ج4
طلعت من الغرفه رحت يمهم كعدت بدون مااسلم
يباوعلي بكل وقاحه ماينزل عينه اتمنيت اكوم اشلع عيونه.
كال:
يابه رنا كلش شايفه روحها علينه ماتسلم.
باوعتله بطرف عيني وماجاوبته.
امي:اكوم انه اسويلكم جاي.
اباوع لامي كلت عدها شي اللهفه هاي مو طبيعيه.
انتبهتله بعده صافن علي درت عليه كلته:
خير شكو؟
كال:
كل خير ان شاءالله بس انتي اعصابج..
هدي شوي حتى نحجي.
رنا:احجي.
بس من هسه اكلك حتى تفكر قبل لاتحجي طلعه مانطلع وشتريد تسوي سوي.
ضحك على كيف وبقى مبتسم كال:
لا يابه لا ماتطلعين ماعاش اللي يطلعج منو هذا اللي يتجرأ ويطلعلج من البيت وانه موجود.
فتحت عيوني شنو هالتغيير المفاجأ هو هم حس بيه متفاجئه كلي:
حجيت ويه امج قبل شويه وصار بينه شبه اتفاق.
رنا:اتفاقيش؟
كال:
هو يعتمد عليج وعلى قرارج اذا توافقين عليه او لا.
رنا:ياقرار يااتفاق شنو هو غير اعرف؟
كال:
شوفي رنا انا رجال مااعرف الف وادور واحجي طك بطك ومااخاف من احد.
رنا:وبعدين؟
كال:
انه خطبتج من امج قبل لاتجين وامج وافقت.
بالبدايه بقيت صافنه عبالي يتشاقى بس شفت ملامح وجهه جديه.
ضحكت...
هو هم ضحك..
رنا:شنو هاي نكته؟
كال:
لا مو نكته وعيونج احجي صدك.
رنا:
شوف ابو محمد..
كال:
جواد.
رنا:شنو؟
كال:
اسمي جواد.
رنا:مو مشكله جواد ابو محمد مو مهم المهم انت مو تشوفني زغيره عبالك ماافتهم لو مااعرف احجي لو مااعرف اتصرف ويتهيألك تضحك علي شنو زواج شنو خطوبه اعرفك تعرفني؟
جواد:لا منو كال شايفج زغيره مره شكبرج طول بعرض يمكن اطول مني حتى.
واذا عالحجي هم لسانج مامقصر منشار شلون بعد ماتعرفين تحجين وشلون اضحك عليج؟
انه شفتج عجبتيني ولو انتي راسج يابس بس حلوه حتى عصبيتج حلوه.
ومال ماتعرفيني صحيح بس انه اعرف عنكم كل شي.
رنا:وهسه؟
جواد:لا هسه يمج الحجي مو يمي انه كلت العندي لامج.
رنا:كلته لامي وانه شنو؟
جواد:هي تكلج عود.
رنا:لا بالله لا خوش ربحنه من اولها امج تكلج.
ضحك كال:
ولو انه تأخرت بس ميخالف لخاطر هالعيون نتأخر بعد واحجيلج الحجي الحجيته لامج.
رنا:كول.
جواد:انه مفوض بالشرطه تدرين ومتزوج بت عمي من جنت بعدني زغير يعني هسه ولدي بطولي شباب عندي 4 ولد 2 منهم معوقين عدهم اعاقه مايمشون.
رنا:اي؟
جواد:وشفتج عجبتيني وحاجيت امج بقت يمج.
رنا:وشجابرني اتزوج واحد متزوح وعنده 4 ولد شباب يمكن يطلعون بكدي بالعمر؟
جواد:لا اصغر منج مو بكدج مو لهدرجه هههه تره انه زغير مو جبير..
ظليت صافنه هذا من كل عقله!!
جواد:اذا قبلتي خير على خير معناها تبقون كاعدين بالبيت خوما اطلع نسابتي واهل مرتي واذبهم بالشارع هههه.
كريييه وماعنده اسلوب وهمجي هذا الحسيته واللي شايفته.
رنا:من الاخير انه مااريد اتزوج ماافيدك ماافكر بالزواج.
جواد:ليش ماتفيديني؟
رنا:مهري غالي.
اتذكرت جملة امي كلت يمكن تنقذني ويكوم يطلع مايعجبه الحجي.
جواد:اذا اكدر عليه تدللين مايغلى عليج شي.
درت وجهي كلت شهاللبلوه هاي منا المدير ومنا المفوض منين طلعولي ذوله هسه؟؟
آخخ ياارشد شوف شصار بيه وانت ماتدري وماحاس.
جابت امي الجاي وانه اترخصت رحت لغرفتي اتمددت وبقيت اباوع للسكف وافكر هسه موضوع البيت يمي اذا اقبل يخلينه كاعدين بالبيت واذا ارفض يشمرنه بالشارع...
فكري رنا فكري بحل بسرعه..
