#فقراء لم يخلقوا للحب
للكاتبه #روز الفياض
جميع حقوق النشر محفوظه
ج19
من رجعنه للبيت وصلوني وراحوا ثاني يوم كتله:
حبيبي انه هذا ابو تغريد ماارتاحيتله ابد.
ارشد:ولاانه بس نتحمله ميخالف يفيدني بالشغل خوش واسطه رفيق جبير بالحزب هذا.
رنا:ادري هو انه ليش خايفه منه.
ارشد:المايسوي شي محد يتدناله واحنه الحمدلله ماعدنه شي نخاف منه.
رنا:كيفك.
وره ايام ارشد وصى ابو تغريد يتوسطلي بوظيفه بنفس الدائره اللي جان ابوي يداوم بيها بس بالفرع مال بغداد وفعلا وره 3ايام اتصل على ارشد وكله خل تداوم من باجر.
داومت وبده ابو تغريد يساعد ارشد بالشغل يجيبله زباين ثكال من تجار ومسؤولين ورفاق.
امورنه الماديه صارت كلش زينه ارشد اشترى بيت ملك جبير ووسع شغله حتى يلحك عالشغل ووراها اشترى قطعة ارض جبيره بنص بغداد.
خلال هالفتره اللي هي سنه اهل ارشد من جانوا يجون لبغداد محد منهم يجينه ماعدا امه وعصام ومره اجت وحده من خواته الزغار.
بس ابوه ابد حتى مايحجي ويه ارشد..
بيوم من الايام ارشد اجه الظهر اتغدينه وخلصنه وجان يوم جمعه ويوم الجمعه جانوا الظهر يطلعون فلم اجنبي بتلفزيون الشباب.
نباوع عالفلم ومندمجين شويه وكال:
البارحه داليا عرفت بزواجنه.
جنت نايمه على رجله رفعت راسي كتله:
هاا؟
ارشد:داليا عرفت بزواجنه
رنا:شلون؟
ارشد:انه مخلي عقد الزواج ويه الاوراق المهمه والجناسي وهالسوالف.
رنا:اي؟
ارشد:هي بيها خصلتين مو حلوه الاولى كللش فضوليه والثانيه تحجي هواي.
فضولها هالمره ماخذها لاوراقي ولكت عقد الزواج.
رنا:وشكالت؟
ارشد:بجت شويه وسكتت بعدين كالت انه جنت متوقعه هي اللي تحبها قبل من شفتك عرفت اسمها وشلون تباوعلها وتحاجيها.
رنا:وانوب؟
ارشد:ماكو سكتت
رنا:بس هاي؟
ارشد:اي والله ماكالت شي ولاسألتني ليش ولا شلون ولاشوكت اصلا طلبت رقم التليفون حتى تخابرلج وتباركلج.
ظليت متعجبه معقوله ماانقهرت؟
معقوله ماتأثرت مو تكول احبه؟
رنا:اخاف هذا الهدوء الذي يسبق العاصفه؟
ارشد:ماكو عواصف ان شاءالله بالعكس هسه الوضع اتعدل لان كتلها انوب ليله يمج وليله يمها؟
رنا:كول والله؟
ارشد:والله...
رنا:ومرت عمك شنو كالت؟
ارشد:مرت عمي شتكول اذا هي اصلا عمي اتزوجها على مرته الاولى.
رنا:كول هيجييي.
ارشد:زين هسه ماكو شي؟
رنا:شياتيش؟
ارشد:شي مثل هذا💏💏💏.
وره يومين تقريبا جنت انظف العصر ودك التليفون شلته:
الو؟
.الو
رنا:نعم؟
.اني داليا مرت ارشد انتي مو رنا؟
سكتت استحيت بعدين كتلها:
هلو داليا شلونج؟
داليا:الحمدلله.
رنا:شخبارج وشلونها رنين؟
داليا:الحمدلله زينه.
بدل ماتسألين عنها بالتليفون تعاي زورينه وشوفيها.
