ماذنبي انا

الخامس عشر

#قصصي
#مدن_الاحزان
#ماذنبي_انا

سارة اتفقت ويه زينه متكول لاحد ان احمد رايح لفاديه بلكي الله ويقنعها
احمد..وصلت لتركيا ورحت للعنوان عرفت بيتهم حجزت بفندق وبتت ليلي اتقلب على جمر مشتاق الها موت وافكر ببنتي شلون شكلها شكد عمرها هسه .طلعت الصبح الهم للبيت شفت فاديه تمشي وتدفع عربانه بيها طفل وراحت باتجاه الشارع بقيت امشي وراها وصلت لحديقه وكعدت على مصطبه وانا اراقبها فكرت اروح احجي وياها بس خفت لا تظل تعيط وتسوي لي مصيبه .ظليت متردد بعدين كلت المواجهة اول وتالي راح تصير رحت يمها رفعت راسها شافتني وظلت صافنه بوجهي فتح عيونها كلها كامت تتنفس سريع ولزمت العربانه حسيتها خافت
اشرت لها بايدي اهدي ماراح ءاذيج  بس اريد اشوفها اريد اشوف شكل بنتي ظلت خايفه مني ولازمة العربانة بايديها الاثنين نزلت للعربانه وشفتها تخبل تشبه امها بس دبدوبه كلش خدودها سايحات كانت تباوع لي وتحرك ايديها ورجليها رفعت عيني لفاديه وكامت دموعي تنزل غصب عني شلتها وحضنتها وابجي واهمس بأذنها بابا لاتتركيني مثل اخوج والله قلبي مو متحمل بعد بقيت حاضنها ماشبعت من ريحتها كانت طفله تخبل دبدوبه وحلوة ايدها ينكرطن كرط التفتت لفاديه ..هاي نسخة منج
بقت تباوع لي بحقد .
تعالي كعدي ماراح ءاذيكم .كعدت ومبين عليها القلق
حقج تكرهيني وتخافين مني هو انا كاره نفسي .غلطت بحقج هواي بس هذه بنتي لاتحرميني منها وانت تعرفين مالي احد .
احجي لاتظلين ساكته
شحجي شكول
كولي اي شي
انت منين عرفت مكاني
سألت صار ٣ اشهر ادور عليج
وليش تدور
اشرت على بنتي وقلت روحي واشرت عليها وقلت قلبي وياج
دارت وجهها عني
فدوشتي والله ماراح ءاذيج بس لاتحرميني من بنتي
شنو سميتيها
فرح
فروحة انت فرحة قلب ابوج ..بقيت الاعبها والتفت لفاديه ولج هاي تخبل شلون ماريد احد يشوفها لايحسدوها
هههه والله ضحكتني سوالفك مثل بيبيتي تكول لبسيها خضرمة مال حسد
...اي لبسيها واقري المعوذات لو اكول لج لاتطلعيها من البيت
....ايييي هذا اللي تريدة مو اكول لك تحبسون المرة
باوعت  لها بمكر ورفعت حاجب وكلت.. المرة اللي نحبها نخاف عليها من الهوى الطاير ولو راحت لاخر الدنيا نتبعها  ونكلب الدنيا وناخذها وحتى لو تكول علينا شروكي هاي احنه هيج عشك الشروكي

