#شهوة_حب💗5/الجزء الخامس
#زينه_الزنزونه@
...
المرحله هاي الدراسه كلش صعبه بالنسبه الي وواجهتني شغلات جديده بحساب كبرت شويه وبمرحلة المراهقه نفتحت عيني على مواضيع الحب والاعجاب من الاخرين وحسب كلام الكل كبرت وحلويت عن قبل
الحارس خليل چبير بالعمر ثلاثيني وجان بالحزب التابع للنظام ومربي شوارب وشكله يخوف وعرفت من البنات انه مصاحب ع المزاج وماكو وحده محدده يعني يختار اللي تعجبه ويقضي وياها وقت يقشمر البنات ويمل بسرعه منهن
اكو طالبه ويانه صف الثالث متوسط اسمها سناء حلوة طويله وسمرة وسافرة بدون حجاب سمعت من البنات انها بنهايه الدوام تحط مكياج وتتعدل وتروحله بغرفته اللي بداخل المدرسه وهواي كلام سمعته عنهم بين البنات وماركزت بي مااهتميت شعليه بيهم
بمرور الايام طلعت من المدرسه حيدر يتأخر بالرجعه لان دروس اضافيه عدة وانتظرة بباب المدرسه تقريبا ربع ساعه
سمعت صوت رجال بين البنات .. يبنيه يبنيه !
التفتت شفت الحارس خليل واكف شطوله وضخم رجفت گتله هاا ؟
هاي ورقه طاحت منج غمزلي وراح استغربت !
شنو الورقه !
منين طاحت !
التفتت وتلمست جنطتي مسدودة !
بقيتها بيدي
تمشيت لكدام وصل حيدر رحنا نتمشى ويسألني عن المدرسه والدروس علما وصلنه الف فكرة ببالي شنو هالورقه وشعده هذا !
دخلت لغرفتي بدلت ع السريع خفت ماما تدخل فتحت الورقه مكتوب كلام مقطع مثل الشعر الدارمي مافهمته ورقم تلفون ارضي گايل اتصلي ضروري
حفظت الرقم ومزكت الورقه ورحت للمطبخ غسلت وذبيتها بالزبل والرجفه بعظامي شسوي هسه اول مره يصير بيه هيج ومن منو !
من واحد شكبرة يمكن اضعاف عمري
ماما بقت تعاين ببوجهي
شبيج زنزون !
هاا ماما ماكو شي تعبانه بالمدرسه جعت ودخت
يمه اسم الله عليج حبيبتي فتحي الثلاجه طلعي عصير وفواكه
هاا .. اي اي هسه ماما لاتصيحولي ع العشه اريد ادرس عدي امتحان صعب باجر
اي ماما حبيبتي روحي عبير تساعدني
اخذت فواكه وعصير ورجعت لغرفتي وافكر باللي صار
هذا شكله يخوف وبعدين مو عدة سناء صاحبته شله بيه !
بقيت اگلب بالكتاب مالي خلك ادرس وكل شويه افتح باب الغرفة اراقب التلفون بالصاله مخلي ترددت اخابره يحسون عليه وخاصه بعد وجود عبير من تحصل مجال ويطلع فراس تستلم التلفون تخابر أهلها وأخواتها لاساعه ولاثنين شلون اخابرة هذا وشكلله !
واذا سمعوني شگول منو هذا !
ثاني يوم رحت للمدرسه وخايفه اشوفه بالباب يوكف كل يوم ياربي ماكو غير هالباب وشلون اغيب !
ماريد اغيب وافوت الدروس لو شتعذر كدام ماما اذا غبت !
نفس الشي من دخلت واكف بملابسه العسكريه وهيبته وعينه أكلتني بالنظرات ركضت للصف نور اجتي انتبهت لوجهي
شبيج زنزون وجهج اصفر !
نور فدوة هيج وهيج السالفه شسوي !
