#ثمن_حريتي

الجزء التاسع

#ثمن_حريتي
بقلمي فردوس عبد اللطيف
الجزء التاسع حقيقيه
يحلم كثيرون باليوم الذي يرتبطون فيه بشريك العمر. لكن هناك من ينتابه الخوف من هذا الارتباط، ويبرِّر خوفه بأسباب متعدّدة أبرزها الحرص على الحرية الشخصية، أو الخشية من فشل الزواج، أو الهرب من تحمُّل المسؤولية. والبعض يتردَّدون إزاء تجربة الارتباط الأول، وآخرون يتهيّبون من ذلك بعد مرورهم بتجربة سابقة.
يسرى كانت تجربتها مع حسام قاسيه طبيعي تخاف من ارتباطها ب هاورى لكن كان المنفذ الوحيد للخلاص من بيت الدعاره والتجاره بجسدهه بدون ما تقبض اي ثمن المهم مسكّن يأويها ويحميها من ذئاب الشوارع وتسد رمق جوعها
هذا حلم انسانه بسيطه تمنت تعيش مثل اي بنت بعمرهه
******
هاوره : حبيبتي باجر نسافر على أربيل حضري اغراضج
يسرى : حاضر كبدبوني
بيني وبين نفسي كنت خايفه من المجهول ولكن مادام هاوره يحبني كل شئ يهون واكيد حا اكون الزوجه المخلصة مستعده اخدمه بعيوني طالما خلصني من هذا الوحل سأرحل واترك خلفي اثام والالام تحملتهه رغما عني لم يكن امامي خيار غير العودة لاهلي وهناك حايقتلوني هذه تجربه مرت بي ياليت القادم افضل
اتمنى اعيش بيت بسيط ويه زوج يحميني ويخاف علي
حلم بسيط ماريد رفاهيه ولا سفر وانما بيت صغير يجمعني بزوجي واني مستعده اخدمه طول عمري
هاوره هههه وين صفنتي نحن هنا !!!!!
يسرى حبيبي كنت افكر بحياتي الي مضت وبحياتي الي قادمه ... حياتي وياك شلون حاتكون اكيد ايامنا كولهه حب وسعاده ومراح يمر يوم تعيس ...
حضني هاوره وبقيت ابجي على صدره
هاوره اكو واحد يبجي بيوم زواجه. ؟ ليش البجي؟
يسرى خليني ابجي وأودع الحزن وأبدي معاك حياة جديده
مسد على ظهري ومسح دموعي بقينا للصبح سهرانين لحد ما
غفينا وجه الفجر من فرحتي ما اجاني النوم اخاف انام ويطلع حلم وارجع للواقع المر والزبائن المقرفين
اندك باب الغرفه فزيت من الخوف وتعب السهر منووووو
اني بنتي مو كلتو كعدينا ب 7 صارت ب 8 كعدو وراكم سفر
يسرى هاوره هاوره اكعد حبيبي الساعه ب ٨ الصبح
هاوره : اووو تأخرنا حاروح اخذ دوش حضريلي ملابسي
حضري مستمسكاتج وشنو عندج تردين تاخذي حسبي حسابج بعد ماكو رجعه لهالبيت
يسرى : اكيد ماريد ارجع لهالبيت واغراضي محضرتهم من البارحه  ... حروح احضر الريوك
تريكنا وودعت ام طارق والبنات
ام طارق : بنتي يسرى اذا مارتاحيتي ويه هاورى تذكري هذا بيتج اذا ضاكت بيج الدنيا احنا اهلج لا تحتارين
احنا تعودنا عليج وانت بنيه فقيره وتردين تعيشين بستر
وربج دزلج هاورى بلكي تعيشين وياه وتكملين حياتج
ومثل ماوصيتج بنتي احنا اهلج !!!!
*****
سافرنا لأربيل .....
