ج14
رنا:عصام سد الموضوع هذا وانساه جنك ماتعرفني انه منو.زين؟
عصام:ليش هيج ماعندج مقاومه ولاتدافعين عن نفسج عن حقوقج؟ليش تستسلمين؟
رنا:ياحقوق؟ انت مو تكول زواجه يوم الخميس الجاي؟شتريدني اسوي اروح احضر عرسه واصفكله واباركله؟
عصام:مايحبها وبالكوه قبل يتزوجها انجبر.
رنا:هو عادي اهله يفرضون عليه والمبرر انجبر هاي وهو رجال بس انه بنيه مايصير اكول انجبرت لان اطلع خاينه؟
عصام:انتي مو حجيتيله الحقيقه خلص بعد معناها ماكو اي خيانه منكم اثنينكم.
رنا:كافي عصام لاتطلعني عن طوري شي صار وانتهى وماله كل حل الاحسن ينسي حتى نعيش.
عصام:اعتقد بعدج حاقده عليه وتذبين اللوم عليه.
رنا:لاحاقده ولا الوم احد لو اريد الوم فلازم الوم نفسي كل الغلط مني انه من الاول للاخير انه استاهل انتظرت واحد من اول يوم كلي اهلي يردولي بت عمي ومع ذلك بمنتهى الغباء بقيت انتظره.
عصام:انطي لنفسج فرصه ارتاحي وفكري بالموضوع.
ضحكت ماجاوبته شفكر بالموضوع؟
ياموضوع اللي افكر بي؟
هذا بطران عصام والظاهر رومانسي وعايش بعالم غير هالعالم.
خلصت شغلي ورجعت للبيت اتمددت ردت ارتاح بس اتذكرت ساره.
كمزت رأسا من فراشي للتليفون رحت خابرتها وكتلها اليوم شفت ارشد اجاني للدوام وحجينه.
بدون ماتحجي عرفت حجي ارشد صحيح لان بس حجيت سكتت كللللش مانطقت بحرف ولاسألتني شنو كال شنو حجيتوا شنو صار وشويه وكلتلي مشغوله يمها خطار ماتكدر تحجي.
من كلتلي هيج استفزتني كلتها:
اي روحي مااريد منج شي بس ردت اكلج حجايه.
ساره:شنو؟
رنا:اعتبرتج صديقتي واختي وامنتج على اسراري وحبي مع الاسف عرفت حقيقتج بعد فوات الاوان عرفتها متأخر بس هو غلطي انه المثلج مو مال صداقه واحترام عاميتج الغيره الله لايوفقج عالسويتي بينه بيه وبأرشد.
ماحجت اي شي سدت التليفون بوجهي الحقيره..
مرت ايام الاسبوع بسرعه وصلنه للخميس وشكد وحشه جان ذاك اليوم..
ماكدرت ابقى بالبيت لان اتخبل معناها اموت من التفكير وبنفس الوقت كوه داومت على اعصابي رحت.
الحمدلله عصام مجاز.
والقهرني قبلها بيوم عزم المدير والموظفين على زواج اخوه عزمهم كلهم الا انه شلون يعزمني شلون اروح.
والقهر اكثر من يسألني الموظفات وياي ترحين للعرس اذا ترحين حتى نروح سوه.
شكللهن شجاوبهن بس اهز براسي..
هذا المفروض زواجي عرسي انه .. انه المفروض يتزوجني مو هي مو بت عمه المفروض انه متزوجته هو مو جواد ...
اتمنيت اموت..
اموت وارتاح من ضيم كلبي..
هيج جان احساسه يمكن من عرف انه
اتزوجت جواد..
هسه تبادلنه الادوار هو اللي انجبر وانه اتعذب على فراكه..
يصير اسوي مثله واخابره اعاتبه والومه مثلما هو سوه بيه بليلة زواجي من جواد، يصير؟
آاااخ ياربي خليني اكرهه ياربي مااريد احبه بعد..