سكتت كلت شو هاي كلش بارده.
رنا:اي اكيد ان شاءالله اجي.
داليا:اتصلت حتى اكلج مبروك.
رنا:الله يبارك بيج.
داليا:اني جنت حاسه انتي اللي يحبها بس مااتوقعت يحاول يتزوجج يعني مااتوقعت توصل السالفه للزواج.
رنا:انه جنت متصوره انتي تعرفين بزواجنه بس انصدمت بعد الزواج هو ماكايلج.
داليا:اني سكتت لان امي هم زوجه ثانيه فكلتلي مابيها شي وهو مامقصر ويانه بشي.وادري بيج تحبينه ويحبج من زمان
وبعد مايفيد الحجي.
رنا:وهسه؟
داليا:احسه متغير هواي.
رنا:شلون يعني؟شسوه؟
داليا:لا اقصد اتغير للاحسن هسه احسه مهتم بيه اكثر من قبل ويسولف ويضحك.
رنا:الحمدلله.
داليا:بس عفيه اريد اطلب منج طلب؟
رنا:اي تفضلي.
داليا:عفيه لاتغيرينه علي وعلى بته..
ضاك صدري من حجايتها كتلها:
انتي عرفتي احنه صار سنه تقريبا متزوجين وقبل شويه كلتي اتغير وياج للاحسن وصار يهتم بيج مو صح؟
معناها لاتخافين مني انه احبه ومستحيل اضره بيوم وانتي مرته وام بته وبت عمه يعني عزيزه وغاليه عليه واكيد يحبج ومايكدر على زعلج ولايقبل بأذيتج.
داليا:اي عفيه واني والله احبج صدك من عرفت كرهت بس بعدين فكرت انتي ولاغيرج عالاقل اعرفج.
رنا:وانه هم احبج الله يعلم واحب رنين.
داليا:خوش معناها تعاي باجر اتغدي عدنه امي تريد تسوفج.
رنا:اي ان شاءالله.
سديته منها وانه افكر هاي مو صاحيه خبله يمكن رد فعلها مو طبيعي.
بالليل حجيت لارشد ظل يضحك كال:
شكو بيها؟ليش مستغربه كتلج هي حبابه وفقيره وانتي هم تحبين وماعندج اذيه اتوقع تصيرن صديقات.
رنا:يجوز
ثاني يوم اجه علي ارشد اخذني من الدوام ورحنه لبيت عمه دخلت وانه مستحيه سلمت على امها مره جبيره بس بعدها بحيلها قويه سلمت علي عادي بس ظلت طول الوقت تباوعلي وره شويه اجت داليا لابسه ومكيجه وهي اصلا حلوه اجت سلمت علي واكلتني بالسلام.
سولفنه شويه بعدين راحت للمطبخ تصب الغدا وكمت وراها اساعدها.
داليا:اكلج انتي مو جنتي متزوجه قبل ليش اتطلكتي؟
صفنت من سؤالها وحسيته مو حلو بس كتلها:
مااحبه.
داليا:لعد ليش اتزوجتيه؟
رنا:انجبرت.
داليا:زين ارشد ليش عافج قبل ماخطبج وهسه رجلعلج شغير؟شسويتي ورجعلج؟
رفعت حواجبي ودرت باوعتلها حسيتها تريد تهيني وتسمعني حجي وماتعرف شلون.
رنا:منو كال عافني؟اكو ناس اتدخلت بينه جذبت عالطرفين وجانت اكو ظروف اقوى من عدنه اثنينه.بس بقينه نحب بعض.
داليا:اي فاهمه فاهمه بس قصدي من اتطلكتي هو جان متزوجني ولو يريد جان رجعلج بس مارجع بس من شافج اخر مره تتذكرين رجعلج، ليش؟
سكتت كلت بكلبي عبالي فقيره طلعتي نصج بله.
رنا:لان ماكدر ينساني.