يسرى كبد بوني شكد بعد نوصل
هاوره باعي ذيج السيطره حاندخل كردستان
يسرى دخلنا أربيل مدينه جميله اني أبد ممسافره ولا طالعه من القريه انبهرت بهذه المدينه بناياتهه شوارعها دخت
مناظر حلوه بقيت طول الطريق لازكه وجهي بالجامه حتى اباوع ما اريد يفوتني منظر
هاوره حبيبي وصلنه للبيت ....تحظري اروح افتح الباب وانت صعدي وراي عالسريع ما اريد احد يشوفج
سكتت ماعلقت شي شيريد مني انفذله صعد فتح الباب واشرلي نزلت من السياره وصعدت للشقه
دخلت بيت هاوره وهو نزل يجيب أغراضي
الشقه عباره عن صاله مفتوحه وغرفتين نوم ومطبخ وبلكونه
الاثاث صحيح قديم ومستعمل لكن مرتب ونظيف عجبني الترتيب والديكورات بيهه ذوق ولمسات فنيه
كعدت على كرسي هزاز يم المدفأة ...الله شكد مريح الكعده بهذا الكرسي سرحت بعالم ثاني ..غمضت عيوني
حسيت ايد لزمتني
هاوره حبيبي مليكتي انتي ملكه هذا البيت اهلا وسهلا بيج في مملكتك
يسرى شكرا حبيبي حظنته ونسيت نفسي بين أيديه
اخذني لغرفه النوم يراويني الغرفه
يسرى ذوقك حلو هاوره
هاوره : حبيبتي هذا كوله ذوقي واختياري
اريدج تكونين ملكه هذا البيت
حبيبتي ممنوع تتكلمين مع الجيران ..ممنوع تفتحين الباب
اني عندي مفتاح ادخل للبيت من اجي حتى الشبابيك ممنوع تفتحيهم
يسرى حاضر مولاي
هاوره اروح للسوك وأجيب مسواك حتى تطبخين النه
يسرى ماشي راح انظف الشقه لحد ماترجع
هاوره اميرتي حا اشتاقلج
يسرى واني هم حياتووو
هاوره شنو تردين اجيبلج وياي
يسرى ما محتاجه شي سلامتك
طلع حبيبي بقيت انظف وارتب الشقه كنت في قمه السعاده
مرات اصفن واكول يسرى اصحي انت صاحيه والا جاي تحلمين انظف واركص وأغني
سعاده الدنيا بكلبي ...عمري ماشعرت بهيج سعاده
معقوله يسرى حاتعيشين بيتج ويه زوج يحبج ويوفرلج كولشي ... معقوله حاتعيشين مثل ماتمنيتي زوجه شريفه ...
بعد ما رجع هاوره محمل مسواك رتبت الاغراض ورتبت المطبخ وجان جايب اكل جاهز سخنته وتغدينه بقى يمي لحد الساعه 9 كظيناها سعاده ورومانسيه
هاوره حبيبي اروح للبيت
يسرى اي بيت
هاوره اروح بيت اهلي لازم اروح اشوفهم
يسرى وتعوفني وحدي لزمته من رقبته وحضنته كبد بوني
هاوره حبيبي اكيد حا اشتاقلج
باسني من خدودي
قفلي الباب ولاتفتحي لاحد
يسرى حاضر حياتووووو
طلع هاوره وقفلت الباب وراه كعدت وحدي عالكرسي الهزاز
صافنه اكول الدنيا وين جابتني لازم أصون النعمه الي اني بيهه وأحافظ على هاوره بكل طريقه بس خايفه من اهله اذا عرفو حايسحبون الشغل منه ويبقى مفلس
فتحت التلفزيون كلبت بالقنوات لكيت فلم عربي احب الأفلام ألعربيه واني كاعده جبتلي بطانيه واتفرج عالتلفزيون
اتصل كبد بوني
هاوره هلو حبي شتسوين
يسرى كبد بوني اتفرج تلفزيون
هاوره شتتفرجين
يسرى فلم عربي
هاوره اوك حبي تصبحين على خير
يسرى وانت من اهله
بقيت سهرانه عالتلفزيون وماحسيت ع نفسي نمت
اليوم الثاني ...صباحا
هاوره حبيبي يسوره كعدي ليش نايمه عالكرسي
يسرى صباحوووو حياتي ما ادري نمت بمكاني
تعالي نامي بالغرفه
يسرى عظامي تكسرت من النومه بالكرسي
هاوره اشبيج عفتي السرير ونمتي عالكرسي
يسرى حبي خفت وحدي بقيت يم التلفزيون احس احد يمي
هاوره كم يوم واجي ابات هنا اكول لاهلي بايت يم صديقي
يسرى صدك شكرا حبيبي هاي احلى هديه
تسريع الاحداث
مرت اشهر عشت بيهه احلى ايام حياتي صحيح هاوره كان يعاملني مو كاني زوجته لا كأنه متفضل على وما الي اي حق
اعترض او أتجادل
مع هذا كنت حامده ربي وراضيه بعيشتي معاه اهم شي بالحلال
بعد ثلاثه اشهر حملت من حبلت بدء هاوره يتغير علي وكأنه
ميريد الطفل او كان يريدني عشيقه بس بالحلال لكن هذا الطفل قسمته يجي للدنيا
من احتاج مراجعه للطبيبه كان ينحرج ياخذني او يستعر مني
لذلك كان يوصلني للمكان ويبقى بالسياره حتى محد يشوفني معاه واني هم اكول خليني على هالوضع يمكن اهله اذا عرفو
حا يجبرو يتخلى عني وهو ميكدر يعترض
طبعا اكثر الايام يسهر مع اصدقاءة شرب ويلعب قمار وبعض الاحيان من يخسر يجيني سكران
كنت حامل بالشهر الخامس وبطني مو كلش كبيره لان اول طفل ...دخل للشقه وصاير عصبي
يسرى اشبيك حبيبي
هاوره لا تقشمريني ورطتيني وخليتيني اتزوجج وهسه انتي حامل اني غبي تزوجتج انتي اصلج كح ....
