#فقراء لم يخلقوا للحب
للكاتبه #روز الفياض
جميع حقوق النشر محفوظه
ج ٢٢
وره 8شهور من سقوط بغداد ..
كملنه شهر بالبيت اللي استأجرناه يم اهل ارشد..
رجعوا بالليل ارشد وداليا من بيت اهله اتعشوا يمهم ورجعوا..
اليوم ليلة داليا ..
طفت الكهرباء بس طبوا.. صيف بس الجوا بدا يصير حلو لان صار اسبوع من دخلنه بشهر 11. .
جنت جاي امشط شعري توني طالعه من الحمام..
ارشد:نعيما.
رنا:الله ينعم عليك..
دنك باس خدي كلي:
مو كتلج لاتنومين حمودي لحدما ارجع..
رنا:هو نام نعس وظل يبجي.
كعد عالجربايه حسيته ضايج كتله:
شبيك؟
هز راسه ماكو شي..
طلع من يمي راح للهول وصاح على داليا كلها:
داليا اليوم فرشيلنه فوك السطح..
داليا:لا يافوك السطح .. مااصعد فوك.
ارشد: ولج الهوا يخبل فوك احسن خاف ماتجي الكهرباء ..
داليا: والله لو اموت من الحر مااصعد فوك شبيه مارايده روحي واصعد فوك .. بالليل واشتغل الرمي والاطلاقات لاعيني انام بغرفتنه احسن ..
ارشد:مااريد بالغرفه مخنوك فرشيلي فوك وابقي انتي ..
مشطت شعري ورحت لداليا كتلها:
اكلج شبي ارشد ضايج؟
داليا:اتحاجه هو وعمي ..
رنا: ليش؟ على شنو؟
داليا: ماادري شنو كايل عمي وارشد اتعارك وياه بس اللي افتهمته العركه علمودج..
رنا: يالله سترك .
راحت داليا فرشت لارشد فراش عالسطح وصعد ينام ..
رنا:ولج خطيه تخلينه يصعد بحده روحي صعدي وياه شلون ينطيج كلبج؟
داليا: ياا اخاف مااصعد ورنين نايمه خوما اصعدها ولا اكدر اصعد واعوفها.. خلي ينام ليلة بحده شيصير هههه.
رنا: عابت انه راح اصعد اشوفه وانزل بي ديري بالج على حمودي نايم خاف يكعد.
داليا: روحي الله وياج..
رنا: بس شوفي مو تحسبينها علي ليلتي تره انتي اللي تنازلتي عن حقج..
داليا: هههههههه روحي تره ارجع بكلامي.
صعدت لكيته متمدد تمددت يمه كتله:
نمت؟
ارشد: لا جنت متانيج..
رنا:هههه منو كلك راح اجي؟
ارشد: تجين.
حضنته كتله:
لاول مره احس نفسي مرتاحه وحياتي هادئه وماافكر بشي وماشيله هم شي.
ارشد: ليش؟
رنا: ماادري بس يمكن لان انت يمي ووضعي انه وداليا مستقر وكل شي تمام...
بست خده كتله:
شكد احبك.. تتذكر من اجيت اعترفلي اول مره ههههه عبالي فقير طلعت كل البله بيك..
ضحك كال:
خررب حظي كلها امة محمد تحب وتتزوج بدون مشاكل بس انه سنين اركض وراج.
رنا: شبي حظك مو هاي انه يمك مو اجيت اموت روحي علمودك وين تلكه وحده تحبك بكدي؟
حضني وباسني كال:
ماكو ... وانه هم احبج اموت عليج..
رنا:اسم الله عليك.
دمعت عيوني ومسحتها ضحك كال:
ابوس عينج لو تخاف وتظلين تغنين بهالليل اغنية محمد عبد الوهاب؟ههههههههههههه.
رنا:لا اسم الله اخاف.
لزم ايدي وباس عيني عالعناد ويضحك وانه اكله:
لا لا الله عليك ارشد والله اخاف نتفارك ..
يضحك بصوت عالي كلي:
هاي افكار داليا عدتج.
شبيج ولج مخلبه انتي شلون نتفارك مااكدر افاركم لاانتي ولاحماده ولا رنين وداليا.. انه باليوم المااشوفكم احس يومي ناقص ..
