نغزة وردة
بقلم غزوان علي
البارت الثاتي عشر
نزار . راقبنا تحركات مجموعة الخلية وكانت سيارتين كان وقت خبشة وطلعنا في سيارات مدنية وبملابس مدنية كأننا عابرين سبيل دخلو بالبستان واحنا نزلنا نمشي وراهم عالاقدام زرعنا البستان بالقوات اني الي مجنوعة والسيد الامر مجموعة بس اني محترك قلبي على وسيم والسيد الامر يكول بهدوء المجموعة اشتبكت وياهم بالبداية بالسلاح الابيض ( السكاكين ) حتى لاينسمع صوت الاطلاقات بعدها صار الاشتباك كنت افتر خلف البيت حتى اعرف مكان وسيم شفت من الشباك واحد بيدة مسدس ويضرب اني ضربته طلقتين بسرعة شفته وكع وضليت اراقب كل واحد يتقرب من هاي الغرفة اضربة سمعت احد الابطال يقول تم تم رحت للغرفة ركض لكيت عمر مضروب طلقة براسة وميت وحسين متمدد كلبته لكيته عدل بس مغمى عليه انتبهت شفت وسيم متمدد وبنت فوكه حاضنته ووسيم يكول ساعدني نزار ريام متتحرك باوعت لريام الطلقة جايه باسفل الكتف ومغمى عليها وسمعت الامر يكول ليش قتلته نزار وكانت تعليماتي هو نلزمه والعداله تاخذ مجراها بعد التحقيق
نزار . سيدي اولا اني مااعرفه هذا منو وشفت بيده مسدس ويقتل المخطوفين وماكدرت اتحمل هذا المنظر بس سيدي ماعرفت هذا منو
الامر . هذا ابو قتادة مسؤول تنظيمات ديالى وصراحة والكلام بيننا اني لو شايفه بهيج حاله كان هم قتلته مثل ماقتلت ابو عائشة ومن معة
نزار شفت كل الدواعش مقتولين وعددهم كثير بس باقي واحد منهم وملثم اني بطبيعتي مجرم بيهم اجيت اقتله بس الامر لزمني كال شدسوي كتله عليمن باقي هذا نقتله حاله حالهم ابتسم الامر وكال هذا المصدر الي كان يوصل المعلومات اني استغربت كال لتستغرب ماتسمع مرات بالاخبار جماعة ينخطفون وبنفس اليوم يتحررون وينلزمون الخاطفين كتله نعم سيدي اسمع كال مرات يكون النه مصدر بداخلهم مثل هذا البطل ومثل الشهيد البطل عمر
وسيم . من حسيت ثقل ريام واني لازمهه عرفت الطلقة اجت بيها واغمى عليها لان جان حلكهه بأذني من حاضنتني واسمع انفاسها نزلت بالارض وبقيت حاضنها لحد متخلص الهوسة اصوات طلقات ودخان منظر مخيف اباوع لعمر تأكدت مات لان الطلقه براسة وشفت حسين باقي على نومته من الضربة تلمست جسم ريام اريد اعرف وين انضربت راسها مابي شي رقبتها ونزلت اسفل الكتف حسيت بحرارة الدم وكبست جف ايدي عليه يعني لوما حاضنتني ريام جان الطلقة اجت بقلبي
غزوان . مو كتلك وسيم حظك حظ مياسين الزركة ماصدكت هههه
وسيم . غزوان عوفني اكمل القصة لاابطل واسلمك للمتابعين ينطوك للدواعش وهمه عيني شلون حاقدين عليك لان تتأخر بنشر القصة
وسيم . يعني ريام ضحت بنفسها على مودي لعد شكد تحبني ماحسيت غير ابجي وابوس بريام وشلتهه بحضني واركض مثل المجنون للسيارة شفت سيارة اسعاف طلعت فرقة المداهمه جايبينها وياهم لأي طارئ يصيب جنودهم
اخذو ريام نيموهه عالسدية وكلش خايف عليهه حاضنهه وجهي بركبتهه ولحضهه حلكي يم حلكهه حتى اعرف بعدهه تتنفس واجت بتفكيري كل الحظات العشتهه وياها وشلون تخاف وتحرص عليه وشلون جانت مهتمه بي وشلون دنكت على حذائي تمسحهه من التراب مااعرف شلون صحت بصوت عالي اااخ ريام لتموتين لتموتين بلحظة حبي الج اريييدج اريد اسمعج كلمة كلمة احبج اصحي حبيبتييي اكعديييي
