بقيت بصرررخ بأعلا حسي ، لمن غمرتا و البيت كلو ملموم فوق راسي ، فتحت بقيت بهضرب بقول العروسه ، العروسه وينا ؟
نوال امها لي سبأ قالت لي حبيبتي روقي خلاص هي بعيدة منك وحضنتني ،
سبا قالت لي تتذكري يوم قلت ليكي حمشي مع اختي الدكتور و سالتيني مالها قلت ليكي قصه طويله ؟ قلت ليها ايوة متذكرة
قالت لي اختي دي بتعاني من توحد ، في يوم ابوي ساقهم هي واختي عشان يجيبو لينا عشا بالعربيه بفسحهم ، قلت ليها هي ومنو ؟
قالت لي توام مناسك ، قلت ليها اها
خالتو نوال كملت ، قالت لي دا اليوم المشؤم يا بتي حصلت ليهم حادثة في الطريق العام و الاسعاف لمن حصلهم ما لقي غير مناسك وابوها . قلت ليها كيف يعني ؟ قالت لي بعد جرجرة عرفنا ان بتي التانيه ضاعت من الخلعه بتاعت الحادث اظن طلعت من العربيه ومشت ، سنه كامله بنفتش فيها ما خلينا مكان م فتشناهو ، والعروسه دي مع مناسك بتي من صغرهم ابوها اشتراهم اتنين ليها هي واختها ، دموعي ديل جروووو
قلت ليها عارفه ، انا من وعيت علي الدنيا دي بشوف العروسه دي في احلامي و بخش بعدها في حاله نفسية ، حضنتني شديد قالت لي خايفه اتعشم واقول بتي و يطلع احساسي غلط لالا انا ما حتأمل و بقت تبكي مشت مني ورجعت حضنتني قالت لي لكن قلب الام بقول انك بتي و حتي لو ما بتي انتي من اللحظة دي بتي و تبكي وانا ابكي ، و ناس عم الامين مستغربين علي مخلوعين و مريم دي قرفانه مني عديل ، اصبحنا الصباح قلت لخاله نوال الا نعمل تحليل Dna عسان نفسيتي ترتاح اصريت علي راي و انحنا لو توام انا ومناسك ليه ما بنتشابه ؟ قالت لي من صغركم م كنتو بتتعرفو توام الا لمن اطقم ليكم ، بقيت ببكي وفرحتا شديد و عندي كدا اخواني اتنين اولاد رجعو قطر م اتعرفت بيهم ، و سبا فرحانه بي فرح شديد ، قلت لسبا البسي تعالي معاي مشوار ، قالت لي وين ؟ قلت ليها بس ارح قالت لي تمام
لبسنا ومشينا بيت عم الامين ، فتحت لي مريم طبعا ما طايقه خلقتي ، سلمنا عليها سلمت علي سبا وانا اتجاهلتني ، قلت خير م مشكله ، قلت ليها معليش عايزة هاني و هشام ممكن تناديهم ، نادتهم جا هاني و قالب وشو مني ، قلت ليهو ينفع نتكلم ؟
قال لي اتكلمي ، قلت ليهو هنا ما بينفع ممكن نطلع الحديقه . قال لي اتفضلي ، طلعنا مجرد م قعدنا قال لي ورقتك بكرة حتوصلك ، قلت ليهو شوف انا ما جيت عشان ورقتي ، جيت عشان انا حتي لو كنت لقيطه ف يوم ، الا اني بنت اصول ومحترمة و كوني اثبت لانسان برأتي دي ما بتحصل مني ، لكن كونك كنت زوجي وعاقد علي من حقي ابرر موقفي وكل المطلوب منك تسمع ،، فتحت التسجيل ،، ااي تسجيل
* فلاش باك *
لمن مشيت لعماد لاقيتو و بقبت بجرجرو ف الكلام كنت متعمدة عشان اوقعو وانا كمان اخد حقي منو كل حرف قالو سجلتو ...