من كتلها هيج سكتت ما حجت بعد.
واحنه كاعدين نتغدا رنين تعلب بالاكل وبيبيتها تصيح عليها فبجت صحتلها بحضني والعب وياها وهي تضحك شويه وكالت داليا:
انتي مو جنتي متزوجه قبل ارشد شعجب ماعندج جهال؟
انه بلحظتها صدك فار دمي لان ارشد حسيته انصدم رفع راسه باوعلها.
رنا:لان انه مااريد.
داليا:شعجب؟
راسا ذب الخاشوكه هو وكللها بعصبيه:
انتي شهالموضوع هذا شجلبتي؟
داليا:ياا شبيك هو سؤال.
غلست انه وحسيت امها تخزرها.
وره الغدا انه اشرت لارشد حتى يوديني لان كلش ضجت..
جلبت بيه ابقي اليوم يمنه كتلها مااكدر عندي شغل بالبيت.
وصلني وجبنه الطريق ساكتين مانحجي.
دخلنه للشقه رحت ابدل ملابسي هو كعد بالهول شويه ودخل وراي وكف بالباب يباوعلي.
رنا:شبيك؟
ارشد:شنو سألتج بعد داليا؟
رنا:عفيه سد الموضوع.
سكتت بعدين كال:
لاتزعلين منها هي فقيره بس ماتعرف تحجي.وتحشر نفسها باشياء ماتخصها.
رنا:اي كللللش فقيره وواضح كللش شلون ماتعرف تحجي بدليل حجيها كله مايغث كل مواضيعها عاديه وحلوه ومو مقصوده.
ارشد:خلص انسي.
رنا:كله منك كل اللي صار بينه من حجايتك ذيج.
طاحت دموعي اجه شبيكني كلي بصوت ناصي:
شبيج عقلج زغير وبكل حجايه تتأثرين مو انتي مره مثلها لو انه متزوج عليج ماتسوين هيج؟
مسحت دموعي كتله:
شحدك تسويها.
ظل يضحك..
وره كم يوم جنت اشر ملابس عالسطح واجه ارشد صاح علي كتله:
هنا حبيبي عالسطح.
اجه كعد يباوعلي وانه بيومها حالتي حاله شعري مكوش وهوسه لان ملتهيه بالتنظيف ضحك درت عليه كتله:
شبيك؟
هز راسه ماكو شي..
وكعت القراصه مال الملابس مني ودنكت شلتها ومن كمت دخت كتلها:
ارشد لاتضحك.
ضحك حيل لزمت الحبل مال الملابس خفت اوكع كتله:
لاتضحك تره دايخه.
ارشد:يعني نكول مبروك
رنا:على شنو؟
ارشد:يمكن حمودي بالطريق.
رنا:كول والله؟
ضحك حيل ولزمني دخلني للغرفه كال:
ادري انه المره لو انتي غير انتي تعرفين.
ثاني يوم رحت للدكتوره وطلع عندي حمل وهالمره كلللش فرحت بي.
بيومها جانت ليلة داليا وراح ارشد..
ثاني يوم العصر جانت يمي ام اوس جارتي اللي ساكنين جوانه نسولف ونضحك ودك التليفون داليا.
سلمت عليها عادي كالت:
انه خابرت أسألج ارشد كال حامل صدك؟
رنا:اي البارحه للدكتوره وكلتلي.
عبالي تريد تباركلي..
داليا:اني ذيج المره سألتج كتلج ليش ماعندج جهال من رجلج الاولاني كلتي لان مااريد مو صح؟
رنا:صح.
داليا:لعد ليش هسه تردين تورطين ارشد بطفل؟
رنا:يمه اسم الله ورطتيش شو انتي ماتعرفين تحجي؟ شنو اورطه شنو جايبته من الشارع لو جايبته بالحرام؟ تره ارشد رجلي مثل ماهو رجلج افتهمتي واريد اجيب جهال مااريد جهال هذا شي راجعلي انه ورجلي انتي شكو؟
بعدين شنو حلال عليج وحرام علي؟
سديت التليفون بوجها..
