النت هاي اليومين كلش ضعيف لذلك جاي اتاخر بنشر البارتات
...... ................
الجزء ١٢
بقلم ... رشا الاسدي
شكد ريحني كلام منار وانطاني طاقه ايجابي
ورجعتلي الثقة الي جنت فاقدته بنفسي ...
اجيه يوم زواج ابن الشيخ
وعزيز كلما يراسلني ياكد علي لازم اجي
وارد عليه .. لامااكدر اجي
او حسب الظروف
جان العرس يوم جمعه
بعد الغده .. بابا كلي صعدي حضري نفسج
هم يله لان الطريق بعيد
رزان تحب الاعراس اصرت تجي ويانا
حضرت ملابسها وصيت منار تهتم بيها
اني لبست فستان بنفسجي غامق
وشال يناسب الفستان
وحذاء عالي وجنطه صغيره اوف وايت
وخليج مكياج ولبست عدسات
دخلو منار ورزان للغرفه .. رزان لابسه بدله بيضه
وشعرها مفتوح
منار... ظلت تصفر .. لج شطاله
مسار اليوم تكسرين ع العروسه
هههه اووه لا تبالغين مو لهدرجه
والله شبيج .. هله هله اليوم شكفج من ذاك الرجال
ههههه ... يعني منار صدك طالعه حلوى
سالي المرايه وهي تجاوبج
طليت ع المرايه وابتسمت
مسار بابا يصيح عليج
يله رايحه .. بست منار ونزلت
صعدنا بالسياره ... بابا كلي هواي خاله مكياج لوجههج
بابا غير رايحن عرس قابل رايحه لفاتحه
اي بس انتي حلوى مايحتاج هلكد تخلين
اهووو بابا لا تضوجني تخليني اتندم لان اجيت وياك
يابه اسفين ست مسار .. نرجو المعذره بس اعصابج شوي
وصلنا للقريه ... بابا اتصل بالشيخ لان مانندل بيتهم
دز واحد من احفاده علينا
اجه صعد بالسياره وصلنا للبيت
البيت قصر جبير محاط بسياج عالي وحديقه جبيره كلش
فارشين بيها مدات طويله والشباب كلهم بالحديقه
واكو مضيف جبير كاعدين بيه الشيوخ والوجهاء والزلم الكبار
اني دخلوني من المطبخ
ست خنساء جانت تنتظرني بالباب
سلمت عليها ودخلتني وعرفتني ع ام فيصل وع مرت عزيز
سلمت عليهم
دخلنا للبيت ورزان وياي
صاله جبيره ... من دخلت الكل تباع عليه ويسالون هاي منين البت
دخونا بالدوانيه جانت العروسه كاعده بيها هي واهلها
العروسه واهلها ظلو بس يباعون عليه... كصوني كص
والجهال تارسين الدوانيه حته يشوفون العروسه
ماارتاحيت طلعت اني وست خنساء كعدنا بالصاله
طالباتي اجوي سلمو عليه
رزان انطلقت تلعب ويه البنات وكل شويه تروح يم العروسه
بس وصيتها لا تطلع برى تبقى بالبيت
كعدنا نسولف اني وخنساء عن الدوام
وتعرفني بالناس الموجودين هاي ام فلان وهاي ام فلانه
