رغم أنوفهم

الجزء 15

وصلن لقن البيت ملان نسوان

سلمت عليهن كل واحدة بتشاغل فيها بطريقة الخاصة

وهي نفسها تكورك فيهن بس مافي طريقة

حنان من رد بتها للناس نادتا بعيد من النسوان طلبت منها تفرد وشها شوية قدام الناس شذى قالت ليها :

_أنا طالعة أصلا ما ناقصة أسئلتن الكتيرة دي

وبعدين هسي لامة الدنيا كلها لشنو مش كنت ما موافقة ما كان تستقبيلهم أقلو نخلص من القصة دي.

_القصة دي بديتها أنتِ وأبوكِ مخيرين فيها وأنا ما بخلي بيتي فاضي في فرحة بتي البكر

الناس تقول علي شنو?

_طيب أنا طالعة مع صافي لحدي ما تخلص المسرحية دي بجي راجعة ..

_مش ملاحظة طلعاتك بقت كتيرة الفترة دي أقعدي لحدي ما يصلوا الناس ديل ..

إنتهى اليوم أهل أسعد ما وصلوا نسوان الجيران زهجن قالن بجن راجعت لمو يصلوا , أخواتها فضلن معاها لحدي ما الناس جوا..

شذى بهناك قاعدة قلقانة خايفة علي ينفذ الفي راسو

وهو قافل تلفون رجع البيت منتظر أمو تجي راجعة من العيادة عشان يتكلم معاها

جات بعد الساعة 11 طلب يتكلم معاها في موضوع قالت ليه تعبانة حاليا عايزة تنوم الصباح بتتكلم معاه في اي شي هو عايزو

وهي ماشة على غرفتا وقف نادها قال ليها :

_لمتين ح تفضلي تهربي من أي حاجة بتخصني ? بعرف الصباح برضو بتقولي لي المساء من عمري سبعة سنوات بتتصرفي معاي بنفس الطريقة دي المهم ما آخد من زمنك كتير أنا ناوي أخطب وأتزوج للعلم يعني تصبحي على خير..

جات نازلة بسرعة تعرف دي منو الناوية يخطبها دي

كل همها ما يجيب ليها واحدة عادية تسكن معاها وهي أصلا كانت قبل فترة فتحت مع أخوها " خالد " الفي كندا موضوع خطوبة علي على بتو الكبير

" ريما " بتعرف إنهم أصحاب شديد وشافت هي المناسبة ليها هي قبل ما علي..

سألتو كم سؤال ورا بعض وهو واقف يعاين بعد خلصت قال ليها :

_ إسمها شذى مهندسة من أسرة عادية جدا هي أكبر أخوانها كل تفاصيل البيت في راسها واليوم جايبين شنطتا كمان والعرس بعد شهر تاني في شي..

بقت ضحكت شديد ختت يدها في كتف وهي بتقول :

_لا أنت شكلك بتهظر بت فيها كل دا وعندك نفس تسلم عليها لا وكمان تكون زوجة ولدي ..

_ولدك ..

_ماتفتح السيرة دي وتصبح على خير..

دخلت غرفتا وهو طلع يلاقي أصحابوا..

صافي كانت من فترة عايزة تحكي لي شذى الحاجات المخفية وهي ما بتعرفها عن علي , لكنها قالت تتكلم مع علي يحكي ليها براهو ودا الأفضل بالنسبة للكل ..

يتبع.....