي ماشفتهه عد اهلي شبعت شكد جنت تعبانه وجوعانه بس من تشربني الشوربه باوعت على ايديهه مشككه من الشغل ياترى هاي المرأة الطيبه شنو شغلها بحيث ايديهه بهالخشونه
كملت شرب الشوربه
ام فواز بنتي شنو اسمج
يسرى ها ها خاله اسمي مسار
ام فواز عاشت الأسامي ماما مسار رجعي نامي
يسرى اي خاله تعبانه وبردانه
ام فواز راح اجيبلج بطانيه وتغطي ونامي اني اليوم كلت مااروح للشغل بس مادام راح تنامين حا اروح للمناطق القريبه الملي جم قوطي وجم بطل
خاله انتي شتستغلين
ام فواز. يمه اني الم قواطي وبطاله بلاستك نجمعهم وتالي يجي مقاول يشتريهن من عدنه عالوزن يودوهم لاربيل للمعمل يكولون يسوون أعاده تصنيع ...احنا شمدرينه شيسوون المهم رزق نترزق منه ....شايفه بره كوام الزبل بره ؟ هاي يوميه تجي سيارات الزبل تفرغ بذيج الساحه
واحنا نركض نجمع القواطي
يسرى الله يرزقج خاله اشكرج
ام فواز يمه شسويتلج نامي حبيبتي واني طالعه
يسرى ...رجعت نمت نومه عميقه الجهال راحو ويه امهم لان منطقه قريبه تجمع بيهه القواطي وهم يساعدون امهم
بقيت وحدي صحيح ضجيج سيارات النفايات لكن من تعبي
والوضع الي مر بي نمت وما حسيت الا اجت ام فواز وجهالهه هما دخلو وصارت الهوسه كلهم يحجون ويتعاركون
راحت ام فواز غسلت ...هي صحيح تشتغل بالنفايات لكنهه نظيفه من ترجع تغسل هي وجهالهه
اني بعد لازم اكوم من الفراش
كمت لزمتني دوخه ردت اوكع لزمتني ام فواز ...يمه مسار تجي علي اني اوديج للحمام انت شصاير بيج
رحت غسلت اباوع عليهه بيني وبين نفسي اكول لو امي هيج هم اهرب منهم ليش ما حسستني فد يوم بحنيتهه ليش ما سمعتني يوم كلمه حلوه وليش وليش ؟ حتى النظره تختلف
بقيت يم ام فواز اسبوع بعدهه حسيت اني عبء عليها صحيح المريه ما حسستني لكن اني من نفسي
يسرى خاله ام فواز اني اريد اشتغل
ام فواز يمه انت كاعده عندي ضيفه لو ضجتي من عدنه
يسرى لا خاله بس الكعده هم تضوج اريد اطلع اشتغل
ام فواز خوش اكو منطقه اوديج عليهه باجر هاي المنطقه محد يروحلهه من جماعتنه ترحين تلمين بيهه قواطي وتجيبيهن لهنا وشما يطلعلج نعمه من رب العالمين
يسرى ميخالف خاله بس علميني
ام فواز اول شي اوصيج عليه بنتي تحافظين على نفسج ترى الشارع بي بلاوي لا تثقين بأحد انت بعدج صغيره وحلوه اكيد راح يتحارشون بيج. ديري بالج لا تتقشمرين
يسرى نعم خالتي وأريد البس مثلج
ام فواز هاي عباتج تشديهه على خصرج وعندي جفوف سوده وشعرج تلفي بالحجاب وتحاولين تغطين نص وجهج
يسرى اي خاله ميخالف
طلعت يوم الثاني من الصبح لبست مثل ما علمتني ام فواز
مشينا مسافه طويله بس كظيناها سوالف
ام فواز اوف يا مسار بنتي تدرين اني حبيت ابو فواز وعشنا قصه حب
يسرى اي خاله احجيلي على قصه حبكم
ام فواز يمه شحجيلج يرادلنه نفر الموصل كولهه اسبوع وماتخلص ...حبني ورادني بس اهله رادو بنت عمه زنكينه
واني يتيمه وفقيره وماعندي معين ....جرت حسره اي يا مسار ذكرتيني بأيام الشباب والحب واشلون ابو فواز يمر من بيتنا وياخذ روحي وياه ....
بنتي وصلنا خلي نبلش
يسرى خالتي شكد صارلنه نمشي
ام فواز يمه المسافه بعيده بس اني لهيتج بقصه حبي
يسرى اي والله خالتي ما حسينه بالوقت
جمعنا القواطي اني وأم فواز بس لاحظت شغله العيون كانت علي لان بعدني صغيره يمكن ووجه جديد
اخذنه القواطي جانت الكواني ثكيله بس ارحم من العيشه مع حسام وتحرش صلاح
صحيح مكان ام فواز خرابه لكن حسيت بالامان وتمنيتهه امي الحنيه والدفو الي بخرابتها تريح النفس
اليوم الثاني اخذت وياي فواز خطيه يتعب بس يساعدني تعلمت الشغله صحيح متعبه ورزيله لكن افضل من ابقى كاعده بدون شغل
مرت الايام واني مستمره بشغله جمع القواطي ..بس من اروح اجمع يم المحلات يسالوني انت منين شجابج على هالشغله اني اسكت ما اطول بالكلام معاهم
فد يوم كنت جاي اجمع قواطي يم سنتر كبير نزلو رجل وامرأة كبيره باوعو علي وبقو يتكلمون بينهم ...سيارتهم كانت فخمه ملابسهم مرتبه دخلو للسنتر اني كملت شغلي ومشيت وره مسافه نص ساعه وكفت السياره وفتحت الجامه
المرأة تعالي بنتي انتي شسمج
يسرى ها اني مسار
تعالي بنتي اريد احجي وياج
للحكايه بقيه
..................بقلم فردوس عبد اللطيف ..................