نص ساعه بالضبط وصلت البيت زهجانه واخلاقي في نخرتي ، خاشه من باب الصالون
القي ليكم في وشي هند و هنادي ماسكين اضنين بعض و يتودودن من شافوني قطعو الحركة ، بيني و بينكم انا متألمة للحاصل دا من المفترض ديل اخواتي يكونو اقرب اتنين لي قلت بيني و بين نفسي يا بت يا مياسم امشي عليهم و اتونسي معاهم يمكن اقدر اقرب ليهم و ابعدهم من الغلط ، دخلت قلت ليهم سلام ، كل وحدة لوت بوزا بأتجاه ، قلت ليهم السلام لي الله نفس الشي وحدة عبرتني مافي ، قلتا اخير ما اتمادا معاهم احسن من تقلب شكله و بدر منتظر مني اتصال ، مشيت من جمبهم علي امي اطمنت عليها شكلها مرهقه و يوم عن يوم بقيت خايفه عليها عندي امل في ربنا انها تتعافي رغم العلاجات الغاليه منها القدرت اوفرا و في الما قدرت اجيب منها شريط واحد ، المهم مشيت استحميت و صليت العصر و غيرتا و طلعت الحوش اتصلت علي بدر قفل فيني و رجع لي هو ،، الوووو ميوس
اهلييبن بدر البدور ، اخبارك
تمام بس صوتك دا ما مطمني ، هههه متين لحقت تسمع صوتي ياداب بنقول يا هادي ، شفتي كمان من ضحكتك الصفرة دي كدا اتاكدت من احساسي مالك في شنو احكي لي ، قلت ليك ماف حاجه يا بدر
ميس وحات امي الغاليه فيك شي ...
لسه بتكلم معاي جاتني هنادي خطفت مني التلفون قالت لي بتتكلمي مع منو ، هنادي جيبي التلفون دا ، مسكت التلفون ردت عليهو قالت ليهو الووو " بي دلع " قاليها اديني ميس لو سمحتي ، انا الدم وصل لي راسي و لذيتا شلت تلفوني ، قلت ليها انا ما بسالك بتتكلمي مع منو ولا بتمرقي مع منو ، اسي جنك ما يركبك و تعملي فيها اختي الكبيرة و لو سمحتي زحي من وشي ، عاينت للتلفون وقفلت الخط ،، فجاه مسكتني خنقتني بقوة اقسم بالله كأني عدوها و ما قادرة اقاوما بلذ فيها و ما عندي قوة زيها بقيت بحاول لمن لذيتا برجلي ، قلت ليها انا نفسي افهم انا كاتله ليكم رقبه كان انتي و لا اختك في شنو عدوتكم انا ، قالت لي اختي بي وووين يا بت الحرام ما معروف اصلك من فصلك كلاما نزل علي زي الصاقعه قعدت في الواطه دي و ببكي ، انتي وهنادي كل مرة بتقولو لي كدا ليه ياخ انا عملت ليكم شنووو
مشت خلتني دخلت لامي لقيتا عرقانه بقيت بمسح ليها في العرق و جسمها دا بس نار الله الموقدة حاولتا سندتها طلعتها قعدتها في العنقريب الفي الحوش بنادي يا هند و يا هنادي كالعاده ما عبروني عشان يساعدوني ، اتصلت علي بدر دا بعد لقيت منو اكتر من 15 مكالمة قلت ليهو بدر حصلني امي دي جسمها مولع و بترجف (بدر دكتور باطنة) لكن لسه م معتمد بس مع الترينقات خبرتو ماشاءالله ، قال لي لحظات واكون عندك بس اعملي ليها كمادات بارده لمن اجي قفلت منو مسكت امي طلعت ليها ملابسا مبلوله من العرق ، جبت البشكير و طلعت ليها غيار و امي دي تهضرب ما فاهماها بتقول في شنو ، مشيت جبت المويه و بقيت مقعداها ف العنقريب و برطب ليها جسما اخر شي حميتا بي مويه و بشكرتها ، اتصل لي بدر قال لي انا جمب الباب قلت ليهو خش علي الحوش و ما تشتغل بالبجم البرا ديل ، لبستها جلباب سريع و رقدتها لحد ما جا بدر قاس ليها الضغط و السكر كلو تمام بس شكلو التهاب ، قعدنا نسوي ليها كمادات لحد ما جسمها برد شويه بقينا قاعدين جمبها ، و هند و هنادي جو من شافو بدر بقو يتطاقشو زي البقر في بعض و عيونهم دي زي الشرار
