الجزء ١٣
#بعدك ع بالي
عزيز انته ليش دايما تسالني هذا السؤال
يمكن لان مستغرب شلون متحمل غيابج وعايش بالغربه
وانتي همين شلون متحمله غيابه عنج
عزيز ممكن تسد الموضوع
زين سؤال اخير اترجاج تجاوبين بصراحه
شنو
انتو مزوجين عن حب
لا خطبه اهل
اها ... وانتي تحبيه
عزيز وين تريد توصل باسئلتك
مسار ليش من اجيب سيرت زوجج تتنرفزين وتسدين الموضوع
عزيز اكثر من مره كتلك
هاي امور خاصه بيه مااحب احجي بيها
بس انته ليش بين فتره والثانيه تسالني عنه
(مارد عليه)
يله عزيز تصبح ع خير
اوك اخذي راحتج
وانتي من اهل الخير
مااعرف ليش جنت اتردد احجيله الحقيقه
يمكن لان جنت اتمنى يصارحني بمشاعره اول
وتاكد هو يحبني يله احجيله كلشي
رجعنا اني وعزيزبهذي الايام مثل قبل
يعني مراسلاتنا مجرد سلام وكلام عادي
منار بهذي الايام التهت بالتحضيرات
لا ن موعد زواجها قريب
وع اساس اخويه محمد يجي يحظر العرس
بس ماكدر لا ن عنده مواد واكع بيهم
والله مشتاقه لمحمد ومشتاقه لسوالفه وشقاه
وضحكاته
صح دايما نتراسل وياه بس هو اغلب الوقت مشغول
بهذي الايام انشغلت ويه منار
اني وماما تكفلنا بترتيب شقتها
وجهزناها بالاثاث الي ينقصها
قبل العرس بيومين اخذت منار للحلاقه
حته تصبغ شعرها وتسويلها بعض الترتيبات وتنضيف بشره وكذا
قبل لا نطلع من البيت بابا وصاني احول فلوس لمحمد
اني فرحت حته اشوف عزيز
صارلي زمان ماشايفته من يوم العرس
وصلت منار للصالون وطلعت
وصلت للمكتب .... دخلت
واتفاجاءت بوجود وحده بالمكتب
واكفه تحجي وصوتها عاليه وضحكتها بعد اعلي
وعزيز واكف قريب عليها ويضحك وياها
بس شافني تفاجأ وعدل وكفته
وصلت يمهم سلمت ..
اباع عليها ضخمه وجهه عريضه
ومكياج اوفر وعدسات
ونص شعرها طالع من الشال لونه اصفر
وملابسها ضيقه كلش
وتطك بعلجها ... وظلت تباع علي من فوك ليجوى
درت ع عزيز
ها مسار تفضلي
آه ... عندي فلوس اريد احولها
اوك شكد
كمل الاجرائات وانطاني الوصل
طلعت
طلع ورايه
مسار اوكفي لحظه ... مسار
ها عزيز خير اكو شي
لا بس ردت اكلج ترى هذي زبونه
عدنا ودايما تجي للمكتب
ها اوك يله من رخصتك
مسار بعدين اتصل عليج اوك
مارديت عليه
صعدت السياره واني قلبي احسه اشتعل بالنار
ظليت اطلع حركتي بالستيرن كلساع اضرب عليه حيل
وامشي بالسياره سريع وحته مااعرف وين رايحه
انتبهت ع صوت هورنات السيارات ورايه
دخلت بفرع وركنت السياره
دنكت ع الستيرن ظليت ابجي بحركه
والوم بروحي شلون امنت برجال ثاني وحبيته
شلون علقت كل امالي بيه
ليش اني دايما من دون النسوان ماعندي حظ ويه الزلم
ظليت اضرب راسي بالستيرن حيل
