أراك بقلبي

٧

حاتم:هييييي طول الطريق وانت سرحان في شن تفكر
عزيز:نفكر كيف نبي نراضي اميمة
حاتم:و اللي اسمها منى
عزيز:معاش نبي نسمع اسمها بكل يكفي لهني وبس من خشت لحياتي واني من مشكلة لمشكلة
حاتم:صحة النوم ياصاحبي ياما نصحتك وقتلك راه هالبنت بتخربلك حياتك فوتها وانت شي لين شكيت انها ساحراتك ولا حاجة
عزيز :عارف اني غلطت واني والله ندمان بس معاش عرفت كيف نرجع ثقة وحب اميمة ليا
حاتم:اميمة لو ماتحبكش راه ماقعدتش معاك لتوا صدقني اميمة بنت اصل صبرت عليك وتحملاتك في الوقت اللي كنت فيه مش ساءل عليها وعلى مشاعرها
عزيز:بإذن الله حنعوضها خير وانسيها في كل هالأيام  ...نزلني هني
حاتم :شن في
عزيز:بناخذ ورد وشكلاطة
حاتم :اوك
نزل عزيز وشرا باقة ورد والشكلاطة اللي تحبها اميمة
ومشي لحوشه لقاها في دارها تقرا في كتاب

عزيز:اميمة
تلفتت وشافت نظرة الندم والانكسار اللي في عيونه وحست بمشاعر مختلطة تجاهه وحاولت تتماسك بس بلا اي فايدة قعدت تبكي وهو كذلك وحظنها وماقدرتش تخلص روحها  من حضنه لانها ببساطة كانت بحاجته هو امانها وهو سبب المها واسوء شي ان هالصفتين المتناقضات يجتمعو في جسد واحد ونحسو بمشاعر متناقضة ومختلطة تجاهه
بعد حس انها هدت وانفاسها انتضمت
عزيز :اني اسف على كل شي اميمة سامحيني
اميمة وهي تبعد فيه من عليها كأنها اكتفت من جرعة الأمان اللي خذتها من حضنه:احيانا تكون بعض المواقف اكبر من قدرتنا على اننا نسامحو وننسو
عزيز:بس اني نحبك و...
اميمة:اللي يحب عمره مايخون ياعزيز انت جرحتني مرتين مرة بخيانتك ليا ومرة وقت عرفت انك ختنتي مع صاحبتي
وطلعت من الدار وخلاته غارق في الندم

~~~~~~~
منى روحت للحوشهم وقلبها يغلي من الحقد والغل لان كل اللي كانت تخطط توصله تهدم
خذت نقالها واتصلت بي ولد اختها
منى :اهلين سليم
سليم:اهلين خالتي شن امورك ان شاء الله بخير
منى وهي تمثل انها تبكي:منين بيجي الخير بس
سليم :ليش ياخالتي شن في
منى:في واحد مستغل وضعي لأني ماعنديش خوت وديما يضايق فيا ويجيني للشغل لين الموظفات بدو يحكو عليا وقطعت حتى صاحبتي لانه طلع راجلها
سليم دمه فار :اعطيني عنوان حوشه هالكلب ونوعدك ان غدوة مش حتصبح عليه الشمس
منى:اني سكتت في البداية بس هو تمادى والقصة وصلت ان الموظفات بدو يطلعو في كلام عليا ماقدرتش نتحمل اكثر
سليم:هالحقير ولد الكلب والله لما انربيه
عطاته منى العنوان واتصل بصحابه يجو معاه
~~~~~~~
الحاجة مبروكة:هي سلم وليدي نوض وصلني حوش وخيتك
ناجي :حاضر يام
الحاجة مبروكة:ربي يهديه بوك مش كان خلاها جت قعدت عندنا على الاقل لين تصح وتتغير نفسيتها
ناجي:الله غالب شن بديري هي بوي وتعرفيه كيف يفكر...خلي نمشي نسخن السيارة مابين ماوتيتي

لبست الحاجة مبروكة فراشيتها وركبت في السيارة ووصلها ناجي لحوش اميمة وخش معاها يطمن عليها حتى هو هدرزو شوية
ناجي:هي نستأذنكم يام بعد المغرب تو نرجع نروح بيك
اميمة:لابتبات معاي الليلة
ناجي:وبوي
الحاجة مبروكة :تو نتصل بيه ونقوله اكيد مش حيقول لا
ناجي:تمام..سلام