حسيت بي طلع كمت بدلت وغسلت وجنت جوعااانه هسه انسدت شهيتي رجعت لغرفتي اتمددت واجت امي جايبتلي الغدا لغرفتي مو من عوايدها بس لان تريد تحجي اكيد بموضوع مفوض جواد.
وفعلا كعدت وخلت الاكل:
رناوي كومي تغدي انتي تعبانه.
مالي خلك ارد بس جبرت نفسي كتلها:
مااشتهي.
امي:لا شنو ماتشتهين كومي كومي لاتنامين بدون غدا شماكله انتي قابل من الصبح لهسه بس الريوك.
رنا:ماجوعانه.
امي:لا مامعقوله كومي اكليلج بس لكمتين عالاقل.
بقيت بمكاني مااتحركت هي كعدت وظلت تحجي بموضوع جواد..
ظلت ساعه كامله تعيد وتزيد فرحانه اول مره اشوف ام فرحانه بزواج بتها من واحد متزوج وعنده 4 ولد كبار..
هاي وانه شابه وحلوه والف واحد يتمناني بس هذا لان السالف بيها بيت طبعا توافق وهسه من يعرف ابوي يركصلها بجفيه شيريد بعد اكثر من هيج.
هاي تاليتي يعني اتزوج واحد متزوج ليش؟
الاول ماعنده جهال واكيد يريدني علمود الجهال.
والثاني متزوج بت عمه من زماان ومل منها واكيد تعبت وكبرت وهسه يريد يجدد يرد وحده زغيره وحلوه وكشخه تحل محل الاولى لان خلص استغنى عن خدماتها صارت جبيره ماتفيده.
شلون عقليات ونفسيات مريضه ...
درت على امي كتلها:
المدير خطبني.
امي سكتت جانت تحجي وهسه سكتت اتفاجئت كالت:
منو؟
رنا:مديري استاذ بشار.
امي:شوكت هالحجي؟
رنا:قبل كم يوم.
امي:شو ماكلتي؟
رنا:شكول؟هم مثل هذا متزوج وجبير.
امي:واذا جبير الرجال مايكبر المره بس تكبر.
باوعتلها مالي طاقه ارد عليها كالت:
وشنو يعني متزوج الرجال مايعيبه بس جيبه.
رنا:من شوكت؟
امي:من الاول.
رنا:وشبيه شجابرني شنو عنست لو دخلت بالعمرين لو مو حلوه؟
امي:لا بس هاي فرص من ترفضينها بعدين تتندمين عليها.
بعدين عالاقل عدهم ويدللونج احس مايجيلج واحد فكر حسره عليه الفلس ويعيشج بضيم.
رنا:مااريد دلالهم مااريد منهم شي.
امي:والله يارنا لاتفكرين بس بنفسج فكري بينه خواتج واخوانج وانه وابوج وين نروح بهالعمر ننشمر بالشارع؟
رنا:مانطلع مو كيفه.
امي:لابكيفنه على اساس يمه فتحي عيونج عدل شوفي الدنيا شلون ماشيه الدنيا للعنده فلوس وعنده قوه واحنه لاقوه ولافلوس.
سكتت وغمضت عيوني ردت احبس دموعي قبل لاتطيح لان اللي جاي يصير انه مو كده مااكدر اتحمل كل هالمسؤوليه هاي صعبه ومتعبه مااتحملها.
امي طلعت وظلت تحجي وتدردم بالهول وانه دموعي ظلت تصب.
اتصلت على ارشد كلت اكيد مو قصده الحجي اللي حجاه اخر مره وهسه لازم يعرف شنو اللي جاي يصير لازم يفكر وياي بحل لازم يساعدني اخلص من هالورطه هاي.
دكيت طلعت مره جبيره مبينه من صوتها سألتها عنه كالت طالع.
رنا:من يرجع كلليله رنا اتصلت خل يتصل بيه ضروري عفيه.
سديته وبقيت كاعده انتظر اتصاله هسه يتصل بعد شويه يتصل ماكو مااتصل.
ردت ارجع اتصل بي ثاني يوم بس كرامتي ماسمحتلي كلت خلص معناها اخذ قراره وبت عمه اوله بي مني..
بيومها كرهت نفسي لان انطيته مجال يلعب بمشاعري لان سمحتله يمثل علي دور العاشق الولهان دور الحبيب المحترم المضحي..
كرهت نفسي لان جنت انتظره سنه وره سنه وكلي امل ولان جان عندي بعد استعداد انتظر.
مرت يومين و3 ومااتصل وكلما يمر يوم اكرهه واكره نفسي اكثر واحتقر نفسي لان حبيته.
ليش ارشد ليش ؟؟معقوله من الاول ماتحبني بس تريد تلعب علي وتضيع سنين عمري بالانتظار؟؟
مع الاسف والله من حجايه سمعتها هيج اتغيرت معناها جنت تتحجج وتريد تخلص مني بس ماتعرف شلون..
يالله الحمدلله انكشفت اوراقك هسه بس احسها انكشفت متأخر بعد فوات الاوان.