هسه راح يحب بت عمه وينساني ويعيش ويصير عنده اطفال منها..
وانه ابقى وحدي احبه وافكر بي واتعذب علموده.
افكر وافكر وافكر خلصت نهاري كوه اشتغلت ماعندي تركيز بشي.
رجعت للبيت اتمنيت انام تغمض عيني شويه وارتاح من التفكير.
بس ماكو فايده ماكو فايده.
حسيت ضاكت بيه الدنيا من صار العصر اتخبلت ماادري وين اروح اختنكت واليوم من دون الايام ماعندي دمع..
سمعت التليفون دك رحت اركض بس مالحكت عليه انكطع..
رجعت لغرفتي وكعدت اكلب بالصور مال الكليه ادور عالصور اللي هو موجود بيها
اباوعلهن وحده وحده وافكر بذيج الايام..
رجع التليفون دك.
اجت اختي كالت:
رنا لبنى عالتليفون تريدج.
رنا:جيبي التليفون هنا.
انطتني التليفون حجيت ويه لبني:
شلون وشخبارج؟
لبنى:الحمدلله اسأل عنج شمسويه؟
رنا:كاعده مااسوي شي طالعه روحي.
اختكنت حصرتني البجيه.
لبنى:علمود ارشد؟
ماحجيت مااكدؤ بس احجي ابجي.
لبنى:اتصل بيه قبل شويه كال دكيت عليها محد شاله.
رنا:مالحكت انكطع الخط.
شيريد متصل بعد؟
لبنى:كال ردت احجي وياها شويه.
رنا:ماكو شي ينحجي بعد.
لبنى:حاجيه رنا حاجيه لاخر مره هو هسه بنفس موقفج قبل معذور.
ماحجيت لبنى سلمت وراحت وانه بقيت صافنه معقوله يتزوج غيري مااصدك..
دك التليفون هو اكيد مااريد ارد عليه بس ماانطاني كلبي شلته:
الو؟
ماحجه اسمع صوته يتنهد بس يمه هدوء ماكو صوت ناس وعرس.
رنا:الو منو؟
ارشد:منتظره غيري يتصل؟
دمعت عيوني سكتت كال:
اذا منتظره غيري حتى اسده مااريد اضيع وقتج؟
ماجاوبت بدت الدموع تنزل كال:
ليش الله يبتلينه هيج ليش يخلينه نحب واحنه مامكتوبين واحد للثاني؟
سكت بقى ساكت وانه ساكته بس بدا صوت شهكاتي يعلى كلي:
اتمنيت بمثل هذا اليوم اكشخلج والبس البدله..
اتمنيت اليوم انتي التمشين بصفي وتنزفين الي..
تمنيت انتي اليوم تنامين بحظني وتنورين بيتي تمنيت شكد امنياااات وكلهن انتي بيهن لان بس وياج اتمنيت اعيشهن..
بقيت ابجي شجاوبه وشرد عليه؟
ارشد:معقوله انتي مو الي؟
رنا:روح ارشد روح بعد لاتتصل بيه.
سديت التليفون وصعدت للسطح بجيت بجي طلعت الخنكه مال اسبوع بجيت لحدما داخ راسي وصدع.
ماادري شلون مر علي الليل بيومها للصبح كاعده وافكر انه المفروض اليوم يمه انه المفروض اليوم افرح ..
انه المفروض اليوم يزفوني اله ..
انه المفروض اليوم لابسه بدلة العرس ومنتظرته..
انه احق بي من اي وحده لان اللي انتظرت وانه الصبرت وانه اللي اتحملت..
انه اللي احبه..
مو هي..
اووف ياربي عذبتني وشلعت كلبي شمسويه عدك هيج تشلع كلبي..
كل ساعه تمر علي بذيج الليله عبالك مخلصتها بجنهم تمر علي عذاب ونار تشعل كلبي.