كعدت نمت على صدره وحظنته كتله:
الله لايفركنه ان شاءالله ولايحرمنه منك..
ارشد: تسمعين صوت الرمي؟
رنا: اي بعيد ان شاءالله..
ارشد: الله يعلم كم مسكين هسه ينصاب بسببها..
رنا: اي والله.
ارشد:حبي جيبيلي كلاص ماي عفيه وشوفي حماده خاف كعد بوسيلياه.
كعدت بسته على كيف من شفته كتله:
صار ..
نزلت جبت ماي بارد وطليت على حمودي نايم بسته كتله:
هاي البوسه من بابا.
رحت باوعت لداليا ورنين نايمات..
صعدت حطيت الكلاص يم راسه كتله:
حبيبي اكعد اشرب الماي مادامه بارد ..
ارشد: يفداج.
رنا: منو؟
ارشد: حبيبج..
رنا: اسم الله عليه منو كلك اريده يفداني تانيته شكد انوب يفداني مااريد اريده سالم بس..
حسيت الجو بي بروده وكفت فتحت الجرجف حتى اغطيه واتغطى وياه.
غطيته وجاي اتمدد يمه شفته كمز التفتت عليه واتغطيت وخليت راسي على ايده وحضنته كتله:
شبيك ؟
ماحجه..
حسيت جوه ايدي اللي حضنته بيها رطوبه ماي ماادري شنو وحتى الفراش بي ماي كعدت باوعت لايدي لكيت الجرجف جوه ايدي ناكع فد سائل ماادري شنو لونه غامق ماادري شنو لونه لان ظلمه وبس ضوه الكمر بالسما..
باوعت للفراش نفس الشي كتله:
ارشد شنو هذا المنكع هدومنه والفراش؟ عصير لو حبر لو شنو؟ شو لونه طوخ..
ماجاوبني باوعتله شفته يحرك شفايفه بس مااسمع شيكول اتدنيت يمه كتله:
علي صوتك مااسمع شتكول..
يباوعلي ويهمس ماادري شيكول بدون وعي وبدون شعور كتله:
حبيبي كول لا اله الا الله ...
حسيته هدأ كتله:
ارشد احجي شبيك خوفتني تره ..
ماحجه بعد ولااتحرك ظليت اباوعله ماادري شنو الي جاي يصير بس عرفت هذا الي بفراشنه وهدومنه دم..
اباوعله ناكع بدمه وانه مثله بس ليش انه احجي وهو لا؟
ندهته حاجيته حركته بسته من شفافيه اتوسلت بي يحجي بس ماحجه ولااتحرك ..
ظليت ادك على وجهي واصيح ماادري شسوي ..
البيت الي بصفنه جانوا هم نايمين عالسطح من سمعوني ابجي واصيح طفروا على سطحنه والنسوان ظلن يباوعن من السياج.
اجوا سألوني شكو ماجاوبتهم راحوا لارشد شافوا غركان بدمه ظلوا واكفين محتارين شيسوون.
بعدين نزلوا من من درجنه جوه للبيت فتحوا الباب حتى نسوانهم تجي وراحو لاهل ارشد كلولهم.
وداليا كعدت واجت تركض اباوعلها شابكته وتبجي وتحاجيه واجو اهله امه وخواته واخوانه وابوه صريخ وبجي ودك ولطم.
رجعت عالحايط انتجيت وكعدت بالكاع بدمي واباوعلهم..
ماحسيت الا من عصام غطاني بفد شي لان جنت لابسه بجامه بدون ردن..
كعد يمي سألني:
هذا الدم البيج منه مو انتي هم مصابه؟
رنا: كتله لاتبوس عيني نتفارك يضحك علي ..
ليش ماصدكني؟ كلي مااكدر افارككم .. توه كال يحبني ومايكدر يفاركني ..
عصام يبجي ..
اباوعله بمكانه ملتمين عليه ويبجون واباوع ايديه وملابسي كلها دم .
من وعيت لنفسي اتهسترت ظليت ادك على روحي وابجي .. رصاصه طايشه اجت خذته مني وفركتنه وضيعت حلم وانتظار سنين ..
رملتني ... ويتمت ابني ... واخذت حبيبي .....
اتوفى ارشد بيوم 2003/11/13..
