#شهوة_حب@

شهوه_حب 2💗

#شهوةحب@٢ /الجزء الثاني
#زينه_الزنزونه /
..
أهلا بها مدرستي ..
أهلا بكل أخوتي ..
في عامنا الجديد .. كأننا في عيد
وكل عام نكبر .. وأن نجحنا نفخر
****
أبو فراس ..عيوني زهرتي گولي ..
حبيبي باچر أن شاء الله أخذ زينه للمدرسه اول يوم تتداوم بالصف الاول الابتدائي ..
أيي ..
خايفه خلدون ..
ليش !
البنيه حلوة وعليها العين و ..
أسكتي بروح ابوچ لتكملين ماكو داعي تقلقين وتقلقيني وياچ أن شاء الله ماكو شي
خلدون من حبلت بيها ماارتاحيت وطول السنين الراحت مداريتها اكثر من روحي
ماغابت عن عيني دقيقه ومتنام الا بحضني شلون ابقيها خمس ساعات وحدها
يابعد روحي يابعد قلبي يا ام فراس انتي كل ولدنه هيج سويتي بيه اول يوم مدرسه لو نسيتي؟
الله الحافظ لاتظلين بقلق نامي والصبح يصير خير ولاتنسين توصين المعلمات والمديرة عليها ....
سمعت كلامهم هذا واني نايمه بحضنها لماما
بابا بقه يطمنها ويهدئها لان كلش قلقه جانت ومتخوفه
حتى من راحوا اخواني لاول يوم بالمدرسه جانت متخوفه بس أني أكثر يمكن لأن بنت .. مااعرف .. المهم اني اللي أتذكره چنت فرحانه لان راح التقي ببنات بعمري واطلع للعالم الخارجي اللي انحرمت منه طول السنين السته الراحت وماما وبابا واخواني محاوطيني مثل الحرس الشخصي حتى من ننروح لاقاربنه اكثر شي بيت عمي ابو اركان نزورة ويزورنه ولخالاتي العب ويه بناتهم الاكبر من عمري يمشطولي ويسوولي تسريحات ويتعاركون عليه ويصبغون اضافري يعني الموديل مالهم چنت واستمتع بهالشي
الصبح رحنه للمدرسه لكيت ماما محضرة كلشي ملابسي وجنطتي وشرائط ابيض واحمر وحسيت نفسي فد شي مميز يالله ...طلعت غير شكل بملابس المدرسه والگصايب وجواريب الكشكش
ماما مرتبكه چانت حسيت بيها من لزمت ايدي أيدها ترجف وصلتني للمدرسه مسافه عن البيت تمشينه دخلت وياي وشفت البنات والمعلمات والترتيب مدرسه حلوة ونظيفه ونظاميه
الحدث بوقته مميز كلش وحضور بقى ببالي ماحسيت بخوف بالعكس تشويق ونشاط
ماما دخلتني بالصف ووصت الكل عليه گالتلي ماما زنزون ساعتين ثلاثه وارجعلج مو تخافين
ولا تتطلعين برة المدرسه
ووصت الكل سمعتها وراحت بس عينها مدمعه وتعاينلي
ماعرفت بوقتها ليش هيچ ماما سوت
تعرفت على البنات والمعلمه كلش حبابه وأسلوبها ناعم بحيث تعامل كل الطالبات مثل بناتها وتصفگ مرة وتغنيلنه مرة لخ
مر اول يوم بسرعه حتى مالحگت اطلع الاكل من الجنطه وأكله
أجت ماما نهايه الدوام وحضنتني بلهفه وبوستني كأنما سنه مشايفتني ورجعتني للبيت وبالبيت الكل فرحان بيه اخواني وبابا اللي جايبلي دفاتر والوان وشغلات حلوة جلادات ملونه واخواني جلدوا الكتب والدفاتر وحطوا لزكات كارتون بيها وحسيت نفسي صدگ أميرة وكل اللي يحيطون بيه مهتمين ومتعلقين بيه وحبهم اللي كلش واضح ومبالغ جان
مرت الايام والشهور ونجحت وطلعت الاولى وبابا كبس النتيجه وخلالها اطار وعلكها بغرفته واشترالي لعابه بوقتها لابسه بدله بيضه بيها مكينه وباتري وتغني وتتحرك واخواني هم كلهم نجحوا وبابا جابلهم هدايا
مشت حياتنه بشكل مرتب وطبيعي عال العال
بالعطله نطلع لاقربائنه وبابا ياخذنه بسيارته للمنتزه لو للزيارة بس اشتاقيت للمدرسه والمعلمه والبنات اللي بعمري وكل يوم اسال ماما شوكت ترجع المدرسه تجاوبني ماما دخيلج خليني مرتاحه متدرين شلون گلبي يرجف من ترحين لحد ما تجين
خلصت العطله وصرت صف ثاني وعشت احلى ايام وليالي وكبرت ونجحت سنه ورة سنه واخواني كبروا وفراس دخل كليه صيدله ونبراس كليه قانون واني خلصت السادس الابتدائي ونجحت للمتوسطه وفرحت كلش لان لبست الحجاب وحسيت نفسي كبرت ومعاملة الكل ونظرتهم تغيرت الي زاد حرصهم واهتمامهم وانفرضت عليه انظمه جديده يعني اي واحد يجي من ولد عمي لو ولد خالاتي البس الحجاب وممنوع الضحك والشقه وياهم وبدت ماما تعلمني على سوالف بنات كبار وتوصي بنات خالاتي يعلموني وبعطله نهايه السنه هواي اسمع من ماما تكوله لبابا خليها تتعلم شغلات الطبخ والبيت احسن الها من المدرسه ماريدها تكمل وماريد تطلع المدرسه المتوسطه بعيده واخاف عليها بقيت خايفه ماما تبطلني وخايفه من اللي ينتظرني بحياتي الجايه من اكبر لو فعلا اني كبرت وبلغت ومنتظرتني حياة جديدة وصعبه ...
....
يتبع ...
ج /٢