اخذت فراش وصعدت نمت عالسطح ابحدي فرشت فراشي وظليت كاعده اباوع للسما واحسب نجمه ..
نجمتين..
تلاثه..
بلكي انسى لحدما يطلع الصبح.
وحسيت الليل مايريد يخلص والصبح ماكو اختفى..
هيج نفس احساسي حس من اتزوجت لو اقل؟؟
لااكيد مثلي واكثر..
ياربي موتني ياربي..
على ماطلع الصبح روحي فرفحت اول ماكعدوا اهلي اخذت حبايه الرمين حتى انام ماابجي بعد مااريد احد يسألني شبيج وليش تبجين.
خلصت يومي نايمه ثاني يوم داومت شفت عصام سلمت وكعدت بمكاني.
ماحجه ولا انه حجيت خلصنه الدوام سكته ولاحجينه كلمه سوا.
ومرت 3 ايام على هالحال ماكو بينه غير صباح الخير ومع السلامه.
رابع يوم انه جنت اشتغل وعصام اسمعه اتصل على احد الظاهر من اهله.
عصام:شنسويله مايقبل قابل طفل هو غير رجال.
..........
عصام:اي والله لحد اليوم كعدت اليوم الصبح لكيته نايم جوه.
.....
عصام:والله ماادري شكد حجينه كل احنه حجينه ماقبل ابوي لزك الا يتزوجها.
فهمت الحجي على ارشد.
خلص عصام اتصاله كال:
وتاليها ويه اليحبون.
ماحاجيته غلست سويت نفسي مو وياه كال:
اكو عريس يعوف زفته ويروح للجيران يخابر حبيبته؟
جريت نفس وبقيت ساكته كال:
الله لايطيحني مثلكم ان شاءالله مااحب.
رنا:وبعدين؟
عصام:شنو؟
رنا:والله اذا ماتسكت وتنسى هالموضوع ادخل للمدير واخلي ينقلني لغير مكان.
عبالك مايسمعني كال:
اذا ارشد العاقل هيج يحب انه شلون؟
اليوم رابع اكعد الصبح الكاه نايم جوه ومخلي مرته بحدها بالغرفه.
رنا:مايخصني الله يهديه.
عصام:والله؟من كلبج؟
رنا:انت الظاهر فارغ ماعندك شي تضيع وقتك بي غيري وانه مالي خلك روحي.
عصام:ليش شبيج؟
ماجاوبته ادري بي شيقصد لان اكيد يعرف انه متأذيه من موضوع زواج ارشد..
مرت الايام والاشهر وسنه وسنتين وانه مااقبل اتزوج.
علاقتي بعصام صارت حلوه صرنه اصدقاء نسولف مرات ومرات نضحك ومرات يحجيلي عن بت خالته اللي يحبها بس ماتقبل تتزوج لحدما تخلص دراستها.
ماسألته ولامره عن ارشد ولا هو رجع فتح موضوعه كدامي بس مره كلي انتقل لبغداد هو وزوجته حتى يلزم مكان عمه بالشغل.
خواتي اتزوجن واخواني وصلوا للكليه واستاذ بشار قدم على تقاعد واخذ مرته وسافروا خارج العراق واجانه بمكانه مدير ثاني هم جبير بالعمر بس عكس استاذ بشار نحيس وشالع كلبنه.
وبيوم من الايام صاحلي بالمكتب كلي:
رنا باجر لازم تروحين لبغداد.
رنا:ليش استاذ؟
المدير:ايفاد ترحين انتي واستاذ قاسم اجتماع بالوزاره.
رنا:اي بس شوكت الحك اذا باجر الاجتماع؟
المدير:هسه روحي رتبي امورج وروحي تردين ترحين ويه استاذ قاسم لو ترحين ابحدج كيفج اتفقوا بيناتكم.
