أراك بقلبي

٢

جي عزيز لقاها قاعدة

عزيز :هي واتية

جاوباته من غير ماتشوفله :اي واتية
خذت شنطتها ونزلت سبقاته ركبت في السيارة
طبعا عزيز ملاحظ ان اميمة متغيرة بس ماعطاش للموضوع اهمية كبيرة

بعد دقايق كان بجنبها ف السيارة

عزيز :حبيبتي خيرك مريضة ؟؟
اميمة : لامابيا شي

عزيز :امالا خيرك كلمة وقص وينها اميمة الهدرازة اللي اول ماتبدا تهدرز معاش تسكت
اميمة:لا غير مصدعة شوي بس

عزيز :سلامتك ياعيوني نخطمو ع الصيدلية ناخذلك بنادول؟؟
اميمة:لامافيش اي داعي اول مانوصل لحوشنا تو ناخذ
عزيز :براحتك
والهدوء ساد وماكسراش الا صوت الناس والسيارات في الشارع وطول الطريق هما ساكتين

لين رن نقال عزيز بس هو خلاه ع الصامت وماردش
وطبعا اميمة عرفت طول من اللي اتصل

اميمة:رد على تلفونك ماتشوفش فيه يضرب
عزيز :لاهذا واحد نفاخ عشش فيا يبيني نتوسطله في الشركة
اميمة:اها ربي يعينك

وصلت اميمة لحوشهم ونزلت وخشت طول بلا حتى ماتودع عزيز ولاتعرض عليه يخش
بس هو جي وراها وقاللها نبي نسلم على عمي ليا فترة ماريتاش
طقو الباب وفتحلهم ناجي خو اميمة وهو اخر العنقود مواليد95 بس راجل ينعبى عليه وينشد الظهر بيه لان من صغره تعود يتحمل مسؤلية خواته البنات وامه لان بوه الحاج فتحي بحكم شغله كان ديما مسافر وبعيد عليهم

ناجي :اووو بو نسيب عاش من شافك تي وين ياراجل ليك وحشة
اميمة:باهي به شن وخيتك مش مستاحشها

ناجي:ههههههههه كيف عاد يادرية والله  ليك وحشة انتي وكيكاتك وافهمي كان بتفهمي

اميمة :ههههههه حاضر كم عندي ناجي اني واصلا قاعدة عندكم يومين اني بحبح هي

ناجي:ان شاء الله خير  شن في ماتقوليليش زعلتي راجلك😠

اميمة في قلبها قالت كان تندري ياوخيي بس

عزيز :لا مافي الا كل خير غير حبيت تجي تقعد عندكم شوية لانها مستاحشتكم بس

ناجي :مادام هك تمام ..شن ياعزيز بتقعد واقف ع الباب هي تفضل

اميمة سبقتهم وخشت لان مستاحشة امها واختها هلباااا
خشت سلمت على بوها وعلى امها الحاجة مبروكة
اميمة:شني يام وينها سارة امالا
الحاجة مبروكة :والله تو شوي طلعت عند الجيران دقيقة وتولي
قعدت هدرزت ع امها ..وعزيز مع الحاج فتحي وناجي ف المربوعة
الحاجة مبروكة:نوضي يابنيتي ديري قهوة لراجلك ووخيك وبوك
اميمة :حاضر يام
~~~~~~~~~~~~~~~~~~~~~~~
سارة: زي ماقتلك ياريم اكتبيلي اسماء زميلاتنا كلهم مانبيش ننسى ولاوحدة وتاخذ على خاطرها مني

ريم:والله وكبرتي ياسريوة وبتتزوجي ههههه

سارة:عقبالك يااارب تمشي وراي طوول

ريم:لا لا مازاااال بكري  واصلا حاتم مطول مازال مش مكون روحه
سارة ربي ايسرلكم يارب ويجمعكم بالحلال
ريم :يارب يسمع منك

طبعا حاتم هذا صاحب عزيز روح بالروح شاب خلوق وطيب ومن عيلة متواضعه عمره26ويشتغل مع عزيز في نفس الشركة وهو اللي يصرف على حوشهم لان بوه متوفى من وهو في الابتدائي
<

سارة:هي ريومتي سلام توا اكيد ماما تستنى فيا من بكري عطلت عليها تبيني نصبغلها شعرها

ريم:يحليلي ع الحاجة مبروكة تضرب ع القوي ههههههه صبغة وحركات

سارة:هههههههههه اي امالا شن صقع عليك

طلعت سارة من حوشهم ريم وروحت للحوش وهي خاشة وعزيز طالع
عزيز:اهلين سارة شن حالك
سارة :تمام بخير شن حالك انت
عزيز:تمام الحمد لله
سارة:اكيد اميمة داخل ولا
عزيز:اي قلت نجيبها تقعد عندكم يومين لانها مستاحشتكم
سارة:احسن مادرت ودير حسابك راه الفترة هاذي كلها لين يتم العرس عندنا بتقعد
عزيز:اي اكيد ولو احتجتي اي مساعدة تفضلي وخيك انا
سارة:مشكور عارفاتك ماتقصرش

~~~
طلع وروح لحوشه وجي بيتصل ب حبيبته بس تردد لان ببساطة حس بالذنب لان اول مرة يدير  هالحركة و يبعد مرته على الحوش بيش ياخذ راحته بس  لهفته على حبيبته كانت اقوى من احساسه بالذنب ..وفي النهاية اتصل بيها
عزيز:اهلين حبيبتي
هي:وينك من بكري كنت نتصل بيك اكيد كانت معاك ولا وماحبيتش ترد
عزيز:رفعتها حوش اماليها بيش ناخذ راحتي معاك
هي:حي بجد والله نمووت فيك بس زعلانة منك انا

عزيز:ماعاش من يزعلك ياروحي ليش زعلانة

هي :مش قتلي بعد اسبوع بتجي تكلم بوي

عزيز :اه اي ياحبي كيف جيت بنفاتحك في نفس الموضوع تعرفي كان تصبري عليا لين انظم اموري وبعدين ساهل

هي:عزيز مش ملاحظ انك تماطل هلبا راه من اسبوع بس جي ولد عمي طلبني من بوي والمشكلة ماعنديش سبب يخليني نرفضه

(طبعا لاجاها عريس لا شي بس استخدمت  الهجمة المرتدة المعروفة عندنا😉 بيش تجس نبضه كان يبيها ولا يلعب عليها)

عزيز:عطيني شوية وقت بس والله انا نتمناك معاي اليوم قبل غدوة بس الظروف هي اللي تحكم ياحبي يعني حتى اميمة صعب عليا نقوللها نبي نتزوج عليك وحني ماليناش سنة بس متزوجين

هي:ايوااااه قول هكي من الاول خايف عليها وعلى مشاعرها وانا مش هاماتك امالا  هي نستأذنك وياريت ماتفكرش تكلمني لين ادير راي مش مستعدة نقعد معلقة هكي معاك والعمر يجري وحتى نا بنشوف حياتي ...سلام

عزيز طبعا مخططه  فشل وتكنطى للمليوون وقعد يفكر كيف يفاتح امه بالموضوع خاصة وان امه تمووت في اميمة ومتافهمين هلبا وتشوف فيها كنة كاملة مكملة