هاني سمع التسجيل و وشو جاب ستين لون باختصار لقا الاجووبه علي كل حاجه كان عايز يعرفا ، قمت خليتو و مشيت الصالون لهشام و سبا ، مريم دايرة تمشي ، قلت ليها تعالي لحظات ، جات قعدت و ابتديت احكي الحصل من البداية، قعدت تضحك قالت لي كذابه قلت ليها الدليل علي صحه كلامي كان سمعتيهو حيجرحك وانا للان مراعيه شعورك ، فتحتو و سمعتهم ، حتي سبا اتخلعت م كانت متخيله اني ممكن اعمل كدا .. مريم اعتزرت لي قلت ليها م بينا اعتذار ي بت عمي ، شلت التسجيل نسختو في فلاشه و مشيت بلغت عنو انو مغتصبني و مهددني و فعلا اتسجن ، و بعدها بتلاته شهور انا اتنازلت عشان عم سليمان ، و كنت مصممة علي التحليل و فعلا النتيجه طلعت ايجابيه و بعد معاناة دامت 22 سنة لقيت اهلي ، ابوي "محمد" كان بسافر عشان كان حاسي بتأنيب الضمير في كل السنوات الفاتو ديل سواء كنت ميتة او ضايعه كان بلوم في نفسو رغم ان امي زيها زي اي ام ما لامتو و لا انبتو ،انا بقيت ماسكة قرايتي و ماسكة شغل ابوي و قررنا نكبر الشركة ، في فترة في الشركة كنا منزلين اعلان وظائف شاغرة ، اتخيلو الجا منو شركتنا عشان يقدم لي وظيفه ؟ محمد عثمان اكيد عرفتوهو انا من شفتو مسكتني ضخكة غريبه ، ما عارفه ربنا برجع الناس ديل في حياتي عسان يعوضني و احسسهم بنفس الالم الحسسوني ليهو ولا عشان شنو ، لكن في كل المواقف كنت احسن و رغم اني قلت لهشام نقبل الملف بتاعو بس محمد رفض ، اما وجدان ام مزن طبعا كدا بقت صحبه امي و ابوي صاحب عم سليمان و انا البت الشتموني و اهانوني في بيتهم ، بس للمرة الالف حكون انا الاحسن و ما جبت لامي سيرو بكلام خاله وجدان ، حاولو يتقربو مني وحتي عماد بعد المدة الاتحبسا و اتاكد من اهلي جاني قال لي مستعد اصلح غلطتي و اتزوجك ، قلت ليهو يااااااخي
قال لي ايوة انا غلطت ولازم اتحمل غلطي ، قلت ليهو انا دايرة اتزوج راجل انت علاقتك شنو بالموضوع ، حمر لي واداني عين و فات ، اما انا و بنات عمي اكتر من اخوات يوميااً مع بعض حتى مناسك اختي ابتدت تستجيب للعلاج حمدلله .
، تتزكرو احمد بتاع العربيه بقي صحبي شديد و طوالي معاي وخطب ابتهال بتم عمي بما انو الناس البتخش حياتي بتلصق فيها طبيعي هههه ، و بدر ومزن اتزوجو واتطلقو و طبعا بدر عرف قدر شنو هو ظلمني و خسرني ، وسبا وهشام لسه مخطوبين ،، و عرفت ان هند و هنادي مشو لاهلهم في حته اسمها سنجا و وحدة فيهم اتزوجت لكن م عرفتا منو ..
في يوم جمعه قاعده في حديقه بيتنا ، جا هاني بالجلابيه ، قال لي جمعه مباركة ، قلت ليهو تتبارك ،قال لي شوفي قدامك حلين يا توافقي و نعمل عرسنا بالذوق يا اما اخطفك و اضيعك من اهلك تاني ولا من شاف ولا من دري 😹 قلت ليهو قول اغسسسم
قال لي اوغسسم وابصم ، اذن م بحتاج الخطف بالذوق كدا ربنا يتم لينا علي خير 🙈قال لي كذااااااابه يا ميس فرح فرح ما عادي اخيراً وافقت نرجع لاني بالجد بحبو شديد و ما ساب يدي في اسوأ حالاتي ..
الخلاصه*
عايزاكي تحمدي ربنا علي نعمة اهلك علي نعمه اخوانك علي نعمه بيتكم حتي لو كان عشه حتي لو كان راكوووبه ، ف الاخر حالك احسن من حال غيرك ، ومهما كنتي في حال معسر م تضعفي ايمانك الجواكي دا بخليكي قويه ❤️
النهايه ~ بقلم /سحر سمير
بتمني تكون نالت استحسانكم