يسرى انصدمت هاي ليش تحجي هيج حبيبي
ورأسا جرني من شعري ويضربني كان يريد يوكع الطفل كل هذا لانه خسر بالقمار ويتهمني اني وجهي فكر عليه
بس بيوم الي يربح يكون سعيد ويكول وجهج خير
انهزمت من بين أيديه ورحت عالغرفه وقفلت الباب
هو طلع وراح لبيت اهله
ذيج الليله مانمت كنت خايفه لا يتعود عالضرب والاهانه
ياربي صحيح قانعه وساكته لكن ليش كلسع يكولي انت كح
يبقى هذا العار ملازمني طول حياتي
اني ردت التوبه ردت اعيش بكرامه مع انسان يحترمني واحترمه ليش هيج هاوره مو حبيتك بكل كلبي
بقيت ادعو رب العالمين يهدي
رجع يوم الثاني اجاني واعتذر وصالحني وكال ماكنت بوعي
اني هم لازم أسامحه لان ماعندي احد غيره وين انطي وجهي
وهو هم يعرف هذا الشي لهذا صار يستغل هذه النقطه ويفرض علي قيود ....مع هذا اني متحمله واكول تحملي يا يسرى ويمكن من تجيبين الطفل حا يتغير
حتى بالمصرف تغير لان شغلهم مو مثل اول
مرت علي اشهر الحمل بس رب العالمين يعلم بحالي لا من حقي اسال احد ولا أكلم احد محبوسه بين اربع حيطان بس انتظر هاوره يفتح الباب
صارت ولادتي واتصلت بي اجاني وصلني للمشفى وبالطريق
هاوره يسرى هذا الطفل لا تسمي باسمي
يسرى شنو قصدك لعد باسم منو هو ابنك
هاوره جاي اكولج لا تسمي باسمي واني معلي هذا ابنج انت
يسرى اني بيا حال منا الطلوك ومنا هاوره صدمني
بيش افكر بالولاده لو بالطفل
هاوره اذا سالوج كولي ابو مفقود راح لبغداد وما رجع
يسرى يعني تتخلى عن ابنك
هاوره ما اريد اخسر اهلي
يسرى : ليش تريد تتخلى عني وعن ابنك ليش هاورى
مو اني يسرى حبيبتك
مجاوبني اشرلي نزلي نزلت ودموعي تجري
دخلت المشفى ومتت من الطلوك لحد ما جبت ولد سميته عبد الله ...عبودي شكله يجنن حلو ابيض
توك جيت للدنيا وأبوك يتنكرك الله يعينك شراح تواجه بهالدنيا
بعد ما ارتاحيت اخذت ابني وطلعنه
يسرى شوف ابنك حبيبي
هاوره اي شفته
يسرى ما حسيت بحنيه عليه
هاوره لا منو يكول ابني
يسرى بقيت ابجي ليش تقهرني واني توني جايبه لعد ابن منو
مو انت حابسني وحدي بالبيت منين شايفه رجال غيرك
هاوره كافي ترى دوختيني حا اوصلج واروح عندي سفره للموصل
يسرى اشلون تسافر وتعوفني وحدي واني نفسه منو يمي
هاوره حا اوصي عليج الجيران الجوه اذا تحتاجين شي ضروري
يسرى شعجب أطلقت حريتي
هاوره بحدود لا تتكلمين معاهم زايد خلي علاقتج بيهم محدوده
يسرى حاضر بس لا تتاخر علي
هاوره سفرتي مثل كل مره شنو الي تغير
يسرى حبيبي حا اشتاقلك. مجاوبني
سافر هاوره وره يومين اتصلت بي ام طارق وتحمدتلي عالسلامه وكالت هاوره مار عليهم
يسرى خالتي شيسوي يمكم هاوره وَيَا منو كضى السهره
ضحكت ام طارق الله يبلي سوالفج ولج كمتي تغارين عليه
هما الرياجيل ميشبعون يحبون يغيرون من كل عقلج يبقى عليج اكيد كظاها مع وحده من البنات
يسرى فدوه خالتي كوليلي منو
ام طارق ولج حمدي الله وشكري كعدج بيت وستر عليج
لاتلحين وياه ترى يطردج هو هذا كظاها يوميه ويه وحده بيج خير جلبي بي
مع السلامه بنتي
يسرى مع السلامه
للحكايه بقيه
..................بقلم فردوس عبد اللطيف ..................