من اجه ارشد بالليل ماحجيتله شي.
تعشينه ونمنه كال:
باجر امي وابوي يجون لهناك.
رنا:بحدهم؟
ارشد:ماادري يمكن وياهم البنات.
سكتت كال:
ترحين وياي؟
رنا:وين؟
ارشد:هناك تسلمين عليهم.
سكتت اتنهدت حسيت بي يردني اروح وياه حتى اراضي ابوه كلت يالله ميخالف لخاطره ومهما كان ابوه رجال جبير والاصول انه اروحله واسلم عليه.
رنا:ان شاءالله.
بهالفتره جانت علاقة ارشد بابو تغريد هو وولده كللش قويه وامهم جانت كلش حبابه وتتصل دائما تسأل عني واجت كم مره حتى تشوفني.
ثاني يوم اجه علي ارشد بالليل حتى ياخذني اروح اسلم على امه وابوه بس جنت كوه رايحه مااشتهي اشوف داليا.
طبيت سلمت سلام عادي عليها وعلى امها وشفت ام ارشد كامتلي هي سلمت علي وخواته الزغار 2.
ماشفت ابوه بعدين امه صاحت عليه:
حجي.. حجي..
كامت راحته للغرفه طولت راح ارشد وراهم يسلم على ابوه سمعت صوت ابوه يصيح عليه كمت انه وراهم كلت انه اروح اسلم عليه وام ارشد من شافتني هم كلتلي:
فوتي سلمي عليه وبوسي راسه ميخالف.
وكفت اباب الغرفه شفت ارشد كاعد يمه ويحاجيه ويبوس راسه وهو حاكره.
دكيت الباب التفتوا علي..
شافني كال:
البيت بي ريحه مو حلوه هبت علينه.
انه من كال هيج ماادري شصار بيه وارشد هم يمكن عباله كلامه عادي مايقصد بي شي.
اشرلي تعاي انه هم دخلت حتى اسلم هو راسا كل لارشد:
كوم اخذ مرتك واطلع مااشتهي اشوفكم.
ظليت متحنطه دخلت ام ارشد تحجي وياه بس ارشد كام لزمني ايدي وكلي امشي..
بعدنه ماطلعنه سمعناه يكول لام ارشد:
مايستحي جايب علينه وحده مطلكه.
راسا وكفت ماكدرت امشي انصدمت من حجايته هذا رجال جبير وهيج يحجي.
ارشد سمع بس سكت جرني من ايدي وصاح:
رنااا امشي لاتوكفين امشي..
رجعنه للشقه بس اخذت الطريق كله دموعي تصب انقهرت كلش انقهرت.
من نزلنه دخل وياي ارشد كعد يمي كال:
كافي لاتبجين رجال جبير مايعرف شيحجي.
رنا:مرتك مثل الحيه تكرص وتظم راسها تكلي ماتعرف تحجي ابوك رجال جبير وحجي وتكول مايعرف يحجي منو اليعرف يحجي بيك حتى اعاتبه.
ادري كاتلتلكم واحد حاقدين علي هالحقد؟
سكت ماحجه بس من شافني ظليت احجي ضاج وطلع.
ظليت كاعده بحدي بعدين اتصلت على لبنى سولفنه شويه ردت التهي.
بالليل تعشيت ونمت من وكت كلت اكيد مايجي رجع لهناك.
ماادري بيش الساعه حسيت بحركه بالشقه كعدت شفته بالمطبخ يسويله عشا.
رنا:روح انه اسويه.
راح للهول وانه كملت العشا واخذته اله.
ارشد:ماتتعشين؟
رنا:اكلت
ارشد:شلون صرتي؟
ماحجيت باس خدي كال:
من اول مواجهه اتخليتي عني واتعشيتي بحدج.
ضحكت..
شراح يصير؟🤔
#نورالشمس