وره كم يوم صاحلي استاذ بشار:
ها رنا مارجعتيلي جوابج؟موافقه لا؟
بلعت ريكي ماعندي جواب ومااريد افشله واحرجه بس ماادري شكله بقيت ساكته.
استاذ بشار:يعني ماموافقه؟
هم ماحجيت ..
استاذ بشار:زين اكدر اعرف ليش؟
شكله وشجاوبه حسيت نفسي عركت من الاحراج اخر شي خطرت ابالي فكره بدون ماافكر بيها وبدون مااقصدها بس ردت اخلص من هالموضوع.
رنا:استاذ كل شي حجيته عن حياتك مو مهم متزوج وماعندك اطفال وفرق العمر مايشكل فرق عندي لان انه اذا اريد اتزوج مهري غالي.
ابتسم كلي:
كولي شنو مهرج من الالف لشكد تردين؟
رنا:مو فلوس مااريد فلوس.
كال:
شتردين؟
رنا:بيت اذا تكدر تخلصلي شغلة بيتنه ونبقى كاعدين بي فانا موافقه.
سكت بعدين كال:
ياريت لو بيدي شي لو اكدر جان سويت بدون ماتطلبين تدرين بيه ماتأخر عنج بس مع الاسف هالشي اكبر من سلطتي.
رنا:مو كتلك مهري غالي..
استاذ بشار: زين انه عندي استعداد استأجرلكم بيت انتي واهلج تسكنون بي.
رنا:مايفيد استاذ شلون حجي هذا تصرف علي وعلى اهلي يعني؟
استاذ بشار:اذا صارت القسمه عادي.
رنا:لامو عادي هذا مو حل وحتى لو وافقت قابل لشوكت تبقى مستأجلنه؟
ماينفع هذا الحل لان اصلا مو حل هذا.
بقينه ساكتين بعدين كال:
وهسه؟
رنا:سامحني بس مااكدر اوافق ولااكدر اغير شرطي هالشي خارج عن ارداتي عائلتي مسؤولين مني ولازم افكر بيهم قبل ماافكر بنفسي.
ماحجه شي كمت طلعت كعدت على مكتبي خليت ايديه عالمكتب وخليت راسي بين ايديه عبالي من حجيت هيج وياه ارتاح بس ماارتاحيت بالعكس.
للحظه يمكن اتمنيت يكلي صار اللي تردينه اسويه الج.
اتمنيت اخلص من سالفة البيت واخلص من موضوع جواد فد مره.
بس ماكو فايده مايكدر يسوي شي مع الاسف عالاقل هو احسن من جواد شخص محترم ومنصب ومكانه وعالاقل متزوج بس ماعنده اطفال مو مثل جواد.
ثال راسي من التفكير حسيت ودخت شربتلي حباية براسيتول وصفنت اختنكت من فكرة الزواج مااريد لاهذا ولاهذا مااريدهم اريد بس واحد...
وهالواحد طلع مو كد حجايته وعافني ورجع لبت عمه..
بجيت انقهرت بعدين كمت على شغلي هالايام صايره مهمله التفكير مامخليني اركز بشغلي.
مر كم يوم واستاذ بشار ساكت الظاهر ماعنده استعداد يسوي شي اكثر لخاطري بس انه مجبوره اهم شي هسه اهلي.
ظلت فكره البيت معبيه راسي.
جواد مااجه بعد بس جماعته يجون عادي يدورون على ابوي..
ابوي اللي من عرف بسالفة جواد وخطبته ظل يوميه يخابر يسأل امي شنو قراري.
مستعجل عالبيعه..
هاي بدل مايكول لا ماانطي بتي لهيج واحد وماانطيها لواحد متزوج.
كرهت البيت فد مره لان شوكت ماشافتني امي ظلت تحجي بنفس الموضوع وتريد تشوفني شنو ارد عليها شنو قراري موافقه لو ماموافقه؟
انه جنت مغلسه اكول بلكي الله يفرجها ويحلها من يمه لان انه شنو ذنبي.
بلكي الله ارشد يتصل ويلكالي حل واخلص وارتاح.
بس ماكو شي مااتصل ولاانه اتصلت بعد.
وبقينه بحيره وقلق وتفكير الى ان اجه جواد بالليل جنه نتعشا واندك الجرس طلع اخوي الزغير حمودي.
رجع كال:
هذا الشرطي بالباب.
كامت امي تركض وانه عفت الاكل انقبض كلبي كمت وكعدت على صفحه واباوع على اخواني وخواتي يتعشون.
دخلت امي كالت:
فتحوا الباب الثاني حتى يدخل ابو محمد.
رنا:حمودي كوم افتح الباب.
كام حمودي فتح الباب ورجع.
رنا:دخل هذا اللزكه؟
حمودي:اي
كمت غسلت وبعدين رجعت لغرفتي عدلت شعري وبدلت دشداشتي كلت هسه اكيد امي تصيحلي اجي.
#نورالشمس
