أراك بقلبي

١

كانت في المطبخ تغسل في الماعين وفجأة شافاته تسحب بطريقة مريبة للمربوعة وسكرها وطبعا ماقدرتش تقاوم فضولها نشفت يديها بسرعة وطلعت وراه
وقفت قدام باب المربوعة وقربت وذنها من الباب لعل وعسى تفهم سبب تصرفه الغريب مرات يحضرلها في مفاجأة ومايبيهاش تحس ومرات يكلم في العامل بيش يجي يغير زواق المربوعة اللي من اول ماخشت لحوشها ماعجبهاش لأن الحاجة الوحيدة اللي ماشاورهاش فيها  وحب ان يفرحها خاصة وان ليها فترة تنق عليه بلا فايدة ومراات.......
-ايوااه ياحبي شن حالك تعرفي مستاحشك هلبا وين فايتة ومعاش ادوري

كلماته كانت كفيلة انها اطلعها من دوامة الاحتمالات اللي قعدت تحط فيها  لروحها وحست ان الدنيا لفت بيها للدرجة انها كذبت وذانها
-لا مستحيل عزيز يديريها
مستحيل يخونني
مرات اخته
ومرات بنت اخته
عارفين حالة الغباء اللي تصيبنا وقت ننصدمو من اقرب الناس لينا نحطولهم اعذار نعرفو انها سخيفة ونعرفو انها مش صح بس نخدعو في ارواحنا بيش صورتهم ماتتشوهش وبيش مانخربوش حياتنا

هكي كانت اميمة
كانت تشوف بعيونها وتسمع وتستمر في تكذيبها لروحها
لين عزيز خذي عليها فكرة انها عبيطة والمية تجري من تحت رجليها وهي مش حاسة بشي وبدي يتمادى
~~~~~~~~~~~~~~~~~~~~~~~~~اميمة عمرها 24سنة
طيوبة هلباااا  .. خريجة إدارة اعمال وكانت شاطرة في قرايتها ومقبلة على الحياة زيها زي اي بنت في عمرها
واظافة الى جمالها كانت روحها حلوة وبسيطة وعفوية
تزوجت من سنة  بعد قصة حب دامت سنتين عاشتهم بحلوهم ومرهم وكانت متوقعة ان زواجها من اللي حباته هو النهاية السعيدة لقصة حبها

~~~~~~~~~~~~~~~~~~~~~~~~~عزيز عمره 30سنة  انسان جدي وعصبي بس قلبه طيب  خريج محاسبة ويشتغل في شركة  طويل وقمحي وملامحه جذابة وشرقية بأمتياز وهذا اللي خلا قلب اميمة ينبض من اول ما شافاته💓

هو وحيد امه وبوه وعنده اخت وحدة اسمها "سمية" وامه الحاجة ناجية اطيب واحن عزوزة ممكن تقابلوها وكانت تعامل في اميمة كأن بنتها التانية وديما توقف في صفها ضد ولدها
~~~~~~~~~~~~~~~~~~~~~~~~~خلاص حبييبتي قتلك اسف وبعدين تعرفي اني متزوج ومانقدرش نكلمك الا في اوقات معينة

بس نوعدك اني نحاول

اميمة قعدت تتسمع لين كمل مكالمته وجرت بسرعة للمطبخ وكلامه قاعد يرن في وذنها وحست انها قاعدة تخسر في راجلها وان حيجي يوم وتخسره للأبد
عزيز:حبي بعد تكملي غسيل الماعين ديريلي قهوتي

اميمة:حاضر هي شوية وتكون عندك

عزيز:مشكورة ياعيوني

جابتله القهوة وقصتله من الكيكة اللي دارتها
عزيز: اووو مفتلكة الجووو اليوم مدايرتيلي الكيكة اللي نحبهاا
قعدت تراقب فيه وحاسة انها في صراع هو خانها والتصرف الطبيعي انها تبينله انها عرفت وتعيط وتضرب و ادير اي ردة فعل تنفس فيها عن زعلها وحزنها بس ماقدرتش

اميمة :عجباتك
عزيز :كيف عاد تجنن واي حاجة من تحت دياتك عسل ياحبي
عزيز:قوليلي
اميمة:ها
عزيز:ما استحشتيش اماليك ليك فترة مامشتيش
اميمة:ليش
عزيز:ههههههه حلوة هاذي ليش خيرك ياهبلة نسأل فيك انا خيرك مسبوهة
اميمة :الحق استحشتهم هلبا
عزيز:خلاص بعد العصر وتي روحك نرفعك تباتي يومين عندهم
اميمة معاش قدرت تتحمل لأنها طبعا عارفة سبب عرضه بيش حضرته ياخذ راحته مع حبيبة القلب
اميمة:اوك انا خاشة نرتاح شوي

خشت لدارها لأن معاش قدرت تشد دموعها اكثر وبكت لين خذاها النوم

ناضت بعد العصر خشت توضت وصلت ولبست عبايتها وقعدت ف الصالون تستنى في عزيز لان في كلتا الحالتين مشت ولامامشتش بيدير اللي ف راسه ويكلمها من وراها لهذا فضلت تمشي لأماليها تغير جوها شوية