الجزء ٥
#بعدك ع بالي
للكاتبه ..... رشا الاسدي
مهند طلكني ...
اثنينهم ظلو صافنين
شبيكم متفاجئين .... طلكني مهند
مو اني الي انذل .... وماعاش الي يذني ويهيني
شنو الي جابرني اعيش وياك
ولك اني بت عز بت اصل وفصل
وحلوى والف واحد يتمناني
خالة مسار حبيبتي شبيج صلي ع نبيج
خالة محد دمرنا غيرج انتي .. اي انتي دمرتيني ودمرتي ابنج
والاكثر اني ... هو رجال مايعيبه شي باجر عكبه يرجع لحبيبته ولا كانما صار شي
بس اني حطمتي حياتي واني بعدني صغيره
مهند عافنا ودخل للحمام
اتحملي بتي
وع شنو اتحمل ابنج ..
خالة فهمي ابنج يحب عبير وميت عليها
ومستحيل ينساها
ينساها صدكي بس صبري وصيري وشاطره وعرفي شلون تخليه يحبج
خاله شبيج اله اكلج البارحه من تقربلي يتخيلني عبير
خلي روحج بمكاني او وحده من بناتج
وبعدين راح تحسين بعذابي وحركة قلبي
خاله اني اريد ارجع لاهلي ... وجودي هنا ماله داعي
حاولت تقنعني هي وعمي بس ماقنعت اتصلت بامي واجت خذتني
رجعت لاهلي وظليت فوك الشهر
بابا ماقبل اطلك واني ماصارلي غير شهرين من زوجت
كلي ... الناس شتكول علينا
و ترى يطلعون العيب بيج مو بيه
وانتي تعرفين مجتمعنا شلون تعبان
صبري عليه ع الاقل سنه اتحمليه
وبعد السنه اني اطلكج منه
اذا ماصار زين
قنعت بكلام ابويه
وقبلت ارجع بس بشرط
اني ومهند مانعيش بغرفه وحده
صح شويه القرار صعب عليهم بس قبلو بيه
ورا ايام من رجعتي ظليت احس بدوخة ولعبان نفس
وجان يصير شي لاع البال ولا ع الحسبان
ماجنت اتوقع اني راح احمل
وحته اهل مهند جان الكل متفاجئ
وبنفس الوقت فرحو بهذا الخبر
وعمي سوى وجبة عشى بهذي المناسبه
عزم اولاده وبناته
وبالنسبه لمهند فجان عايش بعالم ثاني مو نفس عالمه
ومطنش الوضعيه
يطلع الصبح للشغل ومايجي للبيت اله الساعه ١ بالليل
مرت فتره الحمل وعلاقتي بمهند ماتغيرت
هو بغرفه واني بغرفه
تعودت ع هذا الشي وشغلت نفسي بدوامي ودراستي
جانت خاله دايما تحجي وياي وتقنعني بان اتقرب لمهند
بس مستحيل اسوي هذا الشي واذل نفسي اله بعد
صح لسه احبه بس مستحيل ادوس ع كرامتي مره ثانيه
اني طبعي احب اهتم بنفسي مكياج ولبس
صح احيانا ازيد بمكايجي حته الفت انتباها
بس هو ابد ولا كانما يشوفني ولا معبرني
اكثر شخص جان قريب مني هي زهراء
زهراء زوجت صلاح ... صلاح هو الابن الاكبر
وهو الكل بالكل بالبيت ... الكل تسمعه كلامه وتمشي بشوره
حته ابوهم ما يسوي شي بالبيت او بالشغل اذا مايشوره