طلعت حجيت لعصام كلي:
مابيها شي قاسم بكد ابوج ليش مستحيه واذا تستحين خلي واحد من اخوانج يروح وياكم.
وفعلا اتفقت ويه استاذ قاسم ورجعت للبيت اخذت مؤمن وياي وطلعنه الظهر لبغداد ويه استاذ قاسم بنفس السياره رحنه سوا.
وصلنه بالليل ورحنه كبل للفندق حاجزيلنه الدائره من الصبح اخذنه غرفه انه ومؤمن بحدنه بس ماكدرت انام خلصت الليل افكر هسه انه يم ارشد بس مايدري بيه هسه شلون حياته؟
شنو عنده من جهال؟
ولد لو بنات؟
يشبهونه لو يشبهون امهم؟
يتذكرني لو نساني وعاش والتهى بعائلته وامور الدنيا؟
شيصير لو يتغير الوضع؟
شيصير لو اتصل بي واسمع صوته؟
صافنه ودك التليفون شلته:
الو؟
كال:
الو رنا؟
نشف دمي كتله:
اي نعم منو حضرتك؟
ضحك كال:
شنو ماعرفتي صوتي؟
رنا:ارشد؟
رجع ضحك بعدين سكت كال:
مسويه روحج ناسيه الظاهر جنتي تفكرين بي؟
رنا:عصام؟
عصام:اي عصام شدعوه لهدرجه ماتميزين صوتي من صوته؟
رنا:نفس الصوت.
عصام:صحيح.
رنا:خير عصام شكو؟شلون عرفت نازلين هنا؟
عصام:شدعوه غير انه حجزتلكم الصبح من طلعتي للبيت.
عموما ردت اكللكم تره الاجتماع تأجل.
رنا:لا والله؟لشوكت يعني؟
عصام:تأجل لعكب باجر.
رنا:ها يعني يوم واحد؟
عصام:اي يوم واحد.كلت خل ابلغكم قبل لاترحون وتعبون على ماكو شي.
رنا:اي والله صدك.بس شنسوي باجر هنا وين نروح خوما نبقى محبوسين بالفندق.
عصام:روحوا انتم واستاذ قاسم اتمشوا اتغدوا بره روحي اتسوكي هههه.
رنا:لا احتمال نروح انه ومؤمن الصبح نزور الامام الكاظم ان شاءالله.
عصام:بكيفكم بعد اللي يريحكم اذا رحتي ادعيلي الله يطيني مرادي.
رنا:هههه ان شاءالله ينطيك مرادك.
اوكي مشكور عصام.
عصام :العفو على شنو اصلا المفروض من وكت اتصل عالفندق واخليلكم خبر يمهم بس نسيت توني اتذكرت ههههه.
رنا:يالله الحمدلله من اتذكرت لو ناسي جان رحنه باجر واتعنينه وتالي يرجعونه وانوب من نرجع يستلمك استاذ قاسم بخوش حجي معدل هههه.
عصام:اي والله وانوب يوصل الحجي للمدير وشلون مايحب النحاسه والخباثه مايرتاح الا يغثني.
رنا:هههه يالله تصبح على خير.
عصام:وانتم من اهله.
سديت التليفون وبقيت كاعده للساعه 3 يمكن يالله نعست ونمت.
الصبح كعدنه ونزلنه اتريكنه ويه استاذ قاسم وكناله راح نروح للامام بس ماقبل يروح ويانه كال يريد يروح لكرايبه هنا ساكنين بغداد.
خلصنه وطلعنه انه ومؤمن من الفندق ناخذ تكسي للامام .
اجرنه تكسي واتوجهنه للامام الكاظم سلام الله عليه.
شفت القبه الذهبيه من بعيد مبينه بس نزلنه دمعت عيوني ودخلنه وانه امشي وادعي بكلبي مولاي اريد انسى.
ارشد اتزوج😭
توقعاتكم؟؟
#نورالشمس
