ضحية حب💔

الحلقة الثالثة

فراس(شبح لوسام ونزل عيونه وتنهد بضيق)
وسام(حط ايده ع كتف فراس) احكي ماادس عليا شي وسرك في بير
فراس:انا نحب هبة بنت عمتي
وسام:اووو احسنت الاختيار بس خيرك مضايق هي تعرف
فراس:لالا ماتعرفش والباين تكرهني للدم
وسام:احكي ياراجل فضفض ماتخلي في قلبك شي
فراس حكى لوسام كل شي من اول ماحب هبة الى موقف اليوم
فراس: وهو هدا اللي صار معايا
وسام:كلامك صح بس المفروض فهمت منها قبل
فراس(بعصبية)تي نقولك شاد ايدها ويقوللها نحبك وهي عاجبها الجو وتقولي مادخلكش فيا وماعاد نبي نشوف وجهك تي انا كلمتها هادي رقتهالي تي انا نحبها اكثر من روحي 4 سنين وانا عااايش على اوهااامها وتجي هي تقولي مانبي نشوفك والله لمصلحتها الزفت
وسام:اااه منها هي التانية والله قصتك عويصة لكن ماتعدل على شي وفوت الموضوع تو يحلها ربي ح تلقى حل
فراس(نزل راسه على ايديه وسكت)
وسام:هي امالا سلامتك انا مروح ورد بالك ع روحك
فراس(شافله وابتسم)منور يا قدر كان مش انت راه اطربقت من كتر ما مكدس ف قلبي
وسام(يفكر) امممم ولا تعرف شني بايت معاك مش قادر نخليك في هالحالة
فراس: على راحتك بس ماتنشغلش عليا واجد
وسام:شن رايك نكلموا الشباب  نمشوا نتعشوا ع البحر ومنها تغير جوك
فراس:بروا انتم انا مش ماشي
وسام:والله بتمشي انت اول واحد ع خاطرك هي المشية
فراس:به به نظم امورك
وكلموا لولاد واتفقوا انهم بيمشوا
________________
عزام يفكر في مصيبة يكسر بيها راس فراس ويندمه ع اللي داره معاه
________________
لؤي: اميرة يا اميرة
اميرة:تي هاا خيرك تعيط
لؤي:بنقولك بنمشي للبحر يوووت
اميرة:حييي مع من بتمشي يابارد
لؤي:مع لولاد
اميرة:بليييز لولي نمشي معاكم اني ولبنات بلييز
لؤي:تمشي عينك مرة اخرى توا نبو بروحنا
اميرة:باهي اقلب وجهك تو نكلمهم يجو يياتو
لؤي:دبري راسك هي سلام(وطلع)
اميرة(مشت تجري تتصل بريهام)
اميرة:الو رهومة شن الجو
ريهام:تمام وانتي
اميرة:مية مية بنقولك راكم بتجوني تباتوا لولاد مدايرين جو ع البحر قلت خل اناديكم
ريهام:الله سعودهم
اميرة:المهم هي نراجي فيكم وباللهي كملي الباقي عنديش رصيد
ريهام:اوكي هي باي
ناضت اميرة وتت فراشات في الصالة الفوقية وهلبا مخاد وولعت التلفزيون وقالت للخدامة وتيلي كل شي ومشت بدلت ولبست بيجاما وتكمت امورها
________________