نزار . اني كاعد بالسيارة يم وسيم واسمع كلامه بجيت متحملت معقوووله معقوله هذا وسيم المغرور ابو خشم اليابس والمتكبر هيج يصير هيج يبجي مثل الطفل صدك لو كالو الحب شو بيذل كمت اجر بيه ولك وسيم كافي شبيك تخبلت يكولي اسكت نزار اسكت انته متعرف شي وسكت وسيم احرك بيه يمعود شبيك وسييم وسيم ماكو حس ولانفس
ابو صالح . جنت سهران ماجاني نوم وكاتلني القهر على وسيم وريام وعلى ابن اخي عمر وابنه حسين والافكار تروح وتجي محسيت غير نمت واسمع موبايلي يدك انتبهت هذا نزار رديت عليه ها نزار بشر اكو خبر منهم سمعته يكول ابشرك عمو وسيم هذا يمي بالمستشفى مابي شي بس اغمى عليه انهيار عصبي وريام هم هنا ومصوبه وان شاء الله مابيها شي وحسين هم بخير ويم الامر بس عمر استشهد بالحظات الاخيرة . اخذت عنوان المستشفى واني حالي صعب كوه اشيل نفسي ماادري افرح لسلامة وسيم وريام وحسين ماادري احزن على عمر باوعت ماشفت ام صالح رحت لكيتها بالمطبخ تبجي كلتلهه لتبجين وسيم زين مابي شي وهسة بالمستشفى وهاي النوب فزت يمه شبيه بالمستشفه كلتلها وي ريام مصوبه وحسين هم جابوه وعدل مابي شي بس عمر كاتلينه ولاتكولين لعلياء رجلج مكتول كعديلي صالح
صالح اني نايم وسمعت الحجية تهز بي و تصيح يمه صالح اكعد وسيم رجع ومابي شي وحجتلي التفاصيل اني طرت من الفرحة مااعرف شسوي اتصلت بسرعة ب ايام ايام صباح النور صالح . اكولج ايام وسيم وريام رجعوهم وهسة بالمستشفى رايحين اني والحجي الهم
ابو صالح دتصل ب ابو احمد وميرد اجه صالح كال حجي عوف الاتصال اني اتصلت ب ايام وفهمتهه اكيد حتكوله
صالح . كان وقت الصبح وصلت للمستشفى والطبيب يكول مابي شي انهيار عصبي وتعب انطيناه علاج ومنوم حتى يرتاح ادخلو يمه بس بهدوء لو سمحتوا شفت الحجي نام على وسيم ويبوس بوجهه وركبته وحتى بديه اووف دوخر ياحجي خلي هم اخذ حصة من وسيم وهم بوسته وحظنته وبجيت عليه ابد مجنت اتوقع اشوفه هيج طلعت ردت اشوف ايام وصلت باوعت شفتهه رحت سلمت وكلتلهه ها شلون ريام ووين كالت يكولون توهه طلعوهه من العمليات ودخلوها بالردهه وميقبلون احد يدخل بعد ساعة ساعتين
علياء . من شفت ابني حسين حسيت بروحي اجيت اخرب بس حاضنته واشم بيه وابجي ماصدكت اشوفك بعد يايمه شصاير بيك سوده عليه مااريد افاركة
ابو صالح . بابا هذا حسين جبته الج بس راح اكول شي اتمنى تتفهميني بنتي
علياء . شنو حجي احجي خليت بالي
ابو صالح . اليوم الصبح من جابو حسين جابو ابوه وياه بس للاسف ابوه جابوه شهيد
علياء . من سمعت هيج انهاريت واكمت اعيط حيل وادك على صدر الحجي وابجي واكول ادري جنت ادري ينكتل من شفته صار وي الدواعش وكل داعشي هيج نهايته ليش عمر ليش هيج تموت وتموت خاين اااه النار البيه شسوي بروحي ماادري
ابو صالح . اهدأي بنتي عمر بطل من ابطال العراق ورفع راسي وراسكم انتي وابنج عمر ماجان داعشي بس جان منخرط وي الدواعش ويوصل اخبار لجيشنا وتحررت هواي مناطق من وراه وكتل هواي منهم ومن حسو بيه كتلوه
علياء من سمعت الحجي هيج يكول افتخرت بعمر وانهاريت بالبجي يعني المرة من تسمع رجلها ميت شتسوي وشنو بيدها غير اللطم والبجي .. يتبع
