الجزء ٦
بقلم ... رشا الاسدي
فد يوم مهند كلي راح اسافر لبغداد لان عندي معامله هناك
انتي روحي لاهلج ظلي كم يوم علما اجي
تريد احظرك الجنطه حبيبي
لا حياتي مااريد اتعبج اني احضرها
انتي حضري نفسج حته العصر اوديج لاهلج
حضرت ملابس الي ولزونه
جانت زونه عمرها سنتين بوقتها
والعصر اخذني لاهلي ورجع
بالليل اتصلت بيه وجان يحضر ملابسه
وكلشي طبيعي
ثاني يوم الظهر كلت خل اتصل عليه اشوفه وصل بعده
اتصل الجهاز مغلق
كلت اكيد بعده بالطريق والنت ضعيف
صارت ب ٢ الضهر اتصل هم مغلق
كلت اي اكيد النقال خلص شحنه
نمت الظهر كعدت العصر كذلك اتصل ماكو ما احصله
كله خارج نطاق التغطيه
ظل بالي بس لا صار عليه شي
صارت الدنيا ليل وهم رجعت اتصل ماكو
كلت اتصل بخاله بلكي همة عدهم علم بيه
اتصلت بيها
كالت لااحنه اتصلنا بيه ولاهو اتصل
ورا ساعه اتصل بيه عمو ابومهند
كلي ماحصلتي مهند
رديت عليه لا والله ماكو
قلقنا عليه خفنا لا خاطفيه او صاير حادث بالطريق لا سامح الله
صارت الساعه ١١ اتصلت زهراء
كالت لا يضل بالج توه اتصل مهند
وكال اني زين ونقالي ضاع مني
واني جاي اتصل من جهاز ابو الفندق
ويسلم عليج
الحمدلله طمنت عليه
ثاني يوم جنت انتظر اتصال منه او حته مسج ع الاقل
منا للعصر
اجونا زهراء وصلاح وجان شكلهم مايطمن ابد
صلاح ... ياجماعه اريد افاتحكم بموضوع بس مااعرف شلون
بابا .. شنو صلاح احجي
ااااا مهند انهزم لخارج العراق هو ووو عبير
هااا
زهراء طلعت ظرف من جنطتها
وهاي ورقه طلاق مسار
ظليت اباع بالوجوه
اشوف الكل تنظر عليه بنظره العطف والرأفه
وكفت ... اصلا عادي طزززز بيه وبيها
كمت من يمهم وصعدت الغرفتي
لسه اذكر هذا اليوم
مااردت ابجي اي ماابجي منو هوو ابجي عليه
شغلت المسجل وخليت قرص اغاني عراقيه ردح
اذكر ساجده عبيد وردح ردح
لحد ماتعبت ونمت
حته بتي ماادري بيها ولا سالت عنها
كلت شربت نامت تبجي او تلعب مااعرف
ولا اي احد من اهلي دك الباب علي
ماكعدت اله ع صوت الموذن لصلاة الفجر
حسيت بقلبي مقبوض وياذيني
احس بحمل ثقيل ع صدي مو كادره ازيحه
اوووف ياربي ساعدني يالهي
ظليت ابجي حيل وبصوت عالي
حسيت الباب انفتح رفعت راسي امي
جانت لابسه احرام الصلاة وبيدها مصلايه
كومي ماما ذكري ربج وادعيه
الي بيه انتي موقليل ولا اي احد يكدر يتحمله
كومي بتي واشكي همج لرب العالمين
ولا تظلين تبجين وتنوحين ع واحد مايستهالج
اجت يمي كعدت ع الجربايه نمت بحظنها مثل الطفل
واني بس ابجي وهي تمسح ع راسي وتقرا ايات
بوقتها تمنيت يرجع لزمن ليوى لذيج الايام الحلوى
ارجع طفله اتقشمر بوسه وحظن كله حنيه ومحبه
وانسى ليش جنت ابجي وارجع العب
٣ سنوات من عمري كانما دهرً
دهر من الحزن والقهر وخيبة الامل والانكسار