عند لولاد خدوا حوت ويشووا وجايبين معاهم العود باش يعزفوا عليه
لؤي:تي هيا انتم جعان راني
هيثم:تي اسكت وانت مرعوش ولا تعالى اشوي انت
لؤي:هاه سكتت
شوية وطاب الحوت وتعشوا وشد سامي العود
سامي:ها شن نغنيلكم
وسام:اي شي بس نبو عربي مش تركي
هيثم:غنيلنا ياهوى روح وقلو
لؤي:اي اي هي
وسام:احم احم(وبدا يعزف:ياهوى روح وقلو قلو كثير اشتقتلو لو بدو عمري كلو بعطي لما ياحبي تردو رح كمل عمري حدو نار بطفيلو بردو ودفيه ردو ياهوى لعندي قصرلي المسافات حامل بايدي وردة اهات ودكريات حبيبي يلي بحبو قلبي معلق بقلبو وعم بحلم فييييه)
هيثم(يصفر)واااو انت ياملك الاحساس
لؤي:ابداااااع
سامي:احم راكم تاخدوني بعين تحرك من مكانك انت وهو
لؤي:هي دوري انا
وسام:اسكت علاش تحشم ف روحك ياراجل... غني يافيرو صوتك حلو
فراس كان مش معاهم بكل كان يتقطع من داخل واجعه حاله وهبة اللي تكرهه مش حاس بشي الا لما انحطت ايد ع كتفه:اه خيرك
لؤي:انت اللي خيرك مش معانا
فراس:اااا لالا معاكم غير راسي يوجع فيا بس
وسام(يبي يغير الموضوع)غريبة الفرخات مالصقوش فينا يجو معانا
لؤي:هههههه اميرة مدايرتلهم استدعاء بايتات معاها
هيثم:تفكروا بشن نفكر
وسام:ولو يانصي فاهمين بعضنا احنا
سامي:هالمرة بنغامر معاكم سادني دور العاقل ههههه
لؤي:هي نوضوا الفزعة
وناضوا ضموا دنيتهم وانطلاق للبنات
عند البنات مقعمزات ويتفرجوا ع فيلم رعب وياكلوا في فشار ودنيا قدامهم
هبة(خايفة)يابنات طفوه صحة نخاااف
ريهام:اسكتي كلنا نخافوا غير اسكتي .. حي حي شوفوا
اميرة:وااااي حتى الحوش فاضي ماما وبابا مهناش بروحنا راه
هديل:خلاص ماعاد تزيدينا على مابينا
شوية هكي بدو يسمعوا في صوت الباب ينفتح
اميرة(ترعش) سمعتوا حاجة وله
ريهام(لوحت الفشار وبدت تبكي)يا ماما هدا جن ووووه
هبة:تعالوا نشوفوا شن في
اميرة:خودوا احتياطاتكم
ناضوا لبنات خدوا طاجين ومغرافة ومخاد زعميتك بيدافعوا ع رواحهم
هديل(بصوت يرعش)اني معش قادرة في صوت حد يمشي
اميرة(تبكي وشادة ف ريهام)
هبة:تكلموا بالشوية
لؤي(خش للحوش هو وسامي من الباب الخلفي)وينهم هادو
سامي:مرات في الكوجينة تعالى
وسام(والباقي خشوا من الباب الرئيسي)هههه خل نفصلوا ضي الكوجينة صوتهم فيها
ومشوا تلاقوا مع سامي ولؤي
هيثم:هي تعالوا للكوجينة هما غادي وانت وسام افصل الكوجينة بس
وسام:هههه به هي
هديل:تعالوا شدوا في بعض
هبة(تبكي بالعبرة)هي تعالووو
وشدوا في بعض وفجأة يفصل الضي
اميرة(ترعش)ياماما حي علينا شن بنديروا
خشوا لولاد للكوجينة وماسكين ضحكتهم وسمعوهم يحكوا
سامي(بدا يدير في اصوات)
هيثم(يضرب ع الطاولة)
لؤي(يهمس بكلام مش مفهوم عشان يخافوا)
هديل(تبكي بقوة)سمعتوا الصوت حي ووك وينكم يابنات
هبة(كانت واقفة جنب الباب متاع الكوجينة)يا بنات نحس في حاجة تتحرك بحدايا
ويديروا لولاد صوت عالي ويعيطوا لبنات باعلى حسهم
هبة(مشت تجري اضبطت اول شخص لقاته وتحسابه هديل) هدييييل ياحمارة معش تخليني
هديل(حاضنه شخص ع بالها ريهام) ريهام وين هبة واميرة
هبة:تي هاني حاضنانك يامختشة
هديل:اخرطي اني ف حضن ريهام
ريهام:عينك اني جنب الروشن واقفة
هبة(تبكي )مالا هدا من
ويولع وسام الضي