فاديه.. ضحكت وكلت خلي استفزة ههه واذا تزوجت شلون
التفت لي بسرعه وعيونة تجدح .ولج تزوجتي ؟ والله ادفنج هنا
...عفيه عفيه ارجع لحقيقتك
...ولج احجي اخذتي من لاتكولين كرار احجي
...اي ابن عمي واولى بيه
...وعلي ادفنج وادفنه ..حطيت فروحة بالعربانه واجيت الها ...
....احجي صدك تزوجتي
...هزيت راسي. اي
....لزمتها من ايدها عصرتها ولج شلون شلون كدرتي تنامين بحضن غيري ولج انت الي
فادية....مو مالت احد انا انا ملك نفسي .تزوجتني مصلحة والمصلحة انتهت بعد ماظل طول عمري انتظرك وانت اصلآ تعرف احنه مو لبعض
...ولج انت الي .انا اول رجال تقرب لج شلون سمحتي لنفسج تكونين لغيري ..احجي شنو تزوجتي لو مخطوبه لو شنو
واقلب باصابيعها وين الحلقه ولج احجي
نكتت ايديها مني وصاحت ماعليك بيه اريد اعيش اريد ادرس اريد احب واتزوج عوفني بحالي عوفني
...فاديه لاتخبليني تزوجتي لو لا
...مو شغلك
...ولج شلون مو شغلي ريحي قلبي وجاوبيني
...ماتزوجت بس اذا لكيت الشخص اللي يدخل قلبي اتزوجة ومايهمني احد
احمد ...بويه كالت ماتزوجت لو ماي بارد طاح على قلبي .
جريت نفس وكلت لها قلبج الي رضيتي ولا مارضيتي واذا تردين تدرسين درسي ماعندي مانع تردين تحبين حبيني انا غيري لااا وعلي الرجال اللي يوصل حدج ادفنه بكاعه
فادية... شنو هي غصب
..اي عندنا احنة الشروكة غصب وخاف ببالج والله انا كنت ماريد شروكي لا عيني الشروكي من يريد وحدة ياخذها يعني ياخذها وهي اللي تحبه وهي الممنونة
ويله امشي رجعي لبيتكم ومرة ثانيه طلعي بجبه مو لابسه لي كوت وبنطرون احش رجليج حش اذا شفتج ببنطرون
فاديه.. ضجت منه اووي وانت شكو البس بكيفي واطب واطلع بكيفي
احمد...اخذت عربانه بنتي وكلت لهة ظلي انت هنا بكيفج كامت تركض وراي اوكف بنتي جيبها
وكفت كلت لها كدامي يله
وصلتها للبيت فتحت الباب شلت فرح وبستها باوعت لفاديه
طلعة ببنطرون ماكو بعد وبنتي ماتطلع لايحسدوها وكولي لابوج بليل امر لكم
بعد اكو اوامر
حاليآ ماكو بس من تصير اكول لج
عشتووو مصدك روحة اخذت منه فروحة همس باذني رجفني من تقرب لي
رجع لسانج المبشط
ضحكت من هيج كال وعفته ودخلت
بقى كلبي يرجف بين فرحانه بعصبيته من عرف تزوجت وبين خايفه ياخذ بنتي
بليل اجانه وابوي وجهة ثقيل تعذر منا وعاتب ابوي شلون ياخذنا ويطلع من العراق
عمي انت مو اخذت بنتك يعني تعرف معزة البنت شلون تحرمني من بنتي
عمي ماءامن عليهن يمك
عمي غلطت وتغيرت..وعد ما ءاذيكم ابد بس انتو رجعو للعراق
لاعمي مانرجع قدمنا ع اليو ان لجوء وبلكي الله يطلع
بقى احمد شويه يمنا وكال انا راح ابقى هنا ١٠ ايام ياريت تسمحولي اشبع من بنتي ووراها ارجع وما اضايقكم
بابا التفت علي اشرت له اي
عمي هاهي براحتك
طلع احمد ورحت نومت فروحة وكعدت اقلب بالفون
اجاني مسج ع الواتس ...والله كنت ميت وبشوفتج حييت
ضحكت عليه ...منين جبت رقمي
هههه جبت عنوانج بغير دوله بقت على رقمج
امممم
اي امممم...اكول عيني ام امممم  بنطرون بعد ماكو مو شفتي روحج بتركيا
لزكت بالبنطرون ترى عريض وفوكة كوت طويل عادي يعني
كلت لج ماكو يعني ماكو
وانت بصفتك شنو تتحكم
بصفتي احبج
اي تحبني مو انا احبك
لاتستعجلين راح تحبيني وتراسليني للصبح وتخابريني تبجين وتكولين مشتاقه لك تعال
هههههه والله مغرور
لا مو غرور ثقه
نفس الشي
لا واثق بحبي الج نظيف ونيتي صافيه وراح اوصل لقلبج
هههه الظاهر خيالك صار واسع ...قلبي قفلته وماريد احد بي غير بنتي
مو مشكله اكسر الباب وادخل بنتي بيه تستقبلني
فاديه..😂😂😂
ضحكي ضحكي ...تعاي صدك باسم من سميتي البنيه
باسمك مشيت معاملتها منا .اتصلت بصديقتي وابوها محامي رتبوها
يعني بنتي عندها جنسيه عراقيه
اي .رفضت اسجلها هنا بتركيا
ان شاء الله يجي يوم وترجع للعراق
لا ماترجع والله يخليك لاتخلف وعدك النا مرة ثانيه
ما اخلف