نور لطمت على خدها وبقت مستغربه
ونصحتني اشتكي عليه بالادارة
اني رفضت وحذرتها لان الموضوع اذا يكبر يوصل لاهلي وماما متخليني اداوم بعد وتبطلني أحسن شي السلام عنه واتجاهله ومااهتمله بلكي ييئس مني
بقيت اليوم كله ارجف حتى منتبهت لدروسي وشرح المدرسات
استمريت على هالحال اسبوع تقريبا وجمعه عطله وبالبيت الاوضاع عاديه ماكو شي جديد على الاكثر مفكرين يزوجون نبراس وماما مشغوله ويه خالاتي تتدورله عروس
الاسبوع الوراه داومت كوة ونفسيتي تعبانه قررت اواجهه واعرف منه شيريد مني
باثناء الدوام بالفرصه بدون ماابين لنور انتهزت فرصه ورحت يم غرفة الحارس خليل اللي جانت قريبه على باب المدرسه والادارة وصلت قريب منه
انتبهت سناء طلعت من الغرفه وتعدل بصدريتها وشعرها شافتني وكفت ووراهه طلع خليل يلعب بشورابه ويضحك اني رجعت خطوات ارتبكوا اثنينهم
افتريت ورحت امشي سريع المنظر مالهم يخزي متعجبه شلون محد كشفهم لحد هسه والادارة معقوله مامنتبهين !
لحكتني سناء وصاحت زينه.. زينه..
مشيت بسرعه قريب الصف لزمت ايدي
اوكفي زينه شبيج اني جنت يمه علمودج
شنو !
علمودي !
اي هوة دز عليه كلي البنيه عاجبتني واريدها ياريت تحجين وياهه
هه انتي شدا تحجين !
سحبت ايدي بس جانت اقوى مني وضغطت على زندي
سمعي لج خليل معجب بيج ترحيله بورة الدوام وتتفاهمين وياي بالتي هيه احسن ولا هو يتصرف وياج باسلوبه افتهمتي ؟
دفعتني وراحت وبقيت مذهوله
هاي شداتحجي !
شنو هالسفاله والحقارة واني شفتها بهالمنظر وطالعه من غرفته وتريدني اسوي مثلها !
التفتت شفت نور حضنتها سكتتني
اشش سمعت كلشي زينه ترة ذولي عصابه وحطوا عينهم عليج زينه سمعي كلامي واشتكي للادارة
لا نور فدوة اني اخابره وافتهم منه شيريد
لا زينه لا تتورطين ديري بالج منهم
مااعرف نور هسه كلام سناء دوخني مااعرف افكر
رجعنه للصف وكملت يومي بصعوبه
بقيت بالمدرسه ربع ساعه بالطلعه ماطلعت ماردت اوكف بالباب واشوفه لخليل طلعت ركض شفت حيدر لزمت أيده وارجف استغرب والطريق كله ساكته وعينه عليه بيها إسئله بس مكدرت اكول شي
بالبيت شكد حاولت احصل مجال واخابره من التلفون بالصاله مكدرت
مرت الايام وصادفت قريب الامتحانات الشفوية وحاولت بكد مااكدر اتجاهله لخليل رغم ما اكثر من مرة يحاول يشمر ورقه لو يذب حجي ماافهمه ويتحارش
لو يسوي حركات ويحجي بصوت عالي من امر من يمه
قلقني وأثر على مستواي بالدراسه وعلى الاكثر الخوف والرجفه تلزمني ارتبك من اوصل يمه بس احاول ماابين لاحد
بهالايام صادفت الاوضاع بالعراق كلش مخربطه وامريكا مهددة النظام واهلي خايفين كلش وقلقين بابا مشغل الاخبار والخطابات بس اني تفكيري وين چان ولا ببالي شي
بعدين صادفت احداث السقوط والدنيا انكلبت ببغداد ودخلوا الامريكان
المدارس انسدت والدوائر الحكوميه والفوضى بالشوارع والمظاهرات وشي تبوگ وشي تقتل والناس هجمت على الدوائر الحكوميه والحزبيين اللي اكثرهم انهزموا
بقينه ببيوتنا ماطلعنه كم يوم والكهرباء بدت تنقطع بشكل مزعج وعلى اساس نبراس يتزوج بس تأجلت الشغله وبابا عزل المحل ونقل بضاعته كلها بغرفه الضيوف والوضع مربك وكلش مو مطمن
... يتبع
ج/٥
أنت تقرأ
#شهوة_حب@
Romanceقصه حب حقيقيه زينه الزنزونه جميلة لم تحصل على حب حياتها الا بعد تضحيات وخسارة